აჭარის ავტონომიური რესპუბლიკის უმაღლესი საბჭოს რეგლამენტში ცვლილების შეტანის თაობაზე

აჭარის ავტონომიური რესპუბლიკის უმაღლესი საბჭოს რეგლამენტში (გაზეთი ‚‚აჭარა‛‛, №57, 31.03.2005) შეტანილ იქნეს შემდეგი ცვლილება:

1. 77-ე მუხლის პირველი პუნქტის „ა“-„გ“ ქვეპუნქტები ჩამოყალიბდეს შემდეგი რედაქციით:
„ა) კანონპროექტი გადაეცემა უმაღლესი საბჭოს აპარატის საორგანიზაციო და საქმისწარმოების დეპარტამენტს;
ბ) უმაღლესი საბჭოს აპარატის საორგანიზაციო და საქმისწარმოების დეპარტამენტი კანონპროექტს ბიუროს შესაბამისი გადაწყვეტილების პროექტით, გადასცემს ბიუროს უახლოეს სხდომას;
გ) ბიურო უახლოეს სხდომაზე იღებს გადაწყვეტილებას კანონპროექტის განხილვის პროცედურის დაწყების შესახებ და კანონპროექტს გადასცემს წამყვან კომისიას (კომისიებს), სხვა კომისიებს, ფრაქციებს, უმაღლესი საბჭოს აპარატის იურიდიული და საკადრო საკითხთა  დეპარტამენტს, ასევე მთავრობას;“.

2. მე-80 მუხლის:

ა) პირველი – მე-3 პუნქტები ჩამოყალიბდეს შემდეგი რედაქციით:
,,1. საკანონმდებლო ინიციატივის უფლების მქონე სუბიექტის მიერ უმაღლესი საბჭოსათვის წარდგენილი კანონპროექტი გადაეცემა უმაღლესი საბჭოს აპარატის საორგანიზაციო და საქმისწარმოების დეპარტამენტს, რომელიც აღრიცხავს და რეგისტრაციაში ატარებს წარდგენილ კანონპროექტს. კანონპროექტის უმაღლესი საბჭოსათვის წარდგენის თარიღად მიიჩნევა მისი უმაღლესი საბჭოს აპარატის საორგანიზაციო და საქმისწარმოების დეპარტამენტში რეგისტრაციის თარიღი. დაუშვებელია უმაღლესი საბჭოს აპარატის საორგანიზაციო და საქმისწარმოების დეპარტამენტში დაურეგისტრირებელი კანონპროექტის ბიუროს სხდომაზე განსახილველად გატანა.
1¹. უმაღლესი საბჭოს აპარატის საორგანიზაციო და საქმისწარმოების დეპარტამენტი კანონპროექტს დარეგისტრირებიდან არა უგვიანეს მეორე დღისა, ბიუროს შესაბამისი გადაწყვეტილების პროექტთან ერთად გადასცემს ბიუროს წევრებს, ხოლო ბიუროს სხდომის დღის წესრიგს – ბიუროს სხდომამდე არა უგვიანეს 2 საათისა.
2. უმაღლესი საბჭოსათვის წარდგენილ კანონპროექტს უმაღლესი საბჭოს აპარატის საორგანიზაციო და საქმისწარმოების დეპარტამენტი  წარუდგენს უმაღლესი საბჭოს ბიუროს უახლოეს სხდომას, თუ იგი დეპარტამენტში წარდგენილია ბიუროს დაწყებამდე, როგორც წესი არა უგვიანეს 24 საათისა. ამ ვადის გასვლის შემდეგ წარდგენილი კანონპროექტი გადაეცემა ბიუროს მომდევნო სხდომას, რომელიც უახლოეს სხდომაზე იღებს გადაწყვეტილებას კანონპროექტის განხილვის პროცედურის დაწყების შესახებ.
3. უმაღლესი საბჭოს ბიუროსათვის წარდგენილ კანონპროექტს უნდა ერთვოდეს  უმაღლესი საბჭოს აპარატის იურიდიული და საკადრო საკითხთა და საორგანიზაციო და საქმისწარმოების დეპარტამენტების მიერ მომზადებული კანონპროექტის განხილვის პროცედურის დაწყების შესახებ უმაღლესი საბჭოს ბიუროს გადაწყვეტილების პროექტი, რომელშიც მითითებულია:
ა) კანონპროექტის დასახელება;
ბ) კანონპროექტის ინიციატორი;
გ) კანონპროექტის უმაღლესი საბჭოსათვის წარდგენის თარიღი;
დ) წამყვანი კომისია;
ე) კანონპროექტის კომისიის სხდომაზე განხილვის სავარაუდო თარიღი;
ვ) კანონპროექტის უმაღლესი საბჭოს პლენარულ სხდომაზე განხილვის სავარაუდო თარიღი;
ზ) სხვა კომისიები, რომელთა დასკვნებიც უნდა ერთოდეს კანონპროექტს.‛‛.

