საქართველოს გენერალური პროკურორის სათათბირო ორგანოს – სიცოცხლის ხელყოფის საქმეებზე დაზარალებულთა საჩივრების განმხილველი საბჭოს დებულების დამტკიცების შესახებ

საქართველოს გენერალური პროკურორის სათათბირო ორგანოს – სიცოცხლის ხელყოფის საქმეებზე დაზარალებულთა საჩივრების განმხილველი საბჭოს დებულება

1. საქართველოს გენერალური პროკურორის (შემდგომში – გენერალური პროკურორი) სათათბირო ორგანო – სიცოცხლის ხელყოფის საქმეებზე დაზარალებულთა საჩივრების განმხილველი საბჭო (შემდგომში – საბჭო) არის საქართველოს პროკურატურის (შემდგომში – პროკურატურა) ამოცანების სწრაფად და ეფექტიანად განხორციელების ხელშეწყობის მიზნით შექმნილი სათათბირო ორგანო.

2. საბჭოს საქმიანობის სამართლებრივი საფუძვლებია: საქართველოს კონსტიტუცია, საქართველოს საერთაშორისო ხელშეკრულებები, ,,პროკურატურის შესახებ“ საქართველოს ორგანული კანონი, ეს დებულება და სხვა სამართლებრივი აქტები.

3. საბჭოს საქმიანობა წარიმართება კანონიერებისა და სამართლიანობის, ობიექტურობისა და მიუკერძოებლობის, პროფესიონალიზმისა და კომპეტენტურობის პრინციპების დაცვით.

4. საბჭო ანგარიშვალდებულია საქართველოს გენერალური პროკურორის წინაშე.

საბჭო განიხილავს განსაკუთრებული სირთულის სიცოცხლის ხელყოფის საქმეებს, გენერალური პროკურორის გადაწყვეტილებით ან/და დაზარალებულის საჩივრის საფუძველზე.

1. საბჭოს შემადგენლობა განისაზღვრება გენერალური პროკურორის ბრძანებით.

2. საბჭოს ხელმძღვანელობს საბჭოს თავმჯდომარე, რომელსაც, ორი წლის  ვადით, საბჭოს წევრთაგან, ღია კენჭისყრით ირჩევს საბჭო, სხდომაზე დამსწრე წევრთა ხმათა უმრავლესობით.

3. საბჭოს ჰყავს მდივანი – საბჭოს სამდივნოს ერთ-ერთი წარმომადგენელი.

სიცოცხლის ხელყოფის საქმის დაზარალებული საბჭოს მიმართავს საჩივრით. საჩივრის წარდგენა აგრეთვე შესაძლებელია ელექტრონული ფორმით – საბჭოს ელექტრონული ფოსტის (cc@pog.gov.ge) მეშვეობით.

1. საბჭო იკრიბება  საჭიროებისამებრ, საბჭოს თავმჯდომარის მოწვევით.

2. საბჭო უფლებამოსილია განიხილოს საჩივარი/საქმე, თუ საბჭოს სხდომას ესწრება  საბჭოს წევრთა უმრავლესობა.

3. საჩივრის/საქმის განხილვაში მონაწილეობას ვერ მიიღებს საბჭოს/საბჭოს სამდივნოს წევრი, თუ პირადად ან მისი დაქვემდებარებული თანამშრომელი სისხლის სამართლის შესაბამის საქმეზე ახორციელებს გამოძიებას, გამოძიების საპროცესო ხელმძღვანელობას ან/და სახელმწიფო ბრალდების მხარდაჭერას.    

4. საბჭოს სხდომას შესაძლებელია დაესწროს გენერალური პროკურორი ან/და გენერალური პროკურორის პირველი მოადგილე და მოადგილეები.

5. საბჭოზე საკითხის განხილვისას განმარტებებისა და ინფორმაციის მისაღებად შესაძლებელია მოწვეულ იქნეს შესაბამისი პროკურორი/გამომძიებელი ან/და დანაყოფის ხელმღვანელი.

