„აზიური ფაროსანას წინააღმდეგ გასატარებელი ღონისძიებების შესახებ“ საქართველოს მთავრობის 2017 წლის 24 მარტის №588 განკარგულებაში ცვლილების შეტანის თაობაზე

საქართველოს მთავრობის

განკარგულება №1897

2017 წლის 7 სექტემბერი

ქ. თბილისი

„აზიური ფაროსანას წინააღმდეგ გასატარებელი ღონისძიებების შესახებ“ საქართველოს მთავრობის 2017 წლის 24 მარტის №588 განკარგულებაში ცვლილების შეტანის თაობაზე

საქართველოს ზოგადი ადმინისტრაციული კოდექსის 63-ე მუხლის შესაბამისად, „აზიური ფაროსანას წინააღმდეგ გასატარებელი ღონისძიებების შესახებ“ საქართველოს მთავრობის 2017 წლის 24 მარტის №588 განკარგულებაში შეტანილ იქნეს ცვლილება და:

1. პირველი პუნქტის:

ა) „ბ“ ქვეპუნქტი ჩამოყალიბდეს შემდეგი რედაქციით:

„ბ) საქართველოს სოფლის მეურნეობის სამინისტროს „საქართველოს 2017 წლის სახელმწიფო ბიუჯეტის შესახებ“ საქართველოს კანონით მისთვის გათვალისწინებული ასიგნებებიდან 16 190 576 (თექვსმეტი მილიონ ას ოთხმოცდაათი ათას ხუთას სამოცდათექვსმეტი) ლარის მიმართვა ქვეპროგრამაში – „აზიური ფაროსანას წინააღმდეგ გასატარებელი ღონისძიებები;“;

ბ) „გ.ზ“ ქვეპუნქტი ჩამოყალიბდეს შემდეგი რედაქციით:

„გ.ზ) მაღალი წარმადობის აეროზოლური გენერატორისა და საავიაციო საშუალებით მოფრქვევა-შეწამვლის მომსახურებების შესყიდვა;“;

გ) „გ.ზ“ ქვეპუნქტის შემდეგ დაემატოს შემდეგი შინაარსის „გ.თ“ ქვეპუნქტი:

„გ.თ) 230 000 ლიტრი ბიფენტრინის შემცველი ინსექტიციდისა და ფერომონიანი საჭერების შესყიდვა და მუნიციპალიტეტების, მათ შორის, ამ პუნქტის „გ.ა“ ქვეპუნქტით გათვალისწინებული მუნიციპალიტეტების, აჭარის ა/რ-ისა და აფხაზეთის ა/რ-ის მთავრობების მოთხოვნის საფუძველზე, მათთვის საქართველოს კანონმდებლობით დადგენილი წესით გადაცემა, მოსახლეობისთვის დარიგების მიზნით.“.

2. დაემატოს შემდეგი შინაარსის 2² პუნქტი:

„2². ეთხოვოთ ამ განკარგულებით გათვალისწინებულ მუნიციპალიტეტებსა და აჭარის ა/რ-ისა და აფხაზეთის ა/რ-ის მთავრობებს, მათთვის ამავე განკარულების პირველი პუნქტის „გ.თ“ ქვეპუნქტის ფარგლებში გადაცემული ბიფენტრინის შემცველი ინსექტიციდისა და ფერომონიანი საჭერების მოსახლეობისთვის დარიგება.“.

3. დაემატოს შემდეგი შინაარსის 3¹-3⁴ პუნქტები:

„3¹. დაევალოს სსიპ – სურსათის ეროვნულ სააგენტოს, აზიური ფაროსანას წინააღმდეგ გასატარებელი ღონისძიებების ორგანიზებულად წარმართვის მიზნით, შექმნას სამუშაო ჯგუფი საქართველოს სოფლის მეურნეობის სამინისტროს, საქართველოს შინაგან საქმეთა სამინისტროს, საქართველოს რეგიონული განვითარებისა და ინფრასტრუქტურის სამინისტროსა და სსიპ – ეროვნული სატყეო სააგენტოს წარმომადგენელთა და იმერეთის, გურიის, სამეგრელოსა და ზემო სვანეთის რეგიონებში სახელმწიფო რწმუნებულების – გუბერნატორების ადმინისტრაციის წარმომადგენელთა მონაწილეობით.

3². დაევალოთ საქართველოს სოფლის მეურნეობის სამინისტროს, საქართველოს შინაგან საქმეთა სამინისტროს, საქართველოს რეგიონული განვითარებისა და ინფრასტრუქტურის სამინისტროს, სსიპ – ეროვნულ სატყეო სააგენტოსა და იმერეთის, გურიის, სამეგრელოსა და ზემო სვანეთის რეგიონებში სახელმწიფო რწმუნებულებს – გუბერნატორებს ამ განკარგულების 3¹ პუნქტით გათვალისწინებულ სამუშაო ჯგუფში მონაწილეობის მიღების მიზნით კანდიდატურების წარდგენა სააგენტოსთვის.

3³. ეთხოვოთ ამ განკარგულებით გათვალისწინებულ მუნიციპალიტეტებს, უზრუნველყონ ამ განკარგულების 3¹ პუნქტით გათვალისწინებულ სამუშაო ჯგუფში მონაწილეობის მიღების მიზნით სააგენტოსთვის კანდიდატურების წარდგენა და კომპეტენციის ფარგლებში აზიური ფაროსანას წინააღმდეგ გასატარებელი ღონისძიებების განხორციელება.

3⁴. დაევალოს საქართველოს შინაგან საქმეთა სამინისტროს, აზიური ფაროსანას წინააღმდეგ გასატარებელი ღონისძიებების მიმდინარეობისას უზრუნველყოს წესრიგის დაცვა და უსაფრთხოება.“.

 

 

პრემიერ-მინისტრი                                                                      გიორგი კვირიკაშვილი