„საუბნო საარჩევნო კომისიის წევრთა არჩევის პროცედურებისა და გადაწყვეტილების მიღების წესის დამტკიცების შესახებ” საქართველოს ცენტრალური საარჩევნო კომისიის 2021 წლის 15 ივლისის №30/2021 დადგენილებაში ცვლილების შეტანის შესახებ

უბნის № _______

დანართი

საუბნო საარჩევნო კომისიის წევრთა არჩევის პროცედურები და

გადაწყვეტილების მიღების წესი

საუბნო საარჩევნო კომისიის 8 წევრს, მათ შორის, აღნიშნული საუბნო საარჩევნო კომისიის ხელმძღვანელ პირებს, ირჩევს შესაბამისი საოლქო საარჩევნო კომისია კომისიის სხდომაზე, სახელობითი კენჭისყრით.

საუბნო საარჩევნო კომისიის წევრები/ხელმძღვანელი პირები აირჩევიან შესაბამისი საოლქო საარჩევნო კომისიის მიერ სრული შემადგენლობის არანაკლებ ორი მესამედით, იმ პირობით, რომ კანდიდატურას მხარი დაუჭირა, მათ შორის, ცესკოს მიერ 5 წლის ვადით არჩეულმა შესაბამისი საოლქო საარჩევნო კომისიის 3-მა წევრმა მაინც.

(საოლქო საარჩევნო კომისიის სრული შემადგენლობა – არაუმეტეს 13 წევრი, სრული შემადგენლობის ორი მესამედი – არანაკლებ 9 წევრი, მომხრე არანაკლებ 9 წევრიდან 3 წევრი მაინც უნდა იყოს 5 წლის ვადით არჩეული საოლქო საარჩევნო კომისიის წევრი. ხელახალი კენჭისყრისას, სრული შემადგენლობის უმრავლესობა – არანაკლებ 7 წევრი, მომხრე არანაკლებ 7 წევრიდან 3 მაინც უნდა იყოს 5 წლის ვადით არჩეული საოლქო საარჩევნო კომისიის წევრი).

არჩევის პროცედურაში საოლქო საარჩევნო კომისიის წევრი არ მონაწილეობს, თუ ის არის შესაბამისი საუბნო საარჩევნო კომისიის წევრობის კანდიდატის (მათ შორის, ხელმძღვანელი პირების) ოჯახის წევრი (მეუღლე, პირდაპირი აღმავალი ან დამავალი შტოს ნათესავი, გერი, და, ძმა, მშობლის ან შვილის გერი, მეუღლის და, ძმა, მშობელი).

საუბნო საარჩევნო კომისიის წევრად/ხელმძღვანელ პირად არ შეიძლება აირჩეს:

ა) პირი, რომელსაც საუბნო საარჩევნო კომისიის წევრად/ხელმძღვანელ პირად წარდგენის დღისთვის 18 წელი არ შესრულებია;

ბ) პირი, რომელსაც არ აქვს საუბნო საარჩევნო კომისიის წევრის სერტიფიკატი, გარდა საარჩევნო კოდექსის 24-ე მუხლის 5¹ და 5² პუნქტებით გათვალისწინებული შემთხვევებისა, ხოლო ხელმძღვანელ პირად, თუ არ აქვს საუბნო საარჩევნო კომისიის ხელმძღვანელი პირის სერტიფიკატი, გარდა საარჩევნო კოდექსის 25¹ მუხლის მე-6 და მე-7 პუნქტებით გათვალისწინებული შემთხვევებისა;

გ) პირი, რომელიც საქართველოს საარჩევნო კანონმდებლობის დარღვევის გამო საარჩევნო კომისიამ ან სასამართლომ გაათავისუფლა საქართველოს საარჩევნო ადმინისტრაციაში დაკავებული თანამდებობიდან, – თანამდებობიდან გათავისუფლების დღიდან 4 წლის განმავლობაში;

