„საქართველოს თავდაცვის სამინისტროს უწყებრივი მედლისა და სამკერდე ნიშნის ნიმუშების დამტკიცების შესახებ“ საქართველოს თავდაცვის მინისტრის 2018 წლის 29 ივნისის №60 ბრძანებაში ცვლილების შეტანის თაობაზე

საქართველოს თავდაცვის მინისტრის

2018 წლის 13 დეკემბერი

ქ. თბილისი

1. ბრძანების სათაური ჩამოყალიბდეს შემდეგი რედაქციით:

„უწყებრივი მედლისა და სამკერდე ნიშნის ნიმუშების და მათი გაცემის წესის დამტკიცების შესახებ“.

2. ბრძანების პრეამბულა ჩამოყალიბდეს შემდეგი რედაქციით:

„ნორმატიული აქტების შესახებ” საქართველოს კანონის 25-ე მუხლის პირველი პუნქტის „ბ“ ქვეპუნქტისა და „საქართველოს თავდაცვის სამინისტროს დებულების დამტკიცების შესახებ” საქართველოს მთავრობის 2018 წლის 12 დეკემბრის №580 დადგენილებით დამტკიცებული დებულების მე-3 მუხლის მე-4 პუნქტის „ფ.გ“ ქვეპუნქტის  შესაბამისად, ვბრძანებ:“.

3. ბრძანებით დამტკიცებული №1 დანართის „ნიმუში 14-ის“ :

ა) პირველი პუნქტი ჩამოყალიბდეს შემდეგი რედაქციით:

„1. მედლით „თეთრი გიორგი“ ჯილდოვდებიან,  საქართველოს  თავდაცვის ძალების ეროვნული გვარდიის მოქმედი და ყოფილი ხელმძღვანელი პირები (მეთაური/სარდალი/უფროსი), მოქმედი ოფიცრები, სერჟანტები და კაპრალები, რომლებმაც იმსახურეს ეროვნულ გვარდიაში 3 ან მეტი წელი (გამონაკლის შემთხვევაში წელთა ნამსახურების გათვალისწინების გარეშე) და განსაკუთრებული წვლილი შეიტანეს, ეროვნული გვარდიის განვითარების, აღმშენებლობის, საბრძოლო მომზადებისა და საბრძოლო მზადყოფნის ამაღლების საკითხებში.“;

ბ) მე-5 პუნქტი ჩამოყალიბდეს შემდეგი რედაქციით:

„5. მედლით „თეთრი გიორგი“ საქართველოს თავდაცვის ძალების ეროვნული გვარდიის მოქმედ და ყოფილ ხელმძღვანელ პირებს (მეთაური/სარდალი/უფროსი), მოქმედ ოფიცრებს, სერჟანტებს და კაპრალებს აჯილდოებს საქართველოს თავდაცვის მინისტრი.“.

4. ბრძანებით დამტკიცებული №3 დანართის №2 პლანშეტის მე-2 პუნქტის „ა“ ქვეპუნქტი ჩამოყალიბდეს შემდეგი რედაქციით:

„ა) ყოველდღიური და სააღლუმე ფორმის „ღირსეული გვარდიელის“ სამკერდე  ნიშანზე (პლანშეტი №2/1) გამოსახულია „თეთრი გიორგი“. სამკერდე ნიშანი გადაეცემა საქართველოს თავდაცვის ძალების ეროვნული გვარდიის მოსამსახურეებსა და ეროვნული გვარდიის ყოფილ სამხედრო მოსამსახურეებს, აგრეთვე შესაბამისი უცხო ქვეყნის თავდაცვის სამინისტროს თანხმობით, საერთაშორისო ორგანიზაციებისა და პარტნიორი უცხო ქვეყნის წარმომადგენლებს, დადგენილი წესით გაცემულ „ღირსეული გვარდიელის სიგელთან“  ერთად. სამკერდე  ნიშანი არის თითბერისგან ჩამოსხმული ერთ ფერში, 3D განზომილებაში. სამკერდე ნიშნის კანტი, ყველა სახის  წარწერა და „თეთრი გიორგის“ გამოსახულება შესრულებულია ოქროსფერში, კანტში არსებული სივრცე წითელ ფერში. სამკერდე ნიშანს უკანა მხარეს არ აქვს გამოკვეთილი კონტურები და დატანილია სპეციალური სამაგრები. ზომები: სამკერდე ნიშნის სიგრძეა – 35,8 მმ, ხოლო სიგანე – 33 მმ;“.