ამბულატორიული მომსახურების მიმწოდებლების ელექტრონული სამედიცინო ჩანაწერების ცენტრალური სისტემის (C-EMR) ფუნქციონირებისა და წარმოების წესის განსაზღვრის შესახებ

დანართი 1.1

ამბულატორიული მომსახურების მიმწოდებლების ელექტრონული სამედიცინო ჩანაწერების ცენტრალური სისტემის C-EMR სისტემის მონაცემთა ცვლადები

(სამედიცინო მიზნებისათვის)

დანართი 1

ამბულატორიული მომსახურების მიმწოდებლების ელექტრონული სამედიცინო ჩანაწერების ცენტრალური სისტემის (C-EMR) ფუნქციონირებისა და წარმოების წესი

მუხლი 1. ზოგადი დებულებები

1. ამბულატორიული მომსახურების სერვისის მიმწოდებლების ელექტრონული სამედიცინო ჩანაწერების ცენტრალური სისტემა (C-EMR) (შემდგომ - C-EMR სისტემა) არის პაციენტის ჯანმრთელობის მდგომარეობის შესახებ მონაცემთა ციფრული საცავი. სისტემაში დაცული მონაცემები შექმნილია და გაზიარებადია ინფორმაციული უსაფრთხოებისა და პერსონალური მონაცემების მიმართ კანონმდებლობით განსაზღვრული მოთხოვნების დაცვით, ჯანმრთელობის დაცვის სერვისების მიმწოდებელი ავტორიზებული მომხმარებლის მიერ და ეკუთვნის საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს (შემდგომ - სამინისტრო).

2. C-EMR სისტემა მოიცავს პაციენტის ამბულატორიული ვიზიტის დროს, დამოუკიდებელი საექიმო საქმიანობის უფლების მქონე პირის მიერ (შემდგომ – ექიმი) შეგროვებულ, N1.1 დანართით განსაზღვრულ ინფორმაციას და ასევე, ამ დანართის მე-5 მუხლით განსაზღვრული უწყებებების მონაცემთა საცავებიდან მოწოდებულ, ამავე დანართით განსაზღვრულ ინფორმაციას.

3. ლოკალური ელექტრონული სამედიცინო ჩანაწერების სისტემა (შემდგომ – ლოკალური EMR სისტემა) არის სამედიცინო დაწესებულების მიერ დადგენილი წესით წარმოებული ელექტრონული სამედიცინო ჩანაწერები ამ სამედიცინო დაწესებულების პაციენტის შესახებ, რომელიც არსებული კანონმდებლობის შესაბამისად იქმნება, გროვდება და იმართება ამ სამედიცინო დაწესებულების ავტორიზებული დამოუკიდებელი საექიმო საქმიანობის უფლების მქონე პირების და სხვა უფლებამოსილი პირების მიერ. ლოკალური EMR სისტემა ეკუთვნის სამედიცინო დაწესებულებას.

4. C-EMR სისტემაში ჯანმრთელობის შესახებ ჩანაწერი უნდა მოიცავდეს საყოველთაო ჯანდაცვის სახელმწიფო პროგრამის კაპიტაციური მეთოდით დაფინანსების მიმღების მიერ რეგისტრირებული ყველა პაციენტისთვის მხოლოდ ამბულატორიული მომსახურებისას გაწეული/ჩატარებული იმ ძირითადი აქტივობების/პროცედურების ჩამონათვალს/აღწერას, რომლებიც, თავისი არსით, წარმოადგენენ საფუძველს/ შემადგენელ ნაწილს სამკურნალო ღონისძიებების დაწყების, გაგრძელების ან დასრულებისათვის (მიუხედავად დაფინანსების წყაროსი, ექიმის კონსულტაციის ან მიმართვის გარეშე ჩატარებული სხვადასხვა დიაგნოსტიკური თუ ლაბორატორიული კვლევების, ასევე ექიმის მიერ დისტანციურად განხორციელებული კონსულტაციების ჩათვლით), გარდა ამ მუხლის მე-5 პუნქტით გათვალისწინებული მომსახურებებისა.

