დანართი №5
საქართველოს ციფრული მმართველობის 2025–2030 წლების სტრატეგიისა
და საქართველოს ციფრული მმართველობის 2025–2030 წლების სტრატეგიის
2025–2026 წლების სამოქმედო გეგმის საჯარო კონსულტაციების
ანგარიში
საქართველოს ციფრული მმართველობის 2025-2030 წლების სტრატეგიისა
და საქართველოს ციფრული მმართველობის 2025–2030 წლების სტრატეგიის
2025–2026 წლების სამოქმედო გეგმის სამოქმედო გეგმის პროექტები
მიმდინარე წლის იანვარში გაიგზავნა რელევანტურ უწყებებთან მოსაზრებებისა და
კომენტარებისთვის, ასევე, საჯარო განხილვებისთვის განთავსდა ციფრული
მმართველობის სააგენტოს ოფიციალურ ვებ და Facebook გვერდებზე. პროექტები
საჯაროდ იყო ხელმისაწვდომი 2024 წლის 22 იანვრიდან 1-ელი თებერვლის
ჩათვლით, ხოლო დოკუმენტების შესახებ კომენტარები, მოსაზრებები და
რეკომენდაციები მიიღებოდა წინასწარ შემუშავებული კითხვარის შევსების გზით
ან ოფიციალურ ელ-ფოსტაზე: info@dga.gov.ge.
ინფორმაცია მონაწილეების (სრული რაოდენობა)
რეკომენდაციების/წინადადებების და კონსულტაციების შედეგად გათვალისწინებული
და გაუთვალისწინებელი საკითხების შესახებ:
საჯარო უწყება − რეგიონული
განვითარების და ინფრასტრუქტურის სამინისტრო
შემოსვლის თარიღი − 2/7/2024
შემოსვლის არხი − დოკუმენტბრუნვის ელექტრონული
სისტემა (დეს)
დოკუმენტი − საქართველოს ციფრული მმართველობის
2025-2030 წლების სტრატეგია
რეკომენდაცია №1 − იმის გათვალისწინებით, რომ
ა(ა)იპ – მუნიციპალური სერვისების განვითარების სააგენტოს მიერ
მუნიციპალიტეტებში უკვე დანერგილია ელექტრონული სერვისები, მათ შორის,
ელექტრონული დოკუმენტბრუნვისა და საქმისწარმოების სისტემები,
მიზანშეწონილია, სტრატეგიის შესაბამის თავს, სიტუაციის აღწერის ნაწილში,
დაემატოს მუნიციპალიტეტებში განხორციელებული ელექტრონული სერვისების
დანერგვის შესახებ ინფორმაცია, კერძოდ: საქართველოს რეგიონული
განვითარებისა და ინფრასტრუქტურის სამინისტროს ინიციატივით და საქართველოს
მთავრობის, მსოფლიო ბანკისა (WB) და შვეიცარიის განვითარებისა და
თანამშრომლობის სააგენტოს (SDC) ფინანსური მხარდაჭერით, საქართველოს 63
მუნიციპალიტეტში 2022 წელს დასრულდა ინფორმაციული ნაკადების მართვის
ერთიანი ელექტრონული სისტემის დანერგვა. აღნიშნული ელექტრონული სისტემა
მოიცავს: ელექტრონული სერვისების ონლაინ პორტალს მოქალაქეთათვის
(ms.gov.ge), საქმისწარმოების ელექტრონული სისტემასა (apps.gov.ge) და
ინტერაქციულ რუკას გეოსივრცითი მონაცემების მართვისათვის (maps.gov.ge).
დამატებით მსჯელობას საჭიროებს სტრატეგიით გათვალისწინებული
მუნიციპალიტეტებში ელექტრონული სისტემების გამოყენების საკითხის შესწავლის,
შემდგომში ამ სისტემების დანერგვის ხელშეწყობის მიზნით, დატოვების
საკითხი.
აისახა/აისახა ნაწილობრივ/ არ ასახულა − აისახა
ნაწილობრივ
მაკოორდინირებელი უწყების კომენტარი − სიტუაციის
ანალიზში, სერვისების მიწოდების თავში, დაემატა ტექსტი − "საქართველოს
რეგიონული განვითარებისა და ინფრასტრუქტურის სამინისტროს ინიციატივით და
საქართველოს მთავრობის, მსოფლიო ბანკისა (WB) და შვეიცარიის განვითარებისა
და თანამშრომლობის სააგენტოს (SDC) ფინანსური მხარდაჭერით, 2022 წელს,
საქართველოს 63 მუნიციპალიტეტში დაინერგა ინფორმაციული ნაკადების მართვის
ერთიანი ელექტრონული სისტემა. აღნიშნული ელექტრონული სისტემა საშუალებას
აძლევს მომხმარებლებს "ერთი ფანჯრის პრინციპით" მიიღონ მუნიციპალური
ელექტრონული სერვისები, როგორც დისტანციურად, სახლიდან გაუსვლელად, ისე
ადგილზე, ელექტრონულად. ასევე, პლატფორმამ შექმნა სხვადასხვა სახელმწიფო
სერვისთან ინტერაქციის შესაძლებლობაც, რაც მოქალაქისთვის/ბიზნესისთვის
ზრდის მომსახურებაზე ხელმისაწვდომობას. ელექტრონული სისტემა აერთიანებს
ელექტრონული სერვისების ონლაინ პორტალს მოქალაქეთათვის (ms.gov.ge),
საქმისწარმოების ელექტრონულ სისტემას (apps.gov.ge), ინტერაქციულ რუკას
გეოსივრცითი მონაცემების მართვისათვის (maps.gov.ge) და სხვა ონლაინ
მოდულებს." ამოცანა 2.2. დარედაქტირდა შემდეგნაირად − "ამ მიზნით, პირველ
ეტაპზე სტრატეგია ითვალისწინებს, ერთი მხრივ, საქართველოს საერთო
სასამართლოების ელექტრონული სისტემების შეფასებას, ხოლო, მეორე მხრივ,
ადგილობრივი თვითმმართველობების ორგანოებში ელექტრონული დოკუმენტბრუნვისა
და საქმისწარმოების სისტემების გამოყენების საკითხის შესწავლას, რაც თავის
მხრივ, მოიცავს სისტემის მომხმარებელთა (როგორც ადმინისტრაციული ორგანოს
თანამშრომლების, ასევე მოქალაქეების) ციფრული უნარების
შესწავლასაც."
საჯარო უწყება − საქართველოს სტატისტიკის ეროვნული
სამსახური
შემოსვლის თარიღი − 1/17/2024
შემოსვლის არხი − დოკუმენტბრუნვის ელექტრონული
სისტემა (დეს)
დოკუმენტი − საქართველოს ციფრული მმართველობის
2025-2030 წლების სტრატეგია
რეკომენდაცია №1 − გვ. 12, ტექსტი −
"საქართველოს სტატისტიკის ეროვნული სამსახურის 2022 წლის მონაცემებით
ქვეყანაში ინტერნეტით უზრუნველყოფილი შინამეურნეობების წილი 2021 წელთან
შედარებით 2,3 პროცენტით გაიზარდა და შეადგინა 88,4%. 2023 წლის ივლისის
მონაცემებით, ინტერნეტით უზრუნველყოფილია საქართველოს შინამეურნეობების 89%
და საწარმოთა − 84,4%." − შეიცვალოს შემდეგი ტექსტით "2022 წლის ივლისის
მონაცემებით, ქვეყანაში ინტერნეტით უზრუნველყოფილი შინამეურნეობების წილი
2021 წლის ანალოგიურ პერიოდთან შედარებით 2,3 პროცენტული პუნქტით გაიზარდა
და 88,4% შეადგინა; 2023 წლის ივლისის მონაცემებით კი, საქართველოში
ინტერნეტით უზრუნველყოფილი იყო შინამეურნეობების 89,0%. ამასთან, 2023 წლის
1 იანვრის მდგომარეობით, ინტერნეტთან წვდომა ჰქონდა საწარმოების
84,4%-ს."
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი − ტექსტი
დაკორექტირდა − "საქართველოს სტატისტიკის ეროვნული სამსახურის 2022 წლის
ივლისის მონაცემებით ქვეყანაში ინტერნეტით უზრუნველყოფილი შინამეურნეობების
წილი 2021 წლის ანალოგიურ პერიოდთან შედარებით 2,3 პროცენტით გაიზარდა და
შეადგინა 88,4%. 2023 წლის ივლისის მდგომარეობით ინტერნეტით
უზრუნველყოფილია საქართველოს შინამეურნეობების 89%, ხოლო 2023 წლის იანვრის
მონაცემებით, ინტერნეტთან წვდომა აქვს საწარმოთა − 84,4%-ს”
საჯარო უწყება − ინტელექტუალური საკუთრების ეროვნული
ცენტრი − „საქპატენტი“
შემოსვლის თარიღი -1/17/2024
შემოსვლის არხი − დოკუმენტბრუნვის ელექტრონული
სისტემა (დეს)
დოკუმენტი − საქართველოს ციფრული მმართველობის
სტრატეგიის 2025-2026 წწ. სამოქმედო გეგმა
რეკომენდაცია №1 − სამოქმედო გეგმას,
ინტელექტუალური საკუთრების ეროვნული ცენტრის პასუხისმგებლობის ქვეშ
დაემატოს შემდეგი აქტივობები: ამოცანა 2.1 − "ინტელექტუალური საკუთრების
ეროვნული ცენტრის ელექტრონული სისტემის განახლება" − 2025 წ.; ამოცანა 2.5
− "ინტელექტუალური საკუთრების ეროვნული ცენტრის ვებგვერდის
განახლება/შეზღუდული შესაძლებლობის მქონე პირთა ადაპტაცია" – 2025 წ.;
ამოცანა 3.5 − "ინტელექტუალური საკუთრების ეროვნული ცენტრის საქმიანობის
პროცესში ფორმირებული მატერიალური დოკუმენტების დიგიტალიზაცია/გაციფრულება"
– 2025 წ.; ამოცანა 5.1 − "ინტელექტუალური საკუთრების ეროვნული ცენტრის
ელექტრონული სისტემის საერთაშორისო უწყებების სისტემებთან დაკავშირება" −
2025წ.
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი −
აქტივობები დამატებულია სამოქმედო გეგმაში: აქტივობა 2.1.2; აქტივობა
2.5.2; აქტივობა 3.5.5; აქტივობა 5.1.2.
