„საქართველოს მთავრობაში სახელმწიფო მინისტრის თანამდებობების შემოღების შესახებ“ საქართველოს პრეზიდენტის 2004 წლის 14 თებერვლის №61 ბრძანებულებაში ცვლილებებისა და დამატებების შეტანის თაობაზე”

საქართველოს პრეზიდენტის

ბრძანებულება №597

2004 წლის 17 დეკემბერი

ქ. თბილისი

„საქართველოს მთავრობაში სახელმწიფო მინისტრის თანამდებობების შემოღების შესახებ“ საქართველოს პრეზიდენტის 2004 წლის 14 თებერვლის   №61 ბრძანებულებაში ცვლილებებისა და დამატებების შეტანის თაობაზე

„ნორმატიული აქტების შესახებ“ საქართველოს კანონის 36-ე მუხლის პირველი პუნქტის შესაბამისად, „საქართველოს მთავრობაში სახელმწიფო მინისტრის თანამდებობების შემოღების შესახებ“ საქართველოს პრეზიდენტის 2004 წლის 14 თებერვლის №61 ბრძანებულებაში (სსმ III, 2004 წ., №17, მუხლი 168) შეტანილ იქნეს შემდეგი ცვლილებები და დამატებები და ბრძანებულების პრეამბულა და პირველი პუნქტი ჩამოყალიბდეს შემდეგი რედაქციით:

„ევროპულ და ევროატლანტიკურ სტრუქტურებში საქართველოს პოლიტიკური, სამართლებრივი და ეკონომიკური ინტეგრაციის, საქართველოში კონფლიქტების შედეგების აღმოფხვრის, სამოქალაქო ინტეგრაციის ხელშეწყობისა და რეფორმების კოორდინაციის მიზნით „საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონის მე-11 მუხლის შესაბამისად:

1. საქართველოს მთავრობაში შეიქმნას სახელმწიფო მინისტრის შემდეგი თანამდებობები:

ა) სახელმწიფო მინისტრი – ევროპულ და ევროატლანტიკურ სტრუქტურებში ინტეგრაციის საკითხებში;

ბ) სახელმწიფო მინისტრი – კონფლიქტების მოგვარების საკითხებში;

გ) სახელმწიფო მინისტრი – სამოქალაქო ინტეგრაციის საკითხებში;

დ) სახელმწიფო მინისტრი – რეფორმების კოორდინაციის საკითხებში.“.

მ. სააკაშვილი