„ქალაქ თბილისის მერიის ადმინისტრაციის დებულების დამტკიცების შესახებ“ ქალაქ თბილისის მერის 2006 წლის 28 თებერვლის №14 ბრძანებაში ცვლილების შეტანის შესახებ

ა) მე-2 მუხლი ჩამოყალიბდეს შემდეგი რედაქციით:

,მუხლი 2.

ადმინისტრაციის ძირითადი ამოცანებია:

ა) თბილისის მერიისა და მთავრობის საქმიანობის ორგანიზაციული, საინფორმაციო და მატერიალურ-ტექნიკური მომსახურება;

ბ) მოქალაქეთა პრობლემებზე დროული რეაგირება;

გ) ადმინისტრაციის საქმიანობის გამჭვირვალობის მიზნით საჯარო ინფორმაციის ხელმისაწვდომობის უზრუნველყოფა;

დ) თბილისის მერიასა და საზოგადოებას შორის ურთიერთობის კოორდინაცია;

ე) თბილისის მერიისა და მთავრობის ხელმძღვანელობის სამართლებრივი აქტებისა და დავალებების შესრულების კოორდინაცია და კონტროლი;

ვ) ადმინისტრაციაში ერთიანი საქმისწარმოების ორგანიზება;

ზ) სახელმწიფო საიდუმლოების დაცვის ღონისძიებათა უზრუნველყოფა;

თ) ქ. თბილისში სამობილიზაციო საქმიანობის, მოქალაქეთა სამხედრო აღრიცხვაზე აყვანის და მათ სამხედრო სამსახურში გაწვევის, ასევე თავისი კომპეტენციის ფარგლებში სამოქალაქო თავდაცვის საქმიანობის კოორდინაცია;

ი) საკადრო რესურსების მართვა;

კ) მოქალაქეთა მიღების ორგანიზაციული უზრუნველყოფა;

ლ) თბილისის მერიის საქმიანობის შესახებ ოფიციალური ინფორმაციის ოპერატიული გავრცელება მასობრივი ინფორმაციის საშუალებებით;

მ) საგარეო ურთიერთობათა პოლიტიკის პრიორიტეტულ მიმართულებათა შემუშავება და გატარება.