საქართველოს სოფლის მეურნეობისა და სურსათის მინისტრის ბრძანება №2-280 „აჭარის ავტონომიური რესპუბლიკის სოფლის მეურნეობისა და სურსათის სამინისტროსათვის ლიცენზიისა და ნებართვის გაცემის უფლებამოსილების გადაცემის შესახებ

სახელმწიფო სარეგისტრაციო კოდი 240.090.000.11.113.006.168

საქართველოს სოფლის მეურნეობისა და სურსათის მინისტრის

ბრძანება №2-280

2003 წლის 31 ოქტომბერი

ქ. თბილისი

აჭარის ავტონომიური რესპუბლიკის სოფლის მეურნეობისა და სურსათის სამინისტროსათვის ლიცენზიისა და ნებართვის გაცემის უფლებამოსილების გადაცემის შესახებ

“საქართველოს აღმასრულებელი ხელისუფლების სამთავრობო დაწესებულებების სისტემაში ავტონომიური რესპუბლიკის შესაბამისი სამინისტროებისა და უწყებებისათვის ლიცენზიებისა და ნებართვების გაცემის უფლებამოსილების გადაცემის წესის შესახებ” საქართველოს პრეზიდენტის 2003 წლის 29 სექტემბრის №472 ბრძანებულების მოთხოვნათა შესრულების მიზნით, ვბრძანებ:

1. გადაეცეს აჭარის ავტონომიური რესპუბლიკის სოფლის მეურნეობისა და სურსათის სამინისტროს უფლებამოსილება:

ა) გასცეს ლიცენზია “სამეწარმეო საქმიანობის ლიცენზიისა და ნებართვის გაცემის საფუძვლების შესახებ” საქართველოს კანონის მე-6 მუხლის „ნ.ა.”, „ნ.ბ.”, „ნ.გ.” ქვეპუნქტებით გათვალისწინებული საქმიანობის სფეროში;

ბ) გასცეს ნებართვა „სამეწარმეო საქმიანობის ლიცენზიისა და ნებართვის გაცემის საფუძვლების შესახებ” საქართველოს კანონის მე-19 მუხლის 1-ლი პუნქტის „ყ.ა.”, „ყ.ბ.”, „ყ.გ.” ქვეპუნქტებით გათვალისწინებული საქმიანობის სფეროში.

2. აჭარის ავტონომიური რესპუბლიკის სოფლის მეურნეობისა და სურსათის სამინისტროს შესაბამისმა უწყებამ ლიცენზია/ნებართვა გასცეს იმ ლიცენზიის/ნებართვის მაძიებელზე, რომელიც კანონმდებლობით დადგენილი წესით რეგისტრირებულია ავტონომიური რესპუბლიკის ტერიტორიაზე და ლიცენზირებას/ნებართვას დაქვემდებარებულ საქმიანობას ახორციელებს მის ტერიტორიაზე.

3. საქართველოს სოფლის მეურნეობისა და სურსათის სამინისტროს სახელმწიფო საქვეუწყებო დაწესებულებებმა: კვების პროდუქტების ექსპერტიზისა და მონიტორინგის სამსახურმა და დეპარტამენტმა “საქმინხილწყალი”, საჯარო სამართლის იურიდიულმა პირმა ვაზისა და ღვინის დეპარტამენტმა “სამტრესტი” სამი დღის ვადაში გადაუგზავნოს აჭარის ავტონომიური რესპუბლიკის სოფლის მეურნეობისა და სურსათის სამინისტროს ამ ბრძანების მე-2 პუნქტით გათვალისწინებული ლიცენზიის/ნებართვის მაძიებლის მიერ მათთვის წარდგენილი განცხადება თანდართული დოკუმენტებით და აღნიშნულის თაობაზე აცნობოს განმცხადებელს შესაბამისი დასაბუთებით გაგზავნიდან 2 დღეში.

4. აჭარის ავტონომიური რესპუბლიკის სოფლის მეურნეობისა და სურსათის სამინისტროს შესაბამისმა უწყებამ ლიცენზიის/ნებართვის მაძიებლის განცხადების მიღებიდან სამ დღეში, ამ ბრძანების მე-3 პუნქტში მითითებულ ლიცენზიის/ნებართვის გამცემ ორგანოებს, წერილობით აცნობოს მის მიერ ლიცენზიის/ნებართვის გასაცემად ადმინისტრაციული წარმოების დაწყების შესახებ და წარუდგინოს მათ ლიცენზიის/ნებართვის მაძიებლის მიერ წარმოდგენილი დოკუმენტების სათანადოდ დამოწმებული ასლები.

5. აჭარის ავტონომიური რესპუბლიკის სოფლის მეურნეობისა და სურსათის სამინისტრომ უწყებრივი სალიცენზიო/სანებართვო რეესტრის მონაცემები შეტანიდან 10 დღის ვადაში აცნობოს ამ ბრძანების მე-3 პუნქტში მითითებულ ლიცენზიის/ნებართვის გამცემ ორგანოებს.

6. მიღებულ იქნეს ცნობად, რომ აჭარის ავტონომიური რესპუბლიკის სოფლის მეურნეობისა და სურსათის სამინისტროს ლიცენზიის/ნებართვის გაცემის უფლებამოსილება ჩამოერთმევა საქართველოს სოფლის მეურნეობისა და სურსათის მინისტრის ბრძანებით, თუ იგი ლიცენზიის/ნებართვის გაცემას, შეჩერებას, განახლებას, გაუქმებას ახორციელებს “სამეწარმეო საქმიანობის ლიცენზიისა და ნებართვის გაცემის საფუძვლების შესახებ” საქართველოს კანონით გათვალისწინებული მოთხოვნების დარღვევით.

7. კონტროლი ბრძანების შესრულებაზე დაევალოს მინისტრის მოადგილესდ. გრიგოლიას.

8. ბრძანება ამოქმედდეს გამოქვეყნებისთანავე.

დ. კირვალიძე