ქალაქ ფოთის მუნიციპალიტეტის - ნიკო ნიკოლაძის სახელობის საპატიო ჯილდოს შემოღებისა და მინიჭების წესის დამტკიცების შესახებ

დანართი

ქალაქ ფოთის მუნიციპალიტეტის – ნიკო ნიკოლაძის სახელობის

საპატიო ჯილდოს მინიჭების წესი

მუხლი 1. ზოგადი დებულებები

1. ეს წესი შემუშავებულია საქართველოს ორგანული კანონის „ადგილობრივი თვითმმართველობის კოდექსი“ 24-ე მუხლის პირველი პუნქტი „ა.დ“ ქვეპუნქტის შესაბამისად და განსაზღვრავს ქალაქ ფოთის მუნიციპალიტეტის – ნიკო ნიკოლაძის სახელობის საპატიო ჯილდოს (შემდგომში – საპატიო ჯილდო) მინიჭების საფუძვლებს და განხილვის წესს.

2. საპატიო ჯილდო შესაძლებლია მიენიჭოს საქართველოს მოქალაქეს, უცხო ქვეყნის მოქალაქეს და ასევე, განსაკუთრებულ შემთხვევაში მოქალაქეობის არმქონე პირს, რომელსაც საკუთარი საზოგადოებრივი, პროფესიონალური, სპორტული ან/და სხვა საქმინობით/მოღვაწეობით:

ა) განსაკუთრებული დამსახურება აქვს ქალაქ ფოთის მუნიციპალიტეტის ან/და საქართველოს წინაშე;

ბ) მნიშვნელოვანი წვლილი შეიტანა ქალაქ ფოთის მუნიციპალიტეტის განვითარების საქმეში;

გ) მხარი დაუჭირა და განახორციელა საზოგადოებრივი მნიშვნელობის ინფრასტრუქტურული/სამშენებლო, სოციალური და სხვა პროგრამები;

დ) პროფესიონალური, სპორტული წარმატებით სახელი გაუთქვა ქვეყანას და ქალაქ ფოთის მუნიციპალიტეტს;

ე) მნიშვნელოვანი წვლილი შეიტანა მოსახლეობის განათლებასა და სულიერ განვითარებაში.

მუხლი 2. საპატიო ჯილდო

1. საპატიო ჯილდო გაიცემა ფულადი ჯილდოს (არაუმეტეს 500 ლარი), სიგელის, თემატური სუვენირის, თემატური წიგნის, კულტურული ნამუშევრის ან სხვა ფასიანი საჩუქრის სახით.

2. საპატიო ჯილდო პირს მიენიჭება სიცოცხლეში ერთხელ. შესაძლებელია განსაკუთრებული დამსახურებისთვის საპატიო ჯილდოს მინიჭება განხორციელდეს გარდაცვალების შემდგომ.

მუხლი 3. საპატიო ჯილდოს მინიჭების პროცედურა

1. საპატიო ჯილდოს მინიჭებაზე კანდიდატის წამოყენების უფლება აქვს:

ა) ქალაქ ფოთის მუნიციპალიტეტის მერს;

ბ) ქალაქ ფოთის მუნიციპალიტეტის საკრებულოს თავმჯდომარეს;

გ) ქალაქ ფოთის მუნიციპალიტეტის საკრებულოს ცალკეულ წევრებს ან ფრაქციას;

დ)ქალაქ ფოთის მუნიციპალიტეტში რეგისტრირებულ საზოგადოებრივ და შემოქმედებით კავშირებს;

ე) ქალაქ ფოთის მუნიციპალიტეტის სამოქალაქო მრჩეველთა საბჭოს ½-ს.

2.საპატიო ჯილდოს მინიჭებაზე წარდგენილი საინიციატივო მიმართვა უნდა მოიცავდეს წერილობით დასაბუთებას, მასში ჩამოყალიბებული უნდა იყოს წამოყენებული კანდიდატის პიროვნული თვისებები და საპატიო ჯილდოზე წარდგენის საფუძვლები. მიმართვა დადასტურებული უნდა იყოს შესაბამისი ხელმოწერ(ებ)ით.

