1. საკრებულოს საქმიანობა მოიცავს საკრებულოს, საკრებულოს ბიუროს, საკრებულოს კომისიების, დროებითი სამუშაო ჯგუფებისა და ფრაქციების სხდომებს.
2. საკრებულოს მორიგი სხდომები „ადგილობრივი თვითმმართველობის შესახებ“ საქართველოს ორგანული კანონის 24-ე მუხლის პირველი პუნქტის შესაბამისად, ამ დებულებით დადგენილი წესით, მოიწვევა თვეში ერთხელ მაინც. საკრებულოს სხდომა ტარდება, როგორც წესი, თვეში ორჯერ
3. საკრებულოს სხდომა შეიძლება გაგრძელდეს ორ ან რამდენიმე დღეს, მაგრამ არა უმეტეს ხუთი დღისა.
4. საკრებულოს მორიგი სხდომა იხურება (სრულდება) საკრებულოს მიერ სხდომის დღის წესრიგით გათვალისწინებულ ყველა საკითხზე შესაბამისი გადაწყვეტილების (მათ შორის დღის წესრიგით გათვალისწინებული საკითხის განხილვის გადადების შესახებ გადაწყვეტილების) მიღების შემდეგ.
5. საკრებულო უფლებამოსილია მიიღოს გადაწყვეტილებები (საკრებულოს დადგენილება, საკრებულოს განკარგულება, მიმართვა, განცხადება, დავალება, რეკომენდაცია, ცნობის სახით ინფორმაციის მიღება და სხვ.) მხოლოდ საკრებულოს სხდომაზე.
6. საკრებულო უფლებამოსილია მიიღოს გადაწყვეტილება, თუ საკრებულოს სხდომას ესწრება საკრებულოს სრული შემადგენლობის ნახევარზე მეტი.
7. საკრებულოს გადაწყვეტილებები მიიღება სხდომაზე დამსწრე წევრთა უმრავლესობით, მაგრამ არანაკლებ საკრებულოს წევრთა სიითი შემადგენლობის ერთი მესამედისა, თუ საქართველოს კანონით ან ამ დებულებით სხვა წესი არ არის დადგენილი