6 საბჭოს გადაწყვეტილება მიიღება სხდომაზე დამსწრე საბჭოს წევრთა ხმათა უმრავლესობით, ღია კენჭისყრით.

7. საბჭოს გადაწყვეტილება, რომელიც სარეკომენდაციო ხასიათისაა,  ფორმდება ოქმით, რომელსაც ადგენს სამდივნო (სხდომის მდივანი). ოქმს ხელს აწერენ სამდივნოს წარმომადგენელი და სხდომაზე დამსწრე საბჭოს წევრები.

8. საბჭოს მიერ მიღებული გადაწყვეტილება წარედგინება გენერალურ პროკურორს, რომელიც  უფლებამოსილია არ დაეთანხმოს რეკომენდაციას. ასეთ შემთხვევაში, იგი უარს ამბობს რეკომენდაციის გაზიარებაზე ან/და  დაავალებს საბჭოს დამატებით შეისწავლოს საკითხი.

9. საბჭოს გადაწყვეტილება, რომელსაც ეთანხმება გენერალური პროკურორი, ეგზავნება შესაბამის პროკურორსა და მის ხელმძღვანელს.

1. საბჭო იკრიბება და რეკომენდაციას გასცემს სამდივნოს მიერ საჩივრის განსახილველად გადაგზავნიდან ან/და გენერალური პროკურორის მიერ გადაწყვეტილების მიღებიდან გონივრულ ვადაში.

2. საბჭო უფლებამოსილია, გამოითხოვოს და შეისწავლოს სისხლის სამართლის საქმის მასალები, გამოითხოვოს და მიიღოს საკითხის გადაწყვეტისთვის აუცილებელი  ინფორმაცია ან/და დოკუმენტი. განახორციელოს სხვა უფლებამოსილება, რაც დაეხმარება საკითხის სრულყოფილად შესწავლაში.

3. სისხლის სამართლის საქმეზე, სადაც დადგენილია ხარვეზების არსებობის ფაქტი, საბჭო აწესებს ზედამხედველობას, მასზე შემაჯამებელი გადაწყვეტილების მიღებამდე.

4. საბჭო უფლებამოსილია, საჭიროების შემთხვევაში, წინადადებით მიმართოს გენერალურ პროკურორს პროკურორის/პროკურატურის გამომძიებლის მიმართ დისციპლინური პასუხისმგებლობის თაობაზე.

1. საბჭოს საქმიანობის ორგანიზაციულ-ტექნიკურ უზრუნველყოფას ახორციელებს საბჭოს სამდივნო.

2. სამდივნო შედგება არაუმეტეს სამი წევრისაგან რომელთა ვინაობას განსაზღვრავს გენერალური პროკურორი.

3. სამდივნო უზრუნველყოფს  საბჭოსათვის წარდგენილი საჩივრების, მასალების შეკრებასა და სისტემატიზაციას.

4. საჩივრებისა და მასალების შესწავლის საფუძველზე, სამდივნო, საბჭოს თავმჯომარესთან შეთანხმებით, იღებს დასაბუთებულ გადაწყვეტილებას, საკითხის საბჭოსთვის განსახილველად გადაცემის ან გადაცემაზე უარის თქმის შესახებ.

5. სამდივნო უფლებამოსილია, პროკურატურის შესაბამისი ორგანოებიდან და სტრუქტურული დანაყოფებიდან გამოითხოვოს მასალები. საჭიროების შემთხვევაში გაესაუბროს საჩივრის ავტორს ან/და პროკურორს, რომელიც ახორციელებს გამოძიების საპროცესო ხელმძღვანელობას ან/და სახელმწიფო ბრალდების მხარდაჭერას.

6. საჩივრის საბჭოსთვის გადაცემაზე უარის თქმის შესახებ გადაწყვეტილება ეგზავნება საჩივრის ავტორს.