მუხლი 4. აკადემიის ავტონომიურობა

1. აკადემია არის ავტონომიური უფლებების მქონე საზღვაო პროფილის უმაღლესი საგანმანათლებლო დაწესებულება, რომელიც მოქმედებს საქართველოს მოქმედი კანონმდებლობის, საერთაშორისო კონვენციებისა და ამ წესდების საფუძველზე.

2. აკადემიის ავტონომიური საქმიანობის სფეროს განეკუთვნება:

ა) ფაკულტეტების ჩამოყალიბება, მათი სასწავლო და შემოქმედებითი საქმიანობის ძირითადი მიმართულებების განსაზღვრა;

ბ) წესდების შემუშავება, აკადემიის შინაგანაწესის, ეთიკისა და დისციპლინური პასუხისმგებლობის საფუძვლებისა და წესის დამტკიცება;

გ) თავისი საქმიანობის მიზნებისა და ამოცანების განსაზღვრა;

დ) ერთიანი ეროვნული გამოცდის ცალკეული კომპონენტებისათვის ძირითადი ერთეულების მიერ წარმოდგენილი კოეფიციენტების დამტკიცება;

ე) აკადემიის მართვის ორგანოებისა და აკადემიურ თანამდებობის პირთა არჩევა;

ვ) აკადემიის ორგანიზაციული და სტრუქტურული ერთეულების ჩამოყალიბება და მართვა;

ზ) ერთობლივ საგანმანათლებლო პროგრამებში მონაწილეობა, საქართველოს ან სხვა ქვეყნების სასწავლო და სამეცნიერო ორგანიზაციებთან პირდაპირი კონტაქტების დამყარება;

თ) ხელშეკრულებების საფუძველზე სპეციალისტთა მომზადება;

ი) სასწავლო მიზნების განსახორციელებლად გარეშე ორგანიზაციებიდან ან სხვა სასწავლებლებიდან სპეციალისტების მოწვევა ხელშეკრულებით;

კ) აკადემიის მიზნებისა და ამოცანების შესაბამისად თავისი საფინანსო-ეკონომიკური საქმიანობის განსაზღვრა, თანამდებობრივ სარგოებზე დანამატების დადგენა, თანამშრომელთა მატერიალური წახალისების, პრემიებისა და სახელობითი სტიპენდიების დაწესების საკითხის გადაწყვეტა;

ლ) საგანმანათლებლო პროგრამების შესაბამისად სახელობო, დიპლომირებული სპეციალისტების, ბაკალავრების, მაგისტრებისა და დოქტორანტების მომზადება;

მ) კანონმდებლობითა და ამ წესდებით დადგენილი წესით ქონებისა და ფინანსური სახსრების განკარგვა, მის გამგებლობას მიკუთვნებული სხვა საკითხების გადაწყვეტა.

3. სხვა საქმიანობა, რომელიც არ ეწინააღმდეგება საქართველოს მოქმედ კანონმდებლობას.