საჯარო უწყება − პერსონალურ მონაცემთა დაცვის
სამსახური
შემოსვლის თარიღი − 1/18/2024
შემოსვლის არხი − დოკუმენტბრუნვის ელექტრონული
სისტემა (დეს)
დოკუმენტი − საქართველოს ციფრული მმართველობის
2025-2030 წლების სტრატეგია
რეკომენდაცია №1 − გვ. 40, მიზანი 3, არსებული ტექსტი-
"მნიშვნელოვანია სახელმწიფო დაწესებულებებმა სერვისების შექმნისა და ასევე
ადმინისტრაციული წარმოების პროცესში, როგორც მმართველობით პროცესთან
დაკავშირებული, ასევე სერვისების მომხმარებელთა პერსონალური მონაცემების
დაცვის მიზნით გაითვალისწინონ შემდეგი საკითხები: 1. ინფორმაციულ
საკომუნიკაციო ინფრასტრუქტურის უსაფრთხოება; 2. მხოლოდ ლიცენზირებული
პროგრამული უზრუნველყოფის გამოყენება; 3. სერვისების შექმნის პროცესში
უსაფრთხოების ელემენტების სავალდებულო წესით გათვალისწინება (ე.წ.
“security by design”); 4. სახელმწიფო სერვისების შექმნასა და მიწოდებაზე
პასუხისმგებელი პირების უსაფრთხოების კუთხით მომზადება/გადამზადება."
შეიცვალოს შემდეგი ტექსტით − "მნიშვნელოვანია, სახელმწიფო
დაწესებულებებმა სერვისების შექმნის, აგრეთვე, ადმინისტრაციული წარმოების
პროცესი შესაბამისობაში მოიყვანონ პერსონალურ მონაცემთა დაცვის შესახებ
განახლებულ საკანონმდებლო მოწესრიგებასთან და მმართველობის პროცესის
„პერსონალურ მონაცემთა დაცვის შესახებ“ საქართველოს კანონთან
შესაბამისობაში წარმართვის, აგრეთვე, სერვისების მომხმარებელთა პერსონალურ
მონაცემთა დაცვის მიზნით, გათვალისწინებულ იქნას შედეგი: 1. „პერსონალურ
მონაცემთა დაცვის შესახებ“ საქართველოს ახალი კანონით გათვალისწინებული
მოთხოვნები; 2. ინფორმაციულ-საკომუნიკაციო ინფრასტრუქტურის
ტექნიკურ-ორგანიზაციული უსაფრთხოება; 3. ახალი პროდუქტის ან მომსახურების
შექმნის პროცესში მონაცემთა მეტად დაფართვის პრიორიტეტის, როგორც
ალტერნატიული მიდგომის არჩევამდე ავტომატურად გამოყენებული საწყისი მეთოდი
("Privacy by Default and by Design"); 4. მხოლოდ ლიცენზირებული პროგრამული
უზრუნველყოფის გამოყენება; 5. პერსონალურ მონაცემთა დაცვის შესახებ
საკანონმდებლო მოთხოვნებისა და ტექნიკურ-ორგანიზაციული უსაფრთხოების
სტანდარტის უზრუნველყოფის შესახებ სახელმწიფო სერვისების შექმნასა და
მიწოდებაზე პასუხისმგებელი პირების კვალიფიკაციის ამაღლება."
აისახა/აისახა ნაწილობრივ/ არ ასახულა − აისახა
ნაწილობრივ
მაკოორდინირებელი უწყების კომენტარი −
დარედაქტირდა ტექსტი − "მნიშვნელოვანია სახელმწიფო დაწესებულებებმა
სერვისების შექმნისა და ასევე ადმინისტრაციული წარმოების პროცესში, როგორც
მმართველობით პროცესთან დაკავშირებული, ასევე სერვისების მომხმარებელთა
პერსონალური მონაცემების დაცვის მიზნით გაითვალისწინონ შემდეგი საკითხები:
1. ინფორმაციულ საკომუნიკაციო ინფრასტრუქტურის უსაფრთხოება; 2. მხოლოდ
ლიცენზირებული პროგრამული უზრუნველყოფის გამოყენება; 3. ახალი პროდუქტის ან
მომსახურებების შექმნის პროცესში უსაფრთხოების, მათ შორის პერსონალურ
მონაცემთა დაცვის უზრუნველმყოფი ელემენტების სავალდებულო წესით
გათვალისწინება (ე.წ. “security by design”, “privacy by default and by
design”); 4. სახელმწიფო სერვისების შექმნასა და მიწოდებაზე პასუხისმგებელი
პირების უსაფრთხოების კუთხით მომზადება/გადამზადება."
საჯარო უწყება − პერსონალურ მონაცემთა დაცვის
სამსახური
შემოსვლის თარიღი − 1/18/2024
შემოსვლის არხი − დოკუმენტბრუნვის ელექტრონული
სისტემა (დეს)
დოკუმენტი − საქართველოს ციფრული მმართველობის
სტრატეგიის 2025-2026 წწ. სამოქმედო გეგმა
რეკომენდაცია №2 − სამოქმედო გეგმას, პერსონალურ
მონაცემთა დაცვის სამსახურის პასუხისმგებლობის ქვეშ დაემატოს შემდეგი
აქტივობები: ამოცანა 1.1 − "მონაცემთა უსაფრთხოების დარღვევის თაობაზე
შეტყობინების უზრუნველსაყოფად ელექტრონული სისტემის შექმნა" − 2025, IV
კვ., "პერსონალურ მონაცემთა დამუშავების კანონიერების გეგმური შემოწმება" −
2025, IV კვ.; ამოცანა 1.2 − "პერსონალურ მონაცემთა დაცვის თემატიკაზე
ელექტრონულ სასწავლო პლატფორმაზე საინფორმაციო ლექციების განთავსება" −
2025,IV კვ.., "პერსონალურ მონაცემთა დაცვის შესახებ საინფორმაციო
შეხვედრების გამართვა" − 2025-2026,IV კვ., "ახალი პროდუქტის ან
მომსახურების შექმნის პროცესში მონაცემთა მეტად დაფართვის პრიორიტეტის,
როგორც ალტერნატიული მიდგომის არჩევამდე ავტომატურად გამოყენებული საწყისი
მეთოდის ("Privacy by Default and by Design") შესახებ სახელმძღვანელო
რეკომენდაციების შემუშავება" − 2025,IV კვ; ამოცანა 3.1 − "მონაცემთა
სუბიექტების მიერ პერსონალურ მონაცემთა დაცვის სამსახურისთვის მიმართვის
ელექტრონული ფორმის დახვეწა" − 2025, IV კვ., "პერსონალურ მონაცემთა დაცვის
ახალ საკანონმდებლო სტანდარტებთან დაკავშირებით კონსულტაციის გაცემის
პროცესში ელექტრონული პლატფორმების მხარდაჭერა" − 2025, IV კვ.; ამოცანა
4.2 − "პერსონალურ მონაცემთა დაცვის თანამშრომელთა გადამზადება ციფრული
მმართველობის მიმართულებით" − 2025, IV კვ.
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი −
პერსონალურ მონაცემთა დაცვის სამსახურთან, წერილში განსაზღვრულ
აქტივობებთან დაკავშირებით დამაზუსტებელი კომუნიკაციის შემდეგ განისაზღვრა
შემდეგი აქტივობები: "მონაცემთა უსაფრთხოების დარღვევის თაობაზე
შეტყობინების უზრუნველსაყოფად ელექტრონული სისტემის შექმნა"; "მონაცემთა
სუბიექტების მიერ პერსონალურ მონაცემთა დაცვის სამსახურისთვის მიმართვის
ელექტრონული ფორმის დახვეწა"; "ციფრული სერვისების გამოყენებით პერსონალურ
მონაცემთა დამუშავების კანონიერების გეგმური შემოწმება"; "პერსონალურ
მონაცემთა დაცვის შესახებ საინფორმაციო შეხვედრების გამართვა საჯარო და
კერძო სექტორებთან"; "ახალი პროდუქტის ან მომსახურების შექმნის პროცესში
მონაცემთა მეტად დაფართვის პრიორიტეტის, როგორც ალტერნატიული მიდგომის
არჩევამდე ავტომატურად გამოყენებული საწყისი მეთოდის ("Privacy by Default
and by Design") შესახებ სახელმძღვანელო რეკომენდაციების შემუშავება";
"პერსონალურ მონაცემთა დაცვის თანამშრომელთა გადამზადება ციფრული
მმართველობის მიმართულებით."
საჯარო უწყება − საქართველოს განათლების, მეცნიერებისა
და ახალგაზრდობის სამინისტრო / სსიპ − ახალგაზრდობის
სააგენტო
შემოსვლის თარიღი1/23/2024
შემოსვლის არხი − დოკუმენტბრუნვის ელექტრონული
სისტემა (დეს)
დოკუმენტი − საქართველოს ციფრული მმართველობის
სტრატეგიის 2025-2026 წწ. სამოქმედო გეგმა
რეკომენდაცია №1 − სამოქმედო გეგმას,
საქართველოს განათლების, მეცნიერებისა და ახალგაზრდობის სამინისტროს/სსიპ −
ახალგაზრდობის სააგენტოს პასუხისმგებლობის ქვეშ დაემატოს შემდეგი აქტივობა:
ამოცანა 4.2 − "ციფრული ახალგაზრდული საქმიანობის განვითარების მიზნით,
საგანმანათლებლო რესურსის შექმნა და ტრენინგის ჩატარება" − 2025, IV
კვ.
