სისტემის ორგანიზატორი – ელექტრონულ-ტექნოლოგიური სისტემის მესაკუთრე (საქართველოს ეროვნული ბანკი).
ანგარიშსწორების სისტემის (RTGS) მონაწილე (მომხმარებელი) – ნებისმიერი საფინანსო-საკრედიტო დაწესებულება, რომელსაც აქვს საკორესპონდენტო, ანგარიშსწორებისა და სხვა ანგარიში საქართველოს საბანკო დაწესებულებაში (მის ფილიალში), არის ქვეყნის ტერიტორიაზე ანგარიშსწორების სუბიექტი და აკმაყოფილებს მოქმედი ელექტრონულ-ტექნოლოგიური სისტემის მოთხოვნებს.
დროის რეალურ რეჟიმში ანგარიშსწორების სისტემა (RTGS) – ფულადი სახსრების მიმოქცევის ორგანიზაციული ფორმების, პროცედურების, ტექნოლოგიურ-ფუნქციური და პროგრამულ-ტექნიკური საშუალებების ერთიანი კომპლექსი.
ელექტრონული საბუთი – ქაღალდის საბუთის ელექტრონული ასლი, წარმოადგენს საგადამხდელო ურთიერთობის სუბიექტებს შორის ოპერაციათა წარმოების საფუძველს, აქვს ბეჭდით და ხელმოწერებით დამოწმებული ქაღალდის საგადახდო საბუთების ტოლფასი იურიდიული ძალა.
ელექტრონულ-ციფრული ხელმოწერა – არის კომპიუტერული ტექნიკის მეშვეობით დამუშავებული სპეციალური სისტემის (ორგანიზატორის მიერ ტირაჟირებული), კრიპტოგრაფიული ალგორითმით ელექტრონული საბუთის დამუშავების შედეგად მიღებული სიმბოლოების მიმდევრობა, რომელიც ადასტურებს ელექტრონული საბუთის ნამდვილობას, მთლიანობას, ხელმომწერი პირის ვინაობას.
ელექტრონულ-ციფრული ხელმოწერის მფლობელი – პირი, რომელიც რეგისტრირებულია სისტემის ორგანიზატორის მიერ დადგენილი წესით.
ელექტრონული ხელმოწერის ღია გასაღები – ელექტრონულ-ციფრული ხელმოწერის შესამოწმებელ სიმბოლოთა ზოგადად მიღებული (ცნობილი) თანამიმდევრობა.
ელექტრონული ხელმოწერის დახურული გასაღები – ელექტრონულ- ციფრული ხელმოწერის გამოსამუშავებელ სიმბოლოთა თანამიმდევრობა, რომელიც იცის მხოლოდ უფლებამოსილმა პირმა.
არასანქცირებული წვდომა – ინფორმაციის ან სისტემის ფუნქციების წვდომა იმ პირთა მიერ, რომელთაც არა აქვთ ამის უფლება.
გასაღების კომპრომეტირება – დაკარგვა, მოპარვა, გასაღებთა არასანქცირებული კოპირება, აგრეთვე სხვა ვითარებები, როდესაც ნამდვილად უცნობია, რა დაემართა გასაღებს.
ელექტრონულ-ციფრული ხელმოწერის საშუალებები – პროგრამულ-ტექნიკური საშუალებები, რომელთა მეშვეობითაც ხდება ელექტრონულ საბუთზე ელექტრონულ-ციფრული ხელმოწერის შესრულება.
ელექტრონული საბუთის ნამდვილობა – ელექტრონული საბუთი ნამდვილია, თუ მან წარმატებით გაიარა სისტემაში არსებული შემოწმების პროცედურები და ნამდვილია ელექტრონულ-ციფრული ხელმოწერა.
ელექტრონული საბუთის ელექტრონულ-ციფრული ხელმოწერის ნამდვილობა – ელექტრონული საბუთის ელექტრონულ-ციფრული ხელმოწერა ნამდვილია, თუ სისტემა იძლევა შეტყობინებას, რომ ეს უკანასკნელი არის ნამდვილი და ელექტრონულ საბუთზე ხელმომწერმა მხარემ გამოიყენა ხელმოწერის არაკომპრომეტირებული გასაღები