„საჯარო სამართლის იურიდიული პირის – თავდაცვის მოხალისის წესდების დამტკიცების შესახებ“ საქართველოს თავდაცვის მინისტრის 2023 წლის 18 დეკემბრის №125 ბრძანებაში ცვლილების შეტანის თაობაზე

საქართველოს

თავდაცვის  მინისტრის  

ბრძანება  №4

2025 წლის 3 თებერვალი

ქ. თბილისი

„მუხლი 8. თავდაცვის მოხალისის სტრუქტურა

1. თავდაცვის მოხალისის სტრუქტურული ერთეულებია:

ა) ადმინისტრაციული დეპარტამენტი:

ა.ა) ორგანიზაციული უზრუნველყოფის სამმართველო;

ა.ბ) საზოგადოებასთან ურთიერთობის სამმართველო;

ბ) საფინანსო, შესყიდვებისა და ლოჯისტიკის დეპარტამენტი;

გ) მოხალისეებთან და ახალგაზრდობასთან ურთიერთობის დეპარტამენტი;

დ) ანალიზისა და მონიტორინგის დეპარტამენტი.

2. ადმინისტრაციული დეპარტამენტი:

ა) წარმართავს თავდაცვის მოხალისის საერთაშორისო ურთიერთობებს;

ბ) მართავს თავდაცვის მოხალისის მიერ განსახორციელებელ და მიმდინარე პროექტებს;

გ) ახორციელებს თავდაცვის მოხალისის ორგანიზაციული განვითარების მხარდაჭერას;

დ) უზრუნველყოფს თავდაცვის მოხალისის საქმის წარმოებას და არქივის მართვას;

ე) უზრუნველყოფს თავდაცვის მოხალისის საიდუმლო საქმისწარმოებას;

ვ) უზრუნველყოფს საჯარო ინფორმაციის ხელმისაწვდომობას;

ზ) ორგანიზაციული ანალიზის შედეგების გათვალისწინებით, უზრუნველყოფს პერსონალის

(საშტატო-საორგანიზაციო) დაგეგმვას;

თ) უზრუნველყოფს პერსონალის მოზიდვას, შერჩევას და შერჩევის მიზნით საკონკურსო და საპრეტენზიო კომისიების საქმიანობას;

ი) ახორციელებს თანამშრომელთა შრომითი ურთიერთობების (დანიშვნა, გადაყვანა, დროებით მოვალეობის დაკისრება/შეთავსება/შეწყვეტა, გათავისუფლება, შვებულება, ქვეყნის შიგნით მივლინება, წახალისება, დისციპლინური პასუხისმგებლობის დაკისრება, ნამუშევარი/ნამსახურები წლების გაანგარიშება) შესახებ შესაბამისი პროცედურების ადმინისტრირებას;

კ) ახორციელებს სამუშაოს შესრულების ხარისხის მართვის პროცესის დაგეგმვას, ორგანიზებას, კოორდინაციას, შედეგების შეჯამებასა და ანგარიშგებას;

ლ) უზრუნველყოფს პერსონალის მონაცემთა დადგენილი წესით წარმოებას და მართვას;

მ) ახორციელებს სამუშაოთა ანალიზის პროცესის მართვას (საკვალიფიკაციო მოთხოვნების განსაზღვრა, დადგენილი სტანდარტის შესაბამისად სამუშაოს აღწერების წარმოება და ა.შ.), პერსონალის კომპეტენციების განსაზღვრას, საჭიროებების გამოვლენას და შეფასების უზრუნველყოფას;

ნ) უზრუნველყოფს სამართალშემოქმედებით საქმიანობასთან დაკავშირებული ფუნქციების შესრულებას;

ო) თავდაცვის მოხალისის საქმიანობასთან დაკავშირებულ საკითხებზე ამზადებს სამართლებრივ დასკვნებს;

პ) უზრუნველყოფს თავდაცვის მოხალისის წარმომადგენლობას და ინტერესების დაცვას ყველა ინსტანციის სასამართლოში, სხვა სახელმწიფო ორგანოებთან, დაწესებულებებთან და ორგანიზაციებთან, აგრეთვე, საჯარო და კერძო სამართლის იურიდიულ პირებთან ურთიერთობებში სპეციალური მინდობილობის/რწმუნებულების საფუძველზე;

ჟ) თავდაცვის მოხალისის საქმიანობის პოპულარიზაციის და ცნობადობის გაზრდის მიზნით შეიმუშავებს სოციალური მედიის პლატფორმების მართვის სტრატეგიას;

რ) მართავს სოციალური მედიის პლატფორმებს;

ს) შეიმუშავებს სოციალური მედიაპლატფორმებისთვის მორგებულ ტექსტებს და ვიზუალურ მასალას;

ტ) უზრუნველყოფს შეთანხმებული მასალის განთავსებას შესაბამის პლატფორმებზე;

უ) მონაწილეობს სოციალური მედიის საშუალებით შემოსულ კითხვებზე პასუხის დაბრუნების პროცესში.

3. ადმინისტრაციული დეპარტამენტი ამ მუხლის მე-2 პუნქტის:

ა) ,,ა“ - ,,პ“ ქვეპუნქტებით განსაზღვრულ ფუნქციებს ახორციელებს ორგანიზაციული უზრუნველყოფის სამმართველოს მეშვეობით;

ბ) ,,ჟ“ - ,,უ“ ქვეპუნქტებით განსაზღვრულ ფუნქციებს ახორციელებს საზოგადოებასთან ურთიერთობის სამმართველოს მეშვეობით.