ბ) მე-5 და მე-6 პუნქტები ჩამოყალიბდეს შემდეგი რედაქციით:
‚‚5. თუ წარდგენილ კანონპროექტს არ ერთვის ამ რეგლამენტის 79-ე მუხლის  მე-3 და მე-4 პუნქტებით გათვალისწინებული დოკუმენტები, უმაღლესი საბჭოს ბიურო უმაღლესი საბჭოს აპარატის საორგანიზაციო და საქმისწარმოების დეპარტამენტის მოტივირებული დასკვნის საფუძველზე უფლებამოსილია ხარვეზის გამოსასწორებლად კანონპროექტი დაუბრუნოს მის ინიციატორს.
6. უმაღლესი საბჭოს ბიუროს მიერ კანონპროექტის განხილვის პროცედურის დაწყების შესახებ გადაწყვეტილების მიღების შემდეგ კანონპროექტი განსახილველად გადაეცემა წამყვან კომისიას, სხვა კომისიებს, ფრაქციებს, უმაღლესი საბჭოს აპარატის იურიდიული და საკადრო  საკითხთა  დეპარტამენტს, ასევე მთავრობას.‛‛.

3. 81-ე მუხლის  პირველი–მე-3  პუნქტები ჩამოყალიბდეს შემდეგი რედაქციით:
,,1. კანონპროექტის განხილვის პროცედურის დაწყების შესახებ უმაღლესი საბჭოს ბიუროს მიერ გადაწყვეტილების მიღების შემდეგ ბიუროს სხდომაზე წარდგენილ კანონპროექტს უნდა ერთვოდეს უმაღლესი საბჭოს აპარატის საორგანიზაციო და საქმისწარმოების დეპარტამენტის ინფორმაცია და უმაღლესი საბჭოს აპარატის იურიდიული და საკადრო საკითხთა დეპარტამენტის დასკვნა.
2. იურიდიული და  საკადრო საკითხთა დეპარტამენტი დასკვნას აკეთებს შემდეგ საკითხებთან დაკავშირებით:
ა) შეესაბამება თუ არა, ან ხომ არ ეწინააღმდეგება კანონპროექტი საქართველოსა და აჭარის ავტონომიური რესპუბლიკის კანონმდებლობას;
ბ) საჭიროა თუ არა ახალი კანონის მიღება;
გ) ამომწურავია თუ არა გასაუქმებელი ნორმატიული აქტებისა და სავალდებულო ცვლილების პროექტის ნუსხა.
3. საორგანიზაციო და საქმისწარმოების დეპარტამენტის ინფორმაცია მოიცავს ამ რეგლამენტით და სხვა ნორმატიული აქტებით განსაზღვრულ საპროცედურო მოთხოვნებთან კანონპროექტის მომზადებისა და განხილვის მსვლელობის შესაბამისობის საკითხებს.‛‛.

