1.1. მოპასუხე შპს „ა-----ს“ ქალაქ ქუთაისის მუნიციპალიტეტის მერიის სასარგებლოდ დაეკისროს - 1470,60 (ათას ოთხას სამოცდაათი ლარი და სამოცი თეთრი) ლარის გადახდა;

მოსარჩელის განმარტებით, შპს „ა-----” სამეწარმეო საქმიანობის დაწყების დღიდან სრულად იღებს მომსახურებას ადგილობრივი თვითმმართველობის მხრიდან, თუმცა მოპასუხე მხარემ არ შეასრულა დასუფთავების მოსაკრებლის გადახდის ვალდებულება. 2018 წლის 04 თებერვლის წერილით მას ეცნობა, რომ ერიცხებოდა დასუფთავების მოსაკრებელის დავალიანება - 1470,60 ლარის ოდენობით და მისი ნებაყოფლობით დაფარვისათვის განესაზღვრა 5 სამუშაო დღე, რაც დღემდე გადახდილი არ არის. შესაბამისად, შპს „ა-----ს” დასახლებული ტერიტორიის დასუფთავების მოსაკრებლის დავალიანება შეადგენს 1470,60 ლარს.

2. მხარეთა პოზიცია

2.1. მოპასუხის პოზიცია

2.1.1. მოპასუხე - შპს „ა-----ს” წარმომადგენელმა ავთანდილ ბუსხრიკიძემ წარმოდგენილი შესაგებელით სარჩელი არ ცნო და განმარტა, რომ ქალაქ ქუთაისის მუნიციპალიტეტის მერიის დასუფთავების სამსახურის მომსახურებით არასოდეს უსარგებლია.

3. ფაქტობრივი გარემოებები

3.1. დადგენილი ფაქტობრივი გარემოებები

3.1.1. დადგენილია, რომ შპს „ა-----” რეგისტრირებულია 2010 წლის 06 აგვისტოდან შეზღუდული პასუხისმგებლობის საზოგადოებად, მისი საიდენტიფიკაციო კოდია - 412672674, იურიდიული მისამართია: ქ. ქუთაისი, გ. ტ----ის ქ. N38.

სასამართლო ეყრდნობა შემდეგ მტკიცებულებას:

- ამონაწერი მეწარმეთა და არასამეწარმეო (არაკომერციული) იურიდიული პირების რეესტრიდან (იხ. ს.ფ. 13-14);

3.1.2. დადგენილია, რომ შპს „ა-----” (ს/კ 412672674) სამეწარმეო საქმიანობას ეწევა 2013 წლის აგვისტოდან - მისამართზე: ქ. ქუთაისი, გ. ტ----ის N72ა. შპს ,,ა-----ს’’ ყოველთვიური დასუფთავების მოსაკრებელი შეადგენს - 25,80 ლარს.

სასამართლო ეყრდნობა შემდეგ მტკიცებულებას:

- აბონენტის ბარათი (იხ. ს.ფ. 15-16);

3.1.3. დადგენილია, რომ ქალაქ ქუთაისის მუნიციპალიტეტის მერიის პირველადი სტრუქტურული ერთეულის ზედამხედველობის სამსახურის 2018 წლის 04 თებერვლის წერილით შპს „ა-----ს” ეცნობა, რომ ერიცხებოდა დასუფთავების მოსაკრებელის დავალიანება 1470,60 ლარის ოდენობით და მისი ნებაყოფლობით დაფარვისათვის განესაზღვრა 5 სამუშაო დღე.

სასამართლო ეყრდნობა შემდეგ მტკიცებულებას:

- მიმართვა (იხ. ს.ფ. 17);

3.1.4. დადგენილია, რომ დღეის მდგომარეობით, ქალაქ ქუთაისის მუნიციპალიტეტის მერიის ელექტრონული მონაცემთა ბაზის თანახმად, შპს „ა-----ს” ქალაქ ქუთაისის მუნიციპალიტეტის მერიის მიმართ დასახლებული ტერიტორიის დასუფთავების მოსაკრებლის დავალიანება შეადგენს - 1470,60 ლარს.

