ყვარლის მუნიციპალიტეტის სიმბოლიკის (გერბის და დროშის) დამტკიცების შესახებ

ყვარლის მუნიციპალიტეტის საკრებულო ს

დადგენილება №21

2012 წლი ს 9 აგვისტო

ქ. ყვარელი       

ყვარლის მუნიციპალიტეტის სიმბოლიკის (გერბის და დროშის) დამტკიცების შესახებ

„ადგილობრივი თვითმმართველობის შესახებ“ საქართველოს ორგანული კანონის მე-8 მუხლის მე-2 პუნქტის თანახმად:

1. დამტკიცდეს საქართველოს პარლამენტთან არსებული ჰერალდიკის სახელმწიფო საბჭოსთან შეთანხმებული ყვარლის მუნიციპალიტეტის გერბის და დროშის გამოსახულებები:

ა) ყვარლის მუნიციპალიტეტის გერბის და დროშის გამოსახულებები, დანართი №1;

ბ)ყვარლის მუნიციპალიტეტის გერბის აღწერილობა, დანართი №2;

გ)ყვარლის მუნიციპალიტეტის დროშის აღწერილობა, დანართი №3 .

2. ყვარლის მუნიციპალიტეტის სიმბოლოების გამოყენება მოხდეს საქართველოს პრეზიდენტის ბრძანებულებით დადგენილი წესით .

3. დადგენილება ძალაშია გამოქვეყნებისთანავე.

საკრებულოს თავმჯდომარის მოვალეობის შემსრულებელი      ზ. ლომიძე

 

დანართი № 1

 

 

დანართი №2

ყვარლის მუნიციპალიტეტის გერბი

(აღწერილობა)

გერბის ფარი შუაზე ტეხილადაა გადაკვეთილი, ხოლო ზედა ნაწილი გაკვეთილია და იყოფა ორ ველად. I ნაწილი – ზურმუხტოვან ველზე ვერცხლის ორკოშკიანი გალავანი ღია კარიბჭით. კოშკებს შორის მოთავსებულია ოქროს გვირგვინი, ხოლო კარიბჭის ქვემოთ ოქროს ვაზი. II ნაწილი – ვერცხლის ველზე მეწამული ჯვარი. III ნაწილი - მეწამულ ველზე ვერცხლის ფრთოსანი ცხენი.

გერბის ფარს ზემოთ მოთავსებულია საქალაქო ვერცხლის გვირგვინი – სამკოშკიანი ქონგურებიანი გალავანი (ციხე-სიმაგრის ფორმის) ნახევრადღია კატარაქტიანი კარიბჭით.

ფარს ქვემოთ მოთავსებულია გერბის დევიზის ვერცხლ-მეწამული  ბაფთა, რომლის ვერცხლის ველზე შავად ჩაწერილია  დევიზი „ყვარელი“.

 

 

დანართი №3

ყვარლის მუნიციპალიტეტის დროშა

(აღწერილობა)

დროშის ქსოვილი ჰორიზონტალურად არის გაყოფილი ორ თანაბარ ნაწილად – მეწამულ და მწვანე ველებად, რომელთა შორის მარცხნიდან შეჭრილია თეთრი ფერის ტოლგვერდა სამკუთხედი, რომლის ცენტრში გამოსახულია მეწამული ჯვარი.

დროშის პროპორციაა 2:3.