4. 84-ე მუხლის:

ა) მე-2  პუნქტი ჩამოყალიბდეს შემდეგი რედაქციით:
,,2. წამყვანი კომისია კანონპროექტს მიღებიდან 2 კვირის ვადაში იხილავს კომისიის სხდომაზე. კომისიის სხდომის შესახებ ინფორმაცია სხდომამდე არა უგვიანეს 1 დღისა გადაეცემა უმაღლესი საბჭოს აპარატის საორგანიზაციო და საქმისწარმოების დეპარტამენტს, რომელიც უზრუნველყოფს მის გავრცელებას უმაღლეს საბჭოში.‛‛.

ბ) მე-9  და მე-10  პუნქტები ჩამოყალიბდეს შემდეგი რედაქციით:
‚‚9. წამყვანი კომისიის სხდომის შემდეგ კანონპროექტი გადაეცემა უმაღლესი საბჭოს აპარატის საორგანიზაციო და საქმისწარმოების დეპარტამენტს უმაღლესი საბჭოს ბიუროს უახლოესი სხდომის დღის წესრიგში შესატანად. ამასთან, კანონპროექტის თითოეული გვერდი ვიზირებული უნდა იყოს წამყვანი კომისიის აპარატის უფროსის მიერ.
10. უმაღლესი საბჭოსათვის წარდგენილ კანონპროექტს უნდა ერთვოდეს წამყვანი კომისიის დასკვნა. ასევე სავალდებულოა სხვა კომისიების, ფრაქციების, უმაღლესი საბჭოს აპარატის იურიდიული და საკადრო საკითხთა დეპარტამენტისა და სხვა უფლებამოსილი სუბიექტების მიერ დასკვნების წარმოდგენა, მიუხედავად იმისა, დადებითია თუ უარყოფითი, ასევე მათი შენიშვნების პროექტში გათვალისწინების მდგომარეობის ამსახველი ფურცელი, რომელიც მზადდება კანონპროექტის ინიციატორთან შეთანხმებით.‛‛.

5. 96¹ მუხლის პირველი პუნქტი ჩამოყალიბდეს შემდეგი რედაქციით:
,,1. უმაღლესი საბჭოს აპარატის საორგანიზაციო და საქმისწარმოების დეპარტამენტი უზრუნველყოფს უმაღლეს საბჭოში განსახილველად შეტანილი კანონპროექტების აღრიცხვას, იურიდიული და საკადრო საკითხთა დეპარტამენტთან ერთად აკონტროლებს მათი განხილვის მდგომარეობას საკანონმდებლო პროცესის განხორციელების სტადიების მიხედვით და აღნიშნულის თაობაზე ინფორმაციას ყოველკვარტალურად წარუდგენს ბიუროს და საკონსტიტუციო, იურიდიულ და საპროცედურო საკითხთა კომისიას.‛‛.

6. 97-ე მუხლის  პირველი  პუნქტი ჩამოყალიბდეს შემდეგი რედაქციით:
,,1. უმაღლესი საბჭოს მიერ მიღებული კანონპროექტი 5 დღის ვადაში, წამყვანი კომისიის თავმჯდომარის (მისი არყოფნის შემთხვევაში – მოადგილის), კომისიის აპარატის პასუხისმგებელი პირის, უმაღლესი საბჭოს აპარატის იურიდიული და საკადრო საკითხთა და საორგანიზაციო და საქმისწარმოების დეპარტამენტების მიერ ვიზირებისა და სხდომის თავმჯდომარის ხელმოწერის შემდეგ გადაეცემა აჭარის ავტონომიური რესპუბლიკის მთავრობის თავმჯდომარეს.‛‛.