სასამართლო ეყრდნობა შემდეგ მტკიცებულებას:

- აბონენტის პირადი ბარათის ამონაწერი;

- ახსნა-განმარტება;

სამოტივაციო ნაწილი :

4. შემაჯამებელი სასამართლო დასკვნა

საქმეში არსებული მასალების შესწავლის, ახსნა-განმარტების მოსმენის, სარჩელის ფაქტობრივი და სამართლებრივი საფუძვლიანობის შემოწმებისა და საქმეში არსებულ მტკიცებულებათა სამართლებრივი შეფასების შედეგად, სასამართლო მივიდა დასკვნამდე, რომ ქალაქ ქუთაისის მუნიციპალიტეტის მერიის სარჩელი საფუძვლიანია და უნდა დაკმაყოფილდეს.

5. კანონები, რომლებითაც სასამართლომ იხელმძღვანელა

,,ადგილობრივი თვითმართველობის კოდექსი“ საქართველოს ორგანული კანონი;

,,ადგილობრივი მოსაკრებლების შესახებ’’ საქართველოს კანონი;

,,მოსაკრებლების სისტემის საფუძვლების შესახებ’’ საქართველოს კანონი’’;

6. სამართლებრივი შეფასება

6.1. საქართველოს ორგანული კანონის ,,ადგილობრივი თვითმართველობის კოდექსის“ მე-16 მუხლის მე-2 პუნქტის ,,დ“ ქვეპუნქტის თანახმად, მუნიციპალიტეტის საკუთარი უფლებამოსილებას განეკუთვნება: ადგილობრივი გადასახადებისა და მოსაკრებლების შემოღება და გაუქმება კანონით დადგენილი წესით, მათი განაკვეთების დადგენა კანონით გათვალისწინებული ზღვრული ოდენობების ფარგლებში; ადგილობრივი მოსაკრებლების ამოღება;

სასამართლო მიუთითებს ,,ადგილობრივი მოსაკრებლების შესახებ“ საქართველოს კანონის პრეამბულაზე, რომლის შესაბამისად, ეს კანონი, საქართველოს კონსტიტუციისა და "მოსაკრებლების სისტემის საფუძვლების შესახებ" საქართველოს კანონის თანახმად, განსაზღვრავს ადგილობრივი მოსაკრებლების სახეს, ოდენობას, შემოღების წესსა და მოსაკრებლების გადამხდელთა უფლება-მოვალეობებს.

,,ადგილობრივი მოსაკრებლების შესახებ“ საქართველოს კანონის პირველი მუხლის თანახმად, ადგილობრივი მოსაკრებელი არის აუცილებელი გადასახდელი ადგილობრივი თვითმმართველი ერთეულის ბიუჯეტში, რომელსაც ფიზიკური და იურიდიული პირები იხდიან ადგილობრივი თვითმმართველობის ორგანოს მიერ განსაზღვრული ვადით ან უამისოდ, კანონით გათვალისწინებული საქმიანობის განხორციელების ან/და სარგებლობის უფლების მინიჭებისათვის, აგრეთვე ადგილობრივი თვითმმართველობის ორგანოს მიერ გარკვეული მომსახურების გაწევისათვის.

,,ადგილობრივი მოსაკრებლების შესახებ’’ საქართველოს კანონის მე-3 მუხლის პირველი პუნქტის შესაბამისად, ამ კანონით დადგენილი წესით ადგილობრივი მოსაკრებლების შემოღების, გაუქმებისა და მათზე შეღავათების დაწესების უფლება აქვს ადგილობრივი თვითმმართველობის წარმომადგენლობით ორგანოს – საკრებულოს. ამავე მუხლის მე-2 პუნქტის მიხედვით, ადგილობრივი მოსაკრებლების შემოღების, გაუქმებისა და მათზე შეღავათების დაწესების შესახებ საკრებულოს გადაწყვეტილება მოქმედებს მხოლოდ მისდამი დაქვემდებარებულ ტერიტორიაზე და ვრცელდება ყველა იქ მცხოვრებ ფიზიკურ და განლაგებულ იურიდიულ პირზე, გარდა კანონით გათვალისწინებული შემთხვევებისა.

დასახელებული მუხლის მე-4 პუნქტის თანახმად, ადგილობრივი თვითმმართველობის ორგანოს მიერ გარკვეული მომსახურების გაწევისათვის ადგილობრივი მოსაკრებელი გადაიხდევინება მომსახურების მთლიანად ან მისი ნაწილის მიღების შემდეგ, ადგილობრივი თვითმმართველობის წარმომადგენლობითი ორგანოს მიერ დადგენილი წესით.

