გადაწყვეტილება №23792/2/2024

№23792/2/2024

15 ნოემბერი 2024

გ ა დ ა წ ყ ვ ე ტ ი ლ ე ბ ა

 

მომჩივანი: შპს „-----“ (ს/ნ -------------)

მოპასუხე: აუდიტის დეპარტამენტი

 

საქართველოს ფინანსთა სამინისტროსთან არსებულმა დავების განხილვის საბჭომ, 7.11.2024 წელს განიხილა და მიიღო გადაწყვეტილება შპს „-----“-ის 25.08.2024 წელს რეგისტრირებულ საჩივარზე (რეგისტრაციის №23792/2/2024).

 

დავის საგანი:

საჩივრის განუხილველად დატოვება - არსებობს იმავე მომჩივნის მიმართ იმავე დავის საგანზე იმავე ორგანოს მიერ მიღებული გადაწყვეტილება.

 

გასაჩივრებული გადაწყვეტილება:

1. აუდიტის დეპარტამენტის 6.10.2023 წლის №081-223 საგადასახადო მოთხოვნა;

2. შემოსავლების სამსახურის 7.08.2024 წლის №18273 ბრძანება.

 

დარიცხული თანხა: 234 823,88 ლარი.

მათ შორის:

გადასახადი - 153 299

დღგ - 106 651

საშემოსავლო გადასახადი - 46 648

ჯარიმა - 75 626

საურავი - 5 898,88

 

ფაქტების აღწერა/დარიცხვის საფუძვლები

კომპანიის საქმიანობაა სურსათით საბითუმო ვაჭრობა ბაზრობის ტერიტორიაზე, ქ. ---ში, ---ის ქ. №--ში.

აუდიტის დეპარტამენტის 22.08.2023 წლის №20769 და 25.09.2023 წლის №23428 ბრძანებების საფუძველზე განხორციელდა კომპანიის საქმიანობის 7.07.2021 წლიდან 1.08.2023 წლამდე საანგარიშო პერიოდების, ხოლო სასაქონლო-მატერიალური ფასეულობების ინვენტარიზაციის მიზნებისთვის 14.08.2023 წლის ჩათვლით პერიოდის კამერალური საგადასახადო შემოწმება. საგადასახადო შემოწმების შედეგები აისახა 26.09.2023 წლის საგადასახადო შემოწმების აქტში, რომლის საფუძველზე გამოიცა აუდიტის დეპარტამენტის 6.10.2023 წლის №24743 ბრძანება და ამავე თარიღის №081-223 საგადასახადო მოთხოვნა, რაც 26.10.2023 წელს გასაჩივრდა შემოსავლების სამსახურში.

შემოსავლების სამსახურის 4.12.2023 წლის №30197 ბრძანებით საჩივარი არ დაკმაყოფილდა, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში. საბჭოს 22.02.2024 წლის №21618/2/2023 (რეგ. 18.04.2024წ. №03/31663) გადაწყვეტილებით საჩივარი არ დაკმაყოფილდა.

მომჩივანმა, აუდიტის დეპარტამენტის 6.10.2023 წლის №081-223 საგადასახადო მოთხოვნაზე, 2.08.2024 წელს კვლავ მიმართა შემოსავლების სამსახურს, რომლის 7.08.2024 წლის №18273 ბრძანებით საჩივარი, საგადასახადო კოდექსის 301-ე მუხლის „ზ“ ქვეპუნქტის შესაბამისად, დარჩა განუხილველი, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.

 

შემოსავლების სამსახურის გადაწყვეტილების შინაარსი

კომპანიის მიერ 6.10.2023 წლის №081-223 საგადასახადო მოთხოვნასთან დაკავშირებით 26.10.2023 წელს წარდგენილი საჩივარი, შემოსავლების სამსახურის 4.12.2023 წლის №30197 ბრძანებით არ დაკმაყოფილდა.

საგადასახადო კოდექსის 301-ე მუხლის „ზ“ ქვეპუნქტის თანახმად, დავის განმხილველი ორგანო საჩივარს არ განიხილავს, თუ არსებობს იმავე მომჩივნის მიმართ იმავე დავის საგანზე იმავე ორგანოს მიერ მიღებული გადაწყვეტილება. ზემოაღნიშნულის გათვალისწინებით, შემოსავლების სამსახურმა მიიჩნია, რომ ვინაიდან არსებობს მომჩივნის მიმართ იმავე დავის საგანზე შემოსავლების სამსახურის მიერ მიღებული გადაწყვეტილება, საგადასახადო კოდექსის 301-ე მუხლის „ზ“ ქვეპუნქტის საფუძველზე კომპანიის 2.08.2024 წლის №91173/1/2024 საჩივარი, აუდიტის დეპარტამენტის 6.10.2023 წლის №081-223 საგადასახადო მოთხოვნასთან დაკავშირებით უნდა დარჩეს განუხილველი.

