1. დაწესებულებაში საკვები უნდა შეიცავდეს ადამიანის სიცოცხლისა და ჯანმრთელობისათვის აუცილებელ კომპონენტებს. აკრძალულია ბრალდებულის/მსჯავრდებულის დასჯის მიზნით საჭმლის კალორიულობის დაქვეითება.
2. ბრალდებულის/მსჯავრდებულის კვების ნორმები განისაზღვრება მინისტრისა და საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის ერთობლივი ბრძანებით დამტკიცებული „ბრალდებულთა და მსჯავრდებულთა კვებისა და სანიტარიულ-ჰიგიენური ნორმებით“.
3. კვების რაციონის განსაზღვრისას გაითვალისწინება ბრალდებულთა/მსჯავრდებულთა ასაკი, ჯანმრთელობის მდგომარეობა, რელიგიური კუთვნილება, კულტურული თავისებურებები და ფიზიკური დატვირთვა.
4. ბრალდებული/მსჯავრდებული ყოველდღიურად უზრუნველყოფილი უნდა იყოს სამჯერადი კვებით.
5. ავადმყოფებს, შეზღუდული შესაძლებლობის მქონე პირებსა და ხანდაზმულებს (ქალს – 60 წლიდან, მამაკაცს – 65 წლიდან) უნდა შეექმნათ მათი მდგომარეობის შესაბამისი კვების პირობები.
6. ბრალდებულს/მსჯავრდებულს უფლება აქვს, დაწესებულების ტერიტორიაზე არსებულ მაღაზიაში შეიძინოს დამატებითი კვების პროდუქტები და პირველადი მოხმარების საგნები იმ თანხით, რომელიც მან გამოიმუშავა დაწესებულებაში მუშაობისას ან მის პირად ანგარიშზე ჩარიცხეს ახლო ნათესავებმა ან სხვა პირებმა. დამატებითი კვების პროდუქტებისა და პირველადი მოხმარების საგნების შესაძენად ბრალდებულის/მსჯავრდებულის მიერ საკუთარი სახსრების გამოყენება დაიშვება ამ დებულებით განსაზღვრული ლიმიტის ფარგლებში მხოლოდ უნაღდო ანგარიშსწორებით.
7. დაწესებულების დაბალი რისკისა და ნახევრად ღია ტიპის თავისუფლების აღკვეთის ნაწილებში მოთავსებულ მსჯავრდებულებს კვების პროდუქტები, პირველადი მოხმარების საგნები და სხვა სამრეწველო საქონელი მაღაზიაში შეუძლიათ შეიძინონ დამოუკიდებლად.
8. დაწესებულების პატიმრობის, დახურული ტიპისა და განსაკუთრებული რისკის თავისუფლების აღკვეთის ნაწილებში მოთავსებული ბრალდებული/მსჯავრდებული საკვები პროდუქტების, პირველადი მოხმარების საგნებისა და სხვა სამრეწველო საქონლის შეძენის სურვილის შემთხვევაში შესაბამისი განცხადებით მიმართავს დაწესებულების დირექტორს, რომელიც ჩაბარდება დაწესებულების წარმომადგენელს ანგარიშზე თანხის არსებობის დამადასტურებელ ქვითართან ერთად. დაწესებულების ტერიტორიაზე არსებული მაღაზიის თანამშრომელი ამოწმებს თანხის არსებობას ბრალდებულის/მსჯავრდებულის ანგარიშზე. შეძენილი საქონელი განაწილდება საერთო საცხოვრებლის/საკნების მიხედვით და ბრალდებულს/მსჯავრდებულს გადაეცემა ხელწერილით.
9. გენერალური დირექტორის ნებართვით, ბრალდებულს/მსჯავრდებულს უფლება აქვს მიიღოს დამატებითი კვების პროდუქტები და პირველადი მოხმარების საგნები ამანათის სახით.
10. დაწესებულების დაბალი რისკის/ნახევრად ღია ტიპის ნაწილში მოთავსებული მსჯავრდებულები იკვებებიან დღის განრიგით დადგენილ საათებში სასადილოში ან გამანაწილებელ პუნქტში სამუშაო ობიექტებზე, ხოლო ის მსჯავრდებულები, რომლებსაც, ექიმის რეკომენდაციის თანახმად ჯანმრთელობის მდგომარეობის გამო არ შეუძლიათ გადაადგილება, საკვებს იღებენ განთავსების ადგილას.
11. ბრალდებულები და დაწესებულების დახურული ტიპის/განსაკუთრებული რისკის თავისუფლების აღკვეთის ნაწილში მოთავსებული მსჯავრდებულები იკვებებიან დღის განრიგით დადგენილ საათებში საკნებში.
12. ბრალდებულს/მსჯავრდებულს შეუზღუდავი რაოდენობით უნდა ჰქონდეს სუფთა სასმელი წყალ