1. ერთეულის დადასტურებაზე დაფუძნებული შესაბამისობა წარმოადგენს შესაბამისობის შეფასების პროცედურის ნაწილს, რომლის საშუალებითაც მწარმოებელი ასრულებს ამ მოდულის მე-2-მე-6 და მე-11-მე-13 პუნქტებით განსაზღვრულ ვალდებულებებს, უზრუნველყოფს და იღებს პასუხისმგებლობას, რომ განსახილველი მოწყობილობა ან საამწყობრო ნაწილი, რომელიც დაექვემდებარა ამ მოდულის მე-7-მე-10 პუნქტებით განსაზღვრულ მოთხოვნებს, შეესაბამება ამ ტექნიკური რეგლამენტით განსაზღვრულ მოთხოვნებს.
2. მწარმოებელმა უნდა შეადგინოს ტექნიკური დოკუმენტაცია და ხელმისაწვდომი გახადოს იგი ამ მოდულის მე-7-მე-10 პუნქტებით განსაზღვრული შესაბამისობის შემფასებელი პირისთვის. დოკუმენტაცია უნდა იძლეოდეს მოწყობილობის ან საამწყობრო ნაწილის სათანადო მოთხოვნებთან შესაბამისობის შეფასების საშუალებას და უნდა შეიცავდეს რისკ(ებ)ის ადეკვატურ ანალიზსა და შეფასებას. ტექნიკურ დოკუმენტაციაში მითითებული უნდა იყოს შესაბამისი მოთხოვნები და მოიცავდეს, რამდენადაც ეს შეფასებისთვის იქნება აუცილებელი, ინფორმაციას, მოწყობილობის ან საამწყობრო ნაწილის პროექტის, წარმოების და ექსპლუატაციის შესახებ.
3. ტექნიკური დოკუმენტაცია, შესაბამის შემთხვევებში უნდა შეიცავდეს, სულ მცირე, შემდეგ ელემენტებს:
ა) მოწყობილობის ან საამწყობრო ნაწილის ზოგად აღწერას;
ბ) კომპონენტების, არსებითი შემადგენელი ნაწილების, წრედების და ა.შ. კონცეპტუალურ პროექტს და საწარმოო ნახაზებსა და სქემებს;
გ) მოწყობილობის ან საამწყობრო ნაწილის ფუნქციონირების და ზემოთ ხსენებული ნახაზების აღქმისთვის აუცილებელ ახსნა-განმარტებებს;
დ) სრულად ან ნაწილობრივ გამოყენებული სტანდარტების ჩამონათვალს, რომელთა დასახელებასაც აქვეყნებს სსიპ − საქართველოს სტანდარტებისა და მეტროლოგიის ეროვნული სააგენტო, ხოლო იმ შემთხვევაში თუ სტანდარტები არ იქნა გამოყენებული, იმ ღონისძიებების აღწერილობას და ტექნიკური სპეციფიკაციების ჩამონათვალს, რომლებიც გამოყენებული იქნა ამ ტექნიკური რეგლამენტით განსაზღვრული უსაფრთხოების ძირითადი მოთხოვნების დასაკმაყოფილებლად. სტანდარტის ნაწილობრივი გამოყენების შემთხვევაში ტექნიკურ დოკუმენტაციაში კონკრეტულად უნდა იყოს მითითებული, თუ რომელი ნაწილი იქნა გამოყენებული;
ე) პროექტირებისას განხორციელებული გაანგარიშებების, ჩატარებული კვლევების და ა.შ. შედეგებს;
ვ) გამოცდების ანგარიშებს;
ზ) მოწყობილობის გამოყენებისა და მონტაჟის ინსტრუქციებს;
თ) საამწყობრო ნაწილის მოწყობილობაში ინკორპორიბების ან ცალკე აწყობის ინსტრუქციებს;
4. სათანადო შემთხვევებში მწარმოებელი ასევე ვალდებულია შესაბამისობის შემფასებელ პირს წარუდგინოს შემდეგი დოკუმენტები:
ა) მოწყობილობაში ინკორპორირებული საამწყობრო ნაწილის ტიპის გამოცდის სერტიფიკატი და შესაბამისობის დეკლარაცია;
ბ) მოწყობილობის ან საამწყობრო ნაწილის წარმოების ან/და ინსპექტირების ან/და მონიტორინგის მეთოდის ატესტაციის მოწმობები და სერტიფიკატები;
გ) ნებისმიერი სხვა დოკუმენტი, რომელიც შესაბამისობის შემფასებელ პირს ხელს უწყობს შესაბამისობის შეფასებაში.
