ბრძანება N 27723
📜 საკანონმდებლო ნორმები
📄 სრული ტექსტი
N 27723
17 დეკემბერი 2025
ბ რ ძ ა ნ ე ბ ა
შპს „-------ის“ (ს/ნ ------------)
(ფაქტ. მის.: -------------------;
იურ. მის.: ---------------------)
2025 წლის 22 ოქტომბრის საჩივრის
დაკმაყოფილებაზე უარის თქმის თაობაზე
შემოსავლების სამსახურმა დავების განხილვის საბჭოს 2025 წლის 20 ნოემბრის სხდომაზე (ოქმი №96) განიხილა შპს „-------ის“ (ს/ნ ------------) 2025 წლის 22 ოქტომბრის №-----/1/2025 საჩივარი, შემოსავლების სამსახურის აუდიტის დეპარტამენტის 2025 წლის 20 ოქტომბრის ID:---- შესაგებელთან დაკავშირებით.
სადავო საკითხი:
გადასახადის გადამხდელი არ ეთანხმება ზედმეტად გადახდილი თანხის დაბრუნებასთან დაკავშირებით აუდიტის დეპარტამენტის მიერ გამოცემულ შესაგებლებს უარის თქმის თაობაზე. განმარტავს, რომ კომპანიის ძირითად საქმიანობას წარმოადგენს საინფორმაციო ტექნოლოგიები და კომპიუტერული მომსახურების სხვა საქმიანობები, კერძოდ, ახორციელებს ჰაშ სიმძლავრის წარმოებას და მიწოდებას. ძირითადი საქმიანობიდან გამომდინარე, კომპანია სარგებლობს ელექტროენერგიის მიწოდებისთვის სს „------ის“, სს „----ის“ და სს „-----ს“ მიერ განხორციელებული მომსახურებით (გადაცემის, განაწილების და დისპეჩერეზაციის მომსახურება). ხოლო, დღგ-ის ჩასათვლელი თანხა წარმოადგენს აღნიშნული კომპანიების მომსახურებაზე გამოწერილი საგადასახადო ანგარიშ-ფაქტურებით, ასევე მიღებული სატელეკომუნიკაციო მომსახურების და დასუფთავების მომსახურებაზე გამოწერილი საგადასახადო ანგარიშ-ფაქტურებით ჩასათვლელ თანხას.
ასევე აღნიშნავს, რომ 2023 წლის 21 აპრილის საგადასახადო შემოწმების აქტით გადამხდელის მიერ მიღებული საგადასახადო ანგარიშ-ფაქტურების შედეგად წარმოშობილი ჩასათვლელი თანხები დარჩა უცვლელი და შეადგენს 1 267 380 ლარს. აღნიშნულით აუდიტის დეპარტამენტის მიერ დადასტურებულია, რომ გადამხდელის მიერ მიღებული ჩათვლა სამართლიანია და არ არსებობს მისი გაუქმების საფუძველი. აღნიშნული ასევე, დასტურდება 2025 წლის 11 ივლისის დასკვნით, რომლის საფუძველზეც გაუქმდა მხოლოდ დასაბეგრი ბრუნვა და მიღებული ჩათვლა დარჩა უცვლელი.
გადამხდელი მიუთითებს, რომ 2025 წლის 10 ოქტომბრის განცხადებას თან ახლდა სრული საბუღალტრო დოკუმენტაცია, მათ შორის საბუღალტრო პროგრამის ასლი, ბანკის ამონაწერები სრულ პერიოდზე დაფუძნების დღიდან განცხადებით მიმართვის თარიღამდე, თუმცა აუდიტის დეპარტამენტი გადაწყვეტილებაში მიუთითებს, რომ სახეზე არაა ახლად აღმოჩენილი ან ახლად გამოვლენილი გარემოებანი, რაც შეცვლიდა მათ გადაწყვეტილებას.
ყოველივე ზემოაღნიშნულის გათვალისწინებით, გადამხდელი ითხოვს ზედმეტად გადახდილი თანხის დაბრუნებას.
