პენიტენციური დაწესებულების ტერიტორიაზე არსებულ მაღაზიაში პროდუქციის ღირებულების შემოწმების წესის დამტკიცების შესახებ

ეს წესი განსაზღვრავს საქართველოს სასჯელაღსრულებისა და პრობაციის სამინისტროს (შემდგომში – სამინისტრო) პენიტენციური დაწესებულებების (შემდგომში – დაწესებულება) ტერიტორიაზე არსებულ მაღაზიებში (შემდგომში – მაღაზია) პროდუქციის ღირებულების შემოწმების წესს.

ინსპექტირებისას მოწმდება მაღაზიაში არსებული პროდუქციის ღირებულების შესაბამისობა ამავე პროდუქციის საბაზრო ღირებულებასთან.

მაღაზიაში არსებული პროდუქციის ღირებულებას ამოწმებს ინსპექტირების კომისია (შემდგომში – კომისია), რომლის შემადგენლობა განისაზღვრება საქართველოს სასჯელაღსრულებისა და პრობაციის მინისტრის ინდივიდუალური ადმინისტრაციულ-სამსართლებრივი აქტით. ამავე ბრძანებით განისაზღვრება ინსპექტირების კომისიის თავმჯდომარე.

იმ შემთხვევაში, თუ დაწესებულების მაღაზიაში გასაყიდი საყოფაცხოვრებო ტექნიკის ზუსტი ანალოგი (ბრენდი) საცალო ვაჭრობით დაკავებულ მსხვილ ობიექტების გაყიდვაში არ არის, დაწესებულების მაღაზიაში არსებული საყოფაცხოვრებო ტექნიკის ფასი არ უნდა აღემატებოდეს კომისიის მიერ სხვა ნებისმიერ 3 სავაჭრო ობიექტში იდენტური საყოფაცხოვრებო ტექნიკის ფასს 10%-ით.

1. კომისია ატარებს  როგორც გეგმურ, ასევე არაგეგმურ ინსპექტირებას.

2. გეგმური ინსპექტირება დაწესებულების თითოეულ მაღაზიაში ტარდება წელიწადში არანაკლებ ოთხჯერ.

3. არაგეგმური ინსპექტირების ჩატარების საფუძველი შესაძლოა იყოს ნებისმიერი ინფორმაცია, მათ შორის, მაღაზიაში არსებული პროდუქციის ღირებულების შესახებ ბრალდებულთა/მსჯავრდებულთა საჩივარი.

1. ინსპექტირების ჩატარებისას კომისია უფლებამოსილია შევიდეს მაღაზიის ტერიტორიაზე, მოითხოვოს მაღაზიაში არსებული პროდუქციის ფასთან დაკავშირებული ინფორმაცია და მაღაზიის წარმომადგენლისგან (მენეჯერისგან) პროდუქციის ფასთან დაკავშირებით მიიღოს ახსნა-განმარტება.

2. ინსპექტირების ჩატარებისას კომისია ასევე უფლებამოსილია მოახდინოს საკონტროლო შესყიდვა მაღაზიაში არსებული პროდუქციის ფასის დადგენის მიზნით.

ინსპექტირება შესაძლებელია ჩატარდეს ისპექტირების შესახებ მაღაზიისთვის წინასწარი შეტყობინების გარეშე.

ინსპექტირება ტარდება მაღაზიის წარმომადგენლის (მენეჯერის) თანდასწრებით.

1. მაღაზიის ინსპექტირებისას  დგება ოქმი, რომელშიც უნდა აისახოს ჩატარების თარიღი, ადგილი, ინსპექტირებისას უშუალოდ მონაწილე პირთა ვინაობა და ინსპექტირებისას მაღაზიაში არსებული პროდუქციის ღირებულება.

2. ოქმს ხელს აწერს ინსპექტირებაში უშუალოდ მონაწილე კომისიის თითოეული წევრი და მაღაზიის წარმომადგენელი (მენეჯერი).

1. მაღაზიის ინსპექტირების შემდგომ 5 სამუშაო დღეში კომისიის წევრები აკეთებენ დასკვნას ინსპექტირების შედეგებთან დაკავშირებით.

2. დასკვნაში უნდა მიეთითოს:

ა) დასკვნის მიღების თარიღი;

ბ) კომისიის წევრების ვინაობა;

გ) მაღაზიის ინსპექტირების თარიღი;

დ) მაღაზიის ინსპექტირებისას, მაღაზიაში არსებული პროდუქციის ღირებულება;

ე) კომისიის მიერ ჩატარებული ბაზრის კვლევის შედეგები;

ვ) მაღაზიაში არსებული პროდუქციის ღირებულების შესაბამისობა ამავე პროდუქციის საბაზრო ღირებულებასთან.

3. ინსპექტირების შედეგებთან დაკავშირებით კომისიის წევრის განსხვავებული აზრი შენიშვნის სახით ფიქსირდება დასკვნაში.

კომისია ვალდებულია, ინსპექტირების შედეგებთან დაკავშირებით მიღებული დასკვნა ინსპექტირების დასრულებიდან 3 სამუშაო დღეში მოხსენებითი ბარათით აცნობოს საქართველოს სასჯელაღსრულებისა და პრობაციის მინისტრს.