„საჯარო სამართლის იურიდიული პირის - საპენსიო სააგენტოს 2018 წლის ანგარიშგების აუდიტის განმახორციელებელი დამოუკიდებელი აუდიტორის შესარჩევი საკონკურსო კომისიის შემადგენლობის დამტკიცების შესახებ“

საფინანსო-საბიუჯეტო კომიტეტი 2-1952/19 11-02-2019 საქართველოს პარლამენტის საორგანიზაციო დეპარტამენტის უფროსს ქალბატონ ეთერ სვიანაიძეს ქალბატონო ეთერ, საქართველოს პარლამენტის რეგლამენტის შესაბამისად, გიგზავნით საქართველოს პარლამენტის დადგენილების პროექტს: „საჯარო სამართლის იურიდიული პირის საპენსიო სააგენტოს 2018 წლის ფინანსური ანგარიშგების განმახორციელებელი დამოუკიდებელი აუდიტორის შესარჩევი საკონკურსო კომისიის შემადგენლობის დამტკიცების შესახებ“. გთხოვთ მისცეთ შესაბამისი მსვლელობა. დანართი: დადგენილების პროექტი 1 ფურცელზე; პატივისცემით, კომიტეტის თავმჯდომარის პირველი მოადგილე პაატა კვიჟინაძე თბილისი 0114, რუსთაველის გამზირი # 8, საქართველოს პარლამენტის სასახლე ტელეფონი: (995 32) 2281679. ელ. ფოსტა: contact@parliament.ge

პროექტი საქართველოს პარლამენტის დადგენილება საჯარო სამართლის იურიდიული პირის საპენსიო სააგენტოს 2018 წლის ანგარიშგების აუდიტის განმახორციელებელი დამოუკიდებელი აუდიტორის შესარჩევი საკონკურსო კომისიის შემადგენლობის დამტკიცების შესახებ საქართველოს პარლამენტი ადგენს: 1. „დაგროვებითი პენსიის შესახებ“ საქართველოს კანონის მე-19 მუხლის პირველი პუნქტის ა) ქვეპუნქტის, „საქართველოს პარლამენტის რეგლამენტის“ 167-ე მუხლის მე-3 და მე-4 პუნქტების, 166-ე მუხლის მე-10 და მე-12 პუნქტებისა და საქართველოს პარლამენტის საფინანსო-საბიუჯეტო კომიტეტის წარდგინების (№2-1475/19, 4 თებერვალი 2019წ.) საფუძველზე დამტკიცდეს საჯარო სამართლის იურიდიული პირის საპენსიო სააგენტოს 2018 წლის ანგარიშგების აუდიტის განმახორციელებელი დამოუკიდებელი აუდიტორის შესარჩევი საკონკურსო კომისია შემდეგი შემადგენლობით: ა) ირაკლი კოვზანაძე (კომისიის თავმჯდომარე); ბ) პაატა კვიჟინაძე; გ) რომან გოცირიძე; დ) ირაკლი (დაჩი) ბერაია; ე) გრიგოლ მიქელაძე; ვ) ხათუნა გოგორიშვილი; ზ) გოგი მეშველიანი; თ) გია ბენაშვილი; ი) ლევან სურგულაძე 2. საკონკურსო კომისიამ შეიმუშაოს კომისიის დებულება და დასამტკიცებლად წარუდგინოს საქართველოს პარლამენტის ბიუროს. 3. საკონკურსო კომისიამ საქართველოს პარლამენტის სახელით გამოაცხადოს კონკურსი აუდიტის ჩატარების შესახებ, შეიმუშაოს საკონკურსო პირობები, მოთხოვნები და წესები. 4. საკონკურსო კომისიამ საქართველოს პარლამენტს კონკურსის საფუძველზე გამოვლენილი აუდიტორული ფირმა წარუდგინოს არაუგვიანეს 2019 წლის 1 აპრილისა. 5. ეს დადგენილება ამოქმედდეს მიღებისთანავე. საქართველოს პარლამენტის თავმჯდომარე ირაკლი კობახიძე თბილისი 2019 წლის თებერვალი

