„საქართველოს მთავრობის ადმინისტრაციის დებულების დამტკიცების თაობაზე“ საქართველოს მთავრობის 2018 წლის 26 ივნისის №340 დადგენილებაში ცვლილების შეტანის შესახებ

1. მე-2 მუხლის „ო⁴“ ქვეპუნქტის შემდეგ დაემატოს შემდეგი შინაარსის „ო⁵“ − „ო⁹“ ქვეპუნქტები:

„ო⁵) გარემოსდაცვითი პოლიტიკის განხორციელების უზრუნველსაყოფად, სახელმწიფო ხელისუფლების ორგანოების ურთიერთობების კოორდინაციას; მუნიციპალური გარემოსდაცვითი პოლიტიკის შემუშავებისა და განხორციელების ხელშეწყობას;

ო⁶) გარემოსდაცვით და ბუნებრივი რესურსების მართვის სფეროში სექტორული თანამშრომლობის ხელშეწყობასა და კოორდინაციას, ასევე „მწვანე ეკონომიკის“ ინსტრუმენტებისა და „მწვანე ტექნოლოგიების“ დანერგვის ხელშეწყობასა და შესაბამისი რეკომენდაციების მომზადებას;

ო⁷) გარემოსდაცვით სფეროში მიმდინარე რეფორმების განხორციელებაში მონაწილეობას. აღნიშნულ პროცესში სამოქალაქო საზოგადოების, საჯარო/კერძო სექტორის ჩართულობის უზრუნველყოფას, თანამშრომლობის ხელშეწყობას, მედიაციასა და კოორდინაციას; 

ო⁸) აქტუალური და პრიორიტეტული გარემოსდაცვითი საკითხებისა და კონკრეტული პროექტების გარემოსდაცვითი ინტერესების პრიორიტეტული დაცვის თვალსაზრისით განხილვას/შეფასებას და შესაბამისი წინადადებების მომზადებას;

ო⁹) გარემოსდაცვით სფეროში მოქალაქეთა კანონიერი ინტერესებისა და უფლებების დაცვის ხელშეწყობას;“.

2.  3¹ მუხლის შემდეგ დაემატოს შემდეგი შინაარსის 3²  მუხლი:

„მუხლი 3². საქართველოს პრემიერ-მინისტრის გარემოსდაცვითი საკითხების განმხილველი სამდივნო

1. საქართველოს მთავრობის ადმინისტრაციაში, საქართველოს პრემიერ-მინისტრისადმი პირდაპირი დაქვემდებარების პრინციპით, იქმნება საქართველოს პრემიერ-მინისტრის გარემოსდაცვითი საკითხების განმხილველი სამდივნო.

2. გარემოსდაცვითი საკითხების განმხილველი სამდივნოს ძირითადი ამოცანებია: ქვეყანაში გარემოსდაცვითი პოლიტიკის განხორციელების უზრუნველსაყოფად, სახელმწიფო ხელისუფლების ორგანოების ურთიერთობების კოორდინაცია; მუნიციპალური გარემოსდაცვითი პოლიტიკის შემუშავებისა და განხორციელების  ხელშეწყობა; სექტორული თანამშრომლობის ხელშეწყობა, კოორდინაცია და შესაბამისი რეკომენდაციების მომზადება; „მწვანე ეკონომიკის“ ინსტრუმენტებისა და „მწვანე ტექნოლოგიების“ დანერგვის ხელშეწყობა; გარემოსდაცვით სფეროში მიმდინარე რეფორმების განხორციელების პროცესში მონაწილეობა და აღნიშნულ პროცესში სამოქალაქო საზოგადოების, საჯარო/კერძო სექტორის ჩართულობის ხელშეწყობა,  თანამშრომლობის უზრუნველყოფა და მედიაცია;   აქტუალური და პრიორიტეტული გარემოსდაცვითი საკითხების, ასევე  კონკრეტული პროექტების გარემოსდაცვითი ინტერესების პრიორიტეტული დაცვის თვალსაზრისით განხილვა/შეფასება და შესაბამისი წინადადებების მომზადება; გარემოსდაცვითი ახალი საკითხების ინიციირება შესაბამის უწყებებში, უწყებათშორისი საკითხების პრიორიტეტიზაცია და მათი კოორდინირება; გარემოსდაცვით სფეროში მოქალაქეთა კანონიერი ინტერესებისა და უფლებების დაცვის ხელშეწყობა.

3. ცალკეული აქტუალური გარემოსდაცვითი საკითხების განხილვის მიზნით, გარემოსდაცვითი საკითხების განმხილველი სამდივნო უფლებამოსილია, მიმართოს საქართველოს პრემიერ-მინისტრს და მისი თანხმობით მოიწვიოს შესაბამისი უწყებები, დაინტერესებული პირები და სამოქალაქო და კერძო სექტორის წარმომადგენლები. აღნიშნულ შეხვედრას ხელმძღვანელობს საქართველოს პრემიერ-მინისტრი.

4. საქართველოს პრემიერ-მინისტრის გარემოსდაცვითი საკითხების განმხილველ სამდივნოს ხელმძღვანელობს გარემოსდაცვითი ომბუდსმენი, რომელსაც თანამდებობაზე ნიშნავს და თანამდებობიდან ათავისუფლებს საქართველოს პრემიერ-მინისტრი.

5. საქართველოს პრემიერ-მინისტრის გარემოსდაცვითი საკითხების განმხილველი სამდივნოს დეტალური კომპეტენცია განისაზღვრება სამდივნოს დებულებით და გამომდინარეობს ამ მუხლის მე-2 პუნქტით განსაზღვრული ძირითადი ამოცანებიდან.

6. საქართველოს პრემიერ-მინისტრის გარემოსდაცვითი საკითხების განმხილველი სამდივნოს დებულებას, გარემოსდაცვითი ომბუდსმენის წარდგინებით, ამტკიცებს საქართველოს პრემიერ-მინისტრი.

7. საქართველოს პრემიერ-მინისტრის გარემოსდაცვითი საკითხების განმხილველ სამდივნოში შესაძლებელია, შეიქმნას სტრუქტურული ქვედანაყოფები.

8. საქართველოს პრემიერ-მინისტრის გარემოსდაცვითი საკითხების განმხილველი სამდივნოს ფუნქციონირებისთვის საჭირო ხარჯების დაფინანსება, ტექნიკურ-მატერიალური და ფინანსური უზრუნველყოფა ხორციელდება წლიური საბიუჯეტო კანონით საქართველოს მთავრობის ადმინისტრაციისთვის გათვალისწინებული ასიგნებებიდან.“.