ფაქტობრივი გარემოებები:
საქმეში არსებული მასალებით და აუდიტის დეპარტამენტის მიერ მოწოდებული ინფორმაციით დგინდება, რომ აუდიტის დეპარტამენტის მიერ „ბიუჯეტის შემოსულობების აღრიცხვა-ანგარიშგებისა და ანგარიშსწორების განხორციელებისა და ბიუჯეტში ზედმეტად ან შეცდომით გადახდილი შემოსულობის თანხის დაბრუნების, აღრიცხვისა და ანგარიშგების შესახებ“ საქართველოს ფინანსთა მინისტრის 2009 წლის 30 დეკემბრის №916 ბრძანებით დამტკიცებული ინსტრუქციის შესაბამისად განხორციელდა შპს „-------ის“ (ს/ნ ------------) 2025 წლის 10 ოქტომბრის „მოთხოვნის“ (ID -----) შესწავლა, რომლის მიხედვითაც გადამხდელი ითხოვდა პირადი აღრიცხვის ბარათზე წარმოშობილი ზედმეტად გადახდილი თანხის 1 120 000 ლარის უკან დაბრუნებას. შპს „----ის“ პირადი აღრიცხვის ბარათზე არსებული ზედმეტობა გამოწვეულია საქართველოს საგადასახადო კოდექსის 175-ე მუხლის პირველი ნაწილის „ა“ პუნქტის შესაბამისად, საქონლის/მომსახურების შეძენისთვის გადახდილი დღგ-ის შესაბამისი ოდენობის თანხის ჩათვლის საფუძველზე.
შემოსავლების სამსახურის აუდიტის დეპარტამენტში შპს „-------ის“ (ს/ნ ------------) მიერ 2025 წლის 4 აგვისტოს წარმოდგენილ იქნა გადასახადის გადამხდელის „მოთხოვნა“ (ID ----) 1 120 000 ლარის დაბრუნების თაობაზე, რაზეც შესაბამისი საფუძვლების გათვალისწინებით ეთქვა უარი და 2025 წლის 20 აგვისტოს გაეგზავნა შესაგებელი (ID ---). აღნიშნული შესაგებელი გადასახადის გადამხდელის მიერ გასაჩივრებულ იქნა შემოსავლების სამსახურში. შემოსავლების სამსახურის დავების განხილვის საბჭომ მიიჩნია, რომ სადავო შესაგებელი აუდიტის დეპარტამენტის მიერ გამოცემულია კანონმდებლობის მოთხოვნათა დაცვით და 2025 წლის 29 სექტემბრის №21193 ბრძანებით, შპს „-------ის“ (ს/ნ ------------) საჩივარი არ დაკმაყოფილდა.
ყოველივე ზემოაღნიშნულიდან გამომდინარე, მათ შორის, იმის გათვალისწინებით, რომ სახეზე არ არის ახლად აღმოჩენილი ან ახლად გამოვლენილი გარემოებანი, აუდიტის დეპარტამენტის მიერ შპს „-------ს“ (ს/ნ ------------) 2025 წლის 10 ოქტომბრის გადასახადის გადამხდელის „მოთხოვნის“ განხილვაზე ეთქვა უარი და 2025 წლის 20 ოქტომბერს გაეგზანა შესაგებელი (ID -----).
შემოსავლების სამსახურმა განიხილა წარმოდგენილი საჩივარი და მიიჩნია, რომ გადასახადის გადამხდელის მოთხოვნა არ უნდა დაკმაყოფილდეს შემდეგ გარემოებათა გამო:
საქართველოს საგადასახდო კოდექსის 63-ე მუხლის პირველ ნაწილის თანახმად, თუ გადასახადის გადამხდელის მიერ გადახდილი გადასახადების ან/და სანქციების (მათ შორის, საბაჟო სანქციის) თანხა აღემატება დარიცხული გადასახადების ან/და სანქციების (მათ შორის, საბაჟო სანქციის) თანხას, საგადასახადო ორგანო გადასახადის გადამხდელის მოთხოვნის საფუძველზე, ამ მოთხოვნის წარდგენიდან არაუგვიანეს 1 თვისა უბრუნებს გადასახადის გადამხდელს ზედმეტად გადახდილ თანხას.
ამავე კოდექსის 65-ე მუხლის თანახმად:
1. გადასახადის გადამხდელის მოთხოვნა არის პირის მიერ საგადასახადო ორგანოსათვის წარდგენილი მოთხოვნა გადასახადების ან/და სანქციების (მათ შორის, საბაჟო სანქციის) ზედმეტად გადახდილი თანხის დაბრუნების შესახებ, რომლის შესრულებაც სავალდებულოა საგადასახადო ორგანოსათვის ამ კოდექსით გათვალისწინებულ შემთხვევებში და დადგენილი წესით.
2. გადასახადის გადამხდელის მოთხოვნის წარდგენის საფუძველია გადასახადების ან/და სანქციების (მათ შორის, საბაჟო სანქციის) ზედმეტად გადახდილი თანხა.
3. გადასახადის გადამხდელის მოთხოვნა შესრულებულად ითვლება მოთხოვნილი თანხის გადახდის მომენტიდან.
4. თუ საგადასახადო ორგანო მიიჩნევს, რომ გადასახადის გადამხდელის მოთხოვნა უსაფუძვლოა, იგი ვალდებულია მოთხოვნის მიღებიდან 20 დღის ვადაში გადასახადის გადამხდელს წარუდგინოს დასაბუთებული შესაგებელი.
5. პირს უფლება აქვს, საგადასახადო ორგანოს შესაგებელი გაასაჩივროს ამ კოდექსით დადგენილი წესით.
საქართველოს ფინანსთა მინისტრის 2009 წლის 30 დეკემბრის №916 ბრძანებით დამტკიცებული „სახელმწიფო ბიუჯეტის, აფხაზეთის და აჭარის ავტონომიური რესპუბლიკების რესპუბლიკური, თვითმმართველი ერთეულების, საქართველოს საბიუჯეტო კოდექსით განსაზღვრული საჯარო სამართლის იურიდიული პირების და არასამეწარმეო (არაკომერციული) იურიდიული პირების ბიუჯეტების შემოსულობათა აღრიცხვა-ანგარიშგება და ანგარიშსწორების შესახებ“ ინსტრუქციის VI1 თავით დადგენილია ზედმეტად გადახდილი გადასახადის ან/და სანქციის თანხის დაბრუნების დამატებითი პროცედურები და „გადასახადის გადამხდელის მოთხოვნაზე“ წარმოსადგენი დოკუმენტაციის ნუსხა.
ამავე ინსტრუქციის 131 მუხლის პირველი პუნქტის თანახმად, ზედმეტად გადახდილი გადასახადის ან/და სანქციის თანხის დაბრუნების მიზნით გადასახადის გადამხდელი უფლებამოსილია მიმართოს საგადასახადო ორგანოს და წარადგინოს „გადასახადის გადამხდელის მოთხოვნა“ (შემდგომში - „მოთხოვნა“), რომელსაც უნდა დაურთოს ამ თავით გათვალისწინებული დოკუმენტები.
ამავე ინსტრუქციის 135 მუხლის პირველი პუნქტის ,,გ“ ქვეპუნქტის თანახმად, გარდა ამ მუხლის მე-2 პუნქტით გათვალისწინებული შემთხვევისა, „მოთხოვნაზე“ უარის თქმის საფუძველია, თუ „მოთხოვნაზე“ არ არის დართული ამ თავით გათვალისწინებული დოკუმენტები;
ამავე ინსტრუქციის 134 მუხლის პირველი პუნქტის ,,ა“ პუნქტის თანახმად, საგადასახადო ორგანოს მიერ ზედმეტად გადახდილი გადასახადის ან/და სანქციის თანხაზე „მოთხოვნის“ რეგისტრაციის მომდევნო დღიდან 11 კალენდარული დღის ვადაში, მოთხოვნის რეგისტრაციის თარიღიდან წინა პერიოდზე, ხანდაზმულობის ვადის გათვალისწინებით (გარდა იმ პერიოდისა, რომელიც უკვე შემოწმებულია შემოსავლების სამსახურის აუდიტის დეპარტამენტის ან/და შემოსავლების სამსახურის შესაბამისი სტრუქტურული ერთეულის მიერ ან ის პერიოდი, რომელიც უკვე გადამოწმებულია ზედმეტად გადახდილი თანხის დაბრუნებისას) მოწმდება „მოთხოვნის“ შევსების და მასზე თანდართული დოკუმენტების სისრულე.
ყოველივე ზემოაღნიშნულიდან გამომდინარე, შემოსავლების სამსახური მიუთითებს, რომ სახეზეა საქართველოს ფინანსთა მინისტრის 2009 წლის 30 დეკემბრის №916 ბრძანებით დამტკიცებული „ბიუჯეტების შემოსულობების აღრიცხვა-ანგარიშგებისა და ანგარიშსწორების განხორციელებისა და ბიუჯეტში ზედმეტად ან შეცდომით გადახდილი შემოსულობის თანხის დაბრუნების, აღრიცხვისა და ანგარიშგების შესახებ“ ინსტრუქციის 135 მუხლის პირველი ნაწილის „გ“ პუნქტით გათვალისწინებული, მოთხოვნაზე უარის თქმის საფუძველი. ამდენად, შემოსავლების სამსახურმა მიიჩნია, რომ სადავო შესაგებელი აუდიტის დეპარტამენტის მიერ გამოცემულია კანონმდებლობის მოთხოვნათა დაცვით და არ არსებობს წარმოდგენილი საჩივრის დაკმაყოფილების სამართლებრივი საფუძველი.
საქართველოს საგადასახადო კოდექსის 304-ე მუხლის საფუძველზე,ვ ბ რ ძ ა ნ ე ბ :
1. შპს „-------ის“ (ს/ნ ------------) საჩივარი არ დაკმაყოფილდეს;
2. აღნიშნული ბრძანების გასაჩივრება შესაძლებელია საქართველოს ფინანსთა სამინისტროსთან არსებულ დავების განხილვის საბჭოში (მის.: ქ. თბილისი, ვახტანგ გორგასლის ქ. №16) ან სასამართლოში (მის.: ქ. ქუთაისი, ვიქტორ კუპრაძის ქ. №11), საქართველოს საგადასახადო კოდექსის XIV კარით დადგენილი წესის შესაბამისად, მისი ჩაბარებიდან 20 კალენდარული დღის ვადაში.
სადავო საკითხი
გადასახადის გადამხდელი არ ეთანხმება ზედმეტად გადახდილი თანხის დაბრუნებასთან დაკავშირებით აუდიტის დეპარტამენტის მიერ გამოცემულ შესაგებლებს უარის თქმის თაობაზე.
ფაქტობრივი გარემოებები
აუდიტის დეპარტამენტის მიერ „ბიუჯეტის შემოსულობების აღრიცხვა-ანგარიშგებისა და ანგარიშსწორების განხორციელებისა და ბიუჯეტში ზედმეტად ან შეცდომით გადახდილი შემოსულობის თანხის დაბრუნების, აღრიცხვისა და ანგარიშგების შესახებ“ საქართველოს ფინანსთა მინისტრის 2009 წლის 30 დეკემბრის №916 ბრძანებით დამტკიცებული ინსტრუქციის შესაბამისად განხორციელდა მომჩივანის 2025 წლის 10 ოქტომბრის „მოთხოვნის“ შესწავლა, რომლის მიხედვითაც გადამხდელი ითხოვდა პირადი აღრიცხვის ბარათზე წარმოშობილი ზედმეტად გადახდილი თანხის 1 120 000 ლარის უკან დაბრუნებას. მომჩივანის პირადი აღრიცხვის ბარათზე არსებული ზედმეტობა გამოწვეულია საქართველოს საგადასახადო კოდექსის 175-ე მუხლის პირველი ნაწილის „ა“ პუნქტის შესაბამისად, საქონლის/მომსახურების შეძენისთვის გადახდილი დღგ-ის შესაბამისი ოდენობის თანხის ჩათვლის საფუძველზე.
შემოსავლების სამსახურის აუდიტის დეპარტამენტში გადსახადის გადამხდელის მიერ 2025 წლის 4 აგვისტოს წარმოდგენილ იქნა გადასახადის გადამხდელის „მოთხოვნა“ 1 120 000 ლარის დაბრუნების თაობაზე, რაზეც შესაბამისი საფუძვლების გათვალისწინებით ეთქვა უარი და 2025 წლის 20 აგვისტოს გაეგზავნა შესაგებელი . აღნიშნული შესაგებელი გადასახადის გადამხდელის მიერ გასაჩივრებულ იქნა შემოსავლების სამსახურში. შემოსავლების სამსახურის დავების განხილვის საბჭომ მიიჩნია, რომ სადავო შესაგებელი აუდიტის დეპარტამენტის მიერ გამოცემულია კანონმდებლობის მოთხოვნათა დაცვით და №21193 ბრძანებით, პირის საჩივარი არ დაკმაყოფილდა.
ყოველივე ზემოაღნიშნულიდან გამომდინარე, მათ შორის, იმის გათვალისწინებით, რომ სახეზე არ არის ახლად აღმოჩენილი ან ახლად გამოვლენილი გარემოებანი, აუდიტის დეპარტამენტის მიერ მომჩივანის 2025 წლის 10 ოქტომბრის გადასახადის გადამხდელის „მოთხოვნის“ განხილვაზე ეთქვა უარი და 2025 წლის 20 ოქტომბერს გაეგზანა შესაგებელი .
გადაწყვეტილება
შემოსავლების სამსახურმა მიიჩნია, რომ სადავო შესაგებელი აუდიტის დეპარტამენტის მიერ გამოცემულია კანონმდებლობის მოთხოვნათა დაცვით და არ არსებობს წარმოდგენილი საჩივრის დაკმაყოფილების სამართლებრივი საფუძველი.
დასაბუთება
შემოსავლების მამსახურის დავების განხილვის საბჭო გადაწყვეტილების დასაბუთებისას ეყრდნობა საქართველოს საგადასახადო კოდექსის შემდეგ ნორმებს: 63(1); 65(1.2.3.4.5);