საქართველოს საგარეო საქმეთა სამინისტროს უწყებრივი ჯილდოების ნიმუშების, დაჯილდოების წესისა და პირობების დამტკიცების შესახებ

დანართი N2

საქართველოს საგარეო საქმეთა სამინისტროს უწყებრივი ჯილდოებით დაჯილდოების

წესი და პირობები

მუხლი 1.

1. ეს წესი განსაზღვრავს საქართველოს საგარეო საქმეთა სამინისტროს (შემდგომში – სამინისტრო) უწყებრივი ჯილდოებით (შემდგომში – უწყებრივი ჯილდო) დაჯილდოების პროცედურებსა და პირობებს.

2. სამინისტროს უწყებრივი ჯილდოებია:

ა) სულხან-საბა ორბელიანის სახელობის უწყებრივი ჯილდო – სულხან-საბა ორბელიანის სახელობის მედალი;

ბ) საქართველოს საგარეო საქმეთა სამინისტროს მადლობის სიგელი;

გ) აკაკი ჩხენკელის სახელობის უწყებრივი ჯილდო – აკაკი ჩხენკელის სახელობის მედალი.

მუხლი 2.

უწყებრივი ჯილდოთი დაჯილდოების მიზანია   საქართველოს საგარეო ურთიერთობების განვითარებასა და საერთაშორისო ასპარეზზე საქართველოს ინტერესების დაცვაში შეტანილი წვლილის, სამსახურის განვითარებაში შეტანილი წვლილის/ღვაწლის და ზოგადად განსაკუთრებული დამსახურების აღიარება-დაფასება, თანამშრომელთა წახალისება, მათი მოტივაციის გაძლიერება, მიღწეული შედეგების აღიარება-დაფასება და შესრულების ხარისხის გაუმჯობესება.

მუხლი 3.

1. ამ წესის პირველი მუხლის მე-2 პუნქტის „ა“ ქვეპუნქტით გათვალისწინებული უწყებრივი ჯილდოთი ჯილდოვდებიან სამინისტროს მოქმედი და ყოფილი თანამშრომლები,  საქართველოს  და  უცხო  ქვეყნის მოქალაქეები,  მოქალაქეობის არმქონე პირები ერთ-ერთი შემდეგი პირობის არსებობის შემთხვევაში:

ა) საქართველოს საერთაშორისო ურთიერთობების განვითარებაში შეტანილი განსაკუთრებული წვლილისა და ქვეყნის სახელმწიფოებრივი ინტერესების დაცვის საქმეში მიღწეული  მნიშვნელოვანი წარმატებისთვის;

ბ) საქართველოს დიპლომატიური სამსახურის განვითარებაში შეტანილი წვლილის/ღვაწლის ან სამინისტროს წინაშე გაწეული განსაკუთრებული დამსახურებისათვის;

გ) სამინისტროში  ხანგრძლივი და კეთილსინდისიერი სამსახურისათვის;

დ)  საერთაშორისო  ასპარეზზე  ორმხრივ  და  მრავალმხრივ  ფორმატებში საქართველოს    მხარდაჭერის,    საქართველოსთან    მტკიცე    მეგობრული    და პარტნიორული ურთიერთობების დამყარებისა და განმტკიცების, საქართველოს ინტერესების დაცვისა და ქვეყნის განვითარების პროცესში მხარდაჭერისათვის.

2. ამ წესის პირველი მუხლის მე-2 პუნქტის ,,ბ“ ქვეპუნქტით გათვალისწინებული უწყებრივი ჯილდოთი ჯილდოვდებიან უცხო ქვეყნის მოქალაქეები, რომლებმაც თავი გამოიჩინეს, განსაკუთრებული ღვაწლი გაწიეს და მნიშვნელოვანი წვლილი შეიტანეს საქართველოს საგარეო-პოლიტიკური ინტერესების გათვალისწინებით, უცხო ქვეყნებთან მჭიდრო მეგობრული ურთიერთობებისა და თანამშრომლობის განვითარების, მათ შორის საქართველოს ცნობადობის ამაღლების, ისტორიის, კულტურისა და ტრადიციების პოპულარიზაციის ხელშეწყობის, ასევე საქართველოს მოქალაქეების ინტერესების დაცვის და ჰუმანიტარული დახმარების საქმეში.

3. ამ წესის პირველი მუხლის მე-2 პუნქტის „გ“ ქვეპუნქტით გათვალისწინებული უწყებრივი ჯილდოთი ჯილდოვდებიან სამინისტროს მოქმედი და ყოფილი თანამშრომლები, ერთ-ერთი შემდეგი პირობის არსებობის შემთხვევაში:

ა) საქართველოს დიპლომატიური სამსახურის გამართულად ფუნქციონირებაში შეტანილი წვლილისათვის;

ბ) საქართველოს საზღვარგარეთ საუკეთესო კუთხით წარმოჩენასა და უცხო ქვეყნის სახელმწიფოებთან/საერთაშორისო ორგანიზაციებთან ურთიერთობების გაღრმავებაში შეტანილი წვლილისათვის.