5. ჯანმრთელობის მდგომარეობის შესახებ ჩანაწერების C-EMR სისტემაში გადაცემის ვალდებულება არ ვრცელდება შემდეგ შემთხვევებში:

ა) სახელმწიფო პროგრამების ადმინისტრირების მიზნით, არსებობს საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის შესაბამისი ბრძანებით ან სხვა სამართლებრივი აქტით განსაზღვრული სამედიცინო დაწესებულების/პერსონალის სახელმწიფოს მიერ შექმნილ ელექტრონულ რეგისტრებში ინფორმაციის შეტანის/რეგისტრაციის ვალდებულება (აღნიშნული ინფორმაცია ავტომატურად სინქრონიზდება C-EMR სისტემებში);

ბ) ხანგრძლივი, ჰოსპისური და პალიატიური სერვისის მიწოდება;

გ) ანტენატალური და პერინატალური სერვისის მიწოდება, ამასთან, აღნიშნული სერვისის მიმწოდებლები ვალდებულნი არიან, შესაბამისი ინფორმაცია ასახონ ორსულთა და ახალშობილთა ჯანმრთელობის მეთვალყურეობის ელექტრონულ მოდულში;

დ) ანონიმური მკურნალობის მიწოდება;

ე) იმ პაციენტების სამედიცინო მომსახურება, რომელთაც საქართველოში რეგისტრაციის საფუძველზე არ აქვთ მინიჭებული პირადი ნომერი;

ვ) სარეაბილიტაციო-გამაჯანსაღებელი სერვისის მიწოდება;

ზ) რეპროდუქტოლოგის მიერ გაწეული მომსახურება;

თ) ჰოსპიტალური მომსახურება;

ი) იმუნიზაციის ელექტრონულ მოდულში ატვირთული შემთხვევები;

კ) C ჰეპატიტის ელიმინაციის სახელმწიფო პროგრამით და აივ ინფექცია/შიდსის სახელმწიფო პროგრამებით გატარებული შემთხვევები;

ლ) დიალიზის შემთხვევები;

მ) ჰემოფილიის პროგრამით გათვალისწინებული, გაცემული მედიკამენტების შესახებ ინფორმაცია;

ნ) ფსიქიკური ჯანმრთელობის სახელმწიფო პროგრამით გათვალისწინებული ფსიქიატრიული კრიზისული ინტერვენციის სამსახურის მომსახურება და ფსიქოსოციალური რეაბილიტაციის მომსახურება;

ო) ჩამანაცვლებელი ფარმაცევტული პროდუქტის მიწოდების შესახებ ინფორმაცია.

6. სამედიცინო დაწესებულების მიერ ჯანმრთელობის შესახებ ელექტრონული სამედიცინო ჩანაწერების (C-EMR) სისტემაში გადმოცემული ინფორმაცია წარმოადგენს სამედიცინო დოკუმენტაციის ნაწილს.

მუხლი 2. C-EMR სისტემების მიზანი

C-EMR სისტემის მიზანია, დადგენილი წესით, C-EMR სისტემაში ლოკალური EMR-ებისგან შეაგროვოს, შეინახოს, დაამუშაოს და გაზიარებადი გახადოს პაციენტის ჯანმრთელობის მდგომარეობის შესახებ ელექტრონული ჩანაწერები ინფორმაციული უსაფრთხოებისა და პერსონალური მონაცემების მიმართ კანონმდებლობით განსაზღვრული მოთხოვნების დაცვით და ამით ხელი შეუწყოს უწყვეტი, ეფექტური, პაციენტზე ორიენტირებული და ხარისხიანი, ინტეგრირებული ჯანმრთელობის დაცვის სისტემის განვითარებას.

მუხლი 3. C-EMR სისტემასთან წვდომა

1. C-EMR სისტემის მფლობელია სამინისტრო.

2. C-EMR სისტემასთან წვდომა ხორციელდება შემდეგი ელექტრონული რესურსებიდან:

ა) ლოკალური EMR სისტემიდან (ავტორიზებული მომხმარებლის როლით);

ბ) C-EMR სისტემის ანალიტიკური გვერდის საშუალებით (მფლობელის მიერ მინიჭებული ავტორიზებული მომხმარებლის როლით).

