სახელმწიფო საკუთრებაში არსებული უძრავი ქონების შპს „გსქ კულასათვის“ პირდაპირი მიყიდვის ფორმით პრივატიზების შესახებ

საქართველოს მთავრობის

განკარგულება №644

2015 წლის 26 მარტი

ქ. თბილისი

სახელმწიფო საკუთრებაში არსებული უძრავი ქონების შპს „გსქ კულასათვის“ პირდაპირი მიყიდვის ფორმით პრივატიზების შესახებ

1. „სახელმწიფო ქონების შესახებ“ საქართველოს კანონის მე-18 მუხლის მე-3 პუნქტის და „აწარმოე საქართველოში“ სახელმწიფო პროგრამის დამტკიცების შესახებ“ საქართველოს მთავრობის 2014 წლის 30 მაისის №365 დადგენილებით დამტკიცებული „სახელმწიფო პროგრამის“ მე-7 და 28-ე მუხლების შესაბამისად, სახელმწიფო საკუთრებაში არსებული, გორის მუნიციპალიტეტში, სოფელ კარბიში მდებარე 6773 კვ.მ არასასოფლო-სამეურნეო დანიშნულების მიწის ნაკვეთი და მასზე არსებული შენობა-ნაგებობები: №1 - მაცივარი - 1006.60 კვ.მ, №2 - აუზი, №3 -ავტოფარეხი - 36.96 კვ.მ, №4 - საყარაულო - 20.16 კვ.მ, (მიწის (უძრავი ქონების) საკადასტრო კოდი: №66.51.07.018) პირდაპირი მიყიდვის ფორმით, 1 (ერთი) ლარად, საკუთრებაში გადაეცეს შპს „გსქ კულას“ (ს/კ 218083197).

 2. ამ განკარგულების პირველი პუნქტით გადაცემული უძრავი ქონების საპრივატიზებო პირობებად განისაზღვროს:

 ა) საპრივატიზებო თანხის გადახდა, ამ განკარგულების გამოცემიდან 1 (ერთი) თვის ვადაში;

 ბ) ამ განკარგულების პირველი პუნქტით გადაცემულ უძრავ ქონებაზე, ხილისა და კენკროვნების გადამამუშავებელი საწარმოს შექმნა და წარმოების დაწყება, ამ განკარგულების გამოცემიდან არა უმეტეს 2 (ორი) წლის ვადაში;

 გ) ამ პუნქტის „ბ“ ქვეპუნქტით გათვალისწინებული საპრივატიზებო პირობის შესრულების მიზნით, არანაკლებ 95 592 (ოთხმოცდათხუთმეტი ათას ხუთას ოთხმოცდათორმეტი) ლარის ინვესტიციის განხორციელება შემდეგი გრაფიკის მიხედვით:

 გ.ა) ინვესტიციის არანაკლებ 25% - ამ განკარგულების გამოცემიდან 1 (ერთი) წლის განმავლობაში;

 გ.ბ) ინვესტიციის დარჩენილი ნაწილი - ამ განკარგულების გამოცემიდან მე-2 წლის განმავლობაში;

 დ) ამ პუნქტის „ბ“ ქვეპუნქტით განსაზღვრული წარმოების დაწყებიდან არანაკლებ 2 (ორი) წლის განმავლობაში, წარმოების პროფილის შენარჩუნება და ამ განკარგულების გამოცემამდე შემოთავაზებული პროდუქციის წლიური მოცულობის, კერძოდ, არანაკლებ 400 (ოთხასი) ტონა ხილისა და არანაკლებ 10 (ათი) ტონა კენკროვნების გადამუშავების უზრუნველყოფა შემდეგი პირობებით:

 დ.ა) წარმოების დაწყებიდან პირველი წლის განმავლობაში, არანაკლებ 400 (ოთხასი) ტონა ხილისა და არანაკლებ 10 (ათი) ტონა კენკროვანის არანაკლებ 25%-ის გადამუშავება;

 დ.ბ) წარმოების დაწყებიდან მეორე წლის განმავლობაში, არანაკლებ 400 (ოთხასი) ტონა ხილისა და არანაკლებ 10 (ათი) ტონა კენკროვნების 50%- ის გადამუშავება.

 3. შპს „გსქ კულას“ მიერ წარდგენილი, განსახორცილებელი ინვესტიციის 10%-ის ოდენობის უპირობო და გამოუხმობი საბანკო გარანტია უზრუნველყოფს, ამ განკარგულების საფუძველზე, შესაბამისი ნასყიდობის ხელშეკრულების გაფორმებისა და ამ განკარგულების მე-2 პუნქტის „ა“-,,გ“ ქვეპუნქტებით გათვალისწინებული საპრივატიზებო პირობების შესრულებას (მათ შორის, ვალდებულებ(ებ)ის შეუსრულებლობისათვის ნასყიდობის ხელშეკრულების საფუძველზე დაკისრებული პირგასამტეხლოს გადახდას).

 4. საქართველოს ეკონომიკისა და მდგრადი განვითარების სამინისტროს სისტემაში შემავალმა საჯარო სამართლის იურიდიულმა პირმა - სახელმწიფო ქონების ეროვნულმა სააგენტომ, ამ განკარგულების შესრულების მიზნით, განახორციელოს კანონმდებლობით გათვალისწინებული შესაბამისი ღონისძიებები.

პრემიერ-მინისტრი ი. ღარიბაშვილი