„დროებითი შრომისუუნარობის ექსპერტიზის ჩატარების და საავადმყოფო ფურცლის გაცემის წესის შესახებ“ საქართველოს შრომის, ჯანმრთელობისა და სოციალური დაცვის მინისტრის 2007 წლის 25 სექტემბრის N281/ნ ბრძანებაში ცვლილების შეტანის თაობაზე

1. 8¹ მუხლის შემდეგ დაემატოს შემდეგი შინაარსის 8² მუხლი:

„მუხლი 8². საავადმყოფო ფურცლის/ცნობის გაცემა ახალი კორონა ვირუსის (COVID-19) დროს

1. კოვიდინფიცირებულ პაციენტებზე, რომლებმაც გაიარეს მკურნალობის კურსი სტაციონარში, მაგრამ შრომისუუნარობა ან/და იზოლაცია გრძელდება და ესაჭიროებათ ამბულატორიული მეთვალყურეობა:

ა) ბინაზე მკურნალობის/იზოლაციის შემთხვევაში სტაციონარის მიერ გაცემული ღია საავადმყოფო ფურცელი გრძელდება ამ წესის მე-5 მუხლის მე-8 პუნქტით დადგენილი პირობებისა და ვადების გათვალისწინებით ამბულატორიული მეთვალყურეობის განმახორციელებელი სამედიცინო დაწესებულების მიერ პაციენტის ონლაინმეთვალყურეობის რეჟიმში;

ბ) კოვიდსასტუმროში მკურნალობის/იზოლაციის შემთხვევაში სტაციონარის მიერ საავადმყოფო ფურცლის გრაფაში - „შეუდგეს მუშაობას” – იწერება „გადადის კოვიდსასტუმროში“ და დასტურდება ბეჭდით. კოვიდსასტუმროში მკურნალობის/იზოლაციის პერიოდზე, მოთხოვნის შემთხვევაში, გაიცემა ამ წესის 8¹ მუხლით განსაზღვრული ცნობა.

2. პირებზე, რომლებსაც ლაბორატორიულად დაუდასტურდათ კოვიდინფექცია ან გამოხატული აქვთ კოვიდინფექციისთვის დამახასიათებელი სიმპტომები და მკურნალობის კურსს გადიან ამბულატორიულად:

ა) ბინაზე იზოლაციის პირობებში, გაიცემა საავადმყოფო ფურცელი ამბულატორიული მეთვალყურეობის განმახორციელებელი სამედიცინო დაწესებულების (გარდა „ცენტრალური ონლაინკლინიკისა“) პაციენტის ონლაინმეთვალყურეობის რეჟიმში;

ბ) კოვიდსასტუმროში მკურნალობის/იზოლაციის პირობებში, მოთხოვნის შემთხვევაში, გაიცემა ამ წესის 8¹ მუხლით განსაზღვრული ცნობა.

3. ამ მუხლის პირველი პუნქტის „ბ“ ქვეპუნქტითა და მე-2 პუნქტის „ბ“ ქვეპუნქტით გათვალისწინებულ შემთხვევებში ცნობის გაცემის საფუძველს წარმოადგენს კარანტინის/იზოლაციის მართვის ელექტრონული სისტემაში (registration.gov.ge) დაფიქსირებული მონაცემები.

4. სამინისტრო უფლებამოსილია, მოთხოვნის შემთხვევაში, გასცეს ამ წესის 8¹ მუხლით განსაზღვრული ცნობა პირებზე, რომლებმაც ისარგებლეს „ცენტრალური ონლაინკლინიკის“ მომსახურებით.“.

2. მე-12 მუხლის მე-4 პუნქტის „ზ“ ქვეპუნქტი ჩამოყალიბდეს შემდეგი რედაქციით:

„ზ) საავადმყოფო ფურცლის დახურვისას, გრაფაში - „შეუდგეს მუშაობას” - რიცხვი და თვე იწერება სიტყვიერად, ხოლო საავადმყოფო ფურცლის გაგრძელების შემთხვევაში ამავე გრაფაში ჩაიწერება - „შრომისუუნარობა გრძელდება” და ახლად გაცემული საავადმყოფო ფურცლის ნომერი და სერია (გარდა ამ წესის 8² მუხლის პირველი პუნქტის „ბ“ ქვეპუნქტით გათვალისწინებული შემთხვევისა);“.

3. III თავის შემდეგ დაემატოს შემდეგი შინაარსის IV თავი:

„IV თავი

გარდამავალი დებულებები

8² მუხლის მოქმედება ვრცელდება 2020 წლის 19 სექტემბრიდან წარმოშობილ ურთიერთობებზე.“.

ბრძანება ამოქმედდეს გამოქვეყნებისთანავე.