3. C-EMR სისტემაში ხვდება ინფორმაცია, რომელიც ექიმს შეაქვს ლოკალურ EMR სისტემაში, პაციენტის თითოეული ამბულატორიული ვიზიტის შესახებ. C-EMR სისტემა მოიცავს შემდეგ ორ კომპონენტს:

ა) ინფორმაცია ამბულატორიული ვიზიტ(ებ)ის შესახებ;

ბ) ცხოვრების ანამნეზი – ამბულატორიული ვიზიტებიდან გენერირებული ინფორმაცია.

4. C-EMR სისტემის მომხმარებელია:

ა) სამინისტროს სახელმწიფო კონტროლს დაქვემდებარებული სსიპ – ჯანმრთელობის ეროვნული სააგენტო (შემდგომ – სააგენტო) ჯანმრთელობის დაცვის სახელმწიფო პროგრამების ზედამხედველობის განხორციელების და კანონმდებლობით მისთვის დაკისრებული სხვა მოვალეობების შესრულების მიზნით;

ბ) სამინისტროს სახელმწიფო კონტროლს დაქვემდებარებული სსიპ – ლ. საყვარელიძის სახელობის დაავადებათა კონტროლისა და საზოგადოებრივი ჯანმრთელობის ეროვნული ცენტრი (შემდგომ – ცენტრი) საზოგადოებრივი ჯანდაცვისა და კანონმდებლობით მისთვის დაკისრებული სხვა მოვალეობების შესრულების მიზნით;

გ) სამინისტროს სახელმწიფო კონტროლს დაქვემდებარებული სსიპ – სამედიცინო და ფარმაცევტული საქმიანობის რეგულირების სააგენტო (შემდგომ – რეგულირების სააგენტო), ჯანმრთელობის დაცვის სახელმწიფო პროგრამების ზედამხედველობის, სამედიცინო დახმარების ხარისხის კონტროლის განხორციელების და კანონმდებლობით მისთვის დაკისრებული სხვა მოვალეობების შესრულების მიზნით.

5. ამ მუხლით მომხმარებლად განსაზღვრული დაწესებულებები/ორგანიზაციები, მათთვის კანონმდებლობით მინიჭებული უფლებამოსილების ფარგლებში უზრუნველყოფენ C-EMR სისტემაში არსებული ინფორმაციის დამუშავებას, მოქმედი კანონმდებლობისა და ამ დანართით განსაზღვრული წესის შესაბამისად. მონაცემებთან წვდომა განხორციელდება სისტემის მფლობელისაგან ავტორიზებული მომხმარებლის უფლების მინიჭების გზით.

6. C-EMR სისტემების მომხმარებელთა უფლებამოსილება შეზღუდულია კანონმდებლობით დადგენილი მიზნით და ფარგლებით.

7. ინფორმაციის უსაფრთხოების მიზნებისათვის, სამინისტრო ადგენს სამედიცინო დაწესებულების, პაციენტის ინფორმაციის დამუშავებაში ჩართული სხვა მხარეების სისტემასთან წვდომისათვის საჭირო აუთენტიფიკაციისა და ავტორიზაციის წესებს.

8. C-EMR სისტემის ფუნქციონირებისთვის აუცილებელ საინფორმაციო-ტექნოლოგიურ მხარდაჭერას უზრუნველყოფს სამინისტროს სახელმწიფო კონტროლს დაქვემდებარებული სსიპ – ინფორმაციული ტექნოლოგიების სააგენტო.

მუხლი 4. ინფორმაციის გადაცემის ვადები C-EMR სისტემაში

1. სამედიცინო დაწესებულება/ავტორიზებული მომხმარებელი ვალდებულია ამბულატორიული შემთხვევების (N1.1 დანართის მიხედვით განსაზღვრული მომსახურების) შესახებ ინფორმაცია C-EMR სისტემაში გადასცეს ამბულატორიული ვიზიტის/მკურნალობის ეპიზოდის დასრულებიდან 3 კალენდარული დღის ვადაში.

