1. დასაქმების საინფორმაციო სისტემაში (სარეგისტრაციო პორტალზე) მიმწოდებლის მიერ საზოგადოებრივი სამუშაოს ვაკანსიის ატვირთვის შემდეგ სააგენტო უზრუნველყოფს საზოგადოებრივი სამუშაოს ვაკანსიით განსაზღვრული მოთხოვნების შესაბამისად იდენტიფიცირებული შრომისუნარიანი პირების შესაბამისობის დადგენას.
2. სააგენტო შრომისუნარიანი პირების საზოგადოებრივი სამუშაოს ვაკანსიასთან შესაბამისობის დადგენის შემდეგ უზრუნველყოფს:
ა) მოსარგებლესთან შეხვედრას, რომელიც შეიძლება იყოს როგორც ინდივიდუალური, ისე ჯგუფური;
ბ) ინფორმაციის მიწოდებას საზოგადოებრივი სამუშაოს პირობების, სარგებლობის წესებისა და პროცედურების შესახებ, საზოგადოებრივი სამუშაოს ვაკანსიაზე უარის თქმის შემთხვევაში მოსალოდნელ ადმინისტრაციულ გადაწყვეტილებებზე. ასევე აწვდის მათ ზოგად ინფორმაციას სააგენტოს სხვა ღონისძიებების შესახებ;
გ) მოსარგებლის პროფილირებას და პროფილირების საფუძველზე შესთავაზებს:
გ.ა) საზოგადოებრივი სამუშაოს ვაკანსიას;
გ.ბ) მისი უნარ-ჩვევების, გამოცდილებისა და პროფესიული განვითარების შესაბამის შრომის ბაზარზე არსებულ ვაკანსიას;
გ.გ) იმ შემთხვევაში თუ მოსარგებლე დასაქმებულია არაფორმალურ სექტორში, დასაქმების ფორმალიზებას;
გ.დ) პროფესიული მომზადების, პროფესიული გადამზადების ქვეპროგრამებში ჩართვას.
3. თუ შრომისუნარიანი პირი თანახმაა ამ მუხლის მე-2 პუნქტის „გ.ა“, „გ.ბ“ ან „გ.გ“ ქვეპუნქტებით გათვალისწინებულ ერთ-ერთ შეთავაზებაზე, ოჯახს 4 წლის განმავლობაში უწყვეტად უნარჩუნდება საარსებო შემწეობა, გარდა იმ შემთხვევისა, როდესაც ოჯახის სოციალურ-ეკონომიკური მდგომარეობის ხელახალი გადამოწმება მოთხოვნილია უშუალოდ ოჯახის მიერ;
4. თუ მოსარგებლემ მიიღო ამ მუხლის მე-2 პუნქტის „გ.ა“ ,“გ.ბ“ ან „გ.გ“ ქვეპუნქტებით გათვალისწინებული ერთ-ერთ შეთავაზება, ხელი მოაწერა ხელშეკრულებას და არ შეასრულა ნაკისრი ვალდებულება, ექვემდებარება ხელშეკრულების შეწყვეტას და მომდევნო თვიდან ერთი წლის შემდეგ ოჯახის სოციალურ-ეკონომიკური მდგომარეობის ხელახალ გადამოწმებას;
5. შრომისუნარიანი პირის ქვეპროგრამაში მონაწილეობა შეწყდება ქვემოთ ჩამოთვლილთაგან ერთ-ერთი საფუძვლის წარმოშობის შემთხვევაში:
ა) პირადი განცხადებით;
ბ) მოსარგებლის გარდაცვალებისას;
გ) მოსარგებლის წინასწარ პატიმრობაში ყოფნისას;
დ) მოსარგებლის მიმართ სასამართლოს გამამტყუნებელი განაჩენის კანონიერ ძალაში შესვლისას, რომლითაც პირს შეეფარდა თავისუფლების აღკვეთის აღსრულება;
ე) საზოგადოებრივი სამუშაოს შესრულებაზე თავის არიდების/არაკეთილსინდისიერად შესრულების გამო სოციალური ხელშეკრულების შეწყვეტისას;
ვ) შრომის ბაზარზე არსებულ ვაკანსიაზე დასაქმების და მოსარგებლის მიზეზით შრომითი ურთიერთობის შეწყვეტისას;
ზ) დასაქმების ფორმალიზების შემდეგ ფორმალიზების შეწყვეტისას;
თ) სხვა საფუძვლით თუ ის გამომდინარეობს ქვეპროგრამიდან.