4. საფინანსო, შესყიდვებისა და ლოჯისტიკის დეპარტამენტი:

ა) უზრუნველყოფს თავდაცვის მოხალისის საფინანსო-ეკონომიკური, სამეურნეო და ბუღალტრული საქმიანობის წარმართვას;

ბ) უზრუნველყოფს თავდაცვის მოხალისის საბიუჯეტო სახსრების, საკუთარი შემოსავლების, გრანტებისა და სხვა ნებისმიერი შემოსავლების დაგეგმვას;

გ) უზრუნველყოფს კანონმდებლობით გათვალისწინებულ ფინანსურ ანგარიშგებას;

დ) უზრუნველყოფს კანონმდებლობით დადგენილი წესით სახელმწიფო შესყიდვების დაგეგმვასა და განხორციელებას;

ე) ახორციელებს შესყიდვების მოსამზადებელი სამუშაოების, უშუალოდ შესყიდვის პროცედურებისა და პროცესების ორგანიზებას, კოორდინაციას და წარმართვას, შესყიდვებისათვის საჭირო დოკუმენტების პროექტების მომზადებას;

ვ) უზრუნველყოფს კანონმდებლობით დადგენილი წესით ბალანსზე რიცხული ძირითადი საშუალებებისა და სხვა ქონების აღრიცხვასა და ინვენტარიზაციას;

ზ) ხელს უწყობს თავდაცვის მოხალისის სტრუქტურული ერთეულების მატერიალურ-ტექნიკურ უზრუნველყოფას.

5. მოხალისეებთან და ახალგაზრდობასთან ურთიერთობის დეპარტამენტი:

ა) კოორდინაციას უწევს თავდაცვის კოდექსით გათვალისწინებულ მოხალისეთა ორგანიზაციებთან თავდაცვის მოხალისის ურთიერთობას;

ბ) ხელს უწყობს კერძო სამართლის იურიდიულ პირებს, რომლებიც ახორციელებენ სამხედრო სამსახურის პოპულარიზაციას;

გ) გეგმავს ან/და ახორციელებს სამინისტროს მიერ დაგეგმილ ღონისძიებებს მოხალისეობასთან დაკავშირებით;

დ) გეგმავს და ახორციელებს მოხალისეთათვის სამხედრო სწავლებებსა და შემეცნებით ღონისძიებებს;

ე) უზრუნველყოფს მოხალისეთა აღრიცხვას და მოხალისეთა ელექტრონული სისტემის მეშვეობით მოხალისეთა რეესტრის წარმოებას;

ვ) უზრუნველყოფს თავდაცვის მოხალისის წარმომადგენლობას მოხალისეთა ორგანიზაციის დაფუძნებისას;

ზ) მონაწილეობს მოხალისეთა ორგანიზაციის მართვაში ამ ორგანიზაციასთან გაფორმებული ხელშეკრულებით განსაზღვრული წესით;

თ) მოხალისეთა ორგანიზაციის ლიკვიდაციის/სტატუსის შეჩერების/სტატუსის შეწყვეტის შემთხვევაში, ახორციელებს მოხალისეთა საქმიანობის კოორდინაციას, მართვას და კონტროლს;

ი) ახორციელებს მოხალისეთა ორგანიზაციების აღრიცხვას და მონიტორინგს;

კ) უზრუნველყოფს მოხალისეთა ორგანიზაციასთან/მოხალისეთა ორგანიზაციის კანდიდატის სტატუსის მქონე სუბიექტთან ხელშეკრულების გაფორმებას;

ლ) ახორციელებს მოხალისეობით ხელშეკრულების გაფორმებას მოხალისესთან;

მ) მოხალისეზე გასცემს მოხალისის დამადასტურებელ მოწმობას, ადმინისტრაციულ დეპარტამენტთან შეთანხმებით;

ნ) მოხალისეობრივ თემატიკაზე შეიმუშავებს და ახორციელებს სასწავლო და საკვალიფიკაციო კურსებს და პროგრამებს;

ო) თავდაცვის მოხალისის პერსონალს და მოხალისეებს უზრუნველყოფს შესაბამისი განათლებით;

პ) კომპეტენციის ფარგლებში გეგმავს და ახორციელებს სამხედრო-პატრიოტულ, სალაშქრო და შემეცნებით ღონისძიებებს.

6. ანალიზისა და მონიტორინგის დეპარტამენტი:

ა) მონიტორინგს უწევს მოხალისეთა ორგანიზაციასთან/მოხალისეთა ორგანიზაციის კანდიდატის სტატუსის მქონე სუბიექტთან გაფორმებული ხელშეკრულებების შესრულებას, აგრეთვე მათ მიერ მიღებული ქონებისა და ფულადი სახსრების ხარჯვას;

ბ) თავდაცვის მოხალისის სტრუქტურული ერთეულების მიერ წარმოდგენილი წინადადებების ანალიზის საფუძველზე შეიმუშავებს თავდაცვის მოხალისის განვითარების სტრატეგიას და ახორციელებს შესაბამის სამოქმედო გეგმებისა და პროგრამების კოორდინაციას;

გ) მონიტორინგს უწევს და აფასებს სტრატეგიისა და შესაბამისი სამოქმედო გეგმის შესრულებას, ამზადებს მონიტორინგის ანგარიშებს;

დ) ახორციელებს ანალიტიკურ საქმიანობას.“.