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი − სამოქმედო
გეგმაში დამატებულია შემოთავაზებული აქტივობები 4.2.2 და 4.2.3
საჯარო უწყება − საქართველოს კომუნიკაციების ეროვნული
კომისია
შემოსვლის თარიღი − 2/5/2024
შემოსვლის არხი − დოკუმენტბრუნვის ელექტრონული
სისტემა (დეს)
დოკუმენტი − საქართველოს ციფრული მმართველობის
სტრატეგიის 2025-2026 წწ. სამოქმედო გეგმა
რეკომენდაცია №1 − საქართველოს ციფრული
მმართველობის სტრატეგის 2025-2026 წწ. სამოქმედო გეგმით განსაზღვრულ
აქტივობაზე №1.2.6 − ""ციფრული მოქალაქეობა" სასწავლო კურსის
შექმნა და განთავსება დისტანციურ სატრენინგო პლატფორმაზე −
www.elearning.gov.ge" − საქართველოს კომუნიკაციების ეროვნული კომისია არ
უნდა იყოს მითითებული, როგორც პასუხისმგებელი უწყება, ხოლო
აქტივობაზე №5.1.1 − "EuroDIG, IGF, ICEGOV ღონისძიებებში
მონაწილეობა" − კომისია დაემატოს როგორც პარტნიორი უწყება
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი − სამოქმედო
გეგმაში − აქტივობა 5.1.1 − დაემატა პარტნიორ უწყებად საქართველოს
კომუნიკაციების ეროვნული კომისია
დამოუკიდებელი ექსპერტი − ირაკლი
გვენეტაძე
შემოსვლის თარიღი − 1/29/2024
შემოსვლის არხი − info@dga.gov.ge
დოკუმენტი − საქართველოს ციფრული მმართველობის
2025-2030 წლების სტრატეგია
რეკომენდაცია №1 − ვფიქრობ, მნიშვნელოვანი
იქნებოდა დოკუმენტი ასევე შეეხოს სახელმწიფოს ერთიანი ელექტრონული
მმართველობის ინტეგრირებული სისტემის (ეკოსისტემის) არქიტექტურული მოდელის
შემუშავებისა და მისი შეთანხმების საკითხს. მსგავსი შეთანხმებული მოდელის
არსებობის გარეშე, ვფიქრობ, მუდამ გვექნება ნებისმიერი პოლიტიკის
დოკუმენტის ტექნიკური იმპლემენტაციის მრავალმხრივი ინტერპრეტაციის
პრობლემა.
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი −
სტრატეგიაში 1.3 ამოცანის ქვეშ დაემატა ტექსტი − "საჯარო-კერძო
პარტნიორობის პროცესის სწორად დაგეგმვის მიზნით, მნიშვნელოვანია ყველა
ჩართულ მხარეს ნათლად ჰქონდეს გაცნობიერებული მისი როლი და მნიშვნელობა
სახელმწიფოს ციფრული მმართველობის ერთიან ინტეგრირებულ სისტემაში
(ეკოსისტემა). დაინტერესებული მხარეების ჩართულობით შემუშავდება აღნიშნული
სისტემის არქიტექტურული მოდელი, რომელიც უნდა მოიცავდეს საერთო გამოყენების
ინფრასტრუქტურის კომპონენტების (მონაცემთა გაცვლის ინფრასტრუქტურა,
მოქალაქის პორტალი, ერთიანი სახელმწიფო რეესტრი, სახელმწიფო ქლაუდი,
ციფრული ხელმოწერა, ციფრული არქივი, მოქალაქისთვის ელექტრონული
შეტყობინების საერთო არხები და ა.შ.) აღწერას და მათი განვითარების
ქვე-სტრატეგიებს. აღნიშნული მოდელი შეასრულებს ერთგვარი რუკის ფუნქციას
გადაწყვეტილების მიმღები პირებისთვის.", ხოლო სამოქმედო გეგმაში დაემატა
აქტივობა 1.3.3.
რეკომენდაცია №2 − არქიტექტურული მოდელი უნდა
მოიცავდეს საერთო გამოყენების ინფრასტრუქტურის კომპონენტების აღწერას და
მათი განვითარების ქვე-სტრატეგიებს. საერთო გამოყენების ინფრასტრუქტურაში
ვგულისხმობ მონაცემთა გაცვლის ინფრასტრუქტურას, მოქალაქის პორტალს,
რეესტრების რეესტრს, სახელმწიფო ქლაუდს, ციფრულ ხელმოწერას, სახელმწიფო
ელექტრონულ არქივს, მოქალაქისთვის ელექტრონული შეტყობინების საერთო არხებს
და ა.შ. ეს სია თანდათან დაზუსტდება და გაფართოვდება. აქვე სტრატეგიაში
უნდა განისაზღვროს თუ რა პრიორიტეტებითა და მასშტაბით უნდა მოხდეს
სახელმწიფო უწყებების მიერ ამ ინფრასტრუქტურის სავალდებულო გამოყენება.
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი −
სტრატეგიაში 1.3 ამოცანის ქვეშ დაემატა ტექსტი − "საჯარო-კერძო
პარტნიორობის პროცესის სწორად დაგეგმვის მიზნით, მნიშვნელოვანია ყველა
ჩართულ მხარეს ნათლად ჰქონდეს გაცნობიერებული მისი როლი და მნიშვნელობა
სახელმწიფოს ციფრული მმართველობის ერთიან ინტეგრირებულ სისტემაში
(ეკოსისტემა). დაინტერესებული მხარეების ჩართულობით შემუშავდება აღნიშნული
სისტემის არქიტექტურული მოდელი, რომელიც უნდა მოიცავდეს საერთო გამოყენების
ინფრასტრუქტურის კომპონენტების (მონაცემთა გაცვლის ინფრასტრუქტურა,
მოქალაქის პორტალი, ერთიანი სახელმწიფო რეესტრი, სახელმწიფო ქლაუდი,
ციფრული ხელმოწერა, ციფრული არქივი, მოქალაქისთვის ელექტრონული
შეტყობინების საერთო არხები და ა.შ.) აღწერას და მათი განვითარების
ქვე-სტრატეგიებს. აღნიშნული მოდელი შეასრულებს ერთგვარი რუკის ფუნქციას
გადაწყვეტილების მიმღები პირებისთვის.", ხოლო სამოქმედო გეგმაში დაემატა
აქტივობა 1.3.3
რეკომენდაცია №3 − ახალი emerging ტექნოლოგიების
შემოატანა საჯარო სექტორში. უნდა განისაზღვროს მოდელი (სტრატეგია) თუ რა
ეტაპები უნდა გაიაროს ახალი ტექნოლოგიების საჯარო სექტორში დანერგვამ ისეთი
როგორიცაა ბლოკჩეინი, ხელოვნური ინტელექტი და ა.შ. ვფიქრობ, ამ საკითხის
უკონტროლოდ დატოვება გამოიწვევს ქაოსს (რასაც უკვე ვხედავთ) და დიდი
ინვესტიციების გაფლანგვას გაურკვეველი მიზნებით.
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი − 2.2
ამოცანის ქვეშ დაემატა ტექსტი − "ციფრული მმართველობის პროცესში, გარდა
ფართოდ გამოყენებული ტექნოლოგიებისა, მნიშვნელოვანია იმ ახალი
შესაძლებლობების გამოყენებაც, რომელსაც თანამედროვე ტექნოლოგიები (მაგ.:
ბლოქჩეინი, ხელოვნური ინტელექტი (AI), დიდი მონაცემები (Big Data),
ნივთების ინტერნეტი (IoT) და სხვა) გვთავაზობს. აუცილებელია აღნიშნული
ტექნოლოგიების საჯარო სექტორში დანერგვის და გამოყენების პროცესში
სახელმწიფოს ჰქონდეს ერთიანი ხედვა და სტრატეგია, რათა შესაძლებლობებთან
ერთად, გათვალისწინებული იყოს ის საფრთხეებიც, რომელიც შესაძლოა თან
სდევდეს აღნიშნული ტექნოლოგიების დანერგვას. ამისთვის, საწყის ეტაპზე
საჭიროა მომზადდეს ქვეყანაში არსებული სიტუაციის მიმოხილვა, რომელიც
გამოავლენდა ხელოვნური ინტელექტის გამოყენების შესაძლებლობებს,
განსაკუთრებით ციფრული სერვისების მიწოდების და შეზღუდული შესაძლებლობის
მქონე პირების ვებ-მისაწვდომობის უზრუნველყოფის კუთხით. ამის შემდეგ კი
შემუშავდეს ხელოვნური ინტელექტის რეგულირების ეთიკური და სამართლებრივი
ჩარჩო საერთაშორისოდ აღიარებული სტანდარტების და სხვა მაღალტექნოლოგიური
ქვეყნების გამოცდილების გათვალისწინებით.", ხოლო სამოქმედო გეგმაში −
შესაბამისი აქტივობა.
რეკომენდაცია №4 − მნიშვნელოვანია გაკეთდეს
იდენტიფიცირება ციფრული მმართველობის რომელი ახალი პროდუქტები მოუტანს
საზოგადოებას სწრაფ სარგებელს. ამ პროდუქტების იდენტიფიცირებისთვის უნდა
ჩატარდეს შესაბამისი კვლევა და დაიდენტიფიცირებული ამოცანები სხვა
საკითხებთან შედარებით მაღალი პრიორიტეტის რეჟიმში უნდა განხორციელდეს. ეს
მიდგომა დიდი ალბათობით საზოგადოების მხრიდან შესაბამის ყურადღებას და
მხარდაჭერას მოუტანს ელექტრონული მმართველობის განვითარებას
ქვეყანაში.
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი − სამოქმედო
გეგმაში დაემატა აქტივობა 1.2.6.
აკადემიური სექტორი − ბიზნესისა და ტექნოლოგიების
უნივერსიტეტი (სადოქტორო პროგრამა „ციფრული მმართველობა და ხელოვნური
ინტელექტი საჯარო სექტორში“ )
შემოსვლის თარიღი − 1/31/2024
შემოსვლის არხი − info@dga.gov.ge
დოკუმენტი − საქართველოს ციფრული მმართველობის
2025-2030 წლების სტრატეგია
რეკომენდაცია №1 სასურველია 1.2 ამოცანის ბოლო
ნაწილი ჩამოყალიბდეს შემდეგი რედაქციით: „უფრო კონკრეტულად, ციფრული
მმართველობის მიმართულებით საქართველოში არსებული სიტუაციის, ამ სფეროში
საერთაშორისო საუკეთესო პრაქტიკისა თუ ინოვაციური ტექნოლოგიების
გამოყენების შესწავლის მიზნით უნდა ჩატარდეს შესაბამისი კვლევები.
აღნიშნული კვლევებში სასურველია მონაწილეობდნენ ამ მიმართულების მქონე
აკადემიური საგანმანათლებლო პროგრამების განმახორციელებელი უმაღლესი
საგანმანათლებლო დაწესებულებების მკვლევრები. რაც შეეხება სასწავლო
მიმართულების მხარდაჭერას, იგეგმება ციფრული მმართველობის სასწავლო კურსის
შექმნა აკადემიურ სექტორთან თანამშრომლობით და მათი ხელმისაწვდომობის
უზრუნველყოფა როგორც ფიზიკურ, ისე − დისტანციურ სასწავლო
გარემოში.
