„მეფუტკრეობის მხარდაჭერის პროგრამის“ ფარგლებში ბენეფიციარების მიერ მიზნობრიობის შესრულების მონიტორინგის პირობების განსაზღვრის შესახებ

„მეფუტკრეობის მხარდაჭერის პროგრამის“ ფარგლებში ბენეფიციარების მიერ მიზნობრიობის შესრულების მონიტორინგის პირობები

მუხლი 1. მოქმედების სფერო

„მეფუტკრეობის მხარდაჭერის პროგრამის“ (შემდგომ – პროგრამა) ფარგლებში ბენეფიციარების მიერ მიზნობრიობის შესრულების მონიტორინგის პირობებით განისაზღვრება „მეფუტკრეობის მხარდაჭერის პროგრამის“ ფარგლებში ბენეფიციარის მიერ მოთხოვნილი სკის ტიპი და სკის პარამეტრი.

მუხლი 2. სკის ტიპები და პარამეტრები

ა) სკის ტიპებია:

ა.ა) ლანგსტროტ-რუტის სკა, სამი ძირითადი კორპუსით (10-ჩარჩოიანი ზომის) (სურათი №1) ან/და დადან-ბლატის სკა ორკორპუსიანი (10-ჩარჩოიანი ზომის) (სურათი №2):

ბ) სკის პარამეტრებია:

ბ.ა) ლანგსტროტ-რუტის სამ კორპუსიანი 10-ჩარჩოიანი (სურათი №1)

ბ.ბ) დადან-ბლატის ორკორპუსიანი 10-ჩარჩოიანი (სურათი №2)

პროგრამის ფარგლებში ბენეფიციარების მიერ მიზნობრიობის შესრულების მონიტორინგის პირობებისთვის საჭირო ორივე ტიპის სკის ძირითადი მახასიათებლებია კორპუსის გარე და შიდა ზომები: სიგრძე, სიგანე და სიმაღლე (ცდომილება დასაშვებია 2 მმ-ის ფარგლებში).

(სურათი №1)

ლანგსტროტ-რუტის სამკორპუსიანი 10-ჩარჩოიანი სკა

ლანგსტროტ-რუტის სკის კორპუსის შიდა ზომებია 450 X 380 X 240 მმ

სიგრძე – 450 მმ

სიგანე – 380 მმ

სიმაღლე – 240 მმ

ლანგსტროტ-რუტის სკის კორპუსის გარე ზომებია 500 X 430 X 240 მმ

სიგრძე – 500 მმ

სიგანე – 430 მმ

სიმაღლე – 240 მმ

(სურათი №2)

დადან-ბლატის ორკორპუსიანი 10-ჩარჩოიანი სკა

დადან-ბლატის სკის კორპუსის შიდა ზომებია 450 X 380 X 310 მ

სიგრძე – 450 მმ

სიგანე – 380 მმ

სიმაღლე – 310 მმ

დადან-ბლატის სკის კორპუსის გარე ზომებია 500 X 430 X 310 მმ

სიგრძე – 500 მმ

სიგანე – 430 მმ

სიმაღლე – 310 მმ

მუხლი 3. მონიტორინგის განმახორციელებელი და მისი ვალდებულებები

1. ბენეფიციარების მიერ მიზნობრიობის შესრულების მონიტორინგს განახორციელებს სსიპ – სურსათის ეროვნულ სააგენტო.

2. ბენეფიციარების რაოდენობის გათვალისწინებით, მონიტორინგის პროცესის შეუფერხებლად განხორციელების მიზნით, საჭიროების შემთხვევაში მონიტორინგის განხორციელების პროცესში უნდა ჩაერთოს ა(ა)იპ – სოფლის განვითარების სააგენტო.

3. მონიტორინგის განმახორციელებელი ვალდებულია:

ა) პროგრამის ფარგლებში ერთი და იმავე მწარმოებლისგან შესყიდული იდენტური ვიზუალის მქონე სკების არანაკლებ 10% შეამოწმოს და გაზომოს პარამეტრების შესაბამისად;

ა.ა) იმ შემთხვევაში, თუ 10% სკების შემოწმების დროს გამოვლინდა სკის პარამეტრების ცდომილება, მონიტორინგის განმახორციელებელი ვალდებულია შეამოწმოს პროგრამის ფარგლებში შესყიდული სკების სრული რაოდენობა და გაზომოს პარამეტრების შესაბამისად;

ბ) პროგრამის ფარგლებში შესყიდულ ყველა სკაზე შეამოწმოს მწარმოებლის მიერ მითითებული მაიდენტიფიცირებელი მონაცემები;

გ) მონიტორინგის განხორციელებისას უნდა დადასტურდეს განაცხადში მითითებული პროგრამაში მონაწილეობამდე ცხოველთა იდენტიფიკაციისა და მიკვლევადობის ეროვნულ სისტემაში (NAITS) არსებული ფუტკრის ოჯახების რაოდენობა.