„საკრებულოს დებულებაში ცვლილებებისა და დამატებების შეტანის შესახებ“

სახელმწიფო სარეგისტრაციო კოდი 010.250.040.35.160.000.042

თვითმმართველი ქალაქი რუსთავის საკრებულოს

დადგენილება №11

2010 წლის 21 ივლისი

ქ. რუსთავი

საკრებულოს დებულებაში ცვლილებებისა და დამატებების შეტანის შესახებ

„ადგილობრივი თვითმმართველობის შესახებ“ საქართველოს ორგანული კანონის 43-ე მუხლის მე-2 პუნქტის, „ნორმატიული აქტების შესახებ“ საქართველოს კანონის მე-20 მუხლის შესაბამისად,

თვითმმართველი ქალაქი რუსთავის საკრებულო ადგენს:

    მუხლი 1

„თვითმმართველი ქალაქი რუსთავის საკრებულოს დებულების დამტკიცების შესახებ“ თვითმმართველი ქალაქი რუსთავის საკრებულოს 2010 წლის 2 ივლისის №1 დადგენილებაში შევიდეს ცვლილებები და დამატებები:

1. მე-3 მუხლის მე-5 პუნქტს დაემატოს შემდეგი რედაქციის „ბ¹“ ქვეპუნქტი:

„ბ¹) განკარგულებით დაავალოს საკრებულოს თავმჯდომარეს განსაზღვროს პარტნიორის უფლებამოსილების უშუალო განმახორციელებელი ფიზიკური ან იურიდიული პირი (თვითმმართველი ერთეულის მიერ დაფუძნებული კერძო სამართლის სუბიექტების მიმართ)“.

2. მე-17 მუხლის მე-2 პუნქტს დაემატოს შემდეგი რედაქციის „შ¹“ ქვეპუნქტი:

„შ¹) თავისი ბრძანებით ახდენს დამფუძნებელი პარტნიორის უფლებამოსილების უშუალო განმხორციელებლის და მისი დავალების განსაზღვრას.“.

3. 107-ე მუხლის მე-7 პუნქტში შევიდეს ცვლილება და ჩამოყალიბდეს შემდეგი რედაქციით:

„7. საკრებულოს მიერ მიღებული სამართლებრივი აქტი აპარატის იურისტის ექსპერტიზის და აპარატის უფროსის ვიზირების შემდეგ ხელმოსაწერად გადაეცემა საკრებულოს თავმჯდომარეს.“.

4. 108-ე მუხლის პირველ პუნქტში შევიდეს ცვლილება და ჩამოყალიბდეს შემდეგი რედაქციით:

„1. საკრებულოს ნორმატიული აქტის პროექტი ქვეყნდება საკრებულოს ვებგვერდზე – www.rustavi.ge საკრებულოს აპარატში რეგისტრაციიდან 5 დღის ვადაში.“.

5. 136-ე მუხლის მე-2 პუნქტში შევიდეს ცვლილება და ჩამოყალიბდეს შემდეგი რედაქციით:

„2. საკრებულოს აპარატის უფლებამოსილება და მუშაობის ორგანიზება განისაზღვრება საკრებულოს აპარატის დებულებით, რომელსაც საკრებულოს თავმჯდომარის წარდგინებით ამტკიცებს საკრებულო.“.

    მუხლი 2

დადგენილება ძალაშია გამოქვეყნებისთანავე.   

საკრებულოს თავმჯდომარე კ. გურგენიძე