„საქართველოს თავდაცვის სამინისტროს მიერ გასაცემი სალიცენზიო და სანებართვო მოწმობის ფორმების, მათი გამოყენებისა და აღრიცხვა-ანგარიშგების წესის დამტკიცების თაობაზე“ საქართველოს თავდაცვის მინისტრის 2008 წლის 26 აგვისტოს №481 ბრძანებაში ცვლილების შეტანის თაობაზე

საქართველოს თავდაცვის მინისტრის

2023 წლის 12 აპრილი

ქ. თბილისი

1. პირველი მუხლის პირველი პუნქტი ჩამოყალიბდეს შემდეგი რედაქციით:

„1. ეს წესი შემუშავებულია „მკაცრი აღრიცხვის ფორმების შესახებ“ საქართველოს კანონის მე-8 მუხლისა და „მკაცრი აღრიცხვის ფორმების ნუსხის, მკაცრი აღრიცხვის ფორმების რეგისტრაციის წესისა და მკაცრი აღრიცხვის ფორმების რეგისტრაციის ჟურნალის ფორმის დამტკიცების თაობაზე“ საქართველოს ეკონომიკისა და მდგრადი განვითარების მინისტრის 2020 წლის 31 აგვისტოს №1-1/345 ბრძანების საფუძველზე.“.

2. მე-5 და მე-6 მუხლები ჩამოყალიბდეს შემდეგი რედაქციით:

„მუხლი 5. სალიცენზიო ან/და სანებართვო მოწმობის გაცემა

1. სალიცენზიო ან/და სანებართვო მოწმობის გაცემა მფლობელზე წარმოებს პიროვნების პირადობის დამადასტურებელი დოკუმენტის წარდგენის საფუძველზე.

2. სალიცენზიო ან/და სანებართვო მოწმობის მესამე პირზე გაცემა შესაძლებელია ლიცენზიის ან ნებართვის მაძიებლის/მფლობელის მიერ გაცემული მინდობილობისა და პიროვნების პირადობის დამადასტურებელი დოკუმენტის წარდგენის შემთხვევაში (მინდობილობა რჩება ადგილზე).

3. სალიცენზიო ან/და სანებართვო მოწმობის მიღებაზე უფლებამოსილი პირი ხელმოწერით ადასტურებს სალიცენზიო ან/და სანებართვო მოწმობების მიღების ფაქტს უწყებრივ სალიცენზიო/სანებართვო რეესტრში.

4. სალიცენზიო ან/და სანებართვო მოწმობის დამოწმებული ასლი ინახება საქმეში ლიცენზიის/ნებართვის მაძიებლის მიერ ლიცენზიის/ნებართვის მისაღებად წარმოდგენილ დოკუმენტებთან ერთად.

მუხლი 6. სალიცენზიო ან/და სანებართვო მოწმობის დუბლიკატის გაცემა

1. სალიცენზიო ან/და სანებართვო მოწმობის დაკარგვის ან დაზიანების შემთხვევაში სამინისტროს მიერ, გაიცემა სალიცენზიო ან/და სანებართვო მოწმობის დუბლიკატი, კანონმდებლობით და ამ დებულებით დადგენილი წესით.

2. სამინისტროს მიერ გაცემული სალიცენზიო ან/და სანებართვო მოწმობის დაკარგვის ან დაზიანების შემთხვევაში, სამინისტრო გასცემს მის დუბლიკატს, თუ მოწმობაში მითითებული ლიცენზიის ან/და ნებართვის გამცემ ორგანოს:

ა) წარმოადგენს სამინისტრო, დუბლიკატის გაცემის მოთხოვნისას;

ბ) წარმოადგენდა სამინისტრო ამგვარი ლიცენზიის ან/და ნებართვის სახის გაუქმების დროისთვის.

3. სხვა სახელმწიფო ორგანოს მიერ გაცემული სალიცენზიო ან/და სანებართვო მოწმობის დაკარგვის ან დაზიანების შემთხვევაში, სამინისტრო გასცემს მის დუბლიკატს, თუ მოწმობაში მითითებული ლიცენზიის ან/და ნებართვის გამცემ ორგანოს:

ა) წარმოადგენს სამინისტრო, დუბლიკატის გაცემის მოთხოვნისას;

ბ) წარმოადგენდა სამინისტრო ამგვარი ლიცენზიის ან/და ნებართვის სახის გაუქმების დროისთვის.

