საკონსულო მოსაკრებლის უკან დაბრუნების წესისა და შემთხვევების დამტკიცების შესახებ

საკონსულო მოსაკრებლის უკან დაბრუნების წესი და შემთხვევები

მუხლი 1

ეს წესი განსაზღვრავს საზღვარგარეთ საქართველოს დიპლომატიური წარმომადგენლობის, საკონსულო დაწესებულებისა და მესამე სახელმწიფოს დიპლომატიურ წარმომადგენლობაში შექმნილი საქართველოს ინტერესთა სექციის (შემდგომში _ დაწესებულება) მიერ საკონსულო მოქმედების შესრულებისათვის ან/და მომსახურების გაწევისათვის ,,საკონსულო მოსაკრებლის შესახებ“ საქართველოს კანონით დადგენილი თანხის _ საკონსულო მოსაკრებლის უკან დაბრუნების წესსა და შემთხვევებს.

მუხლი 2

გადახდილი საკონსულო მოსაკრებელი ექვემდებარება უკან დაბრუნებას, თუ:

ა) დაინტერესებული პირი შესაბამისი მომსახურების შესახებ განცხადების რეგისტრაციამდე უარს განაცხადებს მომსახურების მიღებაზე;

ბ) საკონსულო მომსახურების გაწევისას საკონსულო თანამდებობის პირის მიერ დოკუმენტები შედგენილი ან/და გაცემულ იქნა არასწორი მონაცემებით, თუ დაინტერესებულ პირს აღარ სურს მომსახურების ხელახლა მიღება;

გ) მომსახურების ნაწილობრივ ან სრულად გაწევა ვერ განხორციელდა განმცხადებლისა და დაწესებულებისაგან დამოუკიდებელი მიზეზების (მათ შორის, ტექნიკური ხასიათის დაბრკოლებების, მეტეოროლოგიური პირობების, საგანგებო სიტუაციების, საომარი მდგომარეობის, სხვა ფორსმაჟორული გარემოებების) გამო, გარდა იმ შემთხვევისა, თუ არსებობს უარის თქმის სამართლებრივი საფუძველი;

დ) საკონსულო მოსაკრებელი გადახდილია იმ პირის მიერ, რომელიც სარგებლობს

,,საკონსულო მოსაკრებლის შესახებ’’ საქართველოს კანონით დადგენილი შესაბამისი შეღავათით საკონსულო მოსაკრებლის გადახდაზე;

ე) საკონსულო მოსაკრებელი გადახდილია ,,საკონსულო მოსაკრებლის შესახებ’’ საქართველოს კანონით განსაზღვრულზე მეტი ოდენობით ან ისეთი მომსახურებისათვის, რომლისთვისაც არ არის გათვალისწინებული საკონსულო მოსაკრებლის გადახდა.

მუხლი 3

1. თუ საკონსულო მოსაკრებელი კანონით დადგენილი ოდენობით გადახდილია იმ პირის მიერ, რომელიც გათავისუფლებულია საკონსულო მოსაკრებლის 50 პროცენტის გადახდისაგან, პირს უბრუნდება სხვაობა მის მიერ გადახდილ თანხასა და კანონით დადგენილი შეღავათით სარგებლობის შემთხვევაში გადასახდელ საკონსულო მოსაკრებელის ოდენობას შორის.

2. თუ საკონსულო მოსაკრებელი გადახდილია ,,საკონსულო მოსაკრებლის შესახებ’’ საქართველოს კანონით დადგენილზე მეტი ოდენობით, საკონსულო მოსაკრებლის

გადამხდელს უბრუნდება სხვაობა მის მიერ გადახდილ თანხასა და კანონით დადგენილ საკონსულო მოსაკრებლის ოდენობას შორის.

მუხლი 4

1. საკონსულო მოსაკრებლის უკან დაბრუნების თაობაზე მოთხოვნა წარდგენილი უნდა იქნეს საკონსულო მოსაკრებლის გადახდიდან 3 თვის ვადაში. ამ ვადის გასვლის შემდეგ, გადახდილი საკონსულო მოსაკრებელი არ ექვემდებარება უკან დაბრუნებას.

2. საკონსულო მოსაკრებელი უკან ბრუნდება დაწესებულების ხელმძღვანელის გადაწყვეტილებით, დაინტერესებული პირის წერილობითი მოთხოვნიდან 10 სამუშაო დღის ვადაში, იმავე ვალუტაში, რომელშიც განხორციელდა მისი გადახდა.

3. საკონსულო მოსაკრებლის შესაბამისი პირისათვის უკან დაბრუნება ხორციელდება ნაღდი ან უნაღდო ანგარიშსწორებით, მიმდინარე შემოსავლის ფარგლებში, იმავე სახაზინო კოდიდან, რომელშიც განხორციელდა მისი გადახდა.