,,ადგილობრივი მოსაკრებლების შესახებ“ საქართველოს კანონის მე-3 მუხლის მე-5 პუნქტის შესაბამისად, სახეების მიხედვით ადგილობრივი მოსაკრებლების დიფერენცირებულ ოდენობას, გადახდის პერიოდულობასა და ვადას ადგენს ადგილობრივი თვითმმართველობის წარმომადგენლობითი ორგანო შესაბამისი გადაწყვეტილებით. ამავე მუხლის მე-6 პუნქტის თანახმად, ადგილობრივი მოსაკრებლები გადაიხდევინება ადგილობრივი თვითმმართველობის წარმომადგენლობითი ორგანოს მიერ დამტკიცებული ინსტრუქციების შესაბამისად. ამავე კანონის მე-5 მუხლის მე-3 პუნქტის შესაბამისად, ადგილობრივი სანებართვო მოსაკრებელია - მოსაკრებელი დასახლებული ტერიტორიის დასუფთავებისათვის.

,,ადგილობრივი მოსაკრებლების შესახებ“ საქართველოს კანონის მე-121 მუხლის პირველი პუნქტის მიხედვით, დასახლებული ტერიტორიის დასუფთავება გულისხმობს ტერიტორიის დაგვა-დასუფთავებას და ტერიტორიაზე წარმოქმნილი ნარჩენების ნარჩენების მართვის კოდექსის შესაბამისად მართვას. ამავე მუხლის მე-2 პუნქტის შესაბამისად, მოსაკრებლის გადამხდელები არიან ფიზიკური ან/და იურიდიული პირი, ორგანიზაცია, დაწესებულება, რომლებიც თვითმმართველი ერთეულის ტერიტორიაზე წარმოქმნიან ნარჩენებს.

დასახელებული მუხლის მე-5 პუნქტის თანახმად, ნარჩენების წარმომქმნელმა შეიძლება მოახდინოს მოსაკრებლის ოდენობის დიფერენცირება დაგროვებული ნარჩენების წონის, მოცულობის ან/და ნარჩენების დაგროვების ნორმის, ნარჩენების სახეობის მიხედვით, აგრეთვე თავისი შემოსავლის, ქონების, მის მიერ დასაქმებული პერსონალის რაოდენობის ან/და საქონლის (მომსახურების) მომხმარებელთა რაოდენობის მიხედვით. მოსაკრებლის ოდენობის დადგენისას შესაძლებელია გამოყენებულ იქნეს ამ სიდიდეების კომბინაციებიც.

,,ადგილობრივი მოსაკრებლების შესახებ“ საქართველოს კანონის მე-14 მუხლის შესაბამისად, პასუხისმგებლობა ამ კანონის დარღვევისათვის განისაზღვრება საქართველოს კანონმდებლობით დადგენილი წესით. ხოლო, მე-15 მუხლის თანახმად, ადგილობრივ მოსაკრებლებთან დაკავშირებულ დავას წყვეტს სასამართლო საქართველოს კანონმდებლობით დადგენილი წესით. სასამართლოში სარჩელის შეტანა არ ათავისუფლებს გადამხდელს ადგილობრივი მოსაკრებლების გადახდისაგან.

დადგენილია, რომ თვითმმართველი ქალაქის ქუთაისის საკრებულოს 2007 წლის 14 მაისის N69 დადგენილებით, საყოფაცხოვრებო ნარჩენების შეგროვება-ტრანსპორტირებისა და გაუვნებლობის მომსახურებისათვის ქალაქ ქუთაისში შემოღებული იქნა დასახლებული ტერიტორიის დასუფთავების მოსაკრებელი და დამტკიცდა მოსაკრებლის გადახდის თანდართული ინსტრუქცია დანართი N1-ის შესაბამისად. ქალაქ ქუთაისში მოსახლეობისათვის დასუფთავების მოსაკრებლის ოდენობა განისაზღვრა ერთ სულზე 50 თეთრით თვეში. იურიდიული პირების, ორგანიზაციების და დაწესებულებებისათვის მოსაკრებლის ოდენობა განისაზღვრა დანართი N2-ის შესაბამისად. ცნობად იქნა მიღებული, რომ 1მ3 ნარჩენის გატანა-გაუვნებლობის ღირებულება შეადგენს 6 ლარს, მათ შორის გაუვნებლობის (ნაგავსაყრელის მომსახურების) ღირებულება -0,6 ლარს.

