გარდამავალ პერიოდში საკონტეინერო მოსაკრებლის გადახდის ადმინისტრირების შესახებ

1. „საკონტეინერო მოსაკრებლის გადახდის წესი, პერიოდულობა და ვადა“ (შემდგომში – წესი) განსაზღვრავს საქართველოს ტერიტორიაზე არსებულ საზღვაო ნავსადგურში შემოტანილი ან საქართველოს ტერიტორიაზე არსებული საზღვაო ნავსადგურიდან გასატანი საქონლით დატვირთულ კონტეინერზე საკონტეინერო მოსაკრებლის გადახდის წესს, პერიოდულობასა და ვადას.

2. საკონტეინერო მოსაკრებლის (შემდგომში – მოსაკრებელი) გადახდის ვალდებულება ეკისრება საქართველოს ტერიტორიაზე არსებულ საზღვაო ნავსადგურში შემოტანილი ან საქართველოს ტერიტორიაზე არსებული საზღვაო ნავსადგურიდან გასატანი საქონლით დატვირთული კონტეინერის გადამზიდავს (შემდგომში – გადამზიდავი).

3. ამ წესის მიზნებისთვის, გადამზიდავად განიხილება პირი, რომლის საკუთრებაში ან/და სარგებლობაში არის საქართველოს ტერიტორიაზე არსებულ საზღვაო ნავსადგურში შემოტანილი ან საქართველოს ტერიტორიაზე არსებული საზღვაო ნავსადგურიდან გასატანი საქონლით დატვირთული კონტეინერი.

4. მოსაკრებელი გადაიხდევინება შესაბამისი მუნიციპალიტეტის წარმომადგენლობითი ორგანოს მიერ განსაზღვრული ოდენობით, რომელიც 1 კონტეინერისთვის 30 ლარს არ უნდა აღემატებოდეს. ამასთანავე, შესაბამისი მუნიციპალიტეტის წარმომადგენლობითი ორგანო ვალდებულია, მოსაკრებლის ოდენობის განსაზღვრისთანავე დაუყოვნებლივ მიაწოდოს აღნიშნულის თაობაზე ინფორმაცია სსიპ – შემოსავლების სამსახურს (შემდგომში – შემოსავლების სამსახური).

5. ამ დადგენილებით განსაზღვრული ვალდებულებების შესრულებას უზრუნველყოფს უშუალოდ გადამზიდავი ან მისი წარმომადგენელი.

გადამზიდავი ვალდებულია, მოსაკრებელი გადაიხადოს:

ა) საქართველოს საბაჟო ტერიტორიაზე შემოტანილი საქონლით დატვირთულ კონტეინერზე – საქონლით დატვირთული კონტეინერის საზღვაო ნავსადგურიდან გატანამდე ან საზღვაო ნავსადგურში კონტეინერის გახსნამდე (კონტეინერის გახსნის შემთხვევაში);

ბ) საქართველოს საბაჟო ტერიტორიიდან გასატანი საქონლით დატვირთულ კონტეინერზე – სპეციალური ელექტრონული კონტროლის საშუალებით კონტეინერის რეგისტრაციამდე, ხოლო იმ შემთხვევაში, თუ კონტეინერი არ არის სპეციალური ელექტრონული კონტროლის საშუალებით რეგისტრირებული – საქონლით დატვირთული კონტეინერის გემზე დატვირთვამდე.

გადამზიდავი ვალდებულია, მოსაკრებლის გადახდის შესახებ ინფორმაცია შემოსავლების სამსახურის საბაჟო დეპარტამენტს მიაწოდოს მასთან შეთანხმებული ფორმითა და წესით.

გადამზიდავი თავისუფლდება მოსაკრებლის გადახდისგან იმ კონტეინერისთვის, რომლითაც:

ა) საქართველოს საბაჟო ტერიტორიაზე შემოტანილ იქნა მხოლოდ შემდეგი საქონელი:

ა.ა) სტიქიური უბედურების, ავარიისა და კატასტროფის ლიკვიდაციის, აგრეთვე ჰუმანიტარული დახმარების გაწევის მიზნით გადაადგილებული საქონელი;

ა.ბ) უცხო ქვეყნების დიპლომატიური წარმომადგენლობებისა და მათთან გათანაბრებული წარმომადგენლობების ოფიციალური სარგებლობისთვის, აგრეთვე ამ წარმომადგენლობების დიპლომატიური პერსონალისა და ადმინისტრაციულ-ტექნიკური პერსონალის (მათთან მცხოვრები ოჯახის წევრების ჩათვლით) პირადი სარგებლობისთვის განკუთვნილი საქონელი;

ბ) საქონლის საზღვაო გზით ტრანსპორტირება 2024 წლის 1 თებერვლამდე დაიწყო და რომელიც საზღვაო ტრანსპორტით საქართველოს საბაჟო ტერიტორიაზე შემოტანილ იქნა არა უგვიანეს 2024 წლის 30 აპრილისა.