საქართველოს პარლამენტის 2019 წლის 19 თებერვლის პლენარული სხდომა შესვენების შემდეგ სხდომას თავმჯდომარეობს პარლამენტის თავმჯდომარის პირველი მოადგილე თამარ ჩუგოშვილი თავმჯდომარე. ა, ბატონი ირაკლი შემოგვიერთდა, შესაბამისად შეგვიძლია კიდევ ერთი საკითხი განვიხილოთ, ეს არის 65-ე საკითხი, საქართველოს პარლამენტის დადგენილების პროექტი „საჯარო სამართლის იურიდიული პირის საპენსიო სააგენტოს 2018 წლის ანგარიშგების აუდიტის განმახორციელებელი დამოუკიდებელი აუდიტორის შესარჩევი საკონკურსო კომისიის შემადგენლობის დამტკიცების შესახებ“, მომხსენებელი ბატონი ირაკლი კოვზანაძე. ი.კოვზანაძე. გმადლობთ, ქალბატონო თამარ. ძვირფასო კოლეგებო, ჩვენ კანონიდან გამომდინარე გვევალება სახელმწიფო აუდიტის, უფრო სწორად, შევადგინოთ კომისია, რომელიც შეისწავლის და დაგროვებითი პენსიის კანონიდან გამომდინარე მოახდენს აუდიტირებას და შეადგენს, ჩამოაყალიბებს კომისიას და შეადგენს საჯარო სამართლის იურიდიული პირის საპენსიო სააგენტოს 2018 წლის ანგარიშების აუდიტის განმახორციელებელი დამოუკიდებელი აუდიტორის შესარჩევი საკონკურსო კომისიის შემადგენლობა უნდა ავირჩიოთ. გამომდინარე აქედან ჩვენ გვევალებოდა ამ კომისიის ჩამოყალიბება. აქედან გამომდინარე, კომიტეტის სხდომაზე გვქონდა აღნიშნული საკითხი განხილული და წარმოვადგინეთ კომისია შემდეგი შემადგენლობით: ბატონი პაატა კვიჟინაძე, ბატონი რომან გოცირიძე, ირაკლი-დაჩი ბერაია, გრიგოლ მიქელაძე, ხათუნა გოგორიშვილი, გოგი მეშველიანი, გია ბენაშვილი და ლევან სურგულაძე, რომელიც გახლავთ საპენსიო სააგენტოს ხელმძღვანელი და ასევე ირაკლი კოვზანაძე, როგორც კომისიის თავმჯდომარე. ეს არის ამ კომისიის შემადგენლობა, რომელიც დასამტკიცებლად წარმოგიდგინეთ თქვენ. თავმჯდომარე. მადლობა, ბატონო ირაკლი. კითხვები ხომ არ არის მომხსენებელთან, თანამომხსენებელს ხომ არ სურს გამოსვლა, კომიტეტები, ფრაქციები, უმცირესობა, უმრავლესობა? განხილულია. მადლობა, ბატონო ირაკლი. ი.კოვზანაძე. გმადლობთ.

საქართველოს პარლამენტის 2019 წლის 19 თებერვლის პლენარული სხდომა შესვენების შემდეგ სხდომას თავმჯდომარეობს პარლამენტის თავმჯდომარის პირველი მოადგილე თამარ ჩუგოშვილი თავმჯდომარე. კენჭი ეყრება საქართველოს პარლამენტის დადგენილების პროექტს, „საჯარო სამართლის იურიდიული პირის, საპენსიო სააგენტოს 2018 წლის ანგარიშგების აუდიტის განმახორციელებელი დამოუკიდებელი აუდიტორის შესარჩევი საკონკურსო კომისიის შემადგენლობის დამტკიცების შესახებ. გთხოვთ, ჩართოთ კენჭისყრის რეჟიმი. მომხრე- 67 წინააღმდეგი-0 მიღებულია.