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი − "უფრო
კონკრეტულად, ციფრული მმართველობის მიმართულებით საქართველოში არსებული
სიტუაციის, საერთაშორისო საუკეთესო პრაქტიკისა თუ ინოვაციური ტექნოლოგიების
გამოყენების შესწავლის მიზნით უნდა ჩატარდეს შესაბამისი კვლევები.
მნიშვნელოვანია კვლევებში ჩართულნი იყვნენ შესაბამისი გამოცდილების მქონე
უმაღლესი საგანმანათლებლო დაწესებულებების მკვლევრებიც. რაც შეეხება
სასწავლო მიმართულების მხარდაჭერას, იგეგმება ციფრული მმართველობის
სასწავლო კურსის შექმნა აკადემიურ სექტორთან თანამშრომლობით და მათი
ხელმისაწვდომობის უზრუნველყოფა როგორც ფიზიკურ, ისე − დისტანციურ სასწავლო
გარემოში."
რეკომენდაცია №2 − მიზანშეწონილია, სტრატეგიაში
2.1 ამოცანას დაემატოს შემდეგი შინაარსის აბზაცი: “გასათვალისწინებელია ის
ფაქტორი, რომ ციფრული მმართველობის განვითარებისას მნიშვნელოვანია
თანამედროვე ტექნოლოგიების, განსაკუთრებით ხელოვნური ინტელექტის, როგორც
შესაძლებლობების, ასევე იმ საფრთხეების გათვალისწინება, რომელიც სერვისების
დანერგვისას შესაძლოა თან სდევდეს აღნიშნულ ტექნოლოგიას. შესაბამისად,
მნიშვნელოვანია შემუშავებულ იქნას ხელოვნური ინტელექტის რეგულირების
ეთიკური და სამართლებრივი სტანდარტები. აღნიშნული რეგულირების
შემუშავებისას გათვალისწინებული უნდა იქნეს საერთაშორისოდ აღიარებული
სტანდარტები და სხვა მაღალტექნოლოგიური ქვეყნების გამოცდილება”.
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი −
სტრატეგიაში 2.2 ამოცანაში დაემატა ტექსტი − "ციფრული მმართველობის
პროცესში, გარდა ფართოდ გამოყენებული ტექნოლოგიებისა, მნიშვნელოვანია იმ
ახალი შესაძლებლობების გამოყენებაც, რომელსაც თანამედროვე ტექნოლოგიები
(მაგ.: ბლოქჩეინი, ხელოვნური ინტელექტი (AI), დიდი მონაცემები (Big Data),
ნივთების ინტერნეტი (IoT) და სხვა) გვთავაზობს. აუცილებელია აღნიშნული
ტექნოლოგიების საჯარო სექტორში დანერგვის და გამოყენების პროცესში
სახელმწიფოს ჰქონდეს ერთიანი ხედვა და სტრატეგია, რათა შესაძლებლობებთან
ერთად, გათვალისწინებული იყოს ის საფრთხეებიც, რომელიც შესაძლოა თან
სდევდეს აღნიშნული ტექნოლოგიების დანერგვას. ამისთვის, საწყის ეტაპზე
საჭიროა მომზადდეს ქვეყანაში არსებული სიტუაციის მიმოხილვა, რომელიც
გამოავლენდა ხელოვნური ინტელექტის გამოყენების შესაძლებლობებს,
განსაკუთრებით ციფრული სერვისების მიწოდების და შეზღუდული
შესაძლებლობის მქონე პირების ვებ-მისაწვდომობის უზრუნველყოფის
კუთხით. ამის შემდეგ კი შემუშავდეს ხელოვნური ინტელექტის რეგულირების
ეთიკური და სამართლებრივი ჩარჩო საერთაშორისოდ აღიარებული სტანდარტების და
სხვა მაღალტექნოლოგიური ქვეყნების გამოცდილების გათვალისწინებით.", ხოლო
სამოქმედო გეგმაში − შესაბამისი აქტივობა.
აკადემიური სექტორი − ბიზნესისა და ტექნოლოგიების
უნივერსიტეტი (სადოქტორო პროგრამა „ციფრული მმართველობა და ხელოვნური
ინტელექტი საჯარო სექტორში“ )
შემოსვლის თარიღი − 1/31/2024
შემოსვლის არხი − info@dga.gov.ge
დოკუმენტი − საქართველოს ციფრული მმართველობის
სტრატეგიის 2025-2026 წწ. სამოქმედო გეგმა
რეკომენდაცია №3 − ზემოხსენებულის
გათვალისწინებით, სამოქმედო გეგმაში ასევე უნდა გაიწეროს სათანადო
აქტივობები დასახელებული ამოცანების მისაღწევად. კერძოდ, მიზანშეწონილია,
ჩატარდეს საგანმანათლებლო ბაზრის კვლევა ციფრული მმართველობის მიმართულებით
შესაბამისი ადამიანური რესურსის მოძიებისა და იდენტიფიცირებისათვის, ასევე
შეირჩეს კვალიფიციური პირები აკადემიური სექტორიდან სასწავლო კურსების
შემუშავებისათვის, ხოლო ხელოვნური ინტელექტის შექმნისა და დანერგვის
პროცესში ეთიკური სტანდარტების შემუშავებისა და მიღებისათვის დადგინდეს
სათანადო ვადა.
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი − სამოქმედო
გეგმაში დაემატა შესაბამისი აქტივობები ( 4.2.5 და 1.2.11)
არასამთავრობო უწყება − ინფორმაციის თავისუფლების
განვითარების ინსტიტუტი IDFI
შემოსვლის თარიღი − 2/5/2024
შემოსვლის არხი − info@dga.gov.ge
დოკუმენტი − საქართველოს ციფრული მმართველობის
2025-2030 წლების სტრატეგია
რეკომენდაცია №1 − სტრატეგიაში არ არის
გათვალისწინებული მოქალაქეთა მმართველობის/გადაწყვეტილების მიღების
პროცესში ჩართვის ელექტრონული საშუალებების შექმნა/გაძლიერების საკითხი.
აღსანიშნავია, რომ სიტუაციის ანალიზში ასახულია პრობლემის ასპექტები, მათ
შორის მოყვანილია ichange.gov.ge-ის მაგალითი, რომელიც აქტიურად არ
გამოიყენება. პრობლემის არსებობის აღიარების მიუხედავად, სტრატეგიულ
დოკუმენტებში არ არის გათვალისწინებული გადაჭრის გზები არც ამოცანების და
არც აქტივობების ნაწილში.
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი − ამოცანა
2.2-ში დაემატა ტექსტი "მთავრობის მიმართ ნდობის ამაღლების, კარგი
მმართველობისა და დემოკრატიის გაძლიერების მიზნით, საზოგადოებას
(მოქალაქეები, საზოგადოებრივი ჯგუფები, სამოქალაქო ორგანიზაციები და
ბიზნესი) უნდა შეეძლოს ჩაერთოს საჯარო გადაწყვეტილებების მიღების და
პოლიტიკის შემუშავების პროცესში. აღნიშნულის უზრუნველსაყოფად,
ინფორმაციულ-საკომუნიკაციო ტექნოლოგიები ბევრ ახალ შესაძლებლობას
გვთავაზობს. ასეთ შესაძლებლობებს წარმოადგენს: ონლაინ დიალოგი, სოციალური
მედია და მოხალისეების მონაწილეობა სხვადასხვა აქტივობაში, რაც იძლევა
მონაწილეთა უფრო ფართო სპექტრის ჩართვისა და „დიდი მონაცემების“ მიღების
საშუალებას, ამასთანავე, უზრუნველყოფს კარგად დასაბუთებული პოლიტიკური
გადაწყვეტილებების მიღებას. აქედან გამომდინარე, მნიშვნელოვანია შემუშავდეს
ელექტრონული ჩართულობის სტრატეგიული გეგმა და ელექტრონული ჩართულობის
პლატფორმების განვითარების და საზოგადოების ცნობიერების ამაღლების გზით
გაიზარდოს მოქალაქეთა ჩართულობა გადაწყვეტილების მიღების და ზოგადად,
მმართველობის პროცესში."
რეკომენდაცია №2 − სტრატეგია არ ითვალისწინებს
Data-Driven კულტურის გაძლიერებას, რაც ერთ-ერთი პრინციპია OECD-ის მიერ
შემუშავებული ციფრული მმართველობის სტრატეგიის შექმნისა და განხორციელების
12 პრინციპიდან. Data-Driven კულტურის გაძლიერება მოიცავს რამდენიმე
ასპექტს, რომელთაგან განსაკუთრებით მნიშვნელოვანია Data- Driven Decision
Making-ის კომპონენტი და მისი ჩასმა საჯარო პოლიტიკის ციკლში. IDFI-ის
პოზიციით, მნიშვნელოვანია ციფრული მმართველობის ახალი სტრატეგია ქმნიდეს
პოლიტიკის ციკლში მონაცემებზე დაფუძნებული გადაწყვეტილებების
ინტეგრირებისთვის შესაბამის ნიადაგს და შემდეგ საჯარო მმართველობის
რეფორმის ფარგლებში (რამდენადაც პოლიტიკის დაგეგმვა და კოორდინაცია PAR-ის
მიმართულებაა) მოხდეს პოლიტიკის ციკლში აღნიშნული კომპონენტის ინტეგრირება.
დამატებით, ამ პრინციპთან დაკავშირებით გათვალისწინებული არ არის მონაცემთა
ანალიზის კომპონენტის გაძლიერებაც საჯარო უწყებებში (არამხოლოდ პოლიტიკის
ანალიზის ციკლში და სტრატეგიული დოკუმენტების შექმნისას), რაც ხელს
შეუწყობდა ახალი საჭიროებებისა და ტენდენციების პროგნოზირებას (მათ შორის
სერვისების მიწოდების ნაწილშიც) და იმის გაგებას, თუ როგორ შეიძლება
გაუმჯობესდეს არსებული პროცესები და დინამიკა. Data-Driven მიდგომაზე ხაზია
გასმული OECD-ის 2020 წლის ჩარჩო დოკუმენტში, რომელიც აღწერს ციფრული
მმართველობის ჩარჩოს 6 ძირითად მიმართულებას.