 

მომჩივნის არგუმენტაცია

მომჩივანი ითხოვს შემოწმების შედეგად დარიცხული თანხის გადაანგარიშებას, ვინაიდან არაპირდაპირი მეთოდით გამოყენებით გავრცელებული ფასნამატი 20 პროცენტი არ შესაბამება აღნიშნულ პროდუქციის ფასნამატს. შეიძლება ზედნადებით რეალიზებულ პროდუქციაში იყოს გამონაკლისი ცოტათი ძვირად გაყიდული, ვინაიდან კომპანია მუშაობდა „ნისიაზე“ და ზოგჯერ ცოტათი მეტ ფასში ახდენდა გაყიდვას და რამდენიმე თვე უწევდა ამ თანხის ამოღება 20 ლარობით. ამიტომ ცოტა მეტი ფასნამატი გამოსდიოდა, რაც არ შეიძლება გავრცელდეს ყველა პროდუქციაზე. საბითუმო ვაჭრობისას აღნიშულ პროდუქციაზე ფასნამატი მაქსიმუმ 5 პროცენტი უნდა ყოფილიყო იმიტომ, რომ ანალოგიური პროდუქცია --ის საბითუმო ბაზარზე 2%-დან 3%-მდე ფასნამატით მუშაობს, შესაბამისად ვერ მოახდენდა 20 პროცენტიანი ფასნამატით რეალიზაციას.

ითხოვს აღნიშნულის და იმ ფაქტის გათვალისწინებით, რომ ოჯახის წევრის (მამა) ჯანმრთელობის მდგომარეობის გაუარესების გამო 3 თვიანი პაუზის შემდეგ აგრძელებს მუშაობას, ფინანსურადაც ძალიან შეზღუდულია, არ იყო კომფორტულად მოწყობილი სასაწყობე და სამაცივრე ადგილი და ხშირად უფუჭდებოდა პროდუქცია.

მუშაობა დაიწყო ----ის ქუჩიდან, მაგრამ ვერ მოახდინე ამ ობიექტიდან რეალიზაცია, ქირის გადახდაც ვერ შეძლო, შემდგომ მანქანით დაჰქონდა ---ში, ---ში, ---ა და ----ის ყველა კორპუსთან, ყიდიდა დაბალ ფასში პროდუქციას, მინიმუმ ფასნამატი ჰქონდა 5%-დან 7%-მდე და ხარჯების დამადასტურებელი დოკუმენტი არ გააჩნდა.

 

დავების განხილვის საბჭო

მხარეთა არგუმენტაციისა და წარმოდგენილი დოკუმენტაციის განხილვის შემდეგ საბჭომ მიიჩნია, რომ საჩივარი არ უნდა დაკმაყოფილდეს შემდეგ გარემოებათა გამო:

საგადასახადო კოდექსის 301-ე მუხლის „ზ“ ქვეპუნქტის მიხედვით, დავის განმხილველი ორგანო საჩივარს არ განიხილავს, თუ არსებობს იმავე მომჩივნის მიმართ იმავე დავის საგანზე იმავე ორგანოს მიერ მიღებული გადაწყვეტილება.

მომჩივანმა 2.08.2024 წელს საჩივარი წარადგინა შემოსავლების სამსახურში, რომელშიც გასაჩივრებულ დოკუმენტად მიუთითა აუდიტის დეპარტამენტის 6.10.2023 წლის №081-223 საგადასახადო მოთხოვნა და ასევე ითხოვდა შემოწმების შედეგების გადაანგარიშებას წარდგენილი არგუმენტების გათვალისწინებით.

დადგენილია, რომ შემოწმების შედეგებზე გამოცემული აუდიტის დეპარტამენტის 26.09.2023 წლის საგადასახადო შემოწმების აქტი, 6.10.2023 წლის №24743 ბრძანება და ამავე თარიღის №081-223 საგადასახადო მოთხოვნა 26.10.2023 წელს გასაჩივრდა შემოსავლების სამსახურში, რომლის 4.12.2023 წლის №30197 ბრძანებით საჩივარი არ დაკმაყოფილდა.

