დანართი № 11
საფრთხის გამოსახულების პროეცირების სისტემის მიმართ წაყენებული მოთხოვნები
მუხლი 1. ძირითადი პრინციპები
1. საფრთხის გამოსახულების პროეცირების სისტემას უნდა გააჩნდეს შესაძლებლობა, რენტგენური დანადგარის ეკრანზე პროეცირებულ ჩანთებზე/საგნებზე გამოსახოს საფრთხის შემცველი საგნების ვირტუალური გამოსახულება. საფრთხის შემცველი საგნის ვირტუალური გამოსახულება ჩანთებზე/საგნებზე უნდა პროეცირდებოდეს შერჩევითობის პრინციპით და არ უნდა იყოს ფიქსირებული.
2. ჩანთების/საგნების 3% შერჩევითობის საფუძველზე ექვემდებარება საფრთხის შემცველი საგნის ვირტუალური გამოსახულების პროეცირებას.
3. სისტემა უნდა იძლეოდეს საფრთხის შემცველი საგნის ვირტუალური გამოსახულებების პროცენტულობის განსაზღვრის შესაძლებლობას.
4. საფრთხის გამოსახულების პროეცირების სისტემა არ უნდა აფერხებდეს რენტგენური დანადგარის ნორმალურ ფუნქციონირებას.
5. შემოწმების პროცესში აკრძალულია შემოწმების ოპერატორებისათვის მითითება საფრთხის შემცველი საგნის ვირტუალური გამოსახულებების მოსალოდნელი ან განხორციელებული პროეცირების შესახებ.
6. ავიასაწარმომ უნდა უზრუნველყოს საფრთხის გამოსახულების პროეცირების სისტემის მართვის საშუალებების დაცვა და მასთან წვდომა უნდა ჰქონდეთ მხოლოდ ადმინისტრატორსა და საავიაციო უშიშროებაზე პასუხისმგებელ პირს.
7. ავიასაწარმომ უნდა დანიშნოს ადმინისტრატორი, რომელიც პასუხისმგებელი იქნება საფრთხის გამოსახულების პროეცირების სისტემის კონფიგურაციის მართვაზე.
8. სააგენტო ახორციელებს საფრთხის გამოსახულების პროეცირების სისტემის ექსპლუატაციისა და შემოწმების ოპერატორების სისტემაში მუშაობის შედეგებზე მუდმივ ზედამხედველობას.
მუხლი 2. საფრთხის გამოსახულების პროეცირების სისტემის შემადგენლობა
1. საფრთხის გამოსახულების პროეცირების სისტემა უნდა მოიცავდეს, სულ მცირე:
ა) საფრთხის შემცველი საგნის ვირტუალური გამოსახულებების ბიბლიოთეკას;
ბ) შეტყობინებების პროეცირებისა და წაშლის ფუნქციას;
გ) შემოწმების თითოეული ოპერატორის შედეგების დაფიქსირებისა და შენახვის საშუალებას.
მუხლი 3. საფრთხის გამოსახულების პროეცირების სისტემის შეტყობინებები
1. საფრთხის გამოსახულების პროეცირების სისტემა უნდა ახორციელებდეს შეტყობინებების პროეცირებას შემოწმების ოპერატორთათვის:
ა) როდესაც შემოწმების ოპერატორმა მოახდინა რეაგირება და საფრთხის შემცველი საგნის ვირტუალური გამოსახულება პროეცირებული იყო;
ბ) როდესაც შემოწმების ოპერატორმა არ მოახდინა რეაგირება, ხოლო საფრთხის შემცველი საგნის ვირტუალური გამოსახულება პროეცირებული იყო;
გ) როდესაც შემოწმების ოპერატორმა მოახდინა რეაგირება, ხოლო საფრთხის შემცველი საგნის ვირტუალური გამოსახულება არ იყო პროეცირებული;
დ) როდესაც საფრთხის შემცველი საგნის ვირტუალური გამოსახულების პროეცირების მცდელობა წარუმატებელი იყო და ეს დანახულ იქნა შემოწმების ოპერატორის მიერ.
2. რენტგენური დანადგარის ეკრანზე პროეცირებული შეტყობინება არ უნდა ფარავდეს შესამოწმებელი ჩანთის/საგნის გამოსახულებას.
