,,საქართველოს შეიარაღებული ძალების ოფიცრების განსაკუთრებული პრივილეგიებისა და შეღავათების შესახებ“

სახელმწიფო სარეგისტრაციო კოდი 120.340.000.08.002.004

საქართველოს პრეზიდენტის

ბრძანებულება №136

2007 წლის 22 თებერვალი

ქ. თბილისი

საქართველოს შეიარაღებული ძალების ოფიცრების განსაკუთრებული პრივილეგიებისა და შეღავათების შესახებ

საქართველოს შეიარაღებული ძალების აღმშენებლობისა და კვალიფიციური ოფიცრებით დაკომპლექტების მიზნით:

1. საქართველოს შეიარაღებულ ძალებში სამსახურის გასავლელად შერჩეულ იქნენ:

ა) სტუდენტები, რომლებიც ხელშეკრულების საფუძველზე აიღებენ ვალდებულებას საგანმანათლებლო პროგრამის (ბაკალავრიატი) დასრულების შემდეგ განსაზღვრული ვადით იმსახურონ საქართველოს შეიარაღებულ ძალებში;

ბ) პირები, რომლებსაც დამთავრებული აქვთ უმაღლესი სასწავლებელი.

2. საქართველოს თავდაცვის სამინისტრომ:

ა) ამ ბრძანებულების პირველ პუნქტში აღნიშნულ პირებს კანონმდებლობით დადგენილი წესით გაუფორმოს შესაბამისი ხელშეკრულებები;

ბ) კანონმდებლობის შესაბამისად ხელშეკრულებები გაუფორმოს ოფიცრებს, რომლებიც მსახურობენ საქართველოს შეიარაღებულ ძალებში;

გ) ამ ბრძანებულების პირველი პუნქტის „ა“ ქვეპუნქტში აღნიშნულ პირებს, „უმაღლესი განათლების შესახებ“ საქართველოს კანონის 43-ე მუხლის პირველი პუნქტის „ი“ ქვეპუნქტის თანახმად, სწავლის პერიოდში დაუნიშნოს სტიპენდია;

დ) სამხედრო სამსახურის გავლის დროს უზრუნველყოს კვალიფიკაციის ამაღლების მიზნით ოფიცერთა პროფესიული გადამზადება;

ე) პირებზე, რომლებმაც 2005-2006 წლებში დაამთავრეს უმაღლესი სასწავლებელი და ამ ბრძანებულების შესაბამისად გააფორმეს ხელშეკრულება შეიარაღებულ ძალებში სამსახურის თაობაზე, გასცეს ერთჯერადი დახმარება განსაზღვრული ოდენობით;

ვ) ოფიცრებს დაუწესოს დანამატი თითოეული უცხო ენის ცოდნისათვის.

3. ამ ბრძანებულების შესაბამისად გაფორმებულ ხელშეკრულებაში გათვალისწინებულ იქნეს შემდეგი პირობები:

ა) საქართველოს თავდაცვის სამინისტრომ საქართველოს კანონმდებლობის თანახმად უზრუნველყოს შესაბამისი ღონისძიებების განხორციელება, რათა ამ ბრძანებულების შესაბამისად გაფორმებული ხელშეკრულებით გათვალისწინებულ სამხედრო სამსახურის პერიოდში სამხედრო მოსამსახურეს მიეცეს უფლება გამოიტანოს კომერციული ბანკებიდან დაბალპროცენტიანი კრედიტი;

ბ) კონტრაქტით გათვალისწინებული ვადით სამხედრო სამსახურის დასრულების შემდეგ სამხედრო მოსამსახურის საცხოვრებელი ბინით უსასყიდლოდ უზრუნველყოფა.

4. ბრძანებულება ამოქმედდეს გამოქვეყნებისთანავე.

მ. სააკაშვილი