დადგენილია, რომ ქუთაისის საკრებულოს 2011 წლის 17 ნოემბრის N138 დადგენილებით ცვლილება შევიდა ქალაქ ქუთაისში დასახლებული ტერიტორიის დასუფთავებისათვის მოსაკრებლის შემოღებისა და მოსაკრებლის გადახდის ინსტრუქციის დამტკიცების შესახებ’’ ქალაქ ქუთაისის საკრებულოს 2007 წლის 14 მაისის N69 დადგენილებაში და შეიცვალა დადგენილების დანართი N2, შეიცვალა დადგენილების მე-3 მუხლი და ჩამოყალიბდა შემდეგი სახით: ინდივიდუალური მეწარმეების, იურიდიული პირების, ორგანიზაციების და დაწესებულებებისათვის მოსაკრებლის ოდენობა განისაზღვრა 1მ3 ნარჩენის გატანა-გაუვნებლობის ღირებულება შეადგენს 9 ლარს და 20 თეთრს, დანართი 2-ის შესაბამისად.

დადგენილია, რომ საწარმოების, ორგანიზაციებისა და დაწესებულებების ჯგუფების ჩამონათვალი საქმიანობის სფეროს მიხედვით: შერეული საქონლის მაღაზია; ზომის ერთეული: სამუშაო ფართის 1მ2; ნარჩენების წლიური დაგროვების ნორმა მ3 – 0,65; მოსაკრებლის განაკვეთი თვეში ზომის ერთეულზე სვეტი /N4/:12 თვე X9,2 ლარი/ მოსაკრებლის ოდენობა 1 მ3 ნარჩენზე/ლარი) – 0,32 (კლასიფიკაცია 1).

დადგენილია, რომ საწარმოების, ორგანიზაციებისა და დაწესებულებების ჯგუფების ჩამონათვალი საქმიანობის სფეროს მიხედვით: სამეწარმეო საქმიანობა შენობის შიგნით მიმდინარე წარმოებისას და საყოფაცხოვრებო მომსახურების ობიექტები; ზომის ერთეული: საერთო ფართის 1მ2; ნარჩენების წლიური დაგროვების ნორმა მ3 – 0,25; მოსაკრებლის განაკვეთი თვეში ზომის ერთეულზე სვეტი /N4/:12 თვე X9,2 ლარი/ მოსაკრებლის ოდენობა 1 მ3 ნარჩენზე/ლარი) – 0.19 (კლასიფიკაცია 22).

დადგენილია, რომ საწარმოების, ორგანიზაციებისა და დაწესებულებების ჯგუფების ჩამონათვალი საქმიანობის სფეროს მიხედვით: საწყობი პირდაპირი მიყიდვის გარეშე, მაცივარი, ბაზა; ზომის ერთეული: ღია საერთო ფართის 1მ2; ნარჩენების წლიური დაგროვების ნორმა მ3 – 0,02; მოსაკრებლის განაკვეთი თვეში ზომის ერთეულზე სვეტი /N4/:12 თვე X9,2 ლარი/ მოსაკრებლის ოდენობა 1 მ3 ნარჩენზე/ლარი) – 0.01; ზომის ერთეული: დახურული საერთო ფართის 1მ2; ნარჩენების წლიური დაგროვების ნორმა მ3 – 0,08; მოსაკრებლის განაკვეთი თვეში ზომის ერთეულზე სვეტი /N4/:12 თვე X9,2 ლარი/ მოსაკრებლის ოდენობა 1 მ3 ნარჩენზე/ლარი) – 0.04; (კლასიფიკაცია 34).

ქალაქ ქუთაისის მუნიციპალიტეტის საკრებულოს 2018 წლის 28 მარტის №45 დადგენილებით ძალადაკარგულად გამოცხადდა „ქალაქ ქუთაისში დასახლებული ტერიტორიის დასუფთავებისათვის მოსაკრებლის შემოღებისა და მოსაკრებლის გადახდის ინსტრუქციის დამტკიცების შესახებ“ თვითმმართველი ქალაქის - ქუთაისის საკრებულოს 2007 წლის 14 მაისის №69 დადგენილება. შემოღებულ იქნა ქალაქ ქუთაისის მუნიციპალიტეტში დასახლებული ტერიტორიის დასუფთავებისათვის მოსაკრებელი და დამტკიცდა მისი გადახდის ინსტრუქცია №1 დანართის შესაბამისად. დაწესებულებების, ორგანიზაციების, ინდივიდუალური მეწარმეებისა და იურიდიული პირებისათვის დაწესდა ქალაქ ქუთაისის მუნიციპალიტეტში დასახლებული ტერიტორიის დასუფთავებისათვის მოსაკრებელი №2 დანართის შესაბამისად. ქალაქ ქუთაისის მუნიციპალიტეტში დასახლებული ტერიტორიის დასუფთავებისათვის მოსაკრებლის განაკვეთი ერთ სულ მოსახლეზე განისაზღვრა - 0.50 ლარი თვეში.