დ) პირი, რომელიც საქართველოს საარჩევნო კანონმდებლობის დარღვევის გამო სასამართლომ ცნო ადმინისტრაციულ სამართალდამრღვევად, – სასამართლოს გადაწყვეტილების კანონიერ ძალაში შესვლიდან 4 წლის განმავლობაში;

ე) ნასამართლევი პირი (გარდა იმ შემთხვევისა, როდესაც პირს სანქციის სახით შეფარდებული აქვს ჯარიმა);

ვ) საქართველოს პარლამენტის წევრი, აფხაზეთისა და აჭარის ავტონომიური რესპუბლიკების უმაღლესი წარმომადგენლობითი ორგანოების წევრები;

ზ) საქართველოს პრემიერ-მინისტრი, საქართველოს მთავრობის სხვა წევრი, მისი მოადგილე, აფხაზეთისა და აჭარის ავტონომიური რესპუბლიკების მთავრობათა ხელმძღვანელები, აფხაზეთისა და აჭარის ავტონომიური რესპუბლიკების მთავრობათა სხვა წევრები, მათი მოადგილეები;

თ) მუნიციპალიტეტის წარმომადგენლობითი ორგანოს – საკრებულოს წევრი, მუნიციპალიტეტის მერი, მისი მოადგილე, სახელმწიფო რწმუნებული;

ი) საქართველოს პრეზიდენტის ადმინისტრაციის უფროსი, მისი მოადგილე, საქართველოს მთავრობის ადმინისტრაციის უფროსი, მისი მოადგილე, საქართველოს პარლამენტის აპარატის უფროსი, მისი მოადგილე;

კ) სამინისტროს მმართველობის სფეროში შემავალი სახელმწიფო საქვეუწყებო დაწესებულების, სამინისტროს დეპარტამენტის, სამმართველოს, საჯარო სამართლის იურიდიული პირის ხელმძღვანელი (გარდა იმ საჯარო სამართლის იურიდიული პირებისა, რომლებიც არ შედიან სამინისტროს მმართველობის სფეროში, მათ შორის საგანმანათლებლო დაწესებულებები);

ლ) სამხედრო მოსამსახურე, საქართველოს შინაგან საქმეთა სამინისტროს, საქართველოს თავდაცვის სამინისტროს, საქართველოს იუსტიციის სამინისტროს გენერალური ინსპექციის, ამავე სამინისტროს სისტემაში შემავალი სახელმწიფო საქვეუწყებო დაწესებულების − სპეციალური პენიტენციური სამსახურის, საქართველოს სახელმწიფო უსაფრთხოების სამსახურის, საქართველოს დაზვერვის სამსახურის, სახელმწიფო დაცვის სპეციალური სამსახურის, საქართველოს ფინანსთა სამინისტროს საგამოძიებო სამსახურის მოსამსახურე, სპეციალური საგამოძიებო სამსახურის საგამოძიებო დანაყოფის თანამშრომელი;

მ) მოსამართლე, მისი თანაშემწე;

ნ) პროკურატურის თანამშრომელი;

ო) პოლიტიკური პარტიის ხელმძღვანელი პირი;

პ) პირი, რომელიც არჩევნების დანიშვნიდან იყო/არის საარჩევნო სუბიექტი/საარჩევნო სუბიექტობის კანდიდატი ან/და მისი წარმომადგენელი;

ჟ) დამკვირვებელი ორგანიზაციის ხელმძღვანელი პირი, დამკვირვებელი;

რ) შესაბამის საარჩევნო კომისიაში აკრედიტებული პრესის ან მასობრივი ინფორმაციის სხვა საშუალების წარმომადგენელი.

დაუშვებელია საუბნო საარჩევნო კომისიის წევრად/ხელმძღვანელ პირად იმ პირის არჩევა, რომელიც ბოლოს ჩატარებული ორი საერთო არჩევნებიდან ან ბოლოს ჩატარებული ორი შუალედური არჩევნებიდან, რომელიმეს დანიშვნის შემდეგ იყო პარტიის მიერ დანიშნული საარჩევნო კომისიის წევრი, საარჩევნო სუბიექტი ან საარჩევნო სუბიექტის წარმომადგენელი ან ბოლოს ჩატარებული საერთო არჩევნების წლის დასაწყისიდან ან ბოლოს ჩატარებული შუალედური არჩევნების წლის დასაწყისიდან იყო რომელიმე პარტიის შემომწირველი.

