„საქართველოს ტყის აღრიცხვის სისტემის, კატეგორიზაციისა და მონიტორინგის წესის შესახებ დებულების დამტკიცების თაობაზე“ საქართველოს მთავრობის 2021 წლის 25 აგვისტოს №427 დადგენილებაში ცვლილების შეტანის შესახებ

1. მე-3 მუხლს „ჰ¹²“ ქვეპუნქტის შემდგომ დაემატოს შემდეგი შინაარსის „ჰ¹³“ ქვეპუნქტი:

„ჰ¹³) ბუჩქნარი − ტყის მიწის ტერიტორია, სადაც ბუჩქების ვარჯის პროექცია შეადგენს ფართობის 30%-ს და მეტს და  ხეთა დგომის სიმჭიდროვე ვერ აღწევს 0.1 სიხშირეს.“.

2. მე-14 მუხლის პირველი პუნქტი ჩამოყალიბდეს შემდეგი რედაქციით:

„1. ტყეთმოწყობის ღონისძიებები მოიცავს შემდეგ ეტაპებს:

ა) მოსამზადებელი ეტაპი მოიცავს საკვლევი ობიექტის საკვარტალე ქსელის შემუშავებას, ფართობების დეშიფრირებას, ტყის შიდასამეურნეო ორგანიზებას და შესაბამისი ტერიტორიებისთვის კარტოგრაფიული მასალების მომზადებას;

ბ) საველე სამუშაოების ეტაპი მოიცავს საკვლევ ობიექტზე საველე პირობებში ტყის აღრიცხვის ღონისძიებების ჩატარებას;

გ) შეთანხმების ეტაპი მოიცავს ტყის აღრიცხვის სამუშაოების შედეგად დაზუსტებული სახელმწიფო ტყის საზღვრებისა და გამოვლენილი ფართობების სამინისტროს გავლით შეთანხმებას, საქართველოს ეკონომიკისა და მდგრადი განვითარების სამინისტროსა და  ადგილობრივ მუნიციპალიტეტებთან;

დ) კამერალური სამუშაოების ეტაპი მოიცავს მოსამზადებელი და საველე სამუშაოების შედეგად მოპოვებული მონაცემების დამუშავებას სპეციალური კომპიუტერული პროგრამით და მის საფუძველზე ტყის მართვის გეგმის მომზადებას ამ პუნქტის „გ“ ქვეპუნქტით შეთანხმებულ ფართობებზე.“.

3. 30-ე მუხლი ჩამოყალიბდეს შემდეგი რედაქციით:

„მუხლი 30. ტყის მართვის გეგმის დამტკიცება

1. სახელმწიფო ტყის მართვის ორგანო/კერძო მესაკუთრე ტყის მართვის გეგმის პროექტს დასამტკიცებლად წარუდგენს სამინისტროს. ავტონომიური რესპუბლიკის ტერიტორიაზე არსებული სახელმწიფო ტყის მართვის ორგანოს შემთხვევაში − აჭარის ავტონომიური რესპუბლიკის მთავრობის საქვეუწყებო დაწესებულების − გარემოს დაცვისა და ბუნებრივი რესურსების სამმართველოს უფროსს, ხოლო მუნიციპალური ტყის მართვის ორგანოს შემთხვევაში − შესაბამის მუნიციპალურ ორგანოს.

2. ტყის მართვის გეგმის დამტკიცებაზე უფლებამოსილი პირი იღებს გადაწყვეტილებას ტყის მართვის გეგმის დამტკიცების შესახებ ან შესაბამისი დასაბუთებული შენიშვნებით უკან უბრუნებს ტყის მართვის შესაბამის ორგანოს. 

3. ტყის მართვის გეგმა მტკიცდება ამ წესის მე-14 მუხლის პირველი პუნქტის „გ“ ქვეპუნქტით შეთანხმებული ფართობების მდგომარეობით, საქართველოს ზოგადი ადმინისტრაციული კოდექსით დადგენილი საჯარო ადმინისტრაციული წარმოების წესით.

4. შეთანხმებული ფართობის ცვლილება არ იწვევს ტყის მართვის გეგმის პროექტისა და დამტკიცებული ტყის მართვის გეგმების ცვლილებას.“.