დადგენილია, რომ საწარმოების, ორგანიზაციებისა და დაწესებულებების ჯგუფების ჩამონათვალი საქმიანობის სფეროს მიხედვით: საწყობი პირდაპირი მიყიდვის გარეშე, მაცივარი, ბაზა; ზომის ერთეული: ღია საერთო ფართის 1მ2; ნარჩენების წლიური დაგროვების ნორმა მ3 – 0,02; მოსაკრებლის განაკვეთი თვეში ზომის ერთეულზე სვეტი /N4/:12 თვე X9,2 ლარი/ მოსაკრებლის ოდენობა 1 მ3 ნარჩენზე/ლარი) – 0.02; ზომის ერთეული: დახურული საერთო ფართის 1მ2; ნარჩენების წლიური დაგროვების ნორმა მ3 – 0,08; მოსაკრებლის განაკვეთი თვეში ზომის ერთეულზე სვეტი /N4/:12 თვე X9,2 ლარი/ მოსაკრებლის ოდენობა 1 მ3 ნარჩენზე/ლარი) – 0.06; (კლასიფიკაცია 32).

დადგენილია, რომ ყოველთვიურად შპს „ა-----ს” მიერ ადგილობრივ ბიუჯეტში გადასახდელი თანხა შეადგენს - 25,80 ლარს.

დადგენილია, რომ ქალაქ ქუთაისის მუნიციპალიტეტის მერიის პირველადი სტრუქტურული ერთეულის ზედამხედველობის სამსახურის 2018 წლის 04 თებერვლის წერილით შპს „ა-----ს” ეცნობა, რომ ერიცხებოდა დასუფთავების მოსაკრებლის დავალიანება 1470,60 ლარის ოდენობით და მისი ნებაყოფლობით დაფარვისათვის განესაზღვრა 5 სამუშაო დღე, რაც შპს „ა-----ს“ დღემდე არ გადაუხდია. შესაბამისად, შპს „ა-----ს” დასახლებული ტერიტორიის დასუფთავების მოსაკრებლის დავალიანება შეადგენს - 1470,60 ლარს.