2. ამ მუხლის პირველი პუნქტით განსაზღვრული ვადების დარღვევით C-EMR სისტემაში მონაცემების გადაცემის/შეტანის შემთხვევაში, შემთხვევას ენიჭება სტატუსი ვადაგადაცილებული.

მუხლი 5. C-EMR სისტემის მიერ მონაცემების დამუშავება/მიღება

1. პაციენტის ცხოვრების ანამნეზის სრულყოფის, ასევე, მონაცემთა დუბლირების თავიდან აცილების მიზნით, C-EMR სისტემისთვის სხვა ელექტრონული სისტემებიდან მონაცემთა გადაცემა განხორციელდება მონაცემთა მფლობელებთან სათანადო შეთანხმების საფუძველზე და კანონმდებლობით გათვალისწინებული წესით.

2. C-EMR სისტემამ მონაცემთა დამუშავების მიზნით სისტემაში შეყვანილ პირზე გადაამოწმოს ინფორმაცია საქართველოს იუსტიციის სამინისტროს მმართველობის სფეროში მოქმედ სსიპ – სახელმწიფო სერვისების განვითარების სააგენტოდან (შემდგომ – სსგს) შემდეგი მონაცემებით: პირის იდენტიფიცირებისთვის საჭირო პერსონალური მონაცემები (პირადი ნომერი, სახელი, გვარი, დაბადების თარიღი, სქესი, მოქალაქეობა, რეგისტრაციის მისამართი, გარდაცვალების სტატუსი).

3. რეგულირების სააგენტომ C-EMR სისტემას უნდა გადასცეს:

ა) ექიმთა სახელმწიფო სასერტიფიკაციო რეესტრიდან, ექიმის პირად ნომერზე, რეალურ რეჟიმში, ინფორმაცია ექიმის მოქმედი სერტიფიკატის არსებობის/არარსებობის შესახებ;

ბ) საქართველოს ფარმაცევტული პროდუქტების უწყებრივი რეესტრის მონაცემები;

გ) სამედიცინო დაწესებულებების ლიცენზირებისა და ნებართვების მოდულის მონაცემები.

4. ცენტრმა C-EMR სისტემას უნდა გადასცეს:

ა) იმუნიზაციის ელექტრონული სისტემიდან, პაციენტის პირად ნომერზე, რეალურ რეჟიმში, პროფილაქტიკური აცრების რუკის შემდეგი მონაცემები: ვაქცინაციის დასახელება და აცრების ცხრილი შემდეგი მონაცემებით:

ა.ა) ვაქცინაცია;

ა.ბ) პაციენტის ასაკი;

ა.გ) ვაქცინაციის თარიღი;

ა.დ) ვაქცინის დასახელება;

ა.ე) რეაქცია (კი/არა);

ა.ვ) „კი“-ს შემთხვევაში კომენტარი (რეაქციის მიზეზი);

ა.ზ) უკუჩვენება(კი/არა);

ა.თ) „კი“-ს შემთხვევაში კომენტარი (პერიოდი ან თარიღი, მიზეზი).

ბ) C ჰეპატიტის სკრინინგის სისტემიდან, პაციენტის პირად ნომერზე, რეალურ რეჟიმში, შემდეგი მონაცემები:

ბ.ა) C ჰეპატიტის სკრინინგის თარიღი;

ბ.ბ) C ჰეპატიტის სკრინინგის შედეგი (დადებ/უარყ).

გ) დედათა და ბავშვთა ელექტრონული სისტემიდან, პაციენტის პირად ნომერზე, შემდეგი მონაცემები:

გ.ა) ორსულობის საერთო რაოდენობა;

გ.ბ) მშობიარობის საერთო რაოდენობა;

გ.გ) ბოლო ორსულობის/მშობიარობის თარიღი.