მუხლი 4.

1. სულხან-საბა ორბელიანის სახელობის უწყებრივ ჯილდოსთან ერთად, დაჯილდოებულ პირს გადაეცემა:

ა) ქართულენოვანი სერტიფიკატი და შესაბამისი ერთდროული ფულადი გასაცემელი 2000 ლარი–საქართველოს მოქალაქეს;

ბ) ინგლისურენოვანი სერტიფიკატი და შესაბამისი ერთდროული ფულადი გასაცემელი 2000 ლარი – უცხო ქვეყნის მოქალაქეს/მოქალაქეობის არმქონე პირს.

2. საქართველოს საგარეო საქმეთა სამინისტროს მადლობის სიგელით დაჯილდოებულ პირს გადაეცემა სიგელი.

3. აკაკი ჩხენკელის სახელობის უწყებრივ ჯილდოსთან ერთად, სამინისტროს დაჯილდოებულ თანამშრომელს/ყოფილ თანამშრომელს გადაეცემა:

ა) ქართულენოვანი სერტიფიკატი და შესაბამისი ერთდროული ფულადი გასაცემელი 1000 ლარი–საქართველოს მოქალაქეს;

ბ) ინგლისურენოვანი სერტიფიკატი და შესაბამისი ერთდროული ფულადი გასაცემელი 1000 ლარი უცხო ქვეყნის მოქალაქეს/მოქალაქეობის არმქონე პირს.

4.  პირის    უწყებრივი    ჯილდოთი    დაჯილდოება    შესაძლებელია    სიკვდილის შემდეგაც.

5. სიკვდილის შემდეგ პირის დაჯილდოების შემთხვევაში, უწყებრივი ჯილდო და შესაბამისი ერთდროული ფულადი გასაცემელი ეძლევა დაჯილდოებული პირის მემკვიდრეს (არსებობის შემთხვევაში) საქართველოს სამოქალაქო კოდექსით დადგენილი წესით.

6. სიკვდილის შემდეგ დაჯილდოებული პირის მემკვიდრეთა თანხმობით, უწყებრივი ჯილდო შეიძლება გადაეცეს სამინისტროს.

მუხლი 5.

1. გადაწყვეტილებას უწყებრივი ჯილდოთი პირის დაჯილდოების შესახებ იღებს მინისტრი ინდივიდუალური ადმინისტრაციულ-სამართლებრივი აქტით.

2. სულხან-საბა ორბელიანის სახელობის/აკაკი ჩხენკელის სახელობის უწყებრივი ჯილდოთი დაჯილდოების მიზნით, მინისტრისათვის კანდიდატურების წარსადგენად, იქმნება შესაბამისი კომისია მინისტრის პირველი მოადგილისა და მინისტრის მოადგილეების შემადგენლობით.

3. სულხან-საბა ორბელიანის სახელობის/აკაკი ჩხენკელის სახელობის უწყებრივი ჯილდოთი დასაჯილდოებლად წარსადგენ პირთა კანდიდატურები კომისიას წარედგინება მისი წევრების – მინისტრის პირველი მოადგილისა და მოადგილეების მიერ, ამ ბრძანების დანართი N3-ის შესაბამისად.

4. საქართველოს საგარეო საქმეთა სამინისტროს მადლობის სიგელით დასაჯილდოებელ პირთა კანდიდატურები მინისტრს წარედგინება კურატორი მინისტრის მოადგილის მიერ, ამ ბრძანების დანართი N3-ის შესაბამისად.

5. მინისტრი უფლებამოსილია პირის დაჯილდოების შესახებ გადაწყვეტილება მიიღოს კომისიის წარდგინების გარეშე.

მუხლი 6.

1. კალენდარული წლის განმავლობაში, სულხან-საბა ორბელიანის სახელობის უწყებრივი ჯილდოთი, დასაშვებია არაუმეტეს 3 პირის დაჯილდოება.

2. კალენდარული წლის განმავლობაში, აკაკი ჩხენკელის სახელობის უწყებრივი ჯილდოთი, დასაშვებია არაუმეტეს 8 პირის დაჯილდოება.

3. გასაკუთრებულ შემთხვევაში, მინისტრის გადაწყვეტილებით, შესაძლებელია დადგინდეს ამ მუხლის პირველი და მეორე პუნქტებისაგან განსხვავებული წესი.

მუხლი 7.

1. დაჯილდოებულ პირს უწყებრივი ჯილდო შესაძლებელია გადაეცეს საზეიმო ვითარებაში, მათ შორის, საიუბილეო თარიღთან დაკავშირებით ან სამინისტროს მიერ დაგეგმილი რაიმე ღონისძიების ფარგლებში.

2. დაჯილდოებული პირის არყოფნის შემთხვევაში, უწყებრივი ჯილდო გადაეცემა მის მიერ/სამინისტროს მიერ განსაზღვრულ სხვა პირს.