3. საპატიო ჯილდოზე კანდიდატის წარდგენის ინიციატივას შესაძლებელია აგრეთვე დაერთოს:

ა) პიროვნების ბიოგრაფიული მონაცემები;

ბ) კომპეტენტური ორგანიზაციების, დამსახურებული მოღვაწეების რეკომენდაცია;

გ) კანდიდატის ღვაწლის/დამსახურების ამსახველი მასალა;

დ)კანდიდატის პირადობის დამადასტურებელი დოკუმენტის ასლი, ფოტოსურათი (3X4) და წერილობითი თანხმობა.

4.შემოსული ინიციატივების განხილვას აწარმოებს ქალაქ ფოთის მუნიციპალიტეტის მერის ბრძანებით შექმნილი სამუშაო ჯგუფი. სამუშაო ჯგუფის შემადგენლობაში შესაძლებელია იყვნენ მერიის სტრუქტურული ერთეულის ხელმძღვანელები, სხვა საჯარო მოხელეები, სამოქალაქო მრჩეველთა საბჭოს წევრები, საზოგადო მოღვაწეები, სხვა პირები, აგრეთვე სამუშაო ჯგუფის შემადგენლობაში მოწვეულ უნდა იყვნენ საკრებულოს წევრები.

5. სამუშაო ჯგუფის მიერ საკითხის განხილვის დეტალები და გადაწყვეტილების მიღების საფუძვლები აისახება ოქმში, რომელსაც ადგენს მერის ბრძანებით განსაზღვრული პირი. ოქმს ხელს აწერს ყველა დამსწრე წევრი. გადაწყვეტილება მიიღება ხმათა უბრალო უმრავლესობით. განსხვავებული აზრი დაერთვის ოქმს წერილობითი სახით, ხმების თანაბრად გაყოფის შემთხვევაში გადამწყვეტი ხმის უფლება აქვს სამუშაო ჯგუფის ხელმძღვანელს.

6. ინიციატივების განხილვის, წარმოდგენილი არგუმენტების შეჯერების და შეფასების საფუძველზე, სამუშაო ჯგუფის მიერ გადაწყვეტილების მიღების შემდგომ, საპატიო ჯილდოს ანიჭებს ქალაქ ფოთის მუნიციპალიტეტის მერი, რის შესახებაც გამოსცემს ბრძანებას.

7. ქალაქ ფოთის მუნციპალიტეტის მერი საპატიო ჯილდოს ანიჭებს საზეიმო ვითარებაში ან მის გარეშე.

8. საპატიო ჯილდოს მინიჭების შესახებ ჩანაწერი კეთდება სპეციალურ წიგნში, რომლის წარმოებას და შენახვას უზრუნველყოფს ქალაქ ფოთის მუნიციპალიტეტის მერია.

მუხლი 4. საპატიო ჯილდოს ჩამორთმევა

1. პირს შესაძლებელია ჩამოერთვას საპატიო ჯილდო შემდეგ შემთხვევებში, თუ:

ა) პირმა ჩაიდინა საქართველოს სისხლის სამართლის კოდექსით გათვალისწინებული განზრახ დანაშაული;

ბ) განახორციელა საქართველოს სახელმწიფოს ან/და ქალაქ ფოთის მუნიციპალიტეტის ინტერესების საწინააღმდეგო ქმედება;

გ) ჩაიდინა ისეთი საქციელი, რამაც გამოიწვია სხვისი ღირსებისა და პატივის მნიშვნელოვანი ხელყოფა;

დ) პიროვნებას სურვილი აქვს საკუთარი ნებით უარი თქვას საპატიო ჯილდოზე, ასეთ შემთხვევაში წერილობითი განაცხადი წარედგინება ქალაქ ფოთის მუნიციპალიტეტის მერს.

2. საპატიო ჯილდოს ჩამორთმევა ხორციელდება სამუშაო ჯგუფის მიერ საკითხის განხილვის შემდგომ, ქალაქ ფოთის მუნიციპალიტეტის მერის ბრძანებით.