საქართველოს ზოგიერთ საკანონმდებლო აქტში ცვლილებების შეტანის თაობაზე

საქართველოს კანონი

საქართველოს ზოგიერთ საკანონმდებლო აქტში ცვლილებების შეტანის თაობაზე

    მუხლი 1

„აღმასრულებელი ხელისუფლების სტრუქტურისა და საქმიანობის წესის შესახებ” საქართველოს კანონის (პარლამენტის უწყებანი, №17-18, 9 მაისი, 1997) მე-13 მუხლის მე-2 პუნქტიდან ამოღებულ იქნეს „ჟ” ქვეპუნქტი.

    მუხლი 2

1. საქართველოს ყველა საკანონმდებლო აქტში სიტყვები „საქართველოს საგადასახადო შემოსავლების სამინისტრო” და „საქართველოს საგადასახადო შემოსავლების მინისტრი” შეიცვალოს შესაბამისად სიტყვებით “საქართველოს ფინანსთა სამინისტრო” და „საქართველოს ფინანსთა მინისტრი”, გარდა ამ მუხლის მე-2 პუნქტით გათვალისწინებული შემთხვევებისა.

2. საქართველოს ყველა იმ საკანონმდებლო აქტიდან, რომლებშიც ერთადაა მითითებული სიტყვები „საქართველოს ფინანსთა სამინისტრო”, ამოღებულ იქნეს სიტყვები „საქართველოს საგადასახადო შემოსავლების სამინისტრო”, ხოლო იქ, სადაც ერთადაა მითითებული სიტყვები „საქართველოს საგადასახადო შემოსავლების მინისტრი” და „საქართველოს ფინანსთა მინისტრი”, ამოღებულ იქნეს სიტყვები „საქართველოს საგადასახადო შემოსავლების მინისტრი”.

3. ძალაში დარჩეს საქართველოს საგადასახადო შემოსავლების მინისტრის მიერ ნორმატიული აქტების გამოცემა, მათში ცვლილებებისა და დამატებების შეტანა და მათი გაუქმება განხორციელდეს საქართველოს ფინანსთა მინისტრის შესაბამისი ნორმატიული აქტებით.

    მუხლი 3

საქრთველოს აღმასრულებელმა ხელისუფლებამ უზრუნველყოს ამ კანონით განსაზღვრული სტრუქტურული ცვლილებებისათვის საჭირო ღონისძიებების განხორციელება საქართველოს კანონმდებლობის შესაბამისად.

    მუხლი 4

საქართველოს პრეზიდენტმა საქართველოს ფინანსთა სამინისტროს ახალი დებულების დამტკიცებამდე საქართველოს პარლამენტს წარუდგინოს კანონპროექტი „საქართველოს 2002 წლის სახელმწიფო ბიუჯეტის შესახებ” საქართველოს კანონში ცვლილებებისა და დამატებების შეტანის თაობაზე.

    მუხლი 5

ეს კანონი ამოქმედდეს გამოქვეყნებისთანავე.

საქართველოს პრეზიდენტი ე. შევარდნაძე

თბილისი,

2002 წლის 10 მაისი.

№1399–IIს