ცხინვალის რეგიონის საქართველოს ხელისუფლების მიერ კონტროლირებად ტერიტორიაზე ჰუმანიტარული ტვირთის გადაზიდვის მოწესრიგების შესახებ

საქართველოს მთავრობის

განკარგულება №57

2005 წლის 17 მარტი

ქ. თბილისი

ცხინვალის რეგიონის საქართველოს ხელისუფლების მიერ კონტროლირებად ტერიტორიაზე ჰუმანიტარული ტვირთის გადაზიდვის მოწესრიგების შესახებ

არსებული საერთაშორისო შეთანხმებებისა და ქართულ-ოსური კონფლიქტის მოსაგვარებლად შერეული საკონტროლო კომისიის ფარგლებში მიღებული გადაწყვეტილებების შესაბამისად, ცხინვალის რეგიონის საქართველოს ხელისუფლების მიერ კონტროლირებად ტერიტორიაზე ჰუმანიტარული ტვირთის გადაზიდვის მოწესრიგების მიზნით:

1. ცხინვალის რეგიონის ტერიტორიაზე მშვიდობიანი მოსახლეობისათვის ჰუმანიტარული ტვირთის მიწოდება განხორციელდეს კონფლიქტების მოგვარების საკითხებში საქარ-თველოს სახელმწიფო მინისტრ გიორგი ხაინდრავასთან შეთანხმებით.

2. საქართველოს სახელმწიფო მინისტრის აპარატმა (გ. ხაინდრავა):

ა) უზრუნველყოს საქართველოს ფინანსთა სამინისტროსა და შინაგან საქმეთა სამინისტროს, აგრეთვე საქართველოს შესაბამის ადმინისტრაციულ-ტერიტორიულ ერთეულებში საქართველოს პრეზიდენტის სახელმწიფო რწმუნებულის აპარატის წინასწარი ინფორმირება (გადაზიდვამდე არა უგვიანეს 24 საათისა) რეგიონის მშვიდობიანი მოსახლეობისათვის გათვალისწინებული ტვირთის გადაზიდვის მარშრუტის, ოდენობისა და შემადგენლობის შესახებ, რაც ასევე მითითებულ ი უნდა იქნეს ტვირთის თანმხლებ საბუთებში (სასაქონლო ზედნადები და საქართველოს სახელმწიფო მინისტრის თანხმობა);

ბ) დადგენილი წესი აცნობოს შერეულ საკონტროლო კომისიაში წარმოდგენილ მხარეებს, შერეული სამშვიდობო ძალების სარდლობასა და კონფლიქტის გადაწყვეტის პროცესის მონაწილე საერთაშორისო ორგანიზაციებს;

გ) შერეული სამშვიდობო ძალების სარდლობის წინაშე დააყენოს საკითხი ჰუმანიტარული ტვირთისა და მისი თანმხლები პირების გადაადგილების უსაფრთხოების უზრუნველყოფის გარანტირების თაობაზე;

დ) შერეული საკონტროლო კომისიის წინაშე დასვას საკითხი სოციალურ-ეკონომიკური საკითხების განსახილველად სპეციალური სამუშაო ჯგუფის შექმნისა და მისი ყოველკვირეული შეხვედრების ორგანიზების თაობაზე.

3. საქართველოს ფინანსთა სამინისტრომ (ვ. ჩეჩელაშვილი) და შინაგან საქმეთა სამინისტრომ (ი. მერაბიშვილი):

ა) შიდა ქართლის სამხარეო სტრუქტურების მეშვეობით უზრუნველყონ ჰუმანიტარული ტვირთის ხელყოფისაგან დაცვა;

ბ) გაამკაცრონ კონტროლი და აღკვეთონ ნებისმიერი პირის მიერ ჰუმანიტარული ტვირთის (კერძოდ, ჰუმანიტარული დახმარების სტატუსის მქონე საიმპორტო საქონლის) გადაზიდვა, თუ ეს არ არის შეთანხმებული ამ განკარგულების პირველი და მეორე პუნქტებით გათვალისწინებული წესით;

გ) მაქსიმალურად შეუწყონ ხელი ჰუმანიტარული ტვირთების გადაადგილებას ცხინვალის რეგიონის დე ფაქტო ადმინისტრაციის მიერ დროებით კონტროლირებადი ოსური სოფლების მშვიდობიანი მოსახლეობისათვის;

დ) მაქსიმალურად შეუწყონ ხელი ჰუმანიტარული ტვირთის (კერძოდ, ჰუმანიტარული დახმარების სტატუსის მქონე საიმპორტო საქონლის) იმ გადამზიდავ პირთა (განურჩევლად ეროვნებისა) გადაადგილებას, რომლებიც არ არღვევენ კანონმდებლობით დადგენილ წესს;

ე) უზრუნველყონ შერეული საკონტროლო კომისიის ფარგლებში შექმნილ სოციალურ-ეკონომიკური საკითხების სამუშაო ჯგუფში თავიანთი რეგიონალური დაწესებულებების წარმომადგენელთა მონაწილეობა.

4. საქართველოს სახელმწიფო მინისტრმა კონფლიქტების მოგვარების საკითხებში საქართველოს შესაბამის ადმინისტრაციულ-ტერიტორიულ ერთეულებში საქართველოს პრეზიდენტის სახელმწიფო რწმუნებულის აპარატთან ერთად უზრუნველყოს მოსახლეობისათვის ობიექტური ინფორმაციის მიწოდება ცხინვალის რეგიონის ტერიტორიაზე ჰუმანიტარული ტვირთის მოძრაობის ხელშეწყობისათვის მიღებული გადაწყვეტილებების შესახებ.

5. განკარგულება ძალაშია ხელმოწერის დღიდან.

პრემიერ-მინისტრი ზ. ნოღაიდელი