აისახა/აისახა ნაწილობრივ/ არ ასახულა − აისახა
ნაწილობრივ
მაკოორდინირებელი უწყების კომენტარი − სიტუაციის
ანალიზი − "ციფრული მმართველობის ჭრილში საერთაშორისო ინდექსების ანალიზი
კიდევ ერთხელ უსვამს ხაზს ქვეყანაში მონაცემებზე დაფუძნებული
გადაწყვეტილებებისა და ეფექტიანი, რეაგირების უნარის მქონე პოლიტიკის
გაუმჯობესების, ასევე ციფრული მმართველობის სტრატეგიისა და სახელმწიფოს
ერთიანი მიდგომის გაძლიერების საჭიროებას." ამოცანა 1.2. "მტკიცებულებებზე
დაფუძნებული პოლიტიკის შემუშავების პრინციპის გათვალისწინებით, ციფრული
მმართველობის განხორციელებისას, მნიშვნელოვანია არსებობდეს კვლევის შედეგად
მიღებული საბაზისო მონაცემები ციფრული მმართველობის სხვადასხვა
მიმართულებისთვის, რათა სწორედ მტკიცებულებებზე დაყრდნობით იყოს
შესაძლებელი, ერთი მხრივ, პროგრესისა და მიღწევების, ხოლო, მეორე მხრივ −
პრიორიტეტებისა და საჭიროებების განსაზღვრა."; "ქვეყანაში სრულფასოვანი
კვლევების ჩასატარებლად მნიშვნელოვანია კვლევის მეთოდოლოგია არა მხოლოდ
ინტერვიუებსა და სხვა სუბიექტური მიდგომების მქონე ხერხებზე, არამედ
მნიშვნელოვანწილად, მონაცემებზე იყოს დაფუძნებული. ამისთვის აუცილებელია
ისეთ პროცესებში, როგორიცაა სახელმწიფო ელექტრონული სერვისების
შექმნა-მიწოდება, მოქალაქეებთან კომუნიკაცია თუ ბიზნეს-პროცესების
ოპტიმიზაცია, მუდმივად განხორციელდეს სხვადასხვა სახის მონაცემების
გენერირება, რაც, თავის მხრივ, ხელს შეუწყობს მონაცემებზე დაფუძნებული
კვლევების განხორციელებას."
რეკომენდაცია №3 − გათვალისწინებული არ არის
ციფრული მმართველობის განვითარების პროცესში ხელოვნური ინტელექტის
გამოყენების შესაძლებლობები. მაშინ, როდესაც AI ასე სწრაფად ვითარდება,
ხოლო მთელი რიგი ქვეყნები უკვე აქტიურად იყენებენ ხელოვნურ ინტელექტს
საჯარო მმართველობის საკითხებთან დაკავშირებული პრობლემების გადასაჭრელად.
გარდა ამისა, საქართველოშიც ცალკეული საჯარო უწყებები უკვე იყენებენ
ხელოვნური ინტელექტის სისტემებს, მაშინ როდესაც ქვეყანაში არ არსებობს
ხელოვნური ინტელექტის სისტემებზე დაფუძნებული პროგრამული უზრუნველყოფების
ერთიანი განმარტება, საკანონმდებლო ჩარჩო და ერთიანი ბაზა, სადაც მოცემული
იქნებოდა საჯარო დაწესებულებების მიერ დანერგილი ხელოვნური ინტელექტის
სისტემების ერთიანი ჩამონათვალი ზოგადი აღწერითა და სხვა მნიშვნელოვანი
დეტალებით. საწყის ეტაპზე რეკომენდებულია გათვალისწინებული იყოს არსებული
სიტუაციის მიმოხილვის მომზადება, ასევე, კვლევის ჩატარება, რომელიც
გამოავლენდა AI-ის გამოყენების შესაძლებლობებს, განსაკუთრებით ციფრული
სერვისების მიწოდების და შეზღუდული შესაძლებლობის მქონე პირების
ვებ-მისაწვდომობის უზრუნველყოფასთან დაკავშირებით, რის საფუძველზე
მომზადდებოდა ქვეყნის ერთიანი ხედვა, სტრატეგია და საკანონმდებლო ჩარჩო
საჯარო სექტორში AI-ის გამოყენების შესახებ.
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი −
სტრატეგიაში პრობლემა 2.4-ის ქვეშ დაემატა ტექსტი − "მსოფლიოში
ხელოვნური ინტელექტის სწრაფი განვითარების ფონზე, იზრდება ციფრული
მმართველობის განვითარების პროცესში მისი გამოყენების შესაძლებლობებიც.
მთელი რიგი ქვეყნები აქტიურად იყენებენ ხელოვნურ ინტელექტს საჯარო
მმართველობის პროცესში, სხვადასხვა საკითხებთან დაკავშირებული პრობლემების
გადასაჭრელად. ცალკეული საჯარო უწყებები უკვე საქართველოშიც იყენებენ
ხელოვნური ინტელექტის სისტემებს, თუმცა ქვეყანაში არ არსებობს ხელოვნური
ინტელექტის სისტემებზე დაფუძნებული პროგრამული უზრუნველყოფების ერთიანი
განმარტება, საკანონმდებლო ჩარჩო და ერთიანი ბაზა, სადაც მოცემული იქნებოდა
საჯარო დაწესებულებების მიერ დანერგილი ხელოვნური ინტელექტის სისტემების
ერთიანი ჩამონათვალი ზოგადი აღწერითა და სხვა მნიშვნელოვანი დეტალებით."
ამოცანა 2.2- ში დაემატა ტექსტი − "ციფრული მმართველობის პროცესში, გარდა
ფართოდ გამოყენებული ტექნოლოგიებისა, მნიშვნელოვანია იმ ახალი
შესაძლებლობების გამოყენებაც, რომელსაც თანამედროვე ტექნოლოგიები (მაგ.:
ბლოქჩეინი, ხელოვნური ინტელექტი (AI), დიდი მონაცემები (Big Data),
ნივთების ინტერნეტი (IoT) და სხვა) გვთავაზობს. აუცილებელია აღნიშნული
ტექნოლოგიების საჯარო სექტორში დანერგვის და გამოყენების პროცესში
სახელმწიფოს ჰქონდეს ერთიანი ხედვა და სტრატეგია, რათა შესაძლებლობებთან
ერთად, გათვალისწინებული იყოს ის საფრთხეებიც, რომელიც შესაძლოა თან
სდევდეს აღნიშნული ტექნოლოგიების დანერგვას. ამისთვის, საწყის ეტაპზე
საჭიროა მომზადდეს ქვეყანაში არსებული სიტუაციის მიმოხილვა, რომელიც
გამოავლენდა ხელოვნური ინტელექტის გამოყენების შესაძლებლობებს,
განსაკუთრებით ციფრული სერვისების მიწოდების და შეზღუდული
შესაძლებლობის მქონე პირების ვებ-მისაწვდომობის უზრუნველყოფის
კუთხით. ამის შემდეგ კი შემუშავდეს ხელოვნური ინტელექტის რეგულირების
ეთიკური და სამართლებრივი ჩარჩო საერთაშორისოდ აღიარებული სტანდარტების და
სხვა მაღალტექნოლოგიური ქვეყნების გამოცდილების გათვალისწინებით.", ხოლო
სამოქმედო გეგმაში − შესაბამისი აქტივობა.
არასამთავრობო უწყება − ინფორმაციის თავისუფლების
განვითარების ინსტიტუტი IDFI
შემოსვლის თარიღი − 2/5/2024
შემოსვლის არხი − info@dga.gov.ge
დოკუმენტი − საქართველოს ციფრული მმართველობის
სტრატეგიის 2025-2026 წწ. სამოქმედო გეგმა
რეკომენდაცია №1 − ზოგიერთი დასახული ნაბიჯი
საკმაოდ არაამბიციურია, რასაც მოწმობს გავლენისა და ამოცანის შედეგის
ინდიკატორის მაჩვენებლები შუალედური და სამიზნე წლებისთვის. დამატებით უნდა
აღინიშნოს ამოცანის შედეგის ინდიკატორების ხარისხიც, რომლებიც უმეტესწილად,
გავლენის ინდიკატორების მსგავსად ვერ აკმაყოფილებენ SMART
-კრიტერიუმებს.
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი − ამოცანის
ინდიკატორების ნაწილის ფორმულირება შეიცვალა.
რეკომენდაცია №2 − რადგან სტრატეგიის მოქმედების
ვადა აღემატება 4 წელს, ამოცანის შედეგის ინდიკატორები წარმოდგენილი უნდა
იყოს 2-2 წლიანი ინტერვალით რათა პროგრესის გაზომვა და მიღწეული შედეგების
მონიტორინგი უფრო გამარტივდეს, ამას ითვალისწინებს საქართველოს მთავრობის
#629 დადგენილებაც.
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი −
დამატებულია ამოცანის შედეგის ინდიკატორების შუალედური
მაჩვენებელი.
რეკომენდაცია №3 − ამოცანის შედეგი 1.2.1
საქართველოში ციფრული მმართველობის მიმართულებით განხორციელებული კვლევების
რაოდენობა − 2029 წლისთვის ითვალისწინებს 4 კვლევის არსებობას, რაც საკმაოდ
არაამბიციური მაჩვენებელია, მით უფრო რომ უკვე სამი კვლევა ამ მიმართულებით
2025-2026 წლების სამოქმედო გეგმით არის გათვალისწინებული. ასევე,
დადასტურების წყაროში მოცემულია ვებ-გვერდი, რომელიც არ არის
ფუნქციონირებადი − http://www.justitia.gov.ge/ .
აისახა/აისახა ნაწილობრივ/ არ ასახულა − არ
ასახულა
მაკოორდინირებელი უწყების კომენტარი − სამოქმედო
გეგმაში მითითებულია მინიმალური კვლევების რაოდენობა. დამატებითი ფინანსური
რესურსის შემთხვევაში კვლევების რაოდენობა გაიზრდება.
რეკომენდაცია №4 − კვლევების ნაწილში
გათვალისწინებული არ არის აკადემიური და კერძო სექტორის ჩართვა. შესაბამისი
ამოცანის რისკების გრაფაში წერია: „კერძო და აკადემიური სექტორის, ასევე
დარგის სპეციალისტების არასათანადო მზაობა, მათ შორის, შესაბამისი
რესურსების ნაკლებობა“ − მაგრამ მოცემული აქტივობებიდან, საერთოდ არ ჩანს,
როგორ არის მოაზრებული/დაგეგმილი თანამშრომლობა აკადემიურ სექტორთან, რაც
მნიშვნელოვანია როგორც აკადემიური სექტორისთვის, ისე სტრატეგიის ამოცანის
მიღწევისთვის.