7. 105³  მუხლის  მე-2  პუნქტი ჩამოყალიბდეს შემდეგი რედაქციით:
„2. საინიციატივო ჯგუფი რეგისტრაციაში გატარების თაობაზე განცხადებით მიმართავს უმაღლესი საბჭოს ბიუროს. განცხადებას უნდა ერთვოდეს კანონპროექტი და საინიციატივო ჯგუფის წევრთა შემდეგი მონაცემები: სახელი, გვარი; დაბადების წელი, თვე და რიცხვი; პირადობის დამადასტურებელი მოწმობის ნომერი; მისამართი და საკონტაქტო ტელეფონი. ეს მასალები ბიუროს უახლოესი სხდომიდან 2 დღის ვადაში უმაღლესი საბჭოს აპარატის საორგანიზაციო და საქმისწარმოების დეპარტამენტის მიერ გადაეცემა უმაღლესი საბჭოს საკონსტიტუციო, იურიდიულ და საპროცედურო საკითხთა კომისიას.“.

8. 110¹  მუხლის:

ა) მე-2 პუნქტი ჩამოყალიბდეს შემდეგი რედაქციით:
,,2. რესპუბლიკური ბიუჯეტის კანონის პროექტი თანდართული მასალებით და პრიორიტეტების დოკუმენტი, ასევე მათი განხილვის გრაფიკი, დამტკიცების მომდევნო დღეს ეგზავნება კომისიებს, ფრაქციებს, უმაღლესი საბჭოს ცალკეულ წევრებს, უმაღლესი საბჭოს აპარატის იურიდიული და საკადრო საკითხთა დეპარტამენტს, სახელმწიფო აუდიტის სამსახურს, ხოლო მთავრობას – მხოლოდ განხილვის გრაფიკი.

ბ) მე-6  პუნქტი ჩამოყალიბდეს შემდეგი რედაქციით:
‚‚6. საფინანსო-საბიუჯეტო და ეკონომიკურ საკითხთა კომისია სხვა კომისიების, ფრაქციების, უმაღლესი საბჭოს აპარატის იურიდიული და საკადრო საკითხთა დეპარტამენტის და უმაღლესი საბჭოს იმ წევრთა დასკვნებს, რომლებიც არ არიან გაერთიანებული არც ერთ ფრაქციაში, უმაღლესი საბჭოს ბიუროს წარუდგენს დამტკიცებული გრაფიკის შესაბამისად, რესპუბლიკური ბიუჯეტის კანონის პროექტის და პრიორიტეტების დოკუმენტის შემოსვლიდან არაუგვიანეს 14 დღისა.‛‛.

9. 135¹  მუხლის  მე-2  პუნქტი ჩამოყალიბდეს შემდეგი რედაქციით:
,,2. ანგარიში წარედგინება უმაღლესი საბჭოს აპარატის საორგანიზაციო და საქმისწარმოების დეპარტამენტს, რომელიც დაუყოვნებლივ უგზავნის მას უმაღლესი საბჭოს თავმჯდომარეს, ბიუროს და ფრაქციებს.‛‛.

10. 138¹  მუხლის  მე-6  პუნქტი ჩამოყალიბდეს შემდეგი რედაქციით:
,,6. შრომის ანაზღაურების ფონდში წარმოქმნილი ეკონომიის განკარგვის თაობაზე გადაწყვეტილებას უმაღლესი საბჭოს აპარატის საერთო  დეპარტამენტის (საფინანსო-სამეურნეო და სატრანსპორტო უზრუნველყოფის) წარდგინების საფუძველზე იღებს უმაღლესი საბჭოს თავმჯდომარე.‛‛.

11. 141-ე მუხლის  მე-4  პუნქტი ჩამოყალიბდეს შემდეგი რედაქციით:
,,4. უმაღლესი საბჭოს აპარატის უფროსის მოადგილეს და უმაღლესი საბჭოს აპარატის შემადგენლობაში შემავალი დეპარტამენტების ხელმძღვანელებს უმაღლესი საბჭოს აპარატის უფროსის წარდგინებით თანამდებობაზე ნიშნავს და თანამდებობიდან ათავისუფლებს უმაღლესი საბჭოს თავმჯდომარე. შიდა აუდიტორს თანამდებობაზე ნიშნავს და თანამდებობიდან ათავისუფლებს უმაღლესი საბჭოს თავმჯდომარე.‛‛.

