„ახალგაზრდა მეცნიერთათვის პრეზიდენტის სამეცნიერო გრანტების დაწესების შესახებ“ საქართველოს პრეზიდენტის 2007 წლის 26 მაისის №328 ბრძანებულებაში ცვლილებების და დამატების შეტანის თაობაზე“

საქართველოს პრეზიდენტის

ბრძანებულება №159

2009 წლის 1 აპრილი

ქ. თბილისი

„ახალგაზრდა მეცნიერთათვის პრეზიდენტის სამეცნიერო გრანტების დაწესების შესახებ“ საქართველოს პრეზიდენტის 2007 წლის 26 მაისის №328 ბრძანებულებაში ცვლილებების და დამატების შეტანის თაობაზე

1. „ნორმატიული აქტების შესახებ“ საქართველოს კანონის 36-ე მუხლის შესაბამისად, „ახალგაზრდა მეცნიერთათვის პრეზიდენტის სამეცნიერო გრანტების დაწესების შესახებ“ საქართველოს პრეზიდენტის 2007 წლის 26 მაისის №328 ბრძანებულებაში (სსმ III, №75, 2007 წ., მუხ. 798) შეტანილ იქნეს შემდეგი სახის ცვლილებები და დამატება:

ა) ბრძანებულების მე-2 და მე-3 პუნქტები ჩამოყალიბდეს შემდეგი რედაქციით:

„2. საგრანტო დაფინანსების მიზნით, სამეცნიერო პროექტების შერჩევა კონკურსის წესით განახორციელონ საჯარო სამართლის იურიდიულმა პირებმა – საქართველოს ეროვნულმა სამეცნიერო ფონდმა და ქართველოლოგიის, ჰუმანიტარული და სოციალური მეცნიერებების ფონდმა (რუსთაველის ფონდი) თავიანთი წესდების შესაბამისად.

3. ამ ბრძანებულების მე-2 პუნქტით განსაზღვრული საჯარო სამართლის იურიდიული პირების მიერ კონკურსის წესით შერჩეულ სამეცნიერო პროექტებზე პრეზიდენტის სამეცნიერო გრანტები გაიცემა საქართველოს პრეზიდენტის განკარგულების საფუძველზე, რომლის პროექტსაც ერთობლივად ამზადებენ სსიპ – საქართველოს ეროვნული სამეცნიერო ფონდი და სსიპ – ქართველოლოგიის, ჰუმანიტარული და სოციალური მეცნიერებების ფონდი (რუსთაველის ფონდი) – საქართველოს პრეზიდენტთან წარსადგენად.“;

ბ) ბრძანებულებას დაემატოს შემდეგი შინაარსის 7¹ პუნქტი:

„7¹. „ახალგაზრდა მეცნიერთათვის პრეზიდენტის სამეცნიერო გრანტების გაცემის შესახებ“ საქართველოს პრეზიდენტის 2009 წლის 6 იანვრის №4 განკარგულებით დამტკიცებული პროექტების დაფინანსება, თითოეული პროექტის ხანგრძლივობის შესაბამისად, განახორციელოს საჯარო სამართლის იურიდიულმა პირმა – საქართველოს ეროვნულმა სამეცნიერო ფონდმა.“.

2. ეს ბრძანებულება ამოქმედდეს გამოქვეყნებისთანავე.

მ. სააკაშვილი