„საქართველოს თავდაცვის სამინისტროსა და მის სისტემაში შემავალი საჯარო სამართლის იურიდიული პირების ბალანსზე რიცხული გამოუსადეგარ (ზღვრულ) მდგომარეობამდე მიყვანილი ან დაკარგული მატერიალური საშუალებების (რომელთა ჩამოწერას, აღრიცხვიდან მოხსნას და განკარგვას არ არეგულირებს „გამოუსადეგარ (ზღვრულ) მდგომარეობამდე მიყვანილი ან დაკარგული შეიარაღებისა და ტექნიკის, სამხედრო-ტექნიკური და საბრძოლო მასალების ნომენკლატურაში შემავალი და სხვა ქონების ჩამოწერისა და აღრიცხვიდან მოხსნის დებულების დამტკიცების შესახებ“ საქართველოს პრეზიდენტის 2007 წლის 21 მარტის №197 ბრძანებულება) ჩამოწერის, აღრიცხვიდან მოხსნისა და განკარგვის შესახებ“ საქართველოს მთავრობის 2018 წლის 21 თებერვლის №98 დადგენილებაში ცვლილების შეტანის თაობაზე

1.  სათაური ჩამოყალიბდეს შემდეგი რედაქციით:

„საქართველოს თავდაცვის სამინისტროსა და მის სისტემაში შემავალი საჯარო სამართლის იურიდიული პირების ბალანსზე რიცხული გამოუსადეგარ (ზღვრულ) მდგომარეობამდე მიყვანილი ან დაკარგული მატერიალური საშუალებებისა და სხვა ქონების ჩამოწერისა და აღრიცხვიდან მოხსნის ზოგიერთ ღონისძიებათა შესახებ“.

2. პირველი მუხლი ჩამოყალიბდეს შემდეგი რედაქციით:

„მუხლი 1. „სახელმწიფო ქონების შესახებ“ საქართველოს კანონის პირველი მუხლის მე-5 პუნქტის „ი“ ქვეპუნქტის საფუძველზე, ამ დადგენილებით განსაზღვრულ წესს დაექვემდებაროს საქართველოს თავდაცვის სამინისტროსა და მის სისტემაში შემავალი საჯარო სამართლის იურიდიული პირების ბალანსზე რიცხული გამოუსადეგარ (ზღვრულ) მდგომარეობამდე მიყვანილი ან დაკარგული:

1. ამ დადგენილების მე-2 და მე-3 მუხლებით გათვალისწინებული იმ ქონების ჩამოწერა, აღრიცხვიდან მოხსნა და განკარგვა, რომლის ჩამოწერას, აღრიცხვიდან მოხსნასა და განკარგვას არ არეგულირებს „გამოუსადეგარ (ზღვრულ) მდგომარეობამდე მიყვანილი ან დაკარგული შეიარაღებისა და ტექნიკის, სამხედრო-ტექნიკური და საბრძოლო მასალების ნომენკლატურაში  შემავალი და სხვა ქონების ჩამოწერისა და აღრიცხვიდან მოხსნის დებულების დამტკიცების შესახებ“ საქართველოს პრეზიდენტის 2007 წლის 21 მარტის  №197  ბრძანებულება.

2. ამ დადგენილების 4¹ მუხლით გათვალისწინებული ქონების ჩამოწერა და აღრიცხვიდან მოხსნა.“.

3. მე-3 მუხლის „გ“ ქვეპუნქტი ჩამოყალიბდეს შემდეგი რედაქციით:

„გ) მატერიალური საშუალებები, რომლებიც დაიკარგა ან მიყვანილ იქნა გამოუსადეგარ (ზღვრულ) მდგომარეობამდე მიუხედავად იმისა, შესაძლებელია თუ არა საინსპექტორო მოწმობაში ფასის ან/და ზარალის ოდენობის მითითება.“.

4. დაემატოს შემდეგი შინაარსის 4¹ მუხლი:

„მუხლი 4¹

1. საქართველოს თავდაცვის სამინისტროს შესაბამისი ქვედანაყოფი ან სამინისტროს სისტემაში შემავალი საჯარო სამართლის იურიდიული პირი (შემდგომში − ბალანსმფლობელი), რომლის ბალანსზეც  იმყოფება ამ დადგენილებით  და „გამოუსადეგარ (ზღვრულ) მდგომარეობამდე მიყვანილი ან დაკარგული შეიარაღებისა და ტექნიკის, სამხედრო-ტექნიკური და საბრძოლო მასალების ნომენკლატურაში შემავალი და სხვა ქონების ჩამოწერისა და აღრიცხვიდან მოხსნის დებულების დამტკიცების შესახებ“ საქართველოს პრეზიდენტის 2007 წლის 21 მარტის №197 ბრძანებულებით დამტკიცებული დებულებით გათვალისწინებული ჩამოსაწერი ქონება, ამავე ბრძანებულებით დამტკიცებული დებულებით გათვალისწინებულ შემთხვევებში, შესაბამის დოკუმენტს (ცნობას, რომ ჩამოსაწერ ქონებაზე არ მიმდინარეობს სისხლის სამართლის საპროცესო კოდექსით გათვალისწინებული მოქმედებები/თანხმობას ჩამოწერაზე, თუ ჩამოსაწერ ქონებაზე მიმდინარეობს/მიმდინარეობდა სისხლის სამართლის საპროცესო კოდექსით გათვალისწინებული მოქმედებები) გამოითხოვს შემდეგი სამართალდამცავი/ საგამოძიებო ორგანოებიდან:

ა) სამხედრო პოლიციიდან;   

ბ) სხვა სამართალდამცავი/საგამოძიებო ორგანოდან იმ შემთხვევაში, თუ ბალანსმფლობელისთვის (მათ შორის, წინა ბალანსმფლობელისთვის) ცნობილია, რომ ჩამოსაწერ ქონებასთან დაკავშირებით ამ ორგანოში მიმდინარეობს/მიმდინარეობდა სისხლის სამართლის საპროცესო კოდექსით გათვალისწინებული მოქმედებები.

2. ბალანსმფლობელი საქართველოს თავდაცვის სამინისტროს სამხედრო-ტექნიკურ საკითხთა მუდმივმოქმედ კომისიას, კანონმდებლობით დადგენილ დოკუმენტაციასთან ერთად, წარუდგენს ამ მუხლით გათვალისწინებულ ცნობას/თანხმობას, ხოლო იმ შემთხვევაში, თუ მისთვის უცნობია ჩამოსაწერ ქონებასთან დაკავშირებით მიმდინარე/დასრულებული სისხლის სამართლის საპროცესო მოქმედებების შესახებ, აგრეთვე აღნიშნულ ინფორმაციასაც.“.