სასამართლო ვერ გაიზიარებს მოპასუხის განმარტებას იმის თაობაზე, რომ შპს „ა-----ს” დასახლებული ტერიტორიის დასუფთავების მოსაკრებლის გადახდის ვალდებულება არ წარმოეშვა, რადგან მისი საქმიანობიდან გამომდინარე მას ნარჩენები არ გააჩნია. სასამართლო მიუთითებს, რომ მუნიციპალიტეტის დასახლებული ტერიტორიის დასუფთავებასთან დაკავშირებით რეგულირება ნორმატიული აქტის - კანონისა და მის საფუძველზე გამოცემული კანონქვემდებარე აქტებით დადგენილი წესით ხორციელდება. ზემოთ მითითებული საკანონმდებლო ნორმები არ შეიცვას ცალკეული პირების მიერ საქმიანობის განხორციელების დროს ყოველდღიურად წარმოქმნილი ნარჩენის პერსონალურად კონტროლსა და აღრიცხვას, შესაბამისად ინდივიდუალური მომსახურების წესებს. თვითმმართველი ერთეულის ადმინისტრაციული ორგანო - საკრებულო დიფერენცირებულ გადასახადს ადგენს მხოლოდ კანონით გათვალისწინებულ შემთხვევებში (მაგ: საქმიანობის სფერო, საქმიანობის განხორციელებისათვის დაკავებული ფართობი, დასაქმებული პერსონალის რაოდენობა და სხვ.) გათვალისწინებით, რომელიც სავალდებულოა იმ მუნიციპალიტეტის ტერიტორიაზე და იმ პირებისათვის, რომლებიც ამ ტერიტორიის ფარგლებში საქმიანობენ. შესაბამისად, ყველა სუბიექტი, რომელიც ქუთაისის მუნიციპალიტეტის ტერიტორიაზე ახორციელებს საქმიანობას კონკრეტული ნორმატიული აქტით დადგენილი სავალდებულოდ შესასრულებელი ქცევის წესების რეგულირების ქვეშ ექცევა იმ მომენტიდან, როდესაც ამ საქმიანობის განხორციელებას იწყებს, ხოლო დასახლებული ტერიტორიის დასუფთავების მოსაკრებლი გულისხმობს მუნიციპალიტეტის ტერიტორიის დაგვა-დასუფთავებას და ტერიტორიაზე წარმოქმნილი ნარჩენების მართვას, კანონით დადგენილი წესით. საქართველოს კანონის ,,ნარჩენების მართვის კოდექსის“ მე-3 მუხლის ,,ე“ ქვეპუნქტის თანახმად, მუნიციპალური ნარჩენები არის საყოფაცხოვრებო ნარჩენები, აგრეთვე სხვა ნარჩენები, რომლებიც თავიანთი მახასიათებლებითა და შემადგენლობით საყოფაცხოვრებო ნარჩენების მსგავსია. ამავე კანონის მე-6 მუხლის მე-8 პუნქტის შესაბამისად, ამ კოდექსისა და საქართველოს ორგანული კანონის „ადგილობრივი თვითმმართველობის კოდექსი“ შესაბამისად, ნარჩენების მართვის სფეროში მუნიციპალიტეტის კომპეტენციას განეკუთვნება მუნიციპალური ნარჩენების მართვა (მათ შორის, მუნიციპალური ნარჩენების მართვის გეგმის შემუშავება) ამ კოდექსის მე-16 მუხლის შესაბამისად (გარდა ამ მუხლის მე-7 ნაწილით გათვალისწინებული უფლებამოსილებისა). ამავე კანონის მე-16 მუხლის პირველი პუნქტის ,,ა“ ქვეპუნქტის შესაბამისად, მუნიციპალიტეტმა უნდა უზრუნველყოს მუნიციპალური ნარჩენების შეგროვება და ამ მიზნით მუნიციპალური ნარჩენების შეგროვების სისტემის დანერგვა და გამართული ფუნქციონირება. ამდენად, მოსაკრებლების გადამხდელი ფიზიკური და იურიდიული პირები და ამხანაგობები ვალდებული არიან გადაიხადონ კანონით დაწესებული საერთო-სახელმწიფოებრივი და ადგილობრივი მოსაკრებლები (მოსაკრებლების სისტემის საფუძვლების შესახებ საქართველოს კანონის 3.2 მუხლი).

სასამართლო ასევე, ვერ გაიზიარებს მოპასუხის პოზიციას სასარჩელო მოთხოვნის ხანდაზმულობასთან დაკავშირებით და მიუთითებს ,,მოსაკრებლების სისტემის საფუძვლის შესახებ“ საქართველოს კანონის მე-4 მუხლზე, რომლის თანახმად, კანონმდებლობა მოსაკრებლების შესახებ შედგება ამ კანონისაგან, მის შესაბამისად მიღებული კანონებისა და კანონქვემდებარე ნორმატიული აქტებისაგან. მოსაკრებლების შესახებ კანონები და კანონქვემდებარე ნორმატიული აქტები არ უნდა ეწინააღმდეგებოდეს ამ კანონს. მოსაკრებლების თაობაზე კანონების დებულებებსა და კანონმდებლობის სხვა სფეროს ნორმატიული აქტების დებულებებს შორის მოსაკრებლების დაწესების, შეცვლისა და გაუქმების საკითხებზე კოლიზიის წარმოშობისას გამოიყენება მოსაკრებლების შესახებ კანონები. აკრძალულია მოსაკრებლებთან დაკავშირებული საკითხების მოსაკრებლების შესახებ კანონმდებლობის გარდა სხვა კანონმდებლობით მოწესრიგება.