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი − სამოქმედო
გეგმაში, შესაბამის აქტივობებზე, პარტნიორ უწყებებში დაემატა აკადემიური
სფეროს წარმომადგენლები.
რეკომენდაცია №5 − ბუნდოვანია რას მოიაზრებს
აქტივობა 1.1.3 ქვეყანაში ციფრული მმართველობის მიმართულებით
განხორციელებული პროექტების შესახებ ანგარიშგების მექანიზმის შემუშავება.
ინდიკატორის მიხედვით მომზადებული იქნება ანგარიშგების მექანიზმის
ამსახველი საკანონმდებლო ცვლილებები. მნიშვნელოვანია დაკონკრეტდეს რომელი
საკანონმდებლო აქტის ცვლილება იგეგმება და კონკრეტულად რა ტიპის
ანგარიშგების მექანიზმის შემუშავებაა დაგეგმილი. თუ აქტივობა ამავე
სტრატეგიის ფარგლებში დაგეგმილი პროექტების შესახებ ანგარიშგების
მექანიზმის შექმნას მოიაზრებს, ამის საჭიროება ნაკლებად არსებობს, რადგან
სტრატეგია ისედაც ითვალისწინებს პროგრესს და წლიური მონიტორინგის
ანგარიშების მომზადებას.
აისახა/აისახა ნაწილობრივ/ არ ასახულა − არ
ასახულა
მაკოორდინირებელი უწყების კომენტარი − რომელ
საკანონმდებლო აქტებში შევა ცვლილებები ჯერ-ჯერობით არ არის ცნობილი.
აღნიშნული აქტივობა, არ მოიაზრებს ამ სტრატეგიის ფარგლებში დაგეგმილი და
განხორციელებული აქტივობების შესახებ მონიტორინგის ანგარიშს.
რეკომენდაცია №6 − არაამბიციურია ამოცანის
(საჯარო და კერძო სექტორებს შორის ციფრული მმართველობის საკითხებზე
თანამშრომლობის გაღრმავება) შედეგის ინდიკატორ 1.3.1 -ის სამიზნე
მაჩვენებელი, რომელიც 2029 წლისთვის მოიაზრებს კერძო სექტორთან
თანამშრომლობით დანერგილ მხოლოდ 2 ინიციატივას. ამავე ამოცანის ქვეშ
აქტივობა (ციფრული მმართველობის საკომუნიკაციო პლატფორმის − ფორუმის
შექმნა) 1.3.1 -ის ინდიკატორად რეკომენდებულია დათვლილი იქნეს უკვე ფორუმის
ფარგლებში ჩატარებული შეხვედრების რაოდენობა, რათა შეფასდეს ფორუმის,
როგორც ქმედითი მექანიზმის არსებობა და არა მისი ფორმალურად ჩამოყალიბება
(მით უფრო, რომ აქტივობის დასრულების თარიღია 2025 წლის ბოლო).
აისახა/აისახა ნაწილობრივ/ არ ასახულა − აისახა
ნაწილობრივ
მაკოორდინირებელი უწყების კომენტარი − 1.3.1
ამოცანის შედეგის ინდიკატორის მაჩვენებელი 2029 წლისთვის გაიზარდა და
შეადგენს 7 ინიციატივას. რაც შეეხება 1.3.1 აქტივობის ინდიკატორს,
გამომდინარე იქიდან, რომ საჯარო-კერძო პარტნიორობის პლატფორმა ქვეყანაში
ჯერ-ჯერობით ჩამოსაყალიბებელია, აღნიშნული აქტივობის ინდიკატორი იქნება
ფორუმის დაკომპლექტება და მისი ფუნქციონირებისთვის შესაბამისი
დოკუმენტაციის შექმნა და დამტკიცება. რაც შეეხება ფორუმის, როგორც ქმედითი
მექანიზმის არსებობის შეფასებას, იფარება იგივე ამოცანის 1.3.2
აქტივობით.
რეკომენდაცია №7 − ამოცანის (სახელმწიფო
სერვისების გაციფრულება და არსებული ციფრული სერვისების გაუმჯობესება)
შედეგის ინდიკატორ 2.1.1 − ის საბაზისო მონაცემის მიხედვით ამ ეტაპზე
სახელმწიფო სერვისების გამოყენების მაჩვენებელში მითითებულია 0, რაც
უცნაური მაჩვენებელია, რადგან შესაბამის საჯარო დაწესებულებ(ებ)ს უნდა
ჰქონდეთ ინფორმაცია მათი სერვისების მომხმარებელთა საშუალო რაოდენობის
შესახებ. ასევე, არაამბიციურია ამ მაჩვენებლის 2029 წლისთვის მხოლოდ 20%-ით
ზრდა, თუ სერვისების ონლაინ გამოყენების ზრდის მაჩვენებელი არის
განსაზღვრული. მნიშვნელოვანია დოკუმენტს თან დაერთოს ინდიკატორების
პასპორტი და მსგავსი შემთხვევები დეტალურად იყოს ახსნილი ინდიკატორის
გაანგარიშების მეთოდოლოგიაში.
აისახა/აისახა ნაწილობრივ/ არ ასახულა − აისახა
ნაწილობრივ
მაკოორდინირებელი უწყების კომენტარი − 2.1.1
ამოცანის შედეგის ინდიკატორის საბაზისო მაჩვენებელი შეიცვალა N/A-ით,
რადგან ამ ეტაპზე, ქვეყანაში არ არის დათვლილი სახელმწიფო სერვისების
გამოყენების ჯამურ მაჩვენებელი. სტრატეგიის და სამოქმედო გეგმის პროექტების
საჯარო განხილვების ეტაპზე, საქართველოს მთავრობის
№629 დადგენილების შესაბამისად არ არის სავალდებულო
ინდიკატორის პასპორტების და ბიუჯეტირების ინსტრუმენტების
წარდგენა.
რეკომენდაცია №8 − ამოცანის (საჯარო სექტორში
ელექტრონული საქმისწარმოებისა და დოკუმენტბრუნვის სისტემების გამოყენების
ხელშეწყობა) შედეგის ინდიკატორ 2.2.1-ში უმჯობესია დათვლილი იქნეს არა
უწყებების რაოდენობა, არამედ მათი წილი. ასევე, ამავე ამოცანის ქვეშ
აქტივობა 2.2.2 ითვალისწინებს, რომ მოხდება ელექტრონული დოკუმენტბრუნვის
სისტემების დანერგვა იმ საჯარო დაწესებულებებში/ადმინისტრაციულ ორგანოებში,
რომლებიც არ იყენებენ დოკუმენტბრუნვის ელექტრონულ სისტემებს დასრულდება
2025 წლის ბოლოს, მაშინ როდესაც ისეთი უწყებების იდენტიფიცირება, რომელიც
არ იყენებს ელექტრონულ სისტემებს დასრულდება 2026 წლის IV კვარტალში.
მნიშვნელოვანია, რომ ამ ორ აქტივობას შორის იყოს ლოგიკური ბმა, ჯერ
დასრულდეს უწყებების იდენტიფიცირება და შემდეგ მათში ელექტრონული
დოკუმენტბრუნვის სისტემების დანერგვა.
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი − შეიცვალა
აქტივობების ვადები: აქტივობა 2.2.1 − იმ საჯარო დაწესებულებების /
ადმინისტრაციული ორგანოების იდენტიფიცირება, რომლებიც არ იყენებენ
დოკუმენტბრუნვის ელექტრონულ სისტემებს − შესრულების ვადა 2025, IV კვ.,
ხოლო აქტივობა 2.2.2 − ელექტრონული დოკუმენტბრუნვის სისტემების დანერგვა იმ
საჯარო დაწესებულებებში/ადმინისტრაციულ ორგანოებში, რომლებიც არ იყენებენ
დოკუმენტბრუნვის ელექტრონულ სისტემებს − შესრულების ვადაა 2026, IV
კვ.
რეკომენდაცია №9 − ამოცანის (ელექტრონული
სერვისების მიწოდების არხების გაუმჯობესება) შედეგის ინდიკატორი 2.3.1-ის
სამიზნე მაჩვენებელი ასევე არაამბიციურია და პრაქტიკულად ის უკვე
შესრულებული იქნება სამოქმედო გეგმის დასრულების შემდეგ. კონკრეტულად თუ
აქტივობა 2.3.1 (ელექტრონული სერვისების ერთიანი პორტალის (My.gov.ge)
დახვეწა (რედიზაინი)) და 2.3.2 (ელექტრონული სერვისების მობილური
აპლიკაციის შექმნა) შესრულდა 2025 წლის IV- კვარტალში, ამოცანის შედეგის
ინდიკატორის სამიზნე მაჩვენებელი, რომელიც 2030 წლისთვის მოიაზრებს სულ
მცირე 1 ვებ-გვერდის განახლებასა და 1 მობილური აპლიკაციის შექმნას, უკვე
შესრულებული იქნება.
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი − ამოცანა
2.3-ის ქვეშ დარჩა მხოლოდ ერთი ამოცანის ინდიკატორი.
რეკომენდაცია №10 − არაამბიციური და
არასპეციფიკურია ამოცანა 2.5-ის შესაბამისი ინდიკატორი. ამოცანა მოიაზრებს
− შეზღუდული შესაძლებლობის მქონე პირებისთვის ვებ მისაწვდომობის
გაუმჯობესებას, ინდიკატორი კი ჩამოყალიბებულია შემდეგი ფორმულირებით −
შეზღუდული შესაძლებლობის მქონე პირებისთვის ვებ მისაწვდომობის გაზრდა −
რომელიც არათუ ინდიკატორია, არამედ იმეორებს ამოცანის შინაარს. ცალკე უნდა
აღინიშნოს ინდიკატორის მაჩვენებლები, რომელიც არ აფასებს გაიზრდება თუ არა
შეზღუდული შესაძლებლობის მქონე პირთა ვებ მისაწვდომობა, არამედ აქცენტს
აკეთებს საკანონმდებლო ჩარჩოს არსებობაზე. 2029 წლისთვის სამიზნე
მაჩვენებელი საკანონმდებლო ცვლილებების განხორციელებაა, რაც არაამბიციურია
და აჩენს იმის ვარაუდს, რომ მნიშვნელოვანი ნაბიჯები შეზღუდული
შესაძლებლობის მქონე პირების ვებ მისაწვდომობის გასაუმჯობესებლად არ
იქნება გადადგმული. ამოცანით გათვალისწინებულ აქტივობების ანალიზითაც,
მკაფიოდ ჩანს გადადგმული ნაბიჯების არაამბიციურობა, დაგეგმილია მხოლოდ ერთი
აქტივობა − ონლაინ გამოყენებადობისა და ვებ მისაწვდომობის სტანდარტის
შესაქმნელად საჭირო კვლევის ჩატარება, რომელიც 2025 წლის IV კვარტალში
დასრულდება. ამის შემდეგ კი 2026 წლისთვის არაფერია დაგეგმილი ამ
მიმართულებით. 2030 წლამდე კი, როგორც ამოცანის ინდიკატორის სამიზნე
მაჩვენებლიდან ვიგებთ, მხოლოდ საკანონმდებლო ცვლილებები განხორციელდება,
რაც გვაფიქრებინებს, რომ შემდეგ სამოქმედო გეგმაშიც არ იქნება
გათვალისწინებული მნიშვნელოვანი და ამბიციური ნაბიჯები.