დ) სერვისი შემდეგი სამედიცინო კლასიფიკატორების პერიოდული განახლებისთვის:

დ.ა) ავადმყოფობათა და ჯანმრთელობასთან დაკავშირებული პრობლემების საერთაშორისო სტატისტიკური კლასიფიკაცია (ICD-10) (შემდგომ - ICD-10);

დ.ბ) „სკანდინავიური ქვეყნების ქირურგიული პროცედურების კლასიფიკატორი NCSP, (შემდგომ - NCSP );

დ.დ) ლაბორატორია.

5. სააგენტომ C-EMR სისტემას უნდა გადასცეს:
ა) სამედიცინო დაწესებულებების ავტორიზაციის მოდულიდან, პროვაიდერის მომხმარებლის სახელსა და პაროლზე, რეალურ რეჟიმში, შემდეგი მონაცემები:
ა.ა) დაწესებულების უნიკალური კოდი (GUID);
ა.ბ) საიდენტიფიკაციო კოდი;
ა.გ) დასახელება;
ა.დ) მისამართი.

ბ) საყოველთაო ჯანმრთელობის დაცვის სახელმწიფო პროგრამის შემთხვევათა რეგისტრაციის მოდულიდან, პაციენტის პირად ნომერზე, შემდეგი მონაცემები:

ბ.ა) დაწესებულების უნიკალური კოდი (GUID);

ბ.ბ) შემთხვევის (ქეისის) უნიკალური ნომერი;

ბ.გ) პაციენტის ისტორიის ნომერი;

ბ.დ) სამედიცინო შემთხვევის დასაწყისი (თარიღი);

ბ.ე) შემთხვევის დასასრული (თარიღი);

ბ.ვ) ICD-10 (ძირითადი);

ბ.ზ) ICD-10 (თანმხლები, ერთი ან რამდენიმე);

ბ.თ) NCSP (ერთი ან რამდენიმე).

გ) ელექტრონული რეცეპტების სისტემიდან C-EMR სისტემას უნდა გადაეცეს ინფორმაცია დანიშნულებების შესახებ.

მუხლი 6. უსაფრთხოების დონე C-EMR სისტემაში

C-EMR სისტემის უსაფრთხოების დონე განისაზღვრება „ინფორმაციული უსაფრთხოების შესახებ“ საქართველოს კანონის მოთხოვნათა შესაბამისად.

მუხლი 7. მონაცემთა შენახვა

1. C-EMR სისტემაში სამედიცინო ჩანაწერები ინახება პაციენტის სიცოცხლის ბოლომდე და გარდაცვალებიდან 15 წლის განმავლობაში, თუ საქართველოს კანონმდებლობით სხვა რამ არ არის განსაზღვრული.

2. პაციენტის გარდაცვალების შემდეგ პაციენტის სამედიცინო ჩანაწერებს ენიჭება დაფარულის სტატუსი.

მუხლი 8. ლოგირება

1. C-EMR სისტემაში ინფორმაციის დამუშავება ლოგირდება მომხმარებელთა დონეზე.

2. ლოგი შეიცავს მონაცემთა დამუშავების თარიღს, დამუშავებული მონაცემის მაიდენტიფიცირებელ ჩანაწერს, ინფორმაციას მონაცემთა დამუშავების ფორმის შესახებ (დათვალიერება, შეტანა/განახლება, ექსპორტი), ინფორმაციას დამმუშავებლის ვინაობის თაობაზე. ლოგირების მექანიზმი ვრცელდება ინფორმაციის დამუშავების ყველა რესურსზე. ასევე, ლოგირდება მონაცემთა გაზიარების/დაფარვის მიზნით განხორციელებული ქმედებები (სტატუსის ცვლილებები), დამმუშავებლის, შესაბამისი ეპიზოდის/ვიზიტის და სათანადო მიზეზების ჩვენებით.

3. ლოგები ინახება შესაბამისი ქმედების თარიღიდან 1 წლის განმავლობაში, თუ კანონმდებლობით სხვა რამ არ არის დადგენილი.

მუხლი 9. მონაცემთა ჩასწორება

1. C-EMR სისტემისათვის გადაცემული ინფორმაციის შესწორებას/ხელახლა გადაგზავნას/ განახლებას ახორციელებს მონაცემთა წარმდგენი.