შემოსავლების სამსახურის 4.12.2023 წლის №30197 ბრძანება, აუდიტის დეპარტამენტის 26.09.2023 წლის საგადასახადო შემოწმების აქტთან, 6.10.2023 წლის №24743 ბრძანებასთან და ამავე თარიღის №081- 223 საგადასახადო მოთხოვნასთან ერთად გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში. საბჭოს 22.02.2024 წლის №21618/2/2023 (რეგ. 18.04.2024წ. №03/31663) გადაწყვეტილებით საჩივარი არ დაკმაყოფილდა.

აღსანიშნია, რომ აღნიშნული დავის განახლებაზე, ახლად აღმოჩენილი/ გამოვლენილი გარემოებების საფუძვლით, მომჩივანმა, 2.05.2024 წელს მომართა საქართველოს ფინანსთა სამინისტროსთან არსებულ დავების განხილვის საბჭოს, რომლის 4.07.2024 წლის №23010/2/2024 (რეგ. 17.07.2024წ. 03/54916) გადაწყვეტილებით საჩივარი არ დაკმაყოფილდა.

აღნიშნულიდან გამომდინარე და იმ ფაქტის გათვალისწინებით, რომ მომჩივანი არგუმენტს შემოსავლების სამსახურის მიერ საჩივრის განუხილველად დატოვებაზე არ წარმოადგენს და მომჩივანმა 2.08.2024 წელს იგივე სადავო აქტზე მიმართა შემოსავლების სამსახურს, საბჭოს მიაჩნია, რომ შემოსავლების სამსახურის მიერ საჩივრის, საგადასახადო კოდექსის 301-ე მუხლის „ზ“ ქვეპუნქტის საფუძველზე, განუხილველად დატოვება მართებულია.

 

საბჭომ იხელმძღვანელა საქართველოს საგადასახადო კოდექსის 304-ე მუხლის პირველი ნაწილის „გ“ ქვეპუნქტით და გადაწყვიტა:

 

1. საჩივარი არ დაკმაყოფილდეს;

2. გადაწყვეტილება შეიძლება გასაჩივრდეს თბილისის საქალაქო სასამართლოში (თბილისი, დავით აღმაშენებლის ხეივანი №64) ამ გადაწყვეტილების მომჩივნისთვის ჩაბარებიდან 20 კალენდარული დღის ვადაში.

 

სადავო საკითხი

საჩივრის განუხილველად დატოვება .

 

ფაქტობრივი გარემოებები

აუდიტის დეპარტამენტის №20769 და №23428 ბრძანებების საფუძველზე განხორციელდა კომპანიის საქმიანობის 7.07.2021 წლიდან 1.08.2023 წლამდე საანგარიშო პერიოდების, ხოლო სასაქონლო-მატერიალური ფასეულობების ინვენტარიზაციის მიზნებისთვის 14.08.2023 წლის ჩათვლით პერიოდის კამერალური საგადასახადო შემოწმება. საგადასახადო შემოწმების შედეგები აისახა საგადასახადო შემოწმების აქტში, რომლის საფუძველზე გამოიცა აუდიტის დეპარტამენტის №24743 ბრძანება და №081-223 საგადასახადო მოთხოვნა, რაც გასაჩივრდა შემოსავლების სამსახურში.

შემოსავლების სამსახურის №30197 ბრძანებით საჩივარი არ დაკმაყოფილდა, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში. საბჭოს №21618/2/2023 გადაწყვეტილებით საჩივარი არ დაკმაყოფილდა.

მომჩივანმა, აუდიტის დეპარტამენტის №081-223 საგადასახადო მოთხოვნაზე კვლავ მიმართა შემოსავლების სამსახურს, რომლის №18273 ბრძანებით საჩივარი, საგადასახადო კოდექსის 301-ე მუხლის „ზ“ ქვეპუნქტის შესაბამისად, დარჩა განუხილველი, რაც გასაჩივრდა საქართველოს ფინანსთა სამინისტროსთან არსებულ დავების განხილვის საბჭოში.

 

გადაწყვეტილება

აღნიშნულიდან გამომდინარე და იმ ფაქტის გათვალისწინებით, რომ მომჩივანმა იგივე სადავო აქტზე მიმართა შემოსავლების სამსახურს, საბჭოს მიაჩნია, რომ შემოსავლების სამსახურის მიერ საჩივრის, საგადასახადო კოდექსის 301-ე მუხლის „ზ“ ქვეპუნქტის საფუძველზე, განუხილველად დატოვება მართებულია.

 

დასაბუთება

საქართველოს ფინანსთა სამინისტროსთან არსებულმა დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს: 301( „ზ“);