მუხლი 5. ტერმინთა განმარტება

წესდებაში გამოყენებულ ტერმინებს აქვს შემდეგი მნიშვნელობა:
ა) სამხედრო ძალები – შეიარაღებული ფორმირება, რომელიც შექმნილია კანონმდებლობით ქვეყნის დამოუკიდებლობის, სუვერენიტეტისა და ტერიტორიული მთლიანობის დაცვის, აგრეთვე საერთაშორისო ვალდებულებების შესრულების მიზნით. საქართველოს სამხედრო ძალების შემადგენლობაა:
ა.ა) საქართველოს შეიარაღებული ძალები;
ა.ბ) საქართველოს შინაგან საქმეთა სამინისტროს საქვეუწყებო დაწესებულება – სახელმწიფო საზღვრის დაცვის დეპარტამენტის სასაზღვრო ძალები;
ბ) შესაბამისი სამთავრობო დაწესებულება:
ბ.ა) საქართველოს თავდაცვის სამინისტრო;
ბ.ბ) საქართველოს შინაგან საქმეთა სამინისტრო;
გ) სამხედრო მოსამსახურე – საქართველოს მოქალაქე, მოქალაქეობის არმქონე პირი ან უცხო ქვეყნის მოქალაქე, რომელიც სამხედრო სამსახურს გადის საქართველოს სამხედრო ძალებში.
დ) უფროსები (მეთაურები) და მათ დაქვემდებარებაში მყოფი პირები – სამსახურებრივი მდგომარეობისა და სამხედრო წოდების მიხედვით სამხედრო მოსამსახურეები სხვათა მიმართ შეიძლება იყვნენ უფროსები ან მათ დაქვემდებარებაში მყოფი პირები. უფროსებს უფლება აქვთ უბრძანონ მათ დაქვემდებარებაში მყოფ პირებს და შეამოწმონ ბრძანების შესრულება. უფროსები, რომელთაც სამხედრო მოსამსახურეები სამსახურებრივად ემორჩილებიან, არიან პირდაპირი უფროსები. სამხედრო მოსამსახურეთა თანამდებობრივად უახლოეს უფროსს ეწოდება უშუალო უფროსი.
სამხედრო წოდების მიხედვით, უფროსები არიან სამხედრო წოდებით ზემდგომნი სამხედრო წოდებით ქვემდგომების მიმართ;
ე) ოფიცერთა შემადგენლობა – საქართველოს სამხედრო ძალების ოფიცერთა შემადგენლობა არის საქართველოს კანონმდებლობით დადგენილი სახელმწიფო მოხელეთა ადმინისტრაციულ-სამართლებრივი მდგომარეობა;
ვ) ოფიცერი – პირი, რომელსაც მიღებული აქვს სამხედრო განათლება ან გავლილი აქვს სპეციალური სამხედრო მომზადება ან უამისოდ მიენიჭა ოფიცრის სამხედრო წოდება;
ზ) გარნიზონი – დასახლებულ პუნქტებში ან მათ გარეთ მუდმივად ან დროებით განლაგებული სამხედრო ძალების შემადგენლობაში მყოფი სამხედრო ნაწილების, სამხედრო სასწავლებლებისა და დაწესებულებების ერთობლიობა;
თ) ადმინისტრაციული წარმოება – ადმინისტრაციული ორგანოს საქმიანობა (შესაბამისი სამთავრობო დაწესებულების, ხელმძღვანელის ან მეთაურის საქმიანობა) ადმინისტრაციულ-სამართლებრივი აქტის მომზადების, გამოცემისა და აღსრულების, ადმინისტრაციული საჩივრის გადაწყვეტის, აგრეთვე ადმინისტრაციული ხელშეკრულების მომზადების, დადების ან გაუქმების მიზნით;
ი) ექსტრემალური სიტუაცია – სიტუაცია, რომელშიც სამხედრო მოსამსახურის სიცოცხლე ან ჯანმრთელობა მაღალი რისკის ქვეშ იმყოფება;
კ) ხელფასი – თანამდებობრივი განაკვეთი, წოდებრივი სარგო და კანონმდებლობით გათვალისწინებული სხვა სახის დანამატები;
ლ) არაერთგზის ჩადენილი დისციპლინური გადაცდომა – ორჯერ ან მეტჯერ ჩადენილი დისციპლინური გადაცდომა დისციპლინური პასუხისმგებლობის მოქმედების პერიოდში.
თავი II
წესდების
მოქმედების
ფარგლებ