საქართველოს ენერგეტიკის მინისტრის 2006 წლის 30 აგვისტოს №77 ბრძანებით დამტკიცებულ „ელექტროენერგიის (სიმძლავრის) ბაზრის წესებში“ ცვლილებებისა და დამატებების შეტანის შესახებ

საქართველოს ეკონომიკისა და მდგრადი განვითარების მინისტრის

2021 წლის 13 იანვარი

ქ. თბილისი

1. 4¹ მუხლის მე-9 პუნქტის შემდეგ დაემატოს მე-10  – მე-14 პუნქტები შემდეგი რედაქციით:

„10. იმ შემთხვევაში, თუ ამ მუხლის შესაბამისად საბითუმო ვაჭრობაში მონაწილედ რეგისტრირებული პირი, მისგან დამოუკიდებელი ობიექტური მიზეზ(ებ)ის გამო, ამ მუხლის შესაბამისად დადგენილი წესით რეგისტრაციიდან 90 კალენდარული დღის ვადაში ვერ დაასრულებს ელექტროსადგურის საცდელ გაშვებას ან/და კომპლექსურ გასინჯვას, აღნიშნულ პირს შეუძლია, მხოლოდ ერთხელ, გამოიყენოს ამ მუხლის „ა“ და „ბ“ ქვეპუნქტებით განსაზღვრული ერთ-ერთი უფლება:

ა) მოითხოვოს რეგისტრაციის პერიოდის გაგრძელება, რის თაობაზეც დასაბუთებული წერილით მიმართავს ელექტროენერგეტიკული ბაზრის ოპერატორს, ამ მუხლის მე-8 პუნქტით გათვალისწინებული 90 კალენდარული დღის გასვლამდე არანაკლებ 1 სამუშაო დღით ადრე;

ბ) ამ მუხლის მე-8 პუნქტით გათვალისწინებული 90 კალენდარული დღის გასვლის საფუძველზე რეგისტრაციის გაუქმების შემდეგ, ნებისმიერ დროს წარუდგინოს განაცხადი ელექტროენერგეტიკული ბაზრის ოპერატორს, საბითუმო ვაჭრობაში მონაწილედ რეგისტრაციისათვის ამ მუხლის პირველი პუნქტით დადგენილი წესით.

11. იმ შემთხვევაში, თუ ამ მუხლის შესაბამისად საბითუმო ვაჭრობაში მონაწილედ რეგისტრირებული პირი, გამოიყენებს :

ა) ამ მუხლის მე-10 პუნქტის „ა“ ქვეპუნქტით გათვალისწინებულ უფლებას, ელექტროენერგეტიკული ბაზრის ოპერატორი ელექტროსადგურის საცდელი გაშვების ან/და კომპლექსურ გასინჯვისთვის დადგენილ სარეგისტრაციო პერიოდს გააგრძელებს არაუმეტეს 30 კალენდარული დღის ოდენოებით.

ბ) ამ მუხლის მე-10 პუნქტის „ბ“ ქვეპუნქტით გათვალისწინებულ უფლებას, ელექტროენერგეტიკული ბაზრის ოპერატორი 3 სამუშაო დღის ვადაში ამოწმებს წარმოდგენილი დოკუმენტაციისა და ფაქტობრივი მდგომარეობის შესაბამისობას ამ წესების მოთხოვნებთან. წარმოდგენილი დოკუმენტაციის ამ წესების მოთხოვნებთან შეუსაბამობის შემთხვევაში, დოკუმენტაციის წარმოდგენიდან არაუგვიანეს 3 სამუშაო დღისა, წერილობითი ფორმით აცნობებს უარს საბითუმო ვაჭრობაში მოანწილედ რეგისტრაციის თაობაზე, ხოლო შესაბამისობის შემთხვევაში განახორციელებს პირის საბითუმო ვაჭრობაში მონაწილედ რეგისტრაციას არაუმეტეს 60 კალენდარული დღის ოდენობით;

12. ამ მუხლის მე-11 პუნქტის „ა“ და „ბ“ ქვეპუნქტების შესაბამისად საბითუმო ვაჭრობაში მონაწილედ რეგისტრირებულ პირს რეგისტრაცია გაუუქმდება ამ ქვეპუნქტებით განსაზღვრული ვადის გასვლის ან პირის იმავე ელექტროსადგურის ნაწილში წარმოების ლიცენზიატად ან მცირე სიმძლავრის ელექტროსადგურად – კვალიფიციურ საწარმოდ რეგისტრაციის შემთხვევაში, ამ გარემოებებიდან რომელიმეს დადგომის დღიდან.

13. ამ მუხლის მე-12 პუნქტის საფუძველზე რეგისტრაციის გაუქმების შემდეგ, ელექტროენერგეტიკული ბაზრის ოპერატორი ვალდებულია, პირის საბითუმო ვაჭრობაში მონაწილეთა რეესტრში რეგისტრაციის გაუქმების ჩანაწერის გაკეთებიდან არაუგვიანეს მომდევნო სამუშაო დღისა აცნობოს ამის შესახებ პირს, რომელსაც გაუუქმდა საბითუმო ვაჭრობაში მონაწილის რეგისტრაცია და დისპეტჩერიზაციის ლიცენზიატს, ასევე იმ კვალიფიციურ საწარმოს ან გადაცემის ლიცენზიატს, რომლის მფლობელობაში არსებულ ელექტრულ ქსელზეც არის მიერთებული პირი, რომელსაც გაუუქმდა საბითუმო ვაჭრობაში მონაწილედ რეგისტრაცია.

14. საბითუმო ვაჭრობაში მონაწილედ რეგისტრირებული პირი უფლებამოსილია, ამ  მუხლის მე-10 პუნქტის „ა“ და „ბ“ ქვეპუნქტებით განსაზღვრული უფლებებიდან ერთჯერადად ისარგებლოს მხოლოდ ერთ-ერთი უფლებით.“.