„საქართველოს სტანდარტიზაციის, მეტროლოგიისა და სერტიფიკაციის სახელმწიფო სისტემის სრულყოფის ღონისძიებათა შესახებ“

საქართველოს პრეზიდენტის

ბრძანებულება №445

2002 წლის 25 ოქტომბერი

ქ. თბილისი

საქართველოს სტანდარტიზაციის, მეტროლოგიისა და სერტიფიკაციის სახელმწიფო სისტემის სრულყოფის ღონისძიებათა შესახებ

ქვეყნის მასშტაბით გაზომვათა ერთიანობის უზრუნველყოფის, სტანდარტიზაციის, მეტროლოგიისა და სერტიფიკაციის სახელმწიფო სისტემის სრულყოფის მიზნით „საჯარო სამართლის იურიდიული პირის შესახებ“ საქართველოს კანონის შესაბამისად:

1. შეიქმნას საჯარო სამართლის იურიდიული პირი – „მეტროლოგიის ცენტრი“.

2. საქართველოს სტანდარტიზაციის, მეტროლოგიისა და სერტიფიკაციის სახელმწიფო დეპარტამენტის თავმჯდომარემ (ბ.შოშიტაიშვილი) შეიმუშაოს და დაამტკიცოს საჯარო სამართლის იურიდიული პირის – „მეტროლოგიის ცენტრის“ დებულება და დანიშნოს საჯარო სამართლის იურიდიული პირის – „მეტროლოგიის ცენტრის“ ხელმძღვანელი.

3. საჯარო სამართლის იურიდიული პირის – „მეტროლოგიის ცენტრის“ სახელმწიფო კონტროლის განმხორციელებელ ორგანოდ განისაზღვროს საქართველოს სტანდარტიზაციის, მეტროლოგიისა და სერტიფიკაციის სახელმწიფო დეპარტამენტი.

4. შეტანილ იქნეს დამატება საქართველოს პრეზიდენტის 1998 წლის 27 მარტის №179 ბრძანებულებით დამტკიცებულ საქართველოს სტანდარტიზაციის, მეტროლოგიისა და სერტიფიკაციის სახელმწიფო დეპარტამენტის დებულების VII თავის 23-ე პუნქტში და ტერიტორიული ორგანოების ჩამონათვალის შემდეგ დაემატოს სიტყვები – „საჯარო სამართლის იურიდიული პირი – „მეტროლოგიის ცენტრი“, შემდეგ როგორც ტექსტშია.

5. საჯარო სამართლის იურიდიული პირის – „მეტროლოგიის ცენტრმა“ საქსტანდარტს გაუწიოს ფინანსური მხარდაჭერა საკუთარი შემოსავლებიდან.

ე. შევარდნაძე