4. სალიცენზიო ან/და სანებართვო მოწმობის დუბლიკატის მისაღებად ლიცენზიის ან/და ნებართვის მფლობელმა სამინისტროში უნდა წარმოადგინოს შემდეგი დოკუმენტები:

ა) საქართველოს ზოგადი ადმინისტრაციული კოდექსის 78-ე მუხლის მოთხოვნათა შესაბამისად შედგენილი განცხადება სალიცენზიო ან/და სანებართვო მოწმობის დუბლიკატის გაცემის შესახებ;

ბ) სალიცენზიო ან/და სანებართვო მოწმობის დუბლიკატის მოსაკრებლის გადახდის დამადასტურებელი საბუთი;

გ) დაზიანებული სალიცენზიო ან/და სანებართვო მოწმობის დედანი (სალიცენზიო ან სანებართვო მოწმობის დაზიანების შემთხვევაში);

დ) ამ მუხლის მე-3 პუნქტით გათვალისწინებულ შემთხვევაში, დაკარგული სალიცენზიო ან/და სანებართვო მოწმობის ასლი (ასლის არსებობის შემთხვევაში).

5. ამ მუხლის მე-3 პუნქტის „ბ“ ქვეპუნქტით გათვალისწინებულ შემთხვევებში, სხვა ორგანოს მიერ გაცემული სალიცენზიო ან/და სანებართვო მოწმობის დუბლიკატი გაიცემა ჩამოთვლილ გარემოებათა ერთობლიობის შემთხვევაში:

ა) სამინისტროში წარმოდგენილია ან სამინისტროში დაცულია დაკარგული სალიცენზიო ან/და სანებართვო მოწმობის ასლი;

ბ) სამინისტროში  დაცულია  უწყებრივი სალიცენზიო/სანებართვო რეესტრები, რომლებიც შეიცავენ დაკარგულ სალიცენზიო ან/და სანებართვო მოწმობაში მითითებულ ინფორმაციას.

6. გაცემულ დუბლიკატს დაესმება შტამპი აღნიშვნით „დუბლიკატი“. სალიცენზიო ან/და სანებართვო მოწმობის დუბლიკატს აქვს ისეთივე იურიდიული ძალა, როგორიც მის დედანს.

7. ამ მუხლის მე-2 პუნქტის „ბ“ და მე-3 პუნქტის „ბ“ ქვეპუნქტებით გათვალისწინებულ შემთხვევებში, შტამპში – „დუბლიკატი“ მითითებული უნდა იყოს ამ მუხლის მე-8 პუნქტით განსზღვრული საქართველოს თავდაცვის მინისტრის ინდივიდუალური ადმინისტრაციულ-სამართლებრივი აქტის სახე, გამომცემი ორგანო, გამოცემის თარიღი და ნომერი, ასევე შესაბამისი უფლებამოსილი პირის ხელმოწერა.

8. დაკარგული ან დაზიანებული სალიცენზიო ან/და სანებართვო მოწმობის დუბლიკატის გაცემის მიზნით, გამოიცემა საქართველოს თავდაცვის მინისტრის ინდივიდუალური ადმინისტრაციულ-სამართლებრივი აქტი, რომელსაც დაერთვება დაკარგული ან დაზიანებული სალიცენზიო ან/და სანებართვო მოწმობის ასლი:

ა) ამ მუხლის მე-5 პუნქტით გათვალისწინებულ შემთხვევაში;

ბ) ამ მუხლის მე-2 პუნქტის „ა“ და მე-3 პუნქტის „ა“ ქვეპუნტებით გათვალისწინებულ შემთხვევაში, თუ დუბლიკატის გაცემის დროისთვის შეცვლილია სალიცენზიო ან/და სანებართვო მოწმობის ფორმები.

9. დუბლიკატის გაცემის შესახებ ინფორმაცია შეიტანება უწყებრივ სალიცენზიო/სანებართვო რეესტრში სალიცენზიო ან/და სანებართვო მოწმობის დუბლიკატის გაცემის გადაწყვეტილების მიღებიდან 2 დღის ვადაში.“.