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი − შეიცვალა
2.5. ამოცანის ინდიკატორი − "შეზღუდული შესაძლებლობის მქონე
პირების საჭიროებებზე ადაპტირებული სერვისების წილი ", ასევე დაემატა
ახალი აქტივობა.
რეკომენდაცია №11 − ურთიერთთავსებადობასთან
დაკავშირებით სტრატეგიის ნარატიულ ნაწილში აღწერილია, რომ − “საერთაშორისო
პარტნიორების მხარდაჭერით შემუშავდა როგორც საქართველოს ზოგადი
ადმინისტრაციული კოდექსის ცვლილებების პაკეტი, ასევე ურთიერთთავსებადობის
ჩარჩო დოკუმენტის პირველადი ვერსია, თუმცა, შემდგომში საკანონმდებლო
ცვლილებების ინიციირებას მსვლელობა არ მიეცა, ხოლო ურთიერთთავსებადობის
ჩარჩო დოკუმენტის დამტკიცება ვერ მოხერხდა. ამჟამად მუშაობა მიმდინარეობს
ორივე პროექტის განახლებული რედაქციებით დამტკიცების მიზნით” − როგორც ამ
ჩანაწერიდან ჩანს, მიმდინარეობს ურთიერთთავსებადობის ჩარჩო დოკუმენტის
ვერსიის გადახედვა დამტკიცების მიზნით, თუმცა აქტივობებში მისი დამტკიცება
არ არის მოცემული. შესაბამისად, მნიშვნელოვანია, რომ სამოქმედო გეგმა
ითვალისწინებდეს როგორც აღნიშნული დოკუმენტის დამტკიცებას, ასევე, მისი
პრაქტიკაში დანერგვისთვის საჭირო ცალკეული ღონისძიებების
გატარებას.
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი − სამოქმედო
გეგმაში დაემატა შესაბამისი აქტივობა. ურთიერთთავსებადობის კუთხით
ცნობიერების ამაღლების ღონისძიებები დაგეგმილია სხვადასხვა პოლიტიკის
დოკუმენტებით.
რეკომენდაცია №12 − რაც შეეხება ამ ამოცანის
ქვეშ გათვალისწინებულ აქტივობებს, 3.2.3 (ინფორმაციის ერთიანი სახელმწიფო
რეესტრის პორტალის განვითარება) და 3.2.4 (ინფორმაციის ერთიანი სახელმწიფო
რეესტრის მხარდამჭერი საკანონმდებლო ჩარჩოს გადახედვა, აღსრულების
მექანიზმების შესაქმნელად საკანონმდებლო ცვლილებების მომზადება და
საქართველოს მთავრობისთვის წარდგენა) აქტივობები უკვე გათვალისწინებულია
OGP -ის სამოქმედო გეგმაში, რომელშიც ასევე გათვალისწინებულია ერთიანი
სახელმწიფო რეესტრის შესახებ საჯარო მოხელეთა ცნობიერების გაზრდა, თუმცა
საკმაოდ არაამბიციური მოსალოდნელი შედეგით. დაგეგმილია, მხოლოდ 10 საჯარო
უწყების მინ. 20 მოხელის გადამზადება. აქედან გამომდინარე მნიშვნელოვანია
ციფრული მმართველობის 2025-2026 წლების სამოქმედო გეგმაშიც იყოს მოცემული
საჯარო მოხელეთა ცნობიერების/კომპეტენციების გაზრდა და მოხდეს უფრო მეტი
საჯარო მოხელის გადამზადება, რათა შეიქმნას განხორციელებული საკანონმდებლო
ცვლილებების ეფექტური განხორციელების ნიადაგი. აგრეთვე, რეკომენდებულია
ერთჯერადი ხასიათის ტრენინგებისგან განსხვავებული, მდგრადი სასწავლო
რესურსის შექმნა.
აისახა/აისახა ნაწილობრივ/ არ ასახულა − არ
ასახულა
მაკოორდინირებელი უწყების კომენტარი − ამ
ეტაპზე, პრიორიტეტულად ჩაითვალა ის აქტივობები, რომლებიც მითითებულია
2025-2026 წლების სამოქმედო გეგმაში. კერძოდ, "ინფორმაციის ერთიანი
სახელმწიფო რეესტრის პორტალის განვითარება" და "ინფორმაციის ერთიანი
სახელმწიფო რეესტრის მხარდამჭერი საკანონმდებლო ჩარჩოს გადახედვა,
აღსრულების მექანიზმების შესაქმნელად საკანონმდებლო ცვლილებების მომზადება
და საქართველოს მთავრობისთვის წარდგენა". ზემოთ აღნიშნული აქტივობების
განხორციელების გარეშე არარელევანტურად მიგვაჩნია საჯარო მოხელეების
გადამზადება. OGP-ის სამოქმედო გეგმით განსაზღვრულ მინიმალურ რაოდენობაზე
მეტი საჯარო მოხელის გადამზადება კი სავარაუდოდ ვერ მოხერხდება, იმის
გათვალისწინებით, რომ ორივე სამოქმედო გეგმის განსახორციელებლად
განსაზღვრულია ერთი და იგივე პერიოდი (2025- 2026 წწ.).
რეკომენდაცია №13 − არაამბიციურია ამოცანის (ღია
მონაცემთა ხელმისაწვდომობის უზრუნველყოფა) შედეგის ინდიკატორი 3.3.1,
რომლის მიხედვითაც, მას შემდეგ რაც მიღებულ იქნება საკანონმდებლო
ცვლილებები, რომლებიც საჯარო დაწესებულებებს ღია მონაცემთა გამოქვეყნებას
დაავალდებულებს data.gov.ge-ზე, მხოლოდ 50 მონაცემთა ბაზით გაიზრდება ყოველ
სამ წელიწადში ერთხელ პორტალზე გამოქვეყნებული მონაცემები. მსგავსი
ინდიკატორი ეჭვქვეშ აყენებს მიღებული საკანონმდებლო რეგულაციების ეფექტურ
აღსრულებას. ასევე, სასურველია აღნიშნული ამოცანის ქვეშ გათვალისწინებული
იყოს საჯარო მოხელეთა შესაბამისი ტრენინგები, რათა სხვადასხვა უწყებების
წარმომადგენლებმა სათანადოდ აღასრულონ ახლადმიღებული საკანონმდებლო ჩარჩო
და დაიწყონ მონაცემების ერთიან პორტალზე მონაცემების
გამოქვეყნება.
აისახა/აისახა ნაწილობრივ/ არ ასახულა − აისახა
ნაწილობრივ
მაკოორდინირებელი უწყების კომენტარი − გაიზარდა
3.3.1 ამოცანის შედეგის ინდიკატორში მითითებული მონაცემთა ცხრილების
რაოდენობა. ღია მონაცემების შესახებ საჯარო მოხელეთა გადამზადება
დაგეგმილია საჯარო მმართველობის რეფორმის და OGP-ის 2025-2026 წლების
სამოქმედო გეგმებით, შესაბამისად დუბლირების თავიდან აცილების მიზნით,
აღნიშნული აქტივობის მითითება აღარ ჩაითვალა მიზანშეწონილად წინამდებარე
სამოქმედო გეგმაში.
რეკომენდაცია №14 − არაამბიციურია ამოცანის
(კვალიფიციური სანდო მომსახურების სისტემის განვითარება) შედეგის
ინდიკატორი 3.4.1, რომელიც ითვლის ევროკავშირის ქვეყნების რაოდენობას,
სადაც აღიარებული იქნება საქართველოში მოქმედი კვალიფიციური სანდო
მომსახურება. სამიზნე მაჩვენებლად 2029 წლისთვის დასახულია − 1. თუ ამ
ამოცანის ქვეშ არსებული აქტივობა შესრულდება, უკვე შესრულებული იქნება ეს
სამიზნე მაჩვენებელიც, რადგან აქტივობის შედეგის ინდიკატორშიც იგივე
მაჩვენებელია მითითებული. აქვე უნდა აღინიშნოს, რომ აქტივობასაც (3.4.1)
საკმაოდ ბუნდოვანი ფორმულირება აქვს. ის გულისხმობს საქართველოში არსებული
კვალიფიციური სანდო მომსახურების ევროკავშირის მხრიდან აღიარებისთვის
საჭირო გარემოს შექმნას. მნიშვნელოვანია კონკრეტულად ჩანდეს რა მოიაზრება
საჭირო გარემოს შექმნაში.
აისახა/აისახა ნაწილობრივ/ არ ასახულა − არ
ასახულა
მაკოორდინირებელი უწყების კომენტარი −
საქართველოში მოქმედი კვალიფიციური სანდო მომსახურების ევროკავშირის
ერთ ქვეყანაში აღიარება, ევროკავშირის სხვა ქვეყნებში აღიარებასაც
გულისხმობს, შესაბამისი პოლიტიკური ნების შემთხვევაში. შესაბამისად არ
მიგვაჩნია არაამბიციურ ინდიკატორად 2029 წლამდე დასახული მიზნის
მიღწევა.
რეკომენდაცია №15 − ამოცანა 3.5 გულისხმობს
ციფრული არქივის სისტემის შექმნას ინდიკატორში კი ასახულია როგორ შეიცვლება
საკანონმდებლო ჩარჩო არქივის განვითარებისთვის − ამ ტიპის ინდიკატორი არ
იძლევა რეალურად პროგრესის შეფასების საშუალებას. სავარაუდოდ საჯარო
დაწესებულებების ჩართვა ციფრული არქივის სისტემაში ეტაპობრივად მოხდება და
რეკომენდებულია მოხდეს სწორედ იმ უწყებების წილის დათვლა, რომელიც ჩართული
იქნება ციფრული არქივის სისტემაში.