6. თუ შრომისუნარიანი პირი არ არის თანახმა ამ მუხლის მე-2 პუნქტის „გ“ ქვეპუნქტით გათვალისწინებულ შეთავაზებებზე, უარის თქმის თვიდან ერთი წლის შემდეგ განხორციელდება ოჯახის სოციალურ-ეკონომიკური მდგომარეობის ხელახალი გადამოწმება.
7. ამ მუხლის მე-5 პუნქტით განსაზღვრული საფუძვლების წარმოშობის თვიდან ერთი წლის შემდეგ განხორციელდება ოჯახის სოციალურ-ეკონომიკური მდგომარეობის ხელახალი გადამოწმება.
8. ამ მუხლის მე-2 პუნქტის „გ.გ“ ქვეპუნქტით გათვალისწინებულ შეთავაზებაზე თანხმობის შემთხვევაში სსიპ შემოსავლების სამსახურის მონაცემთა ბაზაში რეგისტრაციის მიზნით თვითდასაქმებულს ეძლევა შეთავაზებიდან ერთი თვის ვადა, დაქირავებით დასაქმებულს – შეთავაზებიდან სამი თვის ვადა.
9. ამ მუხლის მე-2 პუნქტის „გ.დ“ ქვეპუნქტით განსაზღვრულ შეთავაზებაზე თანხმობის შემთხვევაში, ამავე პუნქტით განსაზღვრულ სხვა შეთავაზებებზე თანხმობის/უარის თქმის ვალდებულება შეჩერდება პროფესიული მომზადების, პროფესიული გადამზადების ქვეპროგრამის განხორციელების ვადით. ამ ვადის გასვლის შემდეგ მოსარგებლის მიმართ გავრცელდება ამ მუხლით დადგენილი პირობები.
10. მოსარგებლე:
ა) უფლებამოსილია აირჩიოს ამ მუხლის მე-2 პუნქტის „გ“ ქვეპუნქტით გათვალისწინებული შეთავაზებებიდან ერთ-ერთი;
ბ) უფლებამოსილია შეთავაზებაზე უარის თქმის მიუხედავად, შეცვალოს გადაწყვეტილება და მიიღოს შეთავაზებიდან ერთ-ერთი. ასეთ შემთხვევაში მისი ოჯახის მიმართ გავრცელდება ამ მუხლის მე-3 პუნქტის მოქმედება. გადაწყვეტილების დაფიქსირება შესაძლებელია დასაქმების სააგენტოს ან სოციალური სააგენტოს ნებისმიერ ტერიტორიულ ერთეულში.
გ) უფლებამოსილია მიმართოს დასაქმების სააგენტოს ან სოციალურ სააგენტოს ნებისმიერ ტერიტორიულ ერთეულს ქვეპროგრამაში ჩართვის თაობაზე.
11. იმ შემთხვევაში, თუ ოჯახში რამდენიმე შრომისუნარიანი წევრია და მათგან მინიმუმ ერთმა პირმა განაცხადა თანხმობა ამ მუხლის მე-2 პუნქტის „გ“ ქვეპუნქტით გათვალისწინებულ შეთავაზებაზე, ოჯახის მიმართ გავრცელდება ამ მუხლის მე-3 პუნქტის მოქმედება.
12. ქვეპროგრამის ადმინისტრირების მიზნებისთვის სააგენტო, სოციალური სააგენტო და სსიპ შემოსავლების სამსახური უზრუნველყოფენ მონაცემების მიმოცვლას ურთიერთშეთანხმებული ფორმატითა და კანონმდებლობის შესაბამისად.
13. ამ წესით გათვალისწინებული საგამონაკლისო ნორმების გარდა, საარსებო შემწეობის ადმინისტრირების საკითხები რეგულირდება „სოციალური დახმარების შესახებ“ საქართველოს მთავრობის 2006 წლის 28 ივლისის №145 დადგენილები