„საჯარო სამართლის იურიდიული პირის – გამოცდების ეროვნული ცენტრის დებულების დამტკიცების შესახებ“ საქართველოს განათლებისა და მეცნიერების მინისტრის 2007 წლის 5 თებერვლის №93 ბრძანებაში ცვლილებებისა და დამატების შეტანის თაობაზე

სახელმწიფო სარეგისტრაციო კოდი 040.030.000.22.022.013.057

საქართველოს განათლებისა და მეცნიერების მინისტრის

 ბრძანება №238

2009 წლის 27 აპრილი

ქ. თბილისი

„საჯარო სამართლის იურიდიული პირის – გამოცდების ეროვნული ცენტრის დებულების დამტკიცების შესახებ“ საქართველოს განათლებისა და მეცნიერების მინისტრის  2007 წლის 5 თებერვლის №93 ბრძანებაში ცვლილებებისა და დამატების შეტანის თაობაზე

,,ნორმატიული აქტების შესახებ“ საქართველოს კანონის 36-ე მუხლისა და „საქართველოს განათლებისა და მეცნიერების სამინისტროს დებულების დამტკიცების შესახებ“ საქართველოს მთავრობის 2004 წლის 21 მაისის №37 დადგენილებით დამტკიცებული დებულების მე-3 მუხლის მე-2 პუნქტის „ა“ და „მ“ ქვეპუნქტების საფუძველზე, ვბრძანებ:

1. „საჯარო სამართლის იურიდიული პირის – გამოცდების ეროვნული ცენტრის დებულების დამ-ტკიცების შესახებ“ საქართველოს განათლებისა და მეცნიერების მინისტრის 2007 წლის 5 თებერვლის №93 ბრძანებით (სსმ III, 13.02.2007 წ., №20, მუხ. 229) დამტკიცებულ დებულებაში შეტანილ იქნეს შემდეგი ცვლილებები და დამატება:

ა) დებულების მე-2 მუხლის პირველი პუნქტის ,,თ“ ქვეპუნქტი ჩამოყალიბდეს შემდეგი რედაქციით:

,,თ) უზრუნველყოს საერთო სამაგისტრო გამოცდების ჩატარება მინისტრის მიერ დამტკიცებული დებულების შესაბამისად, სამაგისტრო გამოცდებთან დაკავშირებული მონაცემების შეგროვება და ანალიზი;“;

ბ) დებულების მე-2 მუხლის მე-2 პუნქტის ,,ა¹“ და ,,ა²“ ქვეპუნქტები ჩამოყალიბდეს შემდეგი რედაქციით:

,,ა¹) შეიმუშავებს ერთიანი ეროვნული გამოცდების ჩატარების დებულებასა და სახელმწიფო სასწავლო გრანტის განაწილების წესს, აგრეთვე, სამაგისტრო გამოცდების ჩატარების დებულებასა და სახელმწიფო სასწავლო სამაგისტრო გრანტის განაწილების წესს და დასამტკიცებლად წარუდგენს სამინისტროს;

ა²) უზრუნველყოფს საერთო სამაგისტრო გამოცდების მომზადებასა და ჩატარებას;“;

გ) დებულების მე-2 მუხლის მე-2 პუნქტს დაემატოს შემდეგი შინაარსის ,,ბ³“ ქვეპუნქტი:

,,ბ³) ყოველწლიურად ამზადებს და აკრედიტებულ უმაღლეს საგანმანათლებლო დაწესებულებებში ავრცელებს საერთო სამაგისტრო გამოცდების ტესტებს, ტესტების კრებულებს, ანალიზს უკეთებს საერთო სამაგისტრო გამოცდების შედეგებს;“.

2. ბრძანება ძალაში შევიდეს გამოქვეყნებისთანავე.

ნ. გვარამია