,,საქართველოს სოფლის მეურნეობის სამინისტროს ტერიტორიული ორგანოების დაფინანსების შესახებ”

საქართველოს მთავრობის

დადგენილება №19

2005 წლის 28 იანვარი

ქ. თბილისი

საქართველოს სოფლის მეურნეობის სამინისტროს ტერიტორიული ორგანოების დაფინანსების შესახებ

,,საქართველოს მთავრობის სტრუქტურის, უფლებამოსილებისა და საქმიანობის წესის შესახებ” საქართველოს კანონის შესაბამისად და საქართველოს სოფლის მეურნეობის სამინისტროს ტერიტორიული ორგანოების – რაიონული სამმართველოების სამინისტროს ერთიან საფინანსო სისტემაში მოქცევის მიზნით:

1. საქართველოს სოფლის მეურნეობის სამინისტროს ტერიტორიული ორგანოების – რაიონული სამმართველოების დაფინანსება 2005 წლის 1 მარტიდან განხორციელდეს სახელმწიფო ბიუჯეტიდან საქართველოს სოფლის მეურნეობის სამინისტროსათვის გამოყოფილ ასიგნებათა ფარგლებში.

2. საქართველოს სოფლის მეურნეობის სამინისტრომ (მ. სვიმონიშვილი) უზრუნველყოს:

ა) ტერიტორიული ორგანოების დაფინანსება სამინისტროსათვის 2005 წლის სახელმწიფო ბიუჯეტით გამოყოფილ ასიგნებათა ფარგლებში;

ბ) სოფლის მეურნეობის სამინისტროს ტერიტორიული ორგანოების – რაიონული სამმართველოების რეორგანიზაციასთან დაკავშირებული პროცედურების განხორციელება და ტიპური დებულების დამტკიცება.

3. ძალადაკარგულად ჩაითვალოს ,,1993-1995 წლებში საქართველოს რესპუბლიკის აგროსამრეწველო კომპლექსის კრიზისიდან გამოყვანის პროგრამის შესახებ“ საქართველოს რესპუბლიკის მინისტრთა კაბინეტის 1993 წლის 5 მარტის №199 დადგენილება.

პრემიერ-მინისტრი                 ზ. ჟვანია