3. შეტყობინება უნდა დარჩეს პროეცირებული იმ დრომდე, ვიდრე შემოწმების ოპერატორი არ წაშლის მას.
4. ამ მუხლის პირველი პუნქტის „ა“ და „ბ“ ქვეპუნქტებით განსაზღვრული შეტყობინებასთნ ერთად ეკრანზე უნდა გამოისახოს საფრთხის შემცველი საგნის ვირტუალური გამოსახულება.
მუხლი 4. საფრთხის გამოსახულების პროეცირების სისტემასთან წვდომა
1. საფრთხის გამოსახულების პროეცირების სისტემით აღჭურვილ მოწყობილობასთან წვდომისათვის თითოეულ შემოწმების ოპერატორს უნდა გაანჩნდეს სისტემაში წვდომის ინდივიდუალური იდენტიფიკატორი.
2. საფრთხის გამოსახულების პროეცირების (TIP) ფუნქციის ცალკეულ მომხარებელზე გააქტიურებისას, ინდივიდუალური კონფიგურირების გრაფებში საფრთხის გამოსახულების პროეცირების სიხშირის პროცენტული გადანაწილება მისი ტიპიდან გამომდინარე, უნდა შეესაბამებოდეს ამ დანართის მე-6 მუხლის მე-4 პუნქტის „ა“ ქვეპუნქტში მითითებულ პროცენტულ მაჩვენებლებს.
მუხლი 5. შედეგების შენახვა
საფრთხის გამოსახულების პროეცირების სისტემა უნდა ინახავდეს თითოეული შემოწმების ოპერატორის სისტემაში მუშაობის შედეგების მონაცემებს სულ მცირე 12 თვის მანძილზე იმ ფორმატით, რომელიც უზრუნველყოფს ანგარიშის წარმოების შესაძლებლობას.
მუხლი 6. საფრთხის გამოსახულების პროეცირების ბიბლიოთეკა
1. ბიბლიოთეკა უნდა მოიცავდეს 250 სახეობის საფრთხის შემცველი საგნის, სულ მცირე, 1000 ვირტუალურ გამოსახულებას. თითეული საგანი მოცემული უნდა იყოს მრავალი რაკურსით.
2. ბიბლიოთეკა უნდა წარმოადგენდეს ნამდვილთან მიმსგავსებული საგნების კრებულს, რომელიც რეგულარულად უნდა გადაიხედოს, რათა დაცული იყოს სხვადასხვა საფრთხის შემცველი საგნების თანაფარდობა და გათვალისწინებული იქნას საფრთხის შემცველი გამოსახულებების სახეობა.
3. ჩანთაზე/საგანზე გამოსახული საფრთხის შემცველი საგნის ვირტუალური გამოსახულების ხარისხი არ უნდა იძლეოდეს მისი ნამდვილი საგნისგან განსხვავების საშუალებას.
4. ხელბარგის შემოწმებისთვის განკუთვნილი საფრთხის გამოსახულების პროეცირების სისტემის გამოსახულებათა ბიბლიოთეკა უნდა მოიცავდეს:
ა) ასაფეთქებელი მოწყობილობები – 60-75%;
ბ) იარაღი/ცეცხსასროლი იარაღი – 10-25%;
გ) დანები/ბასრი საგნები – 10-25%;
დ) საფრთხის შემცველი სხვა საგნები – 5-20%.
5. ასაფეთქებელი მოწყობილობის კომპონენტები შეიძლება შეყვანილ იქნას ამ მუხლის მე-4 პუნქტის ,ა“ და ,,დ“ ქვეპუნქტებით განსაზღვრულ კატეგორიებაში.
6. საბარგო ნაკვეთურით გადასაზიდი ბარგის შემოწმებისთვის განკუთვნილი საფრთხის გამოსახულების პროეცირების სისტემის გამოსახულებათა ბიბლიოთეკა უნდა მოიცავდეს:
ა) ასაფეთქებელი მოწყობილობები – 80-100%;
ბ) საფრთხის შემცველი სხვა საგნები – 0-20%.
7. საფრთხის გამოსახულების პროეცირების სისტემის ბიბლიოთეკის განახლება საფრთხის გამოსახულების პროეცირების სისტემის ბიბლიოთეკის განახლება ან შეცვლა უნდა განხორციელდეს, თუ საფრთხის გამოსახულების პროეცირების სისტემაში მუშაობის შედეგების საშუალო შეფასებაა 95% ან მეტი.
8. საფრთხის გამოსახულების პროეცირების სისტემის ბიბლიოთეკა ყოველწლიურად ექვემდებარება განახლებას, რომელიც მოიცავს სულ მცირე 100 გამოსახულების ჩანაცვლებას ახალი გამოსახულებით. პირველ რიგში. იცვლება ბიბლიოთეკაში არსებული ყველაზე ძველი გამოსახულებება.
მუხლი 7. საფრთხის გამოსახულების პროეცირების სისტემაში მუშაობის შეფასება
1. თითოეული შემოწმების ოპერატორის მუშაობის შეფასება უნდა განხორციელდეს 4 თვეში ერთხელ. ამ პერიოდის განმავლობაში შემოწმების ოპერატორს განხორციელებული უნდა ჰქონდეს სულ მცირე 80 გამოსახულების ანალიზი. თუ ამ პერიოდის განმავლობაში შემოწმების ოპერატორმა ვერ განახორციელა ამ რაოდენობის გამოსახულების ანალიზი, შეფასების პერიოდი უნდა გახანგრძლივდეს იმ დრომდე, ვიდრე იგი არ განახორცილებს 80 გამოსახულების ანალიზს. შემოწმების ოპერატორმა უნდა ამოიცნოს პროეცირებული ვირტუალური გამოსახულებების სულ მცირე 75% , ხოლო ცრუ განგაშის კოეფიციენტი უნდა წარმოადგენდეს 25%-ზე ნაკლებს.
2. შემოწმების ოპერატორები, რომელთაც 4 თვის შემდგომ ვერ მიიღეს დამაკმაყოფილებელი შეფასება, ექვემდებარებიან დამატებითი მომზადებას იმ ხარვეზების გათვალისწინებით, რომლებიც გამოვლინდა შეფასების პროცესში. მომზადებას უნდა მოჰყვეს გამოსახულების ამოცნობის ტესტირება სპეციალიზირებული კომპიუტერული პროგრამის საშუალებით. მომზადების კურსი წარმატებით უნდა დასრულდეს შემდგომი შეფასების პერიოდამდე.
3. შემოწმების ოპერატორების საფრთხის გამოსახულების ამოცნობის პერიოდული სწავლება და ტესტირება სპეციალიზირებული კომპიუტერული პროგრამის საშუალებით უნდა განხორცილდეს სულ მცირე 6 თვეში ერთხელ. სწავლების ხანგრძლივობა უნდა შეადგენდეს სულ მცირე 6 საათს.
4. მომზადებისთვის განკუთვნილი სპეციალიზირებული კომპიუტერული პროგრამის ბიბლიოთეკა უნდა მოიცავდეს სულ მცირე 1500 სხვადასხვა საფრთხის შემცველი საგნის 6000 გამოსახულებას. მათ შორის საფრთხის შემცველი საგნების შემადგენელი ნაწილების გამოსახულებებს. ყოველი გამოსახულება მოცემული უნდა იყოს მრავალი რაკურსით.
მუხლი 8. შემოწმების ოპერატორის სისტემასთან მუშაობის პრინციპი
1. შემოწმების ოპერატორს, რენტგენური დანადგარის ლენტის გაჩერების შემდეგ, ეძლევა 25 წამი, რათა ამოიცნოს საფრთხის შემცველი საგნის ვირტუალური გამოსახულება, დავალების შესრულების რეზულტატი კი გამოისახება რენტგენური დანადგარის ეკრანზე 7 პუნქტით განსაზღვრული ერთ-ერთი შეტყობინების სახით.
2. საფრთხის შემცველი საგნის ვირტუალური გამოსახულების შესახებ შეტყობინების პროეცირების შემდეგ, შემოწმების ოპერატორმა უნდა წაშალოს შეტყობინება და განახორციელოს ჩანთის/საგნის განმეორებითი შემოწმება, გადასატანად აკრძალული საგნებისა და ნივთიერებების არსებობის გამორიცხვის მიზნით.