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი − სამოქმედო
გეგმაში არსებული ინდიკატორი შეიცვალა.
რეკომენდაცია №16 − ამოცანა 4.1 (საჯარო სექტორში
ინფორმაციულ-საკომუნიკაციო სფეროს სპეციალისტებისთვის მიმზიდველი გარემოს
შექმნა) − ის შემთხვევაშიც ასევე დაგეგმილია საკმაოდ არაამბიციური ნაბიჯი
აქტივობა 4.1.1 რომელიც 2025 წლის IV კვარტლისთვის ითვალისწინებს მხოლოდ
ანაზღაურებასთან დაკავშირებით რეკომენდაციების მომზადებას, რომელმაც
შესაძლოა ვერ უზრუნველყოს ამოცანით გათვალისწინებული შედეგების
მიღწევა.
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი − დაემატა
აქტივობა 4.2.2 − "უცხო ქვეყნების პრაქტიკის კვლევა საჯარო სექტორში
ინფორმაციულ-საკომუნიკაციო სფეროს სპეციალისტებისთვის მიმზიდველი გარემოს
შექმნის კუთხით".
რეკომენდაცია №17 − ამოცანა 4.2 (სპეციალისტების
ცოდნისა და კვალიფიკაციის ამაღლება)-ის ინდიკატორის შემთხვევაში
არაამბიციურია სამიზნე მაჩვენებელი, რომელიც ციფრული მმართველობის სფეროს
სპეციალისტებისთვის 10 ტრენინგის ჩატარებას გულისხმობს.
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი − გაიზარდა
რაოდენობა
რეკომენდაცია №18 − მნიშვნელოვანია, რომ
სტრატეგიამ დაფაროს ისეთი საკითხები, როგორიცაა მონაცემთა ანალიზის
გამოყენება საჯარო პოლიტიკის ციკლში, საჯარო სექტორში ხელოვნური ინტელექტის
სისტემის გამოყენების წახალისების მექანიზმები და გამჭვირვალობის
სტანდარტების შექმნაზე ორიენტირებული აქტივობები. აგრეთვე ჩართულობის
ელექტრონული საშუალებების არსებობა და გამართული ფუნქციონირება. რაც
ყველაზე მეტად მნიშვნელოვანია, სტრატეგია და სამოქმედო გეგმა არსებული
ამოცანებისა და ინდიკატორების გათვალისწინებით, ნაკლებად ითვალისწინებენ
ელ-მმართველობის თანამედროვე ტენდენციებს, მათ შორის ისეთი საერთაშორისო
ორგანიზაციებისა და აქტორების სახელმძღვანელო პრინციპებსა და
მეთოდოლოგიებს, როგორიცაა მსოფლიო ბანკის GovTech მზაობის ინდექსი და
OECD-ის ელ-მმართველობის სახელმძღვანელო.
აისახა/აისახა ნაწილობრივ/ არ ასახულა − არ
ასახულა
მაკოორდინირებელი უწყების კომენტარი −
სტრატეგიის დოკუმენტი გვ.9 − "დოკუმენტი ითვალისწინებს გაეროს
უნივერსიტეტის ელექტრონული მმართველობის განყოფილების (UNU-EGOV) ექსპერტის
მიერ მომზადებულ დოკუმენტს, სადაც შეფასებულია საქართველოში არსებული
ციფრული მმართველობის გარემო და საერთაშორისო გამოცდილების კარნახით,
ასახულია კონკრეტული რეკომენდაციები და ინიციატივები მისი განვითარების
მიზნით. აგრეთვე, საქართველოს ციფრული მმართველობის 2025-2030 წლების
სტრატეგიაში ასახულია დანიის ციფრული მმართველობის სტრატეგიის (2022 −
2025) გამოცდილება, ეკონომიკური თანამშრომლობისა და განვითარების
ორგანიზაციის (OECD) რეკომენდაციები ციფრული მმართველობის სტრატეგიების
შემუშავების თვალსაზრისით, ასევე, ასტანას საჯარო სამსახურის ჰაბის (Astana
Civil Service Hub) ეგიდით 2022 წელს მომზადებული მიზანშეწონილობის
(მოთხოვნილებების შეფასება) კვლევის შედეგების ანგარიში. ამასთან,
დოკუმენტი ითვალისწინებს ევროკომისიის პროექტის − EU4Digital-ის მიერ 2022
წლის მაისში მომზადებულ ანგარიშს საქართველოში ციფრული მმართველობის
თაობაზე (eGovernance report − Georgia), სადაც ასახულია რეკომენდაციები
შემდგომი განვითარებისათვის, ციფრული მმართველობისა და ადმინისტრაციული
ბარიერების შემცირების თაობაზე ევროპის კომისიის კვლევას (Study on
eGovernment and the Reduction of Administrative Burden), გაეროს
განვითარების პროგრამის (UNDP) და გაეროს უნივერსიტეტის ექსპერტთა მიერ
2021 წელს მომზადებულ რეკომენდაციებს − ვებმისაწვდომობა შეზღუდული
შესაძლებლობების მქონე პირებისთვის საქართველოში." ასევე გვ. 10
"სტრატეგიას ასევე საფუძვლად უდევს ევროკავშირის ეკონომიკური
თანამშრომლობისა და განვითარების ორგანიზაციის (OECD) მმართველობისა და
მენეჯმენტის ხელშეწყობის პროგრამის (SIGMA) მიერ შემუშავებული საჯარო
მმართველობის განახლებული პრინციპები. OECD/SIGMA-ს საჯარო მმართველობის
პრინციპები ეფუძნება ევროკავშირის არსებულ კანონთა კრებულს, OECD-ის
რეკომენდაციებს, ასევე ევროკავშირისა და OECD-ის ქვეყნების საუკეთესო
პრაქტიკას და სხვა საერთაშორისო სტანდარტებს. სახელმძღვანელო “საჯარო
მმართველობის პრინციპები” ევროკავშირის გაფართოების კანდიდატი
ქვეყნებისთვის მთავარი ჩარჩო დოკუმენტია, რომელიც უფრო მეტად ციფრული,
მოქნილი, ინოვაციური და ეკომეგობრული საჯარო მმართველობის ჩამოყალიბების
გზამკვლევს წარმოადგენს."
საჯარო უწყება − საქართველოს კულტურისა და სპორტის
სამინისტრო
შემოსვლის თარიღი − 2/21/2024
შემოსვლის არხი − დოკუმენტბრუნვის ელექტრონული
სისტემა (დეს)
დოკუმენტი − საქართველოს ციფრული მმართველობის
სტრატეგიის 2025-2026 წწ. სამოქმედო გეგმა
რეკომენდაცია №1 − საქართველოს კულტურისა და
სპორტის სამინისტრო მატერიალური ან/და ელექტრონული ფორმით, ახორციელებს
სერვისების მიწოდებას კულტურისა და სპორტის სფეროში. ამასთანავე
მოგახსენებთ, რომ ოფიციალური ვებგვერდი განახლების რეჟიმშია. მიმდინარეობს
მუშაობა აღნიშნულ საკითხზე, რის შემდგომაც სამინისტრო გამოთქვამს მზაობას
განაახლოს კონსულტაციები ელექტრონული სერვისების ერთიან პორტალზე My.gov.ge
სერვისების ინტეგრაციასთან დაკავშირებით.
აისახა/აისახა ნაწილობრივ/ არ ასახულა − არ
ასახულა
მაკოორდინირებელი უწყების კომენტარი − აღნიშნული
ინფორმაცია სტრატეგიის მიზნებისა და ამოცანებისთვის არ ჩაითვალა
რელევანტურად.
მოქალაქე ნაზი შარაშენიძე
შემოსვლის თარიღი − 2/12/2024
შემოსვლის არხი − კითხვარი (Google Drive)
− https://forms.gle/Jo4ruii5Rd9WciVcA
დოკუმენტი − საქართველოს ციფრული მმართველობის
2025-2030 წლების სტრატეგია
რეკომენდაცია №1 −
სტრატეგიაში ცნობიერების ამაღლება კამპანიის
გათვალისწინება
აისახა/აისახა ნაწილობრივ/ არ ასახულა − აისახა
მაკოორდინირებელი უწყების კომენტარი −
გათვალისწინებულია როგორც სტრატეგიის ნარატივში, ასევე სამოქმედო
გეგმაში აქტივობების სახით.
მოქალაქე ნაზი შარაშენიძე
შემოსვლის თარიღი − 2/12/2024
შემოსვლის არხი − კითხვარი (Google Drive)
− https://forms.gle/Jo4ruii5Rd9WciVcA
დოკუმენტი − საქართველოს ციფრული მმართველობის
სტრატეგიის 2025-2026 წწ. სამოქმედო გეგმა
რეკომენდაცია №1 − დეზინფორმაცია, ინფორმაციის
გადამოწმება...
აისახა/აისახა ნაწილობრივ/ არ ასახულა − არ
ასახულა
მაკოორდინირებელი უწყების კომენტარი − აღნიშნული
საკითხი რელევანტური იქნება კიბერუსაფრთხოების სტრატეგიისთვის.
საჯარო კონსულტაციების შედეგები
საჯარო კონსულტაციების ფარგლებში, მაკოორდინირებელი უწყების მიერ
გაანალიზდა სხვადასხვა სექტორის (საჯარო, კერძო, აკადემიური, მოქალაქეები)
მიერ, სხვადასხვა არხის საშუალებით (დოკუმენტბრუნვის ელექტრონული სისტემა
(დეს), კითხვარი (Google Drive) − https://forms.gle/Jo4ruii5Rd9WciVcA,
info@dga.gov.ge) გამოგზავნილი
რეკომენდაციები/ წინადადებები, რომელთა ჯამური რაოდენობა 39 რეკომენდაციას
შეადგენს. მათგან შესაბამის დოკუმენტებში 24 რეკომენდაცია აისახა სრულად, 8
რეკომენდაცია აისახა ნაწილობრივ, ხოლო 7 რეკომენდაციის ასახვა არ ჩაითვალა
მიზანშეწონილად შესაბამისი დასაბუთების მითითებით.