2. C-EMR სისტემის მფლობელს უფლება აქვს, გამოკითხოს მონაცემთა მომწოდებელი, თუ ეჭვი გაუჩნდება მონაცემთან დაკავშირებით.

3. იმ შემთხვევაში თუ C-EMR სისტემის მფლობელი თავად აღმოაჩენს საეჭვო მონაცემს, ის უფლებამოსილია მიმართოს მონაცემთა წარმომდგენს აღნიშნული მონაცემის გადამოწმების და საჭიროების შემთხვევაში, ჩასწორების მოთხოვნით.

4. C-EMR სისტემაში პაციენტის ჯანმრთელობის შესახებ არსებული მონაცემები, რომლებიც შეტანილია სისტემაში წარმოების შესაბამისი წესის დარღვევით და შეუძლებლია მათი ჩასწორება, განიხილება არასწორ მონაცემებად, რის შემდეგაც მათი გამოყენება არ განხორციელდება.

მუხლი 10. C-EMR სისტემიდან მონაცემების გაცემა

1. მონაცემები C-EMR სისტემიდან მიიღება: ავტორიზებული მომხმარებლის მიერ სამედიცინო დაწესებულების ლოკალური EMR სისტემის გამოყენებით.

2. C-EMR-იდან მიღებული ინფორმაცია არ ექვემდებარება ცვლილებას მისი შიდა საინფორმაციო სისტემებში ან/და სამედიცინო ჩანაწერებში გამოყენებისას.

3. სამინისტროს უფლება აქვს, შეზღუდოს ან აკრძალოს C-EMR სისტემაზე წვდომა, თუკი მონაცემთა გაცვლა წარმოშობს ინფორმაციული უსაფრთხოების დარღვევის რისკებს.

მუხლი 11. C-EMR სისტემის მონაცემებზე ავტორიზებული მომხმარებლის წვდომა

1. სამედიცინო დაწესებულებამ C-EMR სისტემის მონაცემებთან წვდომისათვის სისტემაში უნდა გაიაროს რეგისტრაცია.

2. C-EMR სისტემის ანალიტიკური ნაწილის ავტორიზებული მომხმარებლის (სისტემის ანალიტიკური ნაწილისთვის ის შეიძლება იყოს ფიზიკური პირი) რეგისტრაციის უზრუნველსაყოფად, ასევე, მისი ავტორიზაციის შეჩერების ან/და მის მონაცემებში ცვლილებების შეტანის მიზნით, მომხმარებლის მონაცემების ვალიდურობის გადამოწმებისთვის, სამინისტრო C-EMR სისტემისთვის იყენებს სსგს-ს მონაცემთა ელექტრონულ ბაზაში ფიზიკურ პირზე არსებულ შესაბამის ინფორმაციას:

ა) ავტორიზებული მომხმარებლის (ფიზიკური პირის) რეგისტრაციის მიზნით, ხდება პირის მონაცემების ვალიდურობის გადამოწმება მიღებული პერსონალური მონაცემებით (პირადი ნომერი, სახელი, გვარი, დაბადების თარიღი);

ბ) პირის ავტორიზაციისას ხორციელდება მისი პერსონალური მონაცემების (პირადი ნომერი, სახელი, გვარი, დაბადების თარიღი, გარდაცვალების სტატუსი) შესახებ ინფორმაციის გადამოწმება, შესაბამის მონაცემთა გათვალისწინების, ხოლო, გარდაცვალების შემთხვევაში, ავტორიზაციის შეწყვეტის მიზნით.

3. სისტემის ანალიტიკური ნაწილის ავტორიზებული მომხმარებელი უფლებამოსილია, C-EMR სისტემის საშუალებით, დაამუშაოს მონაცემები ანალიტიკური მიზნებისთვის.

4. სისტემის ავტორიზებულ მომხმარებელს (სამედიცინო დაწესებულებას) შეუძლია სამედიცინო დაწესებულების ლოკალურ EMR სისტემაში ჩამოტვირთოს და შეინახოს მხოლოდ ცხოვრების ანამნეზი, აღნიშნული შეზღუდვა უზრუნველყოფილია ელექტრონული სისტემის ფუნქციონალით.