12. 142-ე  მუხლის:

ა) პირველი  პუნქტი ჩამოყალიბდეს შემდეგი რედაქციით:
,,1. უმაღლესი საბჭოს აპარატის შემადგენლობაში სტრუქტურული ერთეულების სახით შედიან: აპარატის ადმინისტრაცია, დეპარტამენტები, უმაღლესი საბჭოს თავმჯდომარის კაბინეტი, უმაღლესი საბჭოს თავმჯდომარის მოადგილის სამდივნო, პრესსამსახური, ბუღალტერია და კომისიების აპარატები, რომელთა შემადგენლობას, თანახმად დამტკიცებული საშტატო განრიგისა, შესაბამისი სტრუქტურული ერთეულის ხელმძღვანელის, ხოლო უმაღლესი საბჭოს თავმჯდომარის მოადგილის სამდივნოს – უმაღლესი საბჭოს თავმჯდომარის მოადგილის და კომისიების აპარატების – კომისიის თავმჯდომარის წარდგინებით, “საჯარო სამსახურის შესახებ” საქართველოს კანონით დადგენილი წესით თანამდებობაზე ნიშნავს და თანამდებობიდან ათავისუფლებს უმაღლესი საბჭოს აპარატის უფროსი.‛‛.

ბ) მე-3  პუნქტი ჩამოყალიბდეს შემდეგი რედაქციით:
‚‚3. უმაღლესი საბჭოს აპარატის სტრუქტურული ერთეულების დებულებებს უმაღლესი საბჭოს აპარატის უფროსის წარდგინებით ამტკიცებს უმაღლესი საბჭოს თავმჯდომარე.‛‛.

გ) მე-5  პუნქტი ჩამოყალიბდეს შემდეგი რედაქციით:
‚‚5. უმაღლესი საბჭოს აპარატის საჯარო მოხელეთა თანამდებობრივ ინსტრუქციებს, გარდა შიდა აუდიტორისა, შესაბამისი სტრუქტურული ერთეულის უფროსთან შეთანხმებით ამტკიცებს უმაღლესი საბჭოს აპარატის უფროსი. შიდა აუდიტორის თანამდებობრივ ინსტრუქციას ამტკიცებს უმაღლესი საბჭოს თავმჯდომარე.‛‛.

13. 144-ე მუხლის  მე-7  პუნქტი ჩამოყალიბდეს შემდეგი რედაქციით:
,,7. თუ უმაღლესი საბჭოს წევრი კალენდარული თვის განმავლობაში არასაპატიო მიზეზით ერთხელ არ დაესწრება კომისიის ან პლენარულ სხდომას, მას დაეკისრება ჯარიმა გაცდენილი დღის ხელფასისა და უმაღლესი საბჭოს წევრის უფლებამოსილების განხორციელებასთან დაკავშირებული სხვა ანაზღაურების ოდენობით. უმაღლესი საბჭოს წევრის კომისიის ან/და პლენარულ სხდომაზე დაუსწრებლობის ფაქტი ფორმდება საოქმო ჩანაწერით, კომისიის ან/და პლენარული სხდომის თავმჯდომარის მიერ აღირიცხება და ეგზავნება უმაღლესი საბჭოს აპარატის საერთო  დეპარტამენტს (საფინანსო-სამეურნეო და სატრანსპორტო უზრუნველყოფის) შესაბამისი თანხის დასაკავებლად.‛‛.

ეს რეგლამენტი ამოქმედდეს 2013  წლის  1 თებერვლიდან.