„კომერციული ბანკების სტანდარტული სადეპოზიტო სერტიფიკატების დებულების დამტკიცების თაობაზე“ საქართველოს ეროვნული ბანკის პრეზიდენტის 2012 წლის 3 მაისის N49/05 ბრძანებაში ცვლილების შეტანის შესახებ

საქართველოს ეროვნული ბანკის პრეზიდენტის

2017 წლის 15 სექტემბერი

ქ. თბილისი

1.  მე-2 მუხლის მე-5 პუნქტი ჩამოყალიბდეს შემდეგი რედაქციით:

„5. ბანკის მიერ გამოშვებულ სერტიფიკატთან დაკავშირებული ოპერაციების შესახებ ბანკსა და კლიენტს შორის ფორმდება ძირითადი ხელშეკრულება, რომელიც უნდა ითვალისწინებდეს სულ მცირე შემდეგ საკითხებს:

ა) მხარეთა უფლება-მოვალეობებს;

ბ) მომსახურების ძირითად პირობებს;

გ) ძირითადი ხელშეკრულების ფარგლებში სერტიფიკატების ყიდვა-გაყიდვის შესაძლებლობას დამატებითი ხელშეკრულების გაფორმების გარეშე.”.

2. მე-2 მუხლის მე-5 პუნქტის შემდეგ დაემატოს 5¹ პუნქტი შემდეგი რედაქციით:

„5¹. ძირითად ხელშეკრულებაში განხორციელებული ცვლილება არ ვრცელდება უკვე გამოშვებულ სერტიფიკატებზე, თუ მხარეთა შეთანხმებით სხვა რამ არ არის გათვალისწინებული.“.

3. მე-3 მუხლის მე-6 პუნქტი ჩამოყალიბდეს შემდეგი რედაქციით:

„6. სერტიფიკატი უნდა იყოს:

ა) ლარით დენომინირებული და არ შეიძლება იყოს ინდექსირებული სხვა უცხოური ვალუტის მიმართ;

ბ) არანაკლებ 3 თვის ვადიანობის;

გ) საპროცენტო სერტიფიკატის შემთხვევაში პროცენტის გადახდა უნდა ხდებოდეს თვეში, კვარტალში, ნახევარ წელიწადში ან წელიწადში ერთხელ.“.

4. მე-4 მუხლის მე-4 პუნქტი ჩამოყალიბდეს შემდეგი რედაქციით:

„4. სერტიფიკატის რეესტრში თითოეულ სერტიფიკატზე ბანკმა უნდა განახორციელოს შემდეგი აუცილებელი მონაცემების შეტანა:

ა) სერტიფიკატის ნომერი, რომელიც შეიძლება იყოს ერთი და იგივე მხოლოდ იმ სერტიფიკატებისათვის, რომელთა ყველა პირობა იდენტურია, გარდა გამოშვების თარიღისა;

ბ) მფლობელის დასახელება ან სახელი, გვარი;

გ) მფლობელის საიდენტიფიკაციო ან პირადი ნომერი;

დ) სერტიფიკატის გამოშვებისა და დაფარვის თარიღი;

ე) სერტიფიკატის რეგისტრაციის თარიღი.“.

5. მე-4 მუხლის მე-7 და მე-8 პუნქტები ჩამოყალიბდეს შემდეგი რედაქციით:

„7. სერტიფიკატის გასხვისების შესახებ გარიგება დგება სერტიფიკატის გასხვისების დავალების ფორმით. სერტიფიკატის გასხვისების დავალების ფორმას, გარდა კანონმდებლობით გათვალისწინებული შემთხვევებისა, ადგენს ბანკი, რომელიც უნდა მოიცავდეს სულ მცირე შემდეგ სავალდებულო პირობებს და ინფორმაციას:

ა) სერტიფიკატის ნომერი;

ბ) სერტიფიკატის თანხა;

გ) გარიგების თანხა და შემოსავლიანობა;

დ) სერტიფიკატის საწყისი საპროცენტო განაკვეთი;

ე) გარიგების დადებისა და ანგარიშსწორების თარიღები;

ვ) გარიგების მხარეების დასახელება ან სახელი, გვარი;

ზ) გარიგების მხარეების მიმდინარე ანგარიშის ნომრები;

თ) მიმღები მხარის თანხმობა სერტიფიკატის პირობებზე.

8. მხარეები ვალდებულნი არიან სერტიფიკატის გასხვისება დაარეგისტრირონ სერტიფიკატის რეესტრში.“.