თუ კანდიდატთა რაოდენობა ასარჩევ რაოდენობაზე მეტი აღმოჩნდა, არჩეულად ჩაითვლებიან მათ შორის უკეთესი შედეგის მქონე კანდიდატები. თუ კანდიდატების მიერ მიღებულ ხმათა თანაბრობის გამო გამარჯვებული ვერ გამოვლინდა, ამ კანდიდატებს დაუყოვნებლივ ეყრებათ კენჭი მათ შორის გამარჯვებულის გამოსავლენად, გადაწყვეტილება მიღებულად ჩაითვლება, თუ კანდიდატს მხარს დაუჭერს კომისიის წევრთა სრული შემადგენლობის უმრავლესობა. თუ გამარჯვებული კვლავ ვერ გამოვლინდა, იგი წილისყრით განისაზღვრება. თუ ამ წესით საუბნო საარჩევნო კომისიის წევრი/ხელმძღვანელი პირი ვერ აირჩა, იმართება ხელახალი კენჭისყრა, ასეთ შემთხვევაში არჩეულად ჩაითვლება ის კანდიდატი, რომელსაც მხარს დაუჭერს საოლქო საარჩევნო კომისიის სრული შემადგენლობის უმრავლესობა.

თუ ზემოაღნიშნული პროცედურების შესაბამისად, ყველა ვაკანსია კვლავ არ შეივსო, არჩეულად ჩაითვლება ის კანდიდატი (კანდიდატები), რომელმაც (რომლებმაც) ხელახალი კენჭისყრისას სხვებზე მეტი ხმა მიიღო (მიიღეს).

საოლქო საარჩევნო კომისიის თითოეულ წევრს უფლება აქვს, განხილვის მიზნით, გაეცნოს კანდიდატთა საკონკურსო დოკუმენტაციას. საოლქო საარჩევნო კომისიის წევრი ვალდებულია კანდიდატთა საკონკურსო დოკუმენტაციის გაცნობისას დაიცვას „პერსონალურ მონაცემთა დაცვის შესახებ” საქართველოს კანონის მოთხოვნები.

კომისიის წევრებს ურიგდებათ ცხრილის სახით ამობეჭდილი კონკურსანტების ჩამონათვალი (დანართი 1), რომელშიც კონკურსანტების სახელისა და გვარის გარდა, აგრეთვე, მიეთითება თუ რომელ საუბნო საარჩევნო კომისიის წევრის ვაკანტურ თანამდებობაზე აქვს მას შეტანილი განცხადება.

შესაბამისი საარჩევნო კომისიის თითოეული წევრი ცხრილში შემოხაზავს თუ რომელ კანდიდატს/კანდიდატებს აძლევს იგი ხმას, თითოეულ გვერდზე მიუთითებს თავის სახელსა და გვარს, მოაწერს ხელს და დოკუმენტს გადასცემს შესაბამისი საოლქო საარჩევნო კომისიის სხდომის მდივანს.

საარჩევნო კომისიის სხდომის მდივანი ითვლის ხმის მიცემის შედეგებს, შეაქვს სპეციალურ ცხრილში (დანართი 2) და აცხადებს თითოეული კანდიდატის მიერ მიღებული ხმების რაოდენობას.

იმ შემთხვევაში, თუ კანონით განსაზღვრულ ვადაში, კომისიის შემადგენლობაში კანონით დადგენილ რაოდენობაზე ნაკლები წევრი აღმოჩნდა, 3 დღის ვადაში საოლქო საარჩევნო კომისიას საუბნო საარჩევნო კომისიის შემადგენლობის შესავსებად წევრთა არჩევის უფლება აქვს კონკურსში მონაწილე კანდიდატთაგან ან ხელახლა გამოცხადებული კონკურსის საფუძველზე.