ამდენად, იმ გარემოების გათვალისწინებით, რომ მუნიციპალიტეტსა და მოსარჩელეს შორის ადგილი არ აქვს სახელშეკრულებო ურთიერთობას, რომელიც წარმოშობილი იქნებოდა სამოქალაქო კოდექსით გათვალისწინებული რომელიმე სახელშეკრულებო ურთიერთობიდან და მათ შორის არც ადმინისტრაციული ხელშეკრულება გაფორმებულა, ,,მოსაკრებლების სისტემის საფუძვლის შესახებ“ საქართველოს კანონის დანაწესებიდან გამომდინარე, მოპასუხის ვალდებულების მიმართ ვერ გავრცელდება სამოქალაქო კოდექსით გათვალისწინებული მოთხოვნის ხანდაზმულობა, რამეთუ სუბიექტს მისი საქმიანობის დაწყების აღრიცხვიანობის მომენტიდან წარმოეშობა დასახლებული ტერიტორიის დასუფთავების მოსაკრებლის გადახდის ვალდებულება, რომლის შესრულების უპირობო ვალდებულება საჯარო კანონმდებლობით არის რეგულირებული.

ზემოაღნიშნულიდან გამომდინარე სასამართლოს მიაჩნია, რომ სასარჩელო მოთხოვნა საფუძვლიანია და შპს „ა-----ს” ქალაქ ქუთაისის მუნიციპალიტეტის მერიის სასარგებლოდ უნდა დაეკისროს - 1470,60 (ათას ოთხას სამოცდაათი ლარი და სამოცი თეთრი) ლარის გადახდა.

7. საპროცესო ხარჯები

საქართველოს სამოქალაქო საპროცესო კოდექსის 55-ე მუხლის პირველი ნაწილის თანახმად, სასამართლოს მიერ საქმის განხილვასთან დაკავშირებით გაწეული ხარჯები და სახელმწიფო ბაჟი, რომელთა გადახდისაგან გათავისუფლებული იყო მოსარჩელე, გადახდება მოპასუხეს ბიუჯეტის შემოსავლის სასარგებლოდ, მოთხოვნათა იმ ნაწილის პროპორციულად, რომელიც დაკმაყოფილებულია.

ამავე კოდექსის 39-ე მუხლის პირველი ნაწილის ,,ა’’ ქვეპუნქტის შესაბამისად სახელმწიფო ბაჟის ოდენობა შეადგენს დავის საგნის ღირებულების 3%, მაგრამ არანაკლებ 100 ლარისა. აღნიშნულიდან გამომდინარე, ვინაიდან მოსარჩელე გათავისუფლებულია სახელმწიფო ბაჟის გადახდისაგან, ამასთან სასარჩელო მოთხოვნა დაკმაყოფილდა, მოპასუხე შპს „ა-----ს“ სახელმწიფო ბიუჯეტის სასარგებლოდ უნდა დაეკისროს სახელმწიფო ბაჟის 100 (ასი) ლარის გადახდა.

სარეზოლუციო ნაწილი:

სასამართლომ იხელმძღვანელა საქართველოს ადმინისტრაციული საპროცესო კოდექსის პირველი, მე-2, მე-3, მე-4, მე-5, მე-12, 24-ე მუხლებით, საქართველოს სამოქალაქო საპროცესო კოდექსის მე-8, 39-ე, 53-ე, 244-ე, 248-ე, 249-ე, 364-ე, 367-ე, 369-ე მუხლებით და

გ ა დ ა წ ყ ვ ი ტ ა :

1. ქალაქ ქუთაისის მუნიციპალიტეტის მერიის სარჩელი დაკმაყოფილდეს;

2. მოპასუხე - შპს „ა-----ს” (ს/კ 412672674) ქალაქ ქუთაისის მუნიციპალიტეტის მერიის სასარგებლოდ დაეკისროს 1470,60 (ათას ოთხას სამოცდაათი ლარი და სამოცი თეთრი) ლარის გადახდა;

3. მოპასუხე - შპს „ა-----ს” (ს/კ 412672674) სახელმწიფო ბიუჯეტის სასარგებლოდ დაეკისროს სახელმწიფო ბაჟის - 100 (ასი) ლარის გადახდა;

4. გადაწყვეტილება შეიძლება გასაჩივრდეს სააპელაციო საჩივრით გადაწყვეტილების ასლის ჩაბარებიდან 14 დღის ვადაში, ქუთაისის სააპელაციო სასამართლოს ადმინისტრაციულ საქმეთა პალატაში, /მისამართი: ქ. ქუთაისი, ნიუ-პორტის ქ. №32/ ქუთაისის საქალაქო სასამართლოს მეშვეობით /მისამართი: ქ. ქუთაისი, კუპრაძის ქ. №11/.

მოსამართლე ლელა მილდენბერგერი