“საქართველოს თავდაცვის სამინისტროს დებულების დამტკიცების შესახებ” საქართველოს პრეზიდენტის 2004 წლის 5 აპრილის №119 ბრძანებულებაში ცვლილეის შეტანის შესახებ

საქართველოს პრეზიდენტის

ბრძანებულება №609

2004 წლის 25 დეკემბერი

ქ. თბილისი

„საქართველოს თავდაცვის სამინისტროს დებულების დამტკიცების შესახებ“ საქართველოს პრეზიდენტის 2004 წლის 5 აპრილის №119 ბრძანებულებაში ცვლილების შეტანის თაობაზე

1. შეტანილ იქნეს ცვლილება „საქართველოს თავდაცვის სამინისტროს დებულების დამტკიცების შესახებ“ საქართველოს პრეზიდენტის 2004 წლის 5 აპრილის №119 ბრძანებულებით (სსმ III, 2004წ., №38, მუხ. 308) დამტკიცებულ საქართველოს თავდაცვის სამინისტროს დებულებაში და დებულების მე-5 მუხლი ჩამოყალიბდეს შემდეგი რედაქციით:

     „მუხლი 5. სამინისტროს სტრუქტურული ქვედანაყოფები, მათი სტატუსი და ფუნქციები

1. სამინისტროს სტრუქტურული ქვედანაყოფებია:

ა) საქართველოს შეიარაღებული ძალების გენერალური შტაბი (შემდგომში – გენერალური შტაბი);

ბ) გენერალური ინსპექცია;

გ) სამინისტროს აპარატი;

დ) თავდაცვის პოლიტიკისა და ევროატლანტიკური ინტეგრაციის დეპარტამენტი;

ე) ფინანსების მართვის დეპარტამენტი;

ვ) სახელმწიფო შესყიდვების დეპარტამენტი.

2. სამინისტროს სტრუქტურული ქვედანაყოფების ერთობლიობა, გარდა საქართველოს შეიარაღებული ძალების გენერალური შტაბისა, ქმნის თავდაცვის სამინისტროს სამოქალაქო ოფისს (შემდგომში – ოფისი).

3. სამინისტროს სტრუქტურულ ქვედანაყოფებს აქვს შემდეგი ძირითადი ამოცანები:

ა) გენერალური შტაბი:

ა.ა) ხელმძღვანელობს საბრძოლო და სამობილიზაციო მომზადებას;

ა.ბ) ახორციელებს საქართველოს სამხედრო ძალების მართვას საომარი ან საგანგებო მდგომარეობის დროს;

ბ) გენერალური ინსპექცია ახორციელებს:

ბ.ა) სამინისტროს სტრუქტურული ქვედანაყოფების ფინანსურ კონტროლს;

ბ.ბ) სამინისტროს სისტემის ორგანოების ინსპექტირებასა და შემოწმებას კანონმდებლობით განსაზღვრული კომპეტენციის ფარგლებში;

ბ.გ) სამსახურებრივ მოკვლევასა და შემდგომ რეაგირებას სამინისტროს სამხედრო და საჯარო მოსამსახურეების მიერ ჩადენილ კანონდარღვევებზე;

გ) სამინისტროს აპარატი:

გ.ა) ორგანიზებას უწევს მინისტრის ყოველდღიურ საქმიანობას;

გ.ბ) უზრუნველყოფს სამინისტროს ურთიერთობას საზოგადოებასა და მასობრივი ინფორმაციის საშუალებებთან;

გ.გ) უზრუნველყოფს ოფისის ერთიან საქმისწარმოებას;

გ.დ) მართავს სამინისტროს არქივს;

გ.ე) სამართლებრივად უზრუნველყოფს სამინისტროს საქმიანობას;

გ.ვ) განსაზღვრავს შეიარაღებული ძალების აღმშენებლობის სამართლებრივი უზრუნველყოფის ძირითად მიმართულებებს, სრულყოფს ნორმატიულ ბაზას;

გ.ზ) ახორციელებს სამინისტროში მომზადებული სამართლებრივი აქტების ექსპერტიზას, ვიზირებასა და სისტემატიზაციას;

გ.თ) საქართველოს იუსტიციის სამინისტროს წარუდგენს თავდაცვის მინისტრის მიერ გამოცემულ ნორმატიული ხასიათის აქტებს სახელმწიფო რეესტრში რეგისტრაციისათვის;

დ) თავდაცვის პოლიტიკისა და ევროატლანტიკური ინტეგრაციის დეპარტამენტი:

დ.ა) წარმართავს სამინისტროს საერთაშორისო ურთიერთობებს;

დ.ბ) მონაწილეობს საერთაშორისო ხელშეკრულებების პროექტების მომზადებაში;

დ.გ) უზრუნველყოფს სამინისტროს მიერ ნატოსთან ინტეგრაციის პროცესის კოორდინირებას;

დ.დ) განსაზღვრავს მოკლე, საშუალო და გრძელვადიან მოთხოვნებს ეროვნული სამხედრო სტრატეგიით დასახული მიზნების შესრულებისათვის და შეიმუშავებს თანამიმდევრულ გეგმებს განსაზღვრული მოთხოვნების უზრუნველსაყოფად;

დ.ე) განსაზღვრავს თავდაცვის სტრატეგიას და მონაწილეობს ეროვნული უშიშროების კონცეფციის შემუშავებაში;

დ.ვ) აყალიბებს სამინისტროს ამოცანებს, რეფორმების მოკლე, საშუალო და გრძელვადიან გეგმებს;

დ.ზ) ხელს უწყობს საქართველოს შეიარაღებული ძალების პროგრამების განხორციელებას;

ე) ფინანსების მართვის დეპარტამენტი:

ე.ა) შეისწავლის სამინისტროს მიერ გასატარებელი საფინანსო პოლიტიკის ძირითად მიმართულებებს და შეიმუშავებს სამინისტროს საფინანსო პოლიტიკას;

ე.ბ) ახორციელებს საერთაშორისო პროგრამების ფინანსურ დაგეგმვასა და შესრულებას;

ე.გ) ახორციელებს დამტკიცებული ბიუჯეტის მიზნობრივ ხარჯვასა და შესრულების ანალიზს;

ე.დ) პასუხისმგებელია სამინისტროს სისიტემაში ბუღალტრული აღრიცხვის მოწესრიგებისა და ფინანსური დისციპლინის განმტკიცებისათვის;

ე.ე) თავდაცვის სამინისტროს ოფისისა და გენერალური შტაბის შესაბამისი მოთხოვნების საფუძველზე შეიმუშავებს თავდაცვის ბიუჯეტის პროექტს;

ვ) სახელმწიფო შესყიდვების დეპარტამენტი:

ვ.ა) ახორციელებს საქონლის (მათ შორის სამხედრო აღჭურვილობის) მომსახურებისა და სამუშაოების შესყიდვას სამინისტროს საჭიროებისათვის;

ვ.ბ) ახორციელებს შესყიდული საქონლის (მათ შორის სამხედრო აღჭურვილობის) მომსახურების, სამუშაოების ხარისხის და საკონტრაქტო პირობების შესრულების კონტროლს.”.

2. ბრძანებულება ძალაშია გამოქვეყნებისთანავე.

მ. სააკაშვილი