„საქართველოს გარემოს დაცვის სამინისტროსა და ლიტვის რესპუბლიკის გარემოს სამინისტროს შორის გარემოს დაცვის სფეროში თანამშრომლობის შესახებ“ შეთანხმება

მხარეები ხელს შეუწყობენ და განავითარებენ თანასწორუფლებიან თანამშრომლობას გარემოს დაცვის სფეროში, რაც ხელსაყრელი და სასარგებლო იქნება ორივე ქვეყნისათვის.

მხარეები ხელს შეუწყობენ ერთობლივ ძალისხმევას გარემოს დაცვის სფეროში შესაბამის სამთავრობო და არასამთავრობო სტრუქტურულ ერთეულებსა და სხვა დაინტერესებულ მხარეებს შორის, ინსტიტუტების, ორგანიზაციებისა და კერძო სამეწარმეო სუბიექტების ჩათვლით.

ეს შეთანხმება მიზნად ისახავს ხელი შეუწყოს მხარეებს განავითარონ მჭიდრო თანამშრომლობა გარემოს დაცვის სფეროში შემდეგი ძირითადი მიმართულებებით:

a) გარემოს დაბინძურებისა და გარემოს მდგომარეობის მონიტორინგი;

b) დაცული ტერიტორიების მართვა, ეკოტურიზმის განვითარება და დაცულ ტერიტორიებზე ისტორიული სახეობების რეინტროდუქცია;

c) ევროპული ინტეგრაციის საკითხებში სახელმწიფო მოხელეთა გადამზადება.

მხარეები ითანამშრომლობენ შემდეგი ფორმებით:

a) ერთობლივი პროექტებისა და პროგრამების განხორციელება;

b) გარემოსდაცვითი კანონმდებლობის, სტანდარტების და გეგმების შესახებ ინფორმაციის გაცვლა;

c) ექსპერტთა კონსულტაციების, ერთობლივი შეხვედრების, კონფერენციების ორგანიზება;

d) სამეცნიერო და ტექნიკური ინფორმაციის გაცვლა;

e) თითოეულ ქვეყანაში ორგანიზებულ საერთაშორისო გარემოსდაცვით კონფერენციებსა და სიმპოზიუმებში ექსპერტთა მონაწილეობა;

f) თანამშრომლობის სხვა ურთიერთშეთანხმებული ფორმები.

1. მხარეები, შეთანხმების ძალაში შესვლის დღიდან 3 თვის ვადაში, ერთმანეთს წერილობით აცნობებენ თანამშრომლობის განხორციელებაზე კოორდინატორების დანიშვნის თაობაზე.

2. კოორდინატორებს ექნებათ რეგულარული კონტაქტები ერთობლივი შეხვედრებისა და/ან სხვა საშუალებებით.

მხარის მიერ წარდგენილ ექსპერტთა დელეგაციების მგზავრობის ხარჯები დაფარული იქნება წარმდგენი მხარის მიერ, თუ სხვაგვარად არ არის შეთანხმებული.

მხარეთა ურთიერთშეთანხმების საფუძველზე, ამ შეთანხმებაში შეიძლება შეტანილ იქნეს ცვლილებები და დამატებები, რომლებიც გაფორმდება ცალკე ოქმის სახით და ძალაში შევა იმავე წესით, როგორი წესითაც ეს შეთანხმება შედის ძალაში. აღნიშნული სახით მიღებული ოქმი წარმოადგენს ამ შეთანხმების განუყოფელ ნაწილს.

ნებისმიერი დავა, რომელიც შეიძლება წარმოიშვას ამ შეთანხმების განმარტებასა და გამოყენებასთან დაკავშირებით, გადაწყდება მხარეებს შორის კონსულტაციებისა და/ან მოლაპარაკების გზით.

1. ეს შეთანხმება მოქმედებს  განუსაზღვრელი ვადით და ძალაში შედის მისი ხელმოწერის დღიდან. თითოეულ მხარეს შეუძლია შეწყვიტოს ამ შეთანხმების მოქმედება მეორე მხარისთვის შეთანხმების მოქმედების შეწყვეტის თაობაზე დიპლომატიური არხებით  წერილობითი შეტყობინების გზით. ეს შეთანხმება მოქმედებას წყვეტს შეტყობინების მიღებიდან 6 თვის შემდეგ.

შერულებულია თბილისში, 2012 წლის 7 სექტემბერს, ორ დედნად, თითოეული ქართულ, ლიტვურ და ინგლისურ ენებზე. ყველა ტექსტი თანაბრად ავთენტიკურია. მხარეთა მიერ ამ შეთანხმების დებულებათა განსხვავებული განმარტების შემთხვევაში უპირატესობა ენიჭება ტექსტს ინგლისურ ენაზე.