5. ავტორიზებული მომხმარებლის მიერ C-EMR სისტემაში გადაცემული (შეყვანილი) ეპიზოდის/ვიზიტის მონაცემები პაციენტის ინფორმირებული თანხმობით შეიძლება იყოს:

ა) ხილული (გაზიარებული) - ეს სტატუსი უზრუნველყოფს პაციენტის ცხოვრების ანამნეზში მონაცემების ასახვას, შესაბამისად ის ხილული იქნება უფლებამოსილი მომხმარებლის მიერ პაციენტის ცხოვრების ანამნეზის მიღებისას;

ბ) დაფარული – აღნიშნული სტატუსი უზრუნველყოფს მონაცემების დაფარვას სისტემის ყველა მომხმარებლისთვის, შესაბამისად ამ სტატუსის მონაცემები არ აისახება პაციენტის ცხოვრების ანამნეზში.

მუხლი 12. ლოკალური EMR სისტემის მიმართ მოთხოვნები C-EMR სისტემასთან ინტეგრაციისათვის

1. ლოკალური EMR სისტემის C-EMR სისტემასთან წვდომისას, აუცილებელია ლოკალური EMR სისტემა აკმაყოფილებდეს შემდეგ მოთხოვნებს:

ა) ლოკალურ EMR სისტემაზე წვდომა ხორციელდება მხოლოდ ავტორიზებული მომხმარებლის მიერ. ავტორიზებული მომხმარებელი შეიძლება იყოს ექიმი;

ბ) ლოკალურ EMR სისტემაზე ყოველი წვდომისას აუცილებელია, ლოკალური EMR სისტემა ითხოვდეს ავტორიზაციის გავლას;

გ) სამედიცინო დაწესებულება ვალდებულია, შეინახოს მისი შიდა საინფორმაციო სისტემის მომხმარებელთა რეგისტრი, მათ მიერ შექმნილი ჩანაწერები და წვდომის უფლებები ამ დანართით დადგენილი ვადებით;

დ) ლოკალურ EMR სისტემას უნდა გააჩნდეს სამინისტროს მიერ მოთხოვნილი ყველა მონაცემის აღრიცხვის საშუალება;

ე) ლოკალურ EMR სისტემაში უნდა ხორციელდებოდეს ლოგირება ამ დანართის შესაბამისად. ლოგირების ბაზები უნდა ინახებოდეს ამავე დანართით განსაზღვრული ვადით.

2. სამინისტროს უფლება აქვს, გონივრული ეჭვის საფუძველზე, მოითხოვოს ლოკალური EMR სისტემის ამ მუხლით აღნიშნულ მოთხოვნებთან შესაბამისობის შემოწმება.

მუხლი 13. C-EMR სისტემაში მონაცემების შესწორება პაციენტის მოთხოვნით

1. პაციენტს უფლება აქვს, მოითხოვოს მის შესახებ მონაცემის შესწორება (მონაცემთა დამატება, ჩასწორება, წაშლა, განადგურება) იმ პირისგან, რომელმაც მონაცემი ასახა C-EMR სისტემაში.

2. თუ პაციენტი ექიმისგან მოითხოვს მის შესახებ არსებული სამედიცინო ჩანაწერის შესწორებას, იგი ვალდებულია, დადგენილი წესით, C-EMR სისტემებს გადასცეს შესწორებული მონაცემები.

3. არასწორი მონაცემების აღმოჩენა და შესწორების მოთხოვნა შეუძლია როგორც ექიმს, ასევე პაციენტს ან მის კანონიერ წარმომადგენელს.

მუხლი 14. C-EMR სისტემაში არსებული პერსონალური მონაცემების უსაფრთხოება

C-EMR სისტემაში არსებული პერსონალური მონაცემების უსაფრთხოების საკითხები წესრიგდება „პერსონალურ მონაცემთა დაცვის შესახებ“ საქართველოს კანონისა და ,,ინფორმაციული უსაფრთხოების შესახებ“ საქართველოს კანონის შესაბამისად.