5. მწარმოებელი ვალდებულია შეინახოს ტექნიკური დოკუმენტაცია შესაბამისი უფლებამოსილი ორგანოსთვის წარსადგენად მოწყობილობის ან საამწყობრო ნაწილის ბაზარზე განთავსების შემდგომ 10 წლის განმავლობაში.
6. მწარმოებელი ვალდებულია მიიღოს ყველა აუცილებელი ზომა, რათა წარმოების პროცესმა და მისმა მონიტორინგმა უზრუნველყოს წარმოებული მოწყობილობის ან საამწყობრო ნაწილის შესაბამისობა ამ ტექნიკური რეგლამენტით მისთვის განსაზღვრულ მოთხოვნებთან.
7. მწარმოებლის მიერ არჩეული შესაბამისობის შემფასებელი პირი ვალდებულია მოწყობილობის ან საამწყობრო ნაწილის ამ ტექნიკური რეგლამენტის სათანადო მოთხოვნებთან შესაბამისობის შემოწმების მიზნით, თავად განახორციელოს ან უზრუნველყოს პროდუქტის სათანადო გამოცდების და შემოწმებების განხორციელება, შესაბამის სსიპ − საქართველოს სტანდარტებისა და მეტროლოგიის ეროვნული სააგენტოს მიერ ამ ტექნიკური რეგლამენტის მიზნებისთვის გამოქვეყნებულ სტანდარტ(ებ)ში მითითებული გზით ან/და ტექნიკურ სპეციფიკაციებში განსაზღვრული ეკვივალენტური შემოწმების საშუალებით.
8. მოწყობილობის ან საამწყობრო ნაწილის შემოწმება შესაძლოა განხორციელდეს საამწყობრო ნაწილის მოწყობილობაში ინკორპორირების, მისი აწყობის ან მოწყობილობის მონტაჟის შემდგომ, თუკი შესაბამისობის შემფასებელი პირი აღნიშნულს ჩათვლის საჭიროდ.
9. შესაბამისობის შემფასებელი პირი ვალდებულია განხორციელებულ გამოცდებსა და შემოწმებებზე დაყრდნობით გასცეს შესასაბამისობის სერტიფიკატი და თითოეულ დამტკიცებულ მოწყობილობაზე ან საამწყობრო ნაწილზე თავად დაიტანოს საკუთარი საიდენტიფიკაციო ნომერი ან უზრუნველყოს, საკუთარი პასუხისმგებლობით მისი დატანა.
10. მწარმოებელი ვალდებულია შეინახოს შესაბამისობის სერტიფიკატი, მოწყობილობის ან საამწყობრო ნაწილის ბაზარზე განთავსების შემდგომ 10 წლის განმავლობაში შესაბამისი უფლებამოსილი სახელმწიფო ორგანოებისთვის წარსადგენად.
11. მწარმოებელმა თითოეულ ინდივიდუალურ მოწყობილობაზე ან საამწყობრო ნაწილზე, რომელიც აკმაყოფილებს ამ ტექნიკური რეგლამნეტის სათანადო მოთხოვნებს, უნდა დაიტანოს ამ მოდულის მე-7-მე-10 პუნქტებით განსაზღვრული შესაბამისობის შემფასებელი პირის პასუხისმგებლობის ქვეშ ამ უკანასკნელის საიდენტიფიკაციო ნომერი.
12. მწარმოებელი ვალდებულია წერილობით შეადგინოს შესაბამისობის დეკლარაცია მოწყობილობის ან საამწყობრო ნაწილის თითოეული ტიპისთვის და უზრუნველყოს მისი შენახვა სათანადო უფლებამოსილი ორგანოსთვის წარსადგენად, მოწყობილობის ან საამწყობრო ნაწილის ბაზარზე განთავსებიდან 10 წლის განმავლობაში. შესაბამისობის დეკლარაციაში მითითებული უნდა იყოს მოწყობილობის ან საამწყობრო ნაწილის ტიპი, რომლისთვისაც შედგენილ იქნა დეკლარაცია.
13. შესაბამისობის დეკლარაციის ასლი მოთხოვნის შემთხვევაში უნდა წარედგინოს შესაბამის ორგანოებს.
14. ამ მოდულის მე-2-მე-5 და მე-11-მე-13 პუნქტებით განსაზღვრული მწარმოებლის ვალდებულებები, მის მაგივრად და მისივე პასუხისმგებობის ქვეშ შესაძლოა შესრულდეს მისი ავტორიზებული წარმომადგენლის მიერ, თუ აღნიშნული ცალსახად გათვალისწინებულია ამ უკანასკნელის უფლებამოსილების მიმნიჭებელ დოკუმენტში.
დანართი III
წარწერები
1. ამ ტექნიკური რეგლამენტის მე-16 მუხლით გათვალისწინებულ ნიშანდებასთან ერთად მოწყობილობაზე ან მის მონაცემთა ფირფიტაზე დატანილ უნდა იქნეს შემდეგი ინფორმაცია:
ა) მწარმოებლის სახელი, რეგისტრირებული სავაჭრო სახელი ან რეგისტრირებული სავაჭრო ნიშანი;
ბ) მოწყობილობის ტიპი, პარტიის ან სერიის ნომერი ან მოწყობილობის იდენტიფიცირებისთვის საჭირო სხვა მონაცემები;
გ) შესაბამის შემთხვევებში გამოყენებული ელექტრული კვების ტიპი;
დ) მოწყობილობის კატეგორიის ნიშანდება;
ე) მიწოდების ნომინალური წნევა, რომელიც გამოიყენება მოწყობილობაში;
ვ) მოწყობილობის ბუნებიდან გამომდინარე, მისი სწორად დამონტაჟების უზრუნველყოფისთვის აუცილებელი ინფორმაცია.
2. საამწყობრო ნაწილის მონაცემთა ფირფიტა საჭიროების შემთხვევაში უნდა მოიცავდეს პირველ პუნქტში მითითებულ ინფორმაციას.
დანართი IV
შესაბამისობის დეკლარაცია N...
1. მოწყობილობის ან საამწყობრო ნაწილის/მოწყობილობის ან საამწყობრო ნაწილის მოდელის (პროდუქტი, ტიპი, პარტიის ან სერიის ნომერი):
2. მწარმოებლის, შესაბამის შემთხვევებში კი მისი ავტორიზებული წარმომადგენლის სახელი და მისამართი:
3. ეს შესაბამისობის დეკლარაცია გაცემულია მხოლოდ მწარმოებლის პასუხისმგებლობის ქვეშ:
4. დეკლარაციის საგანი (მოწყობილობის ან საამწყობრო ნაწილის იდენტიფიცირებისთვის და მიკვლევადობისთვის საჭირო მონაცემები; როდესაც მოწყობილობის ან საამწყობრო ნაწილის იდენტიფიცირებისთვის და მიკვლევადობისთვის აუცილებელია, შესაძლოა დართულ იქნეს სურათი) მოწყობილობის ან საამწყობრო ნაწილის აღწერა.
5. ამ შესაბამისობის დეკლარაციაში მითითებული დეკლარაციის საგანი შესაბამისობაშია ახალი მიდგომის სათანადო ტექნიკურ რეგლამენტთან:
6. სსიპ − საქართველოს სტანდარტებისა და მეტროლოგიის ეროვნული სააგენტოს მიერ ამ ტექნიკური რეგლამენტის მიზნებისთვის გამოქვეყნებულ სტანდარტებსა ან სხვა ტექნიკურ სპეციაფიკაციებზე მითითება, რომელთა შესაბამისობაც იქნა დეკლარირებული:
7. შესაბამისობის შემფასებელი პირი ...(სახელი და ნომერი) განახორციელა... (განხორციელებული საქმიანობის აღწერა) და გასცა სერტიფიკატი(ები)…(დეტალები, მათ შორის თარიღი, და შესაბამის შემთხვევაში სერტიფიკატის ვადის და პირობების ვალიდურობის შესახებ ინფორმაცია).
8. საამწყობრო ნაწილის შემთხვევაში, როგორ უნდა მოხდეს მათი შეერთება მოწყობილობაში ან მათი ცალკე აწყობა მოწყობილობის ფუნქციონირებისთვის, რათა დაკმაყოფილდეს საბოლოო პროდუქტის სახით არსებული საამწყობრო ნაწილისთვის განსაზღვრული ძირითადი მოთხოვნები.
9. დამატებითი ინფორმაცია:
ხელმოწერილია ვის მიერ და ვის ნაცვლად: ...
(გამოცემის თარიღი და ადგილი):
(სახელი, ფუნქცია) (ხელმოწერა