შპს „თეგეტა მოტორსის“ საქმიანობის ხელშესაწყობად რიგ ღონისძიებათა განხორციელების თაობაზე

საქართველოს მთავრობის

განკარგულება №495

2015 წლის 12მარტი

ქ. თბილისი

შპს „თეგეტა მოტორსის“  საქმიანობის ხელშესაწყობად რიგ ღონისძიებათა განხორციელების თაობაზე

1. „საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონის მე-5 მუხლის „ი“ ქვეპუნქტის შესაბამისად, მიეცეს თანხმობა საქართველოს ეკონომიკისა და მდგრადი განვითარების სამინისტროს სისტემაში შემავალ სსიპ - სახელმწიფო ქონების ეროვნულ სააგენტოს, შპს „სახელმწიფო მომსახურების ბიუროსა“ (უფლებამონაცვლე -  სსიპ - სახელმწიფო ქონების ეროვნული სააგენტო) და შპს „თეგეტა მოტორსს“ შორის 2010 წლის 3 ნოემბერს გაფორმებულ უძრავი ქონების ნასყიდობის ხელშეკრულებაში შეტანილ იქნეს შემდეგი სახის ცვლილებები:

ა) ხელშეკრულებით გათვალისწინებულ საინვესტიციო ვალდებულებად (5.1 მუხლის „ა“ ქვეპუნქტი) განისაზღვროს 2015 წლის 31 დეკემბრამდე ქ. ქუთაისში, ახალგაზრდობის გამზირის №98ა და №98,    (ნაკვ. № 1-1-2)-ში მდებარე მიწის ნაკვეთზე (ს/კ № 03.06.25.213) პირადად ან/და მესამე პირ(ებ)ის მეშვეობით  არანაკლებ 500 000 (ხუთასი ათასი) ლარის ოდენობის ინვესტიციის განხორციელება;     

ბ)  ხელშეკრულებით გათვალისწინებულ საინვესტიციო ვალდებულებას დაემატოს შემდეგი შინაარსის ვალდებულებები:

ბ.ა) პირადად ან/და მესამე პირ(ებ)ის მეშვეობით, 2016 წლის 1 სექტემბრამდე, ქ. ქუთაისში, ნიკეას ქუჩის მე-9 ჩიხის №2ა-ში მდებარე უძრავ ქონებაზე (ს/კ №03.05.23.312) 500 000 (ხუთასი ათასი) ლარის ინვესტიციის განხორციელება (5.1 მუხლის „ე“ ქვეპუნქტი);

ბ.ბ) „ხელშეკრულების“ 5.1 მუხლის „ა“ და „ე“ ქვეპუქტებით დადგენილი ვალდებულების შესრულების ვადის ამოწურვიდან არა უგვიანეს 30 დღისა, აუდიტორული/საექსპერტო დასკვნის სსიპ - სახელმწიფო ქონების ეროვნული სააგენტოსთვის წარდგენა, რომელიც მომზადებული უნდა იყოს „საწარმოებისათვის აუდიტირებული ფინანსური ანგარიშგების განმახორციელებელ ან/და საექსპერტო და აუდიტორული დასკვნების გამცემ პირთა და სახელმწიფო საწარმოთა ნუსხის დამტკიცების შესახებ“ საქართველოს მთავრობის 2012 წლის 5 სექტემბრის №360 დადგენილებით განსაზღვრული ერთ-ერთი საექსპერტო ან/და აუდიტორული კომპანიის მიერ; აუდიტორული/საექსპერტო დასკვნა უნდა ადასტურებდეს ამავე  ვალდებულებების შესრულებას.“.

2. „სახელმწიფო ქონების შესახებ“ საქართველოს კანონის 49¹ მუხლის მე-5 პუნქტის საფუძველზე, შპს „თეგეტა მოტორსი“ გათავისუფლდეს მასზე ამ განკარგულების საფუძველზე, შესაბამისი ხელშეკრულების გაფორმებამდე  შპს „სახელმწიფო მომსახურების ბიუროსა“ (უფლებამონაცვლე - სსიპ - სახელმწიფო ქონების ეროვნული სააგენტო) და შპს „თეგეტა მოტორსს“ შორის 2010 წლის 3 ნოემბერს გაფორმებული ნასყიდობის ხელშეკრულების 5.1. მუხლის „ა“ ქვეპუნქტით განსაზღვრული ვალდებულების შეუსრულებლობისათვის, ამავე ხელშეკრულების 8.2 მუხლის საფუძველზე დაკისრებული/დასაკისრებელი პირგასამტეხლოს გადახდისგან იმ პირობით, რომ შპს „თეგეტა მოტორსი“ შეასრულებს შპს „სახელმწიფო მომსახურების ბიუროსა“  (უფლებამონაცვლე -  სსიპ - სახელმწიფო ქონების ეროვნული სააგენტო) და შპს „თეგეტა მოტორსს“  შორის 2010 წლის 3 ნოემბერს გაფორმებული უძრავი ქონების ნასყიდობის ხელშეკრულების 5.1 მუხლის „ა“ და „ე“ ქვეპუნქტებით  გათვალისწინებულ ვალდებულებებს.

3. შპს „სახელმწიფო მომსახურების ბიუროსა“  (უფლებამონაცვლე:  სსიპ - სახელმწიფო ქონების ეროვნული სააგენტო) და შპს „თეგეტა მოტორსს“ შორის 2010 წლის 3 ნოემბერს გაფორმებული უძრავი ქონების ნასყიდობის  ხელშეკრულებით ნაკისრი ვალდებულებების შესრულების, მათ შორის, ვალდებულებების შეუსრულებლობისათვის დაკისრებული პირგასამტეხლოს გადახდის უზრუნველყოფის მიზნით, შესაბამისი ცვლილების ხელშეკრულების გაფორმებამდე, შპს „თეგეტა მოტორსმა“ წარადგინოს 2017 წლის 1 იანვრამდე მოქმედი არანაკლებ 100 000 (ასი ათასი) ლარის ოდენობის  უპირობო და გამოუხმობი საბანკო გარანტია.

4. საქართველოს ეკონომიკისა და მდგრადი განვითარების სამინისტროს სისტემაში შემავალმა სსიპ - სახელმწიფო ქონების ეროვნულმა სააგენტომ, ამ განკარგულების შესრულების მიზნით, განახორციელოს კანონმდებლობით გათვალისწინებული შესაბამისი ღონისძიებები.

პრემიერ-მინისტრი                                         ი . ღარიბაშვილი