საქართველოს ადმინისტრაციულ სამართალდარღვევათა კოდექსში დამატებების შეტანის შესახებ

საქართველოს კანონი

საქართველოს ადმინისტრაციულ სამართალდარღვევათა კოდექსში დამატებების შეტანის შესახებ

    მუხლი 1

საქართველოს ადმინისტრაციულ სამართალდარღვევათა კოდექსში (საქართველოს სსრ უმაღლესი საბჭოს უწყებები, 1984წ., №12-ის დანართი, მუხ. 421) შეტანილ იქნეს შემდეგი დამატებები:

1. კოდექსს დაემატოს შემდეგი შინაარსის 44² მუხლი:

     „მუხლი 44². უკანონო საექიმო ან ფარმაცევტული საქმიანობა

1. საექიმო ან ფარმაცევტული საქმიანობა სახელმწიფო ნებართვის (ლიცენზიის) გარეშე,–

გამოიწვევს დაჯარიმებას ათასი ლარის ოდენობით.

2. სამკურნალო საშუალების მომზადების, წარმოების, ვარგისობის ვადების, შეძენის (შესყიდვის), შენახვის, აღრიცხვის, გაცემის (რეალიზაციის), ხარისხის კონტროლის, სტანდარტიზაციის, სერტიფიცირების, შეფუთვის, მარკირების, გადაზიდვა-გადაგზავნის, ექსპორტ-იმპორტის, რეექსპორტის, განადგურების დადგენილი წესების დარღვევა ან/და ფარმაცევტული საქმიანობის განხორციელება არასპეციალისტის მიერ, აგრეთვე ფალსიფიცირებული ან არარეგისტრირებული სამკურნალო საშუალების გასაღება,–

გამოიწვევს დაჯარიმებას რვაასი ლარის ოდენობით, სამართალდარღვევის საგნის კონფისკაციით.

3. ამ მუხლის პირველ და მე-2 ნაწილებში აღნიშნული ქმედებები, ჩადენილი განმეორებით,–

გამოიწვევს დაჯარიმებას ორი ათასი ლარის ოდენობით, სამართალდარღვევის საგნის კონფისკაციით.“.

2. 208-ე მუხლს ციფრების „44¹“ შემდეგ დაემატოს ციფრები „44²“.

3. 239-ე მუხლს დაემატოს შემდეგი შინაარსის 38-ე ნაწილი:

„38. ამ კოდექსის 44² და 45-ე მუხლებით გათვალისწინებულ სამართალდარღვევათა შესახებ ოქმს ადგენენ საქართველოს შრომის, ჯანმრთელობისა და სოციალური დაცვის სამინისტროს, აფხაზეთის, აჭარის ავტონომიური რესპუბლიკის სამედიცინო ან ფარმაცევტული საქმიანობის სახელმწიფო კონტროლისა და ზედამხედველობის განმახორციელებელი დაწესებულებები.“.

    მუხლი 2

ეს კანონი ამოქმედდეს გამოქვეყნებიდან მე-15 დღეს.

საქართველოს პრეზიდენტი ედუარდ შევარდნაძე

თბილისი,

2001 